Kudi Filemone 1:1-25
1 Ami Polo, mukutwa+ pa mwanda wa Kidishitu Yesu, ne Temote+ mwanetu, kudi Filemone mwingidi netu muswedibwe,
2 ne kudi Afia kaka wetu, ne kudi Akipusa+ sola mukwetu, ne ku kipwilo kidi mu yobe njibo:+
3 Kanye ka ku buntu bitupu ne ndoe bitamba kudi Leza Tata wetu ne kudi Mfumwetu Yesu Kidishitu bikale nenu.
4 Mfwijanga’ko Leza wami mafuku onso ponkutelanga mu milombelo,+
5 pongivwananga nyeke lwitabijo lobe ne buswe bosenswe* Mfumwetu Yesu ne bosenswe* bajila bonso.
6 Nombelanga’mba lwitabijo lodi nalo abe ne bakwenu betabije lukutonone ujingulule bintu biyampe byonso byotudi nabyo kupityila kudi Kidishitu.
7 Mwanda nasangele ne kusengwa bininge pa kwivwana buswe bobe, mwanda mityima* ya bajila yatūkijibwe kupityila kodi, abe mwanetu.
8 O mwanda, nansha byondi na lupusa lukatampe mudi Kidishitu lwa kukusoñanya ulonge kyokya kifwaninwe,
9 ino nakwisāshila pa mwanda wa buswe, pa kuyuka’mba ami ne Polo mwana-mulume mununu, bine, kadi pano mukutwe pa mwanda wa Kidishitu Yesu.
10 Nakwisāshila pa mwanda wa wami mwana, ombutwile+ pano pondi mu kifungo,* ke Onesemusa+ kadi.
11 Dibajinji kadipo na mvubu kodi, ino pano udi na mvubu kodi ne kondi.
12 Nakwalwija’ye, bine aye, mutyima wami.*
13 Nadi nsaka kumulama kuno pa mwanda wami amba endelele kuñingidila pa kyobe kyaba kitatyi kyonkutyīlwe myanda miyampe.+
14 Ino nkisakilepo kulonga kintu nansha kimo shi abe kwitabijepo, kutyina’mba wakalonga kilongwa kiyampe na kutononwa, ino poso muswidile mutyima obe abe mwine.+
15 Kepabulwe padi ye kine kyaanyemēne kitatyi kityetye,* amba umone kwikala nandi monka nyeke,
16 ke bu umpikapo monka, aa,+ ino i kupita ne umpika mwine, bwa mwanetu muswedibwe,+ nakampata kondi ami, ino kodi abe po pene ku ngitu ne mudi Mfumwetu.
17 Nanshi, shi umwene ami bu mulunda nobe,* nankyo nandi mutambule biyampe monka mowadi wa kuntambwila.
18 Inoko shi kudi kyakulubīle nansha mapu kansangwa a kukulubwila, mbadile’kyo amiwa.
19 Ami Polo nalembe ami mwine na kuboko kwami amba: Nsa kukufuta’kyo—napele’tu kunena’mba nobe udi na mapu ami enka ne abe mwine.
20 Bine, abe mwanetu, nsaka unkwashe’ko mudi Mfumwetu; tūkija mutyima wami* mudi Kidishitu.
21 Nkulupile amba usa kwitabija, o mwanda nakulembela, pa kuyuka’mba usa kulonga kupita ne bino byonanena’bi.
22 Ne kadi, nongolwele kifuko kwa kushikata, mwanda nkulupile amba pa milombelo yenu nsa kwalujibwa komudi.*+
23 Abakwimuna kudi Epafalasa+ musungi mukwetu mu bumo na Kidishitu Yesu,
24 ne kudi ba Mako, Aditakusa,+ Demasa,+ ne Luka,+ bengidi nami.
25 Kanye ka ku buntu bitupu ka Mfumwetu Yesu Kidishitu kekale na mushipiditu omulombola.
Kunshi kwa Dyani
^ Nansha’mba “bobe kudi.”
^ Nansha’mba “ne kudi.”
^ Nansha’mba “kisanso kya ku mutyima.”
^ Kishima pa kishima i, “pondi mukutwe.”
^ Nansha’mba “kisanso kyami kya ku mutyima.”
^ Kishima pa kishima i, “nsá imo.”
^ Kishima pa kishima i, “mukwenu.”
^ Nansha’mba “kisanso kyami kya ku mutyima.”
^ Nansha’mba “nsa kulekelelwa ngiye komudi.”
