1, 2. Bua tshinyi tudi ne bua kumona disambila bu diakalenga dinene? Bua tshinyi tudi ne bua kumanya tshitu Bible ulongesha bua disambila?

BULOBA nkantu kakese tshianana patudi tubufuanyikija ne tshibuashibuashi tshionso tshijima. Eyowa, bantu bonso badi bu dimata dia mâyi dikese didi dimata mu mbeketshi ku mêsu kua Yehowa, “wakafuka diulu ne buloba.” (Musambu 115:15; Yeshaya 40:15) Pabi, Bible udi wamba ne: ‘Yehowa udi pabuipi ne bonso badi bamubikila, kudi bonso badi bamubikila mu bushuwa. Yeye udi umana dijinga dionso dia badi bamutshina, udi umvua muadi wabu kabidi.’ (Musambu 145:18, 19) Anji ela meji ku bualu ebu! Mufuki wa bukole buonso udi pabuipi netu bua kututeleja patudi ‘tumubikila mu bushuwa.’ Bulelela, kusambila Nzambi ndiakalenga dinene ditudi nadi.

² Kadi tuetu basue bua Yehowa ateleje masambila etu, tudi ne bua kumusambila mu mushindu udiye musue. Mmunyi mutuamusambila mu mushindu muimpe bituikala katuyi bamanye tshitu Bible ulongesha bua disambila? Mbimpe tumanye tshitu Bible wamba pa bualu ebu, bualu disambila ditu dituambuluisha bua kusemena pabuipi ne Yehowa.

3. Tela bualu bumue butudi ne bua kusambidila Yehowa.

³ Bualu bumue bua mushinga butudi ne bua kusambidila Yehowa budi ne: udi utulomba bua kusambila. Dîyi diende didi dituambila ne: ‘Lekelayi kuditatshisha ku bualu bumue; kadi mu malu onso ku ditendelela ne ku disengelela numanyishe Nzambi bua milombu yenu ne disakidila. Ne ditalala dia Nzambi didi ditamba dijingulula dionso dia bantu, nedilame mitshima yenu ne meji enu mu Kristo Yezu.’ (Filipoi 4:6, 7) Bushuwa, katuena mua kulengulula bualu buimpe nunku budi Mfumu Mutambe Bunene wa diulu ne buloba mutulongoluele!

4. Mmunyi mudi kusambila Yehowa pa tshibidilu kukolesha malanda etu nende?

⁴ Bualu bukuabu butudi ne bua kusambidila Yehowa budi ne: patudi tumusambila pa tshibidilu, tudi tukolesha malanda etu nende. Balunda balelela kabatu bayukila anu padibu dijinga ne tshintu kampanda to. Kadi batu batabalelangana, ne bulunda buabu budi bukola padibu balejangana lungenyi, malu adibu nawu ku muoyo ne mudibu badiumvua. Mu mishindu mikuabu, nsombelu eu udi muomumue bua  malanda etu ne Yehowa Nzambi. Ukadi mulonge bia bungi mu mukanda eu pa tshitu Bible ulongesha bua Yehowa, ngikadilu yende ne malu adiye mulongolole. Udi mpindieu umumona anu bu muntu wetu wa bushuwa eu. Disambila didi dikupesha mushindu wa kuleja Tatuebe wa mu diulu ngenyi yebe ne muudi udiumvua munda muebe. Paudi usambila, udi usemena pabuipi ne Yehowa.​—Yakobo 4:8.

5. Ntshinyi tshidi tshileja ne: Yehowa katu uteleja masambila onso?

⁵ Yehowa utu uteleja masambila onso anyi? Tangila tshiakambilaye bena Isalele bavua bamutombokele mu matuku a muprofete Yeshaya: ‘Panuantendelela ne mitendelelu ya bungi mene, tshiena nnumvuila; bianza bienu bidi biuule tente ne mashi.’ (Yeshaya 1:15) Nunku, kudi malu adi mua kuenza bua Nzambi abenge kuteleja masambila etu. Ke bua tshinyi, tudi ne bua kukumbaja amue malu bua Nzambi kututelejaye.

6. Bua Nzambi kuteleja masambila etu, mbualu kayi bua kumpala butudi ne bua kukumbaja, ne mmushindu kayi?

⁶ Bualu bua kumpala: tudi ne bua kuikala ne ditabuja. (Mâko 11:24) Mupostolo Paulo wakafunda ne: ‘Bikalaku kakuyi ditabuja, muntu kêna mua kusankisha Nzambi; bualu bua muntu udi ulua kudi Nzambi budiye nabu mbua kuitabuja ne: Yeye udiku, ne udi mufutshi wa badi bamukeba.’ (Ebelu 11:6) Kuikala ne ditabuja dilelela kakuena kumvuija kumanya patupu ne: Nzambi udiku ne kabidi utu uteleja ne wandamuna masambila etu to. Ditabuja ditu dimueneka mu malu atudi tuenza. Nunku, nsombelu wetu udi ne bua kuleja patoke ne: tudi ne ditabuja.​—Yakobo 2:26.

7. (a) Bua tshinyi tudi ne bua kuikala ne kanemu patudi tusambila Yehowa? (b) Mmunyi mutudi mua kuleja ne: tudi tusambila Yehowa ne budipuekeshi ne muoyo mujima?

⁷ Yehowa udi kabidi ulomba ne: bantu bikale bamusambila ne budipuekeshi ne muoyo mujima. Kuenaku umona ne: mbimpe kuikala ne budipuekeshi patudi tuakula ne Yehowa  anyi? Patu bantu kumpala kua mfumu kampanda, batu bakula ne kanemu, bamanye ne: udi ku mutu kuabu. Nunku, mmunyi mutuapanga kuikala ne kanemu kakole patudi tusambila Yehowa? (Musambu 138:6) Yeye se ke “Nzambi wa Bukole Buonso.” (Genese 17:1) Mushindu utudi tuakula patudi tusambila Nzambi udi ne bua kuleja ne: tudi tuitaba ne budipuekeshi buonso mudiye mututambe kule ne kule. Budipuekeshi nebutuambuluishe kabidi bua kumuambila bionso bidi mu mutshima wetu, katuyi tuambulula anu bintu bimue bimue to.​—Matayo 6:7, 8.

8. Mmunyi mutudi mua kuenza malu adi umvuangana ne bitudi tulomba?

⁸ Bua Nzambi kutelejaye masambila etu, tudi kabidi ne bua kuenza malu adi umvuangana ne bitudi tumulomba. Yehowa mmusue ne: tuenze muetu muonso bua kukumbaja malu atudi tumulomba. Tshilejilu, patudi tusambila bua ‘atupe tshiakudia tshietu tshia matuku onso,’ tudi ne bua kuenza ne muoyo wetu mujima mudimu wonso udi umueneka, udi muena Kristo mua kuenza. (Matayo 6:11; 2 Tesalonike 3:10) Tuetu tumulomba bua atuambuluishe bua kulekela tshibidilu tshibi kampanda, tudi ne bua kunyema nsombelu yonso idi mua kutufikisha mu diteta. (Kolosai 3:5) Kadi pa kumusha malu manene aa, kudi nkonko kampanda itudi ne bua kuandamuna.

9. Tudi ne bua kusambila nganyi, ne ku butuangaji bua nganyi?

⁹ Nnganyi utudi ne bua kusambila? Yezu wakalongesha bayidi bende bua kusambila “Tatu wetu udi mu diulu.” (Matayo 6:9) Nunku, tudi ne bua kusambila anu Yehowa Nzambi nkayende. Tshidibi, Yehowa udi utulomba bua tuitabe muaba udi nawu Muanende umuepele mulela Yezu Kristo. Anu bu mutuvua balonge mu Nshapita 5, Yehowa wakatuma Yezu pa buloba bua kulambula muoyo wende bua kusungila bantu ku bubi ne ku lufu. (Yone 3:16; Lomo 5:12)  Yeye ke udibu bateke Muakuidi Munene ne Mulumbuluishi. (Yone 5:22; Ebelu 6:20) Ke bualu kayi Bible udi utulomba bua kusambila Yehowa ku butuangaji bua Yezu. Yezu muine wakamba ne: ‘Meme ndi njila ne bulelela ne muoyo; kakuena muntu udi ulua kudi Tatu, kayi muanji kulua kundi diambedi.’ (Yone 14:6) Nunku, bua Nzambi kutelejaye masambila etu, tudi ne bua kusambila anu Yehowa mu dîna dia Yezu.

10. Bua tshinyi katuena mua kuikala mushindu kampanda patudi tusambila?

¹⁰ Mmunyi mutudi ne bua kuikala patudi tusambila? Yehowa kêna ulomba bua bianza anyi mubidi wetu bikale mu mushindu kampanda to. Bible utu ulongesha ne: tudi mua kusambila mu mishindu ya bungi. Nunku, tudi mua kuikala basombe, binyike mitu, batue binu anyi bimane. (1 Kulondolola 17:16; Nehemiya 8:6; Danyele 6:10; Mâko 11:25) Tshidi ne mushinga mmutshima wetu, ki mmushindu kampanda udi bantu mua kumona to. Patudi tuenza midimu yetu anyi patudi mu lutatu, tudi mua kusambila mundamunda muaba wonso utudi. Yehowa utu uteleja masambila a nunku nansha mudi bantu badi netu kabayi bamanye ne: tudi tusambila.​—Nehemiya 2:1-6.

11. Mmalu kayi atudi mua kulomba mu masambila etu?

¹¹ Mmalu kayi atudi mua kulomba mu masambila etu? Bible udi wamba ne: ‘Bituamulomba tshintu tshionso bu mu disua diende, Yehowa udi utumvuila.’ (1 Yone 5:14) Nunku, tudi mua kusambila bua tshintu tshionso tshidi tshiumvuangana ne disua dia Nzambi. Nzambi utu musue bua tumuambile malu adi matutonde anyi? Eyowa! Kusambila Yehowa kudi anu bu kuyukila ne mulunda wa pa muoyo. Tudi mua kuakula patoke, ‘tupumuna milombu ya mu mutshima wetu’ kudi Nzambi. (Musambu 62:8) Mbimpe kulomba nyuma muimpe, bualu neatuambuluishe bua kuenza malu malenga. (Luka 11:13) Tudi kabidi mua kulomba meji bua kuangata mapangadika mimpe ne bukole bua kutantamena ntatu. (Yakobo 1:5) Patudi tuenza bilema,  tudi ne bua kulomba luse ku diambuluisha dia mulambu wa Kristo. (Efeso 1:3, 7) Kadi katuena mua kusambila anu bua malu etu nkayetu to. Tudi mua kusambila kabidi bua bantu bakuabu, bu mudi bena mu dîku dietu ne bena Kristo netu.​—Bienzedi 12:5; Kolosai 4:12.

12. Mmunyi mutudi mua kuteka malu adi atangila Nzambi pa muaba wa kumpala mu masambila etu?

¹² Tudi ne bua kuteka malu adi atangila Yehowa Nzambi pa muaba wa kumpala mu masambila etu. Tudi ne bua kumusakidila ne kumutumbisha bua malu malenga onso adiye mutuenzele. (1 Kulondolola 29:10-13) Yezu wakashiya disambila dia tshilejilu didi mu Matayo 6:9-13. Wakalongesha bua kulomba bua banemeke dîna dia Nzambi, bua Bukalenge bua Nzambi bulue ne bua disua dia Nzambi dienzeke pa buloba anu bu mutudi dienzeka mu diulu. Anu pakajikija Yezu kutela malu a mushinga aa ke pakakulaye bua malu a muntu nkayende. Patudi tuteka Nzambi pa muaba wa kumpala mu masambila etu, tudi tuleja ne: katuena tutangila anu malu etu nkayetu to.

13. Bible udi wamba tshinyi bua bule bua disambila?

¹³ Tudi mua kusambila mutantshi bule kayi? Bible ki mmuele mukenji bua bule bua masambila etu nkayetu anyi atudi tuenza kumpala kua bantu bakuabu to. Disambila didi mua kuikala dîpi kumpala kua kudia, kadi didi mua kuikala dile patudi tusambila pa nkayetu ne tupumuina Yehowa malu adi mu muoyo wetu. (1 Samuele 1:12, 15) Yezu kakanyisha bantu bavua badileja bakane, benza masambila male ne a kuditumbisha nawu kumpala kua bakuabu to. (Luka 20:46, 47) Yehowa katu uteleja masambila a nanku to. Tshidi ne mushinga nkuenza masambila adi afumina mu mutshima wetu. Nunku, bule bua disambila dimpe budi bulonda majinga ne nsombelu udiku.

14. ‘Kutungunuka ne kusambila’ kudi kumvuija tshinyi? Bua tshinyi bualu ebu budi butusankisha?

¹⁴ Tudi ne bua kusambila misangu inga? Bible udi utuambila bua ‘kutungunuka ne kusambila,’ bua ‘kunanukila  mu kusambila’ ne bua ‘kusambila dîba dionso.’ (Matayo 26:41, NW; Lomo 12:12, MML; 1 Tesalonike 5:17, MMM) Mêyi aa kaena umvuija ne: tudi ne bua kusambila Yehowa dinda too ne dilolo to. Tshidibi, Bible udi utulomba bua kuikala ne tshibidilu tshia kusambila bua kuela Yehowa tuasakidila bua bulenga buende ne kumulomba meji, busambi ne bukole. Kabienaku bitusankisha bua mudi Yehowa kayi mutuelele mikalu bua bule ne misangu itudi mua kumusambila anyi? Bituikala tuanyisha diakalenga dia kusambila, netuikale tusambila Tatu wetu wa mu diulu misangu ya bungi.

15. Bua tshinyi tudi ne bua kuamba “Amen” ku ndekelu kua disambila dietu nkayetu anyi dienza kudi mukuabu muntu?

¹⁵ Bua tshinyi tudi ne bua kuamba “Amen” ku ndekelu kua disambila? Muaku “amen” udi umvuija “eyowa” anyi “bikale nanku.” Bilejilu bia mu Bible bidi bituleja ne: mbimpe kuamba “Amen” ku ndekelu kua masambila etu nkayetu anyi menza kudi bakuabu bantu. (1 Kulondolola 16:36; Musambu 41:13) Patudi tuamba “Amen” ku ndekelu kua disambila dietu nkayetu, tudi tuleja ne: tuvua basambile ne muoyo umue. Patudi tuamba “Amen” (mundamunda anyi ne dîyi dikole) ku ndekelu kua disambila dienza kudi muntu mukuabu, tudi tuleja ne: tudi bitabe malu adiye muambe.​—1 Kolinto 14:16.

16. Ndishindika kayi ditudi nadi bua masambila?

¹⁶ Yehowa utu wandamuna bushuwa masambila etu anyi? Eyowa! Tudi ne dishindika dikole dia ne: Yeye ‘utu umvua milombu,’ utu wandamuna masambila a bantu ba bungi batu basambila ne muoyo umue. (Musambu 65:2) Yehowa utu wandamuna masambila etu mishindu ya bungi.

17. Bua tshinyi tudi tuamba ne: Nzambi utu wenza mudimu ne banjelu ne basadidi bende ba pa buloba bua kuandamuna masambila etu?

¹⁷ Yehowa utu ukuata mudimu ne banjelu ne basadidi  bende ba pa buloba bua kuandamuna masambila. (Ebelu 1:13, 14) Bikadi bienzeke misangu ya bungi ne: muntu uvua musambile Nzambi bua amanye Bible, mutantshi mukese panyima, Bantemu ba Yehowa balue kumutangila. Malu a nunku adi aleja ne: banjelu batu balombola mudimu wa kuyisha Bukalenge. (Buakabuluibua 14:6) Bua kuandamuna disambila dienza mu lutatu lukole, Yehowa udi mua kusaka muena Kristo kampanda bua kutuambuluisha.​—Nsumuinu 12:25; Yakobo 2:16.

18. Mmunyi mutu Yehowa wandamuna basadidi bende ku diambuluisha dia Bible ne dia nyuma wende?

 ¹⁸ Yehowa Nzambi utu kabidi wandamuna masambila a basadidi bende ku diambuluisha dia nyuma muimpe ne dia Bible. Udi mua kuandamuna masambila atudi tuenza bua kupita bimpe ne ntatu padiye utulombola ne utupesha bukole ku diambuluisha dia nyuma wende. (2 Kolinto 4:7) Misangu ya bungi patutu tulomba Yehowa diambuluisha bua kuangata mapangadika mimpe, utu utuandamuna ku diambuluisha dia Bible. Tudi mua kupeta mvese mimpe patudi tudilongela Bible ne patudi tubala mikanda ya bena Kristo bu mudi eu. Tudi mua kupeta amue malu adi mua kutuambuluisha mu bisangilu bia bena Kristo anyi padi mukulu kampanda utubela.​—Galatia 6:1.

19. Tudi ne bua kumanya tshinyi tuetu tumona misangu mikuabu ne: Nzambi kêna wandamuna masambila etu?

¹⁹ Nansha tuetu bamone bu ne: Yehowa udi unenga bua kuandamuna, kabiena biumvuija ne: kêna ne mushindu wa kutuandamuna to. Yehowa utu wandamuna masambila bilondeshile disua diende ne mu tshikondo tshidiye mumone tshimpe. Mmumanye bitudi nabi dijinga ne mushindu wa kutupeshabi kutupita ne tuetu bine. Misangu mivule utu wanji kulekela bua ‘tutungunuke ne kulomba ne kukeba ne kukokola.’ (Luka 11:5-10, NW) Patudi tunanukila nunku, tudi tuleja Nzambi ne: dijinga dietu ndikole ne kabidi  ditabuja dietu ndilelela. Yehowa udi kabidi mua kuandamuna masambila etu mu mushindu utudi katuyi bamanye to. Tshilejilu, udi mua kuandamuna disambila dietu bua lutatu kampanda, kayi umusha lutatu alu to, kadi utupesha bukole bua kulutantamena.​—Filipoi 4:13.

20. Bua tshinyi tudi ne bua kuikala tusambila bikole?

²⁰ Tudi ne dianyisha dia bungi bua mushindu udi Mufuki wa diulu ne buloba muikale pabuipi ne bonso badi bamusambila mu mushindu muimpe. (Musambu 145:18) Tuikalayi tusambila Yehowa bikole bualu ndiakalenga dinene. Tuetu tusambila bikole, netuikale ne disanka dia kudia malanda mimpe ne Yehowa, Muteleji wa masambila.