Kino Kyo Kitatyi kya Kutonga

“Leza wapanga muntu monka mu bu-kyelekejo kya Leza mwine, i monka mu bu-kyelekejo kya Leza mwine mwāmupangile, webapanga ba-mulume ne mukaji.”—Ngalwilo 1:27.

BINO binenwa byotwibidile bidi ku ngalwilo kwa Bible bilombola ‘kintu kya buyabuya kyālongele Leza mu kyaba kyakyo’—kupanga Adama ne Eva, ba mulume ne mukaji babwaninine. (Musapudi 3:11) Yehova, Mupangi wabo wēbanene amba: “Butulai; mwivudijei, muyujei panopanshi ne kwipanekenya, kabidi bikalai bulopwe bwa pa mwita wa kalunga-kamema, ne bwa pa byoni bya mūlu, ne bwa pa bintu byonso byumi bilandala panopanshi.”—Ngalwilo 1:28.

Leza wāsapwidile bano ba mulume ne mukaji mpango yandi mu byaēbanenene. Bādi bafwaninwe kwivudija ne kulama ntanda ne kwiyalamuna ke paladisa, kīkalo kyabo ne kya babo bana. Kekwādipo kitatyi kibatungilwe kya kwikala na būmi nansha kya kufwa. Ino, Leza wēbapele kyepelo kilumbuluke. Kya kwikala’ko nyeke ne nyeke mu ndoe ne mu nsangaji shi byadi’mba bātongele butongi buyampe ne kwendelela kupwana na Leza.

 Ino yō, bātongele bifwe, bifikijanga bantu bonso kununupa ne kufwa. O mwanda mwine mukulutuba Yoba wānene amba: “Muntu mubutulwe ne mwana-mukaji, i wa mafuku matyetye, muyule tusuwa.” (Yoba 14:1) Le byāonekele namani?

Bible ushintulula’mba: “Monka mwatwelele bubi panopantanda ku muntu umo, ne lufu nalo ponka pa bubi, mo monka mwasambakanine lufu ku bantu bonso, mwanda abo bonso bapīle mambo.” (Loma 5:12) Na bubine uno “muntu umo” i Adama, wājilwile ku kusaka kijila kya Leza kipēla kadi kipotoloke. (Ngalwilo 2:17) Adama pa kutonga namino, wājimija kyepelo kyandi kya kwikala na būmi bwa nyeke mu paladisa pano pa ntanda. Wābudija ne bana bandi bupyani bulumbuluke, ino wēbapyanika mafingo a bubi ne lufu. Byāmwekele amba ke kutupu kwa kunyemena—ino le i amo?

Kitatyi kya Kwalamuka

Myaka pa kupita’po, mulembi wa Mitōto wāpelwe bukomo bwa kulemba amba: “Boloke bakapyananga ntanda, ne kwikala monka nyeke.” (Mitoto 37:29) Pa kwitukulupija amba mulao wa mu Edena ukafikidila, Kinenwa kya Leza kishintulula biyampe byobya bisa kulongeka amba: “Leza ukapampula impolo yonso mu meso abo; ne lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika. Bintu bibajinji bibatukidila.” Ebiya Leza unena’mba: “Monaipo bidi, byo mpangulula byonso ke bipya.”—Kusokwelwa 21:4, 5.

Bintu byonsololo byobidi ne mwaka wabyo, kipangujo pano i kino, Le i kitatyi’ka kikalamuka byonso ke bipya, kitatyi kikafikidila milao ya Leza ya kutendelwa? Batumoni ba Yehova balupwile dino dipepala, baloñanga bukomo bwa kukwasha bantu bayuke amba tudi mu mafuku atelwa na Bible bu “mafuku a kumfulo’a” kadi amba kitatyi kya Leza kya kulonga bintu “byonso ke bipya” kibafwena. (2 Temote 3:1) Tubakwisāshila wifunde Bible ne kuyuka byobya bikutengele kumeso. Kadi tukulomba witabije luno lwito lwitwita’mba: “Kimbai Yehova pākitanwa, mwitei pakidi pabwipi.” (Isaya 55:6) Pa kyaba kya kuludikwa na kitungo, būmi bobe bwa dyalelo ne bwa nyeke bukutala!

[Bushintuludi pa paje 8]

“Monaipo bidi, byo mpangulula byonso ke bipya”