Bipangujo Bya Batangi . . .

Lelo Leza Udi na Ngalwilo?

▪ Bible ulondolola amba Leza kadipo na ngalwilo. Leza udi’ko nyeke. Nansha byotukomenwe kwivwanija kikadile’ko Leza nyeke, ketubwanyapo kupela uno mulangwe mwandapo’tu ketukokejapo kwiwivwanija ne pa mfulo.

Lelo i kyendele’mo kukimba kuyuka mashinda onso a Leza? Mutumibwa polo wānene amba: “E! E! E! E! munshi bulamo bwa bupeta bwa ñeni ne kuyūkidija kwa Leza! Ne kutyiba-mambo kwandi nako e! e! e! kekuyūkibwapo, ne mu mashinda andi nao monka akankaja kulondamo!” (Loma 11:33) Ñeni yetu keikokejapo kuyuka ne pa mfulo bulampe bwa tunangu ne kuyukidija kwa Leza enka na mukomeninwe mwana kwivwanija mashinda onso a bambutwile bandi. Bino binenwa bya Polo bya ku bukomo bwa mushipiditu nansha byobisambila dibajinji pa ñeni ya pa bula ya Leza ne lusa lwandi, inoko bilombola amba kudi muswelo wikele Yehova Leza ne mingilo yandi na mushike keubwanikapo kusokolwa na ñeni yetu. Mobimwekela mu bino binenwa mudi mulangwe wa amba Leza kadipo na ngalwilo. Ino tubwanya kwikala na lukulupilo lwa binebine mu byobya bifundija Bible padi Leza. Yesu wānene pangala pa bisonekwa bikola amba: “Mwanda obe kyo kyabinebine.”—Yoano 17:17.

Mosesa wālombele kudi Yehova amba: “Ku kala-ā ka kunyuma kutūla ne kala-ā ka ku meso abe wi Leza.” (Mitōto 90:2) Pano Mosesa ulombola kwikala’ko kwa Leza pamo bwa kutandabuke mu byaba bibidi. Kimo i kya kumeso. Yehova i “wa būmi bwa nyeke na nyeke.” (Kusokwelwa 4:10) Nanshi kwikala’ko kwa Leza i kutandabuke kufika ne ku nyekeke. Kikwabo i kya kunyuma. Mu muneneno mukwabo, Leza kāpangilwepo nansha kwikadijibwa’ko. Ino kwikala’ko kwa Leza i kutandabuke mu kitatyi kya kunyuma kya kubulwa mfulo.

Bavule motudi i bakomenwe kwivwanija milangwe mifyame. Inoko, kyaba kimo twikalanga na makambakano mu milangwe, pamo bwa bibalwa bya kubweja ne bya kutalula. Kubala bibalwa kekudipo na mfulo, shi ubala wenda ukanda nansha wenda utuka. Le tubulwepo kwingidija kino kimfwa mu myaka ya būmi bwa mupangi?

Nanshi i kyendele’mo bikele Leza kasuku kandi na kitenta kya bu “Mulopwe wa nyeke” (1 Temote 1:17) Langa’po: Yesu Kidishitu, tununu ne tununu twa bamwikeulu momwa mūlu, ne bantu ba pano panshi, bonsololo badi na ngalwilo mwanda i bapangwe. (Kolose 1:15, 16) Ino shi ke Leza kapangilwepo. Kunena na kusumininwa amba Leza i mupangwe i kukolomona lupata lwa bitupu lwa kukimba kuyuka mwine wāpangile Umpangi. Bine, Yehova kasuku kandi udi’ko tamba “ku kala-ā ka kunyuma kutūla ne kala-ā ka ku meso.” (Mitōto 90:2, BB) Mu muneneno mukwabo, Yehova udi’ko “nyeke na nyeke.”—Yude 25.

Inoko, vuluka amba, mulangwe wa amba Leza udi’ko nyeke ne nyeke ke mwandapo wa bubela. Shi tutale biyampe milombelo ya Mosesa, ilombola patōka amba kwikala kwikele’ko Leza nyeke kwitupa mulao wa nsangaji wa būmi bwa nyeke. Būmi bwandi i bwishile kulampe na būmi bwetu bwīpi, mwanda Leza ulombwelwe amba aye ye “ke kīkalo kyetu, mu nkongo yonsololo.” Byadi Tata wa buswe, Yehova wādi’ko, ukidi’ko, ne ukekala’ko nyeke pa mwanda wa bantu bandi. Mwene buno bubinebine bwa kutendelwa bukokeja kukusenga!—Mitōto 90:1.