Milombelo

7 Le Leza Ukevwana ne Kulondolola?

KINO kipangujo i kikatampe kadi kisangaja. Bible ulombola’mba Yehova wivwananga milombelo dyalelo. Divule batwe bene bo bakokeja kulengeja etwivwane nansha aleke kwitwivwana.

Yesu wātandile bendeji ba bipwilo ba mu andi mafuku bādi balombela na buzazangi; bādi basaka’tu kwimwekeja bu boloke. Wānena’mba bano bantu “abapu kutambula kala ne mpalo yabo,” ko kunena’mba bādi ba kutambula enka byobādi bakimba kutabuka, kumonwa na bantu, ino ke kyobādipo basakilwa, kwivwanwa na Leza. (Mateo 6:5) Ne dyalelo nadyo, bavule balombelanga mungya masakila a abo bene ke a Leza po. Kufutulula misoñanya ya mu Bible yotwesambilanga’po kukakankaja Leza aleke kwitwivwana.

Ino, le abe nobe? Le Leza ukevwana ne kulondolola milombelo yobe? Kilondololwa ku kino kipangujo ke mwandapo utala lukoba, muzo, nansha misokwe yobe. Bible witukulupija’mba: “Leza kalemekangapo bantu’mba: Yeu ye yeu, mhm. Nanshi mu mizo yonso enka umutyina, ulonga bilumbuluke nabya ye waitabijibwa kudi aye.” (Bilongwa 10:34, 35) Le bino binenwa bikutala? Shi utyina Leza, nankyo ukamumona bu udi peulu bininge ne kutyina kumufityija mutyima. Shi ulonga bilumbuluke, nankyo ukakimba kulonga byobya bitela Leza bu bilumbuluke pa kyaba kya kulondalonda kiswa-mutyima kyobe nansha kya bantu bakwabo. Le bine usakanga Leza evwane milombelo yobe? Bible ukukwasha ufikile pa kyakyo kitungo. *

I bine, bavule basaka Leza alondolole milombelo yabo mu kingelengele. Inoko, nansha ke kitatyi kyāsonekelwe Bible, Leza wādi ulonga bingelengele na dimodimo. Kyaba kimo, pādi papita myaka tutwa penepa kalonga kingelengele kikwabo. Kadi Bible ulombola’mba kitatyi kya bingelengele kyāfudile pa kupwa kwa batumibwa. (1 Kodinda 13:8-10) Le ko kunena’mba Leza kakilondololangapo milombelo dyalelo? Ke nankyopo! Tala milombelo imo ilondololanga Leza.

Leza upānanga ñeni. Yehova yo nsulo ya ñeni yonso ya bine. Kadipo nayo mwino, upānga’yo ku buntu boba basaka kuludikwa nandi ne bakimba kulonda’yo mu būmi.—Yakoba 1:5.

Leza upananga mushipiditu sandu wandi ne byabuyabuya byao byonso. Mushipiditu sandu i bukomo bwa Leza bwingila. I kutupu bukomo bupityile buno. Ubwanya kwitukwasha tunekenye matompo. Ubwanya kwitupa ndoe kitatyi kyotudi mu bikoleja. Ubwanya kwitukwasha tutamije ngikadilo milumbuluke ne ikunka ku mutyima. (Ngalatea 5:22, 23) Yesu wākulupije balondi bandi amba Leza upānanga kino kyabuntu na mutyima tō.—Luka 11:13.

Leza upananga buyuki ku boba bamukimba ne mikeketo. (Bilongwa 17:26, 27) Kujokoloka ntanda yonso, kudi bantu bakimba bubinebine pampikwa budimbidimbi. Basaka kuyuka bitala padi Leza—dijina dyandi i ani, le udi na mpango’ka itala ntanda ne bantu, ne i muswelo’ka obakokeja kufwena kwadi. (Yakoba 4:8) Divule Batumoni ba Yehova betananga na bantu badi namino kadi baloelelwe kwibalombola malondololo aleta Bible ku bino bipangujo.

Le nobe ye kyowatambwidile dino dipepala? Lelo ukimbanga Leza? Padi uno o muswelo waalondolola ku milombelo yobe.

[Kunshi kwa dyani]