Genese 16:1-16
-
Hagâ ne Yishemaele (1-16)
16 Mpindieu Salai mukaji wa Abalama kavua mumulelele bana to,+ kadi uvua ne muena mudimu wende muena Ejipitu, dîna diende divua Hagâ.+
2 Nunku Salai wakambila Abalama ne: “Nteleja koku. Yehowa mmumpangishe bua kulela bana. Lala koku ne muena mudimu wanyi. Pamuapa ndi mua kupetela bana kudiye.”+ Nunku Abalama wakateleja tshivua Salai muambe.
3 Pakavua Abalama musombe bidimu dikumi mu buloba bua Kanâna, Salai mukaji wa Abalama wakangata Hagâ, muena mudimu wende muena Ejipitu, kumufilaye kudi bayende Abalama bua ikale mukajende.
4 Nanku wakalala ne Hagâ, yeye kuimita. Pakamonaye ne: uvua ne difu, wakatuadija kupepeja mukalenge wende mukaji.
5 Ke Salai kuambila Abalama ne: “Bubi budibu bangenzele ebu wewe ke udi mubukebeshe. Meme ke uvua muteke muena mudimu wanyi mu tshiadi tshiebe,* kadi padiye mumone ne: udi ne difu, mmutuadije kumpepeja. Yehowa akose tshilumbu tshidi pankatshi panyi nebe.”
6 Ke Abalama kuambila Salai ne: “Tangila! Muena mudimu webe udi ku bukokeshi buebe. Muenzela tshionso tshiudi wela meji ne: ntshimpe.” Nunku Salai wakamufuisha bundu, ke yeye kumunyema.
7 Pashishe muanjelu wa Yehowa wakamusangana ku mushimi wa mâyi mu tshipela, mushimi uvua mu njila wa ku Shû.+
8 Wakamuebeja ne: “Hagâ, muena mudimu wa Salai, udi ufumina penyi ne udi uya penyi?” Yeye kuandamuna ne: “Ndi ngenda nyema mukalenge wanyi mukaji Salai.”
9 Ke muanjelu wa Yehowa kumuambila ne: “Pingana kudi mukalenge webe mukaji, udipuekeshe mu tshianza tshiende.”
10 Pashishe muanjelu wa Yehowa wakamba ne: “Meme nemvudije bana* bebe bikole menemene bua balue bungi kabuyi kubala.”+
11 Muanjelu wa Yehowa wakamba kabidi ne: “Ke wewe eu ne difu; neulele muana wa balume, ne neumuinyike ne: Yishemaele,* bualu Yehowa mmumvue dikenga diebe.
12 Neikale bu mpunda wa tshisuku.* Tshianza tshiende netshiluishe muntu yonso, ne tshianza tshia muntu yonso netshimuluishe, ne neasombe mutangilangane ne bana babu bonso.”*
13 Pashishe wakabila dîna dia Yehowa uvua uyukila nende, wamba ne: “Wewe udi Nzambi udi umona,”+ bualu yeye wakamba ne: “Muaba eu ndiku bushuwa mumone muntu udi ummona anyi?”
14 Ke bualu kayi bakabikila tshina tshia mâyi atshi ne: Bê-laha-loi.* (Tshidi pankatshi pa Kadeshe ne Belede.)
15 Nunku Hagâ wakalelela Abalama muana wa balume, Abalama kuinyikaye muanende uvua Hagâ mulele ne: Yishemaele.+
16 Abalama uvua ne bidimu 86 pavua Hagâ mumulelele Yishemaele.
Mamanyisha
^ Anyi “mu maboko ebe.”
^ Ku mua.: “dimiinu.”
^ Diumvuija: “Nzambi udi umvua.”
^ Anyi “onagre,” mushindu mukuabu wa mpunda wa tshisuku, nansha mudi bantu bakuabu bela meji ne: nngomba ngole. Badi pamuapa bakula bua lungenyi lua kudienzela malu.
^ Anyi pamuapa: “ne neasombe mu lukuna ne bana babu bonso.”
^ Diumvuija: “Tshina tshia Yeye udi ne muoyo udi ummona.”
