Le I Bika Bitutengele Kumeso?
Le I Bika Bitutengele Kumeso?
MWANDA WAKA MALONDOLOLO I A KAMWENO? Mumwena muntu bya dya kesha mo mwasa kulongela bya dyalelo. Kimfwa, boba kebadipo na kyobakulupile mu būmi bwa kumeso bekalanga na uno mwikadila, amba: “Tudye, tutome, ke-twi-bantu dyakesha tufwa.” (1 Kodinda 15:32) Uno mwikadila divule utwalanga muntu ku mudyopolo, bunkolwankolwa, ne njia—ke ku ndoepo ya mutyima.
Bine, shi twisumbidile enka bilonga bantu, nabya mumweno wetu wa būmi bwa kumeso i mufwe. Luvula lotwesa, mema otutoma, ne ntanda yotushikete i byoneke onekē. Kyaka kya mabombe a nyukilia ne kutambwa na batumbula nakyo kyendanga kilundila’ko. Misongo ne bulanda i bibikale midiyo ne midiyo ntanda yonso. Na bubine, bimweka amba kekudipo ne kya kukulupila kine.
Bantu kebakokejapo kulombola mobikekadila kesha, ino Yehova Leza aye “ufumika bya kungalwilo ne bya kumfulo, ne ku byaba bya kalakala bintu kebyalongelwepo.” (Isaya 46:10) Lelo Yehova unena bika pangala pa mafuku a kumeso?
Byobya Binena Bible
Yehova kakalekapo ntanda nansha būmi budi’po bwendelele konakanibwa mu muswelo ukoma ne kulongolola. Eyo, Bible ulaya amba Leza usa ‘kwibonakanya boba bonakanya pano panshi.’ (Kusokwelwa 11:18) Kadi kupityila ku Bulopwe bwandi, nansha umbikalo wandi wa mūlu, usa kufundula lonso pano pa ntanda bibi ne kwaluja ngikadilo mungya mpango yandi imbajinjibajinji. (Ngalwilo 1:26-31; 2:8, 9; Mateo 6:9, 10) Mavese a Bible alonda’ko alombola mukekadila būmi mu mafuku āya kumeso na kulombola bisa kufikila muntu ne muntu pano panshi.
Mitōto 46:8, 9. “Iyai, mubandile mīngilo ya Yehova, yō! ke musala o wasala panopanshi! Watukija mavita ne ku mfulo ya ntanda; utyumunanga buta, ne mukobe nao watempula’o bipindi bibidi; wasōka makalo pa mudilo.”
Isaya 35:5, 6. “Penepa kadi meso a bampofu akapūtulwa, ne matwi a babitwi akajikulwa. Ponkapo usunkuta ukatumbuka’nka bwa kasha kalume, ne ludimi lwa kamama lukembanga; mwanda muntanda mutuputupu mema akalondomoka, ne tuminonga tudi mu ntanda yampikwa bumeni.”
Isaya 65:21, 22. “Bakōbaka mobo ne kwikala monka; kadi bakadima madimi a mañanza ne kudya bipa byayo. Kebakōbakapo amba ungi ekalemo, ehe; kadi kebakadimapo amba ungi adyeko, ehe.”
Danyele 2:44. “Leza wa mūlu ukemika bulopwe kebukōnakanibwapo nansha patyetye, nansha bulopwe bwine bwabo kupityila ku bantu bangi, ehe; ino bukatyumuna bipindibipindi ne kukubija malopwe ano’a onsololo, kadi bukemananga nyeke.”
Yoano 5:28, 29. “Mwaka wiyako’wa bonso badi mu bibundu bakēvwana diwi [dya Yesu]. Ne kutamba bakatambemo.”
Kusokwelwa 21:3, 4. “Ne Leza mwine ukēkala nabo, ke Leza wabo kadi. Kadi Leza ukapampula impolo yonso mu meso abo; ne lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika. Bintu bibajinji bibatukidila.”
Muswelo Ulondolola Bible Uletanga Ndoe ya Bine ya Mutyima
Ngikadilo itelelwe kūlu’ku ibwanya kumweka bu mikomo kwikala’ko. Ino i milao ya Leza, ke ya bantupo, mhm. Kadi Yehova Leza “aye kayūkile kubepa.”—Tetusa 1:2.
Shi uyuke kukulupila mu milao ya Leza ne kulama bijila byandi, nabya ukekala na ndoe ya mutyima nansha shi udi mu ngikadilo mikomo namani. Mavita, bulanda, misongo, nansha bikoleja bya bununu ne lufu lwine kumo—bino byonso kebibwanyapo kukujimijija ndoe yobe. Mwanda waka? Mwanda ukulupile amba Bulopwe bwa Leza bukapwija makambakano onso ano’a.
Le ukekala namani na luno lukulupilo lwa kumeso? I ponka ‘pa kwisambula mutyima obe’ ne kutompa “kiswa-mutyima wa Leza, ne mwikadile bulumbuluke, kuloelelwa, ne bu-bwaninine monka.” (Loma 12:2) Padi usaka kuyukila’ko bubinga bukwabo bulombola amba milao ya mu Bible yo ikulupilwa. Kuno kusaka kuyuka kulomba kwielela’ko. Bintu bityetye byolonga umbūmi bikakuletela ndoe mikatampe ya mutyima.
[Kifwatulo pa paje 7]
I bika binena Kinenwa kya Leza pa būmi bwa kumeso?
[Kifwatulo pa paje 8]