Eseta 5:1-14
5 Mu difuku dya busatu+ Eseta wavwala minkukumba yandi ya bulopwe, waimana mu kipango kya munda kya njibo* ya mulopwe, kampalampala na njibo ya mulopwe, papo mulopwe ushikete pa lupona lwandi lwa bulopwe mu njibo ya bulopwe kampalampala na kibelo.
2 Mulopwe pa kumona’tu Eseta Mukaja Mulopwe wimene mu kipango, wamutōkelwa mutyima, kadi mulopwe watambika Eseta nkonto wa olo+ wadi mu kuboko kwandi. Penepo Eseta wafwena, watenga ku nsongo ya nkonto.
3 Mulopwe wamwipangula’mba: “A Eseta Mukaja Mulopwe, le i bika? I bika byosaka? Nansha ke kipindi kya bulopwe bwami, kikakupebwa!”
4 Eseta walondolola’mba: “Shi kibasangaja mulopwe, nankyo mulopwe āye dyalelo dino’di pamo na Hamane+ ku masobo onamusobela.”
5 Ebiya mulopwe wanena bantu bandi amba: “Kalombolei Hamane āye bukidibukidi, monka mwasakila Eseta.” Penepo mulopwe ne Hamane baenda ku masobo asobele Eseta.
6 Kitatyi kya masobo a vinyu, mulopwe waipangula Eseta amba: “Le i bika byowalomba? Bikakupebwa! Le i bika byosaka? Nansha ke kipindi kya bulopwe bwami, kikakupebwa!”+
7 Eseta wamulondolola’mba: “Byonalomba ne byonsaka i bino,
8 Shi mulopwe wauntōkelwa mutyima ne shi kibasangaja mulopwe kumpa byonomba ne kulonga byonsaka, nankyo mulopwe ne Hamane bāye ku masobo onsa kwibasobela kesha; kadi kesha nsa kulonga mwanenena mulopwe.”
9 Mu dine difuku’dya Hamane watamba musangale ne mutyima muyule nsangaji. Ino Hamane pa kumona Modekai pa kibelo kya mulopwe ne kujingulula’mba kemenepo nansha kuzakala ku meso andi, Hamane wakalabela Modekai+ bya mwiko.
10 Ino, Hamane wekankamika’ko, waenda ku yandi njibo. Kupwa waityija balunda nandi ne wandi mukaji Zeleshi.+
11 Hamane weanya pa mwanda wa bupeta bwandi bwa ntumbo, ne bandi bana bangi,+ ne pa muswelo wamukandije mulopwe, wamuzunzula peulu pa bamfumu ne bengidi ba mulopwe.+
12 Hamane wabweja’ko amba: “Ne kadi, Eseta Mukaja Mulopwe kaityilepo muntu nansha umo ende na mulopwe ku masobo asobele,+ poso’nka ami. Kadi ne mwitwe monka kesha tukemone nandi pamo ne mulopwe.+
13 Inoko bino byonso kebinsangajangapo ponso pomona Modekai Muyuda ushikete pa kibelo kya mulopwe.”
14 Penepo Zeleshi wandi mukaji ne balunda nandi bonso bamunena’mba: “Shimikija mutyi wa maboko 50* mu bula. Kadi sapwila mulopwe lubanga’mba Modekai ufwaninwe kuyeyekwa’ko.+ Ebiya wende na mulopwe ukadye masobo.” Uno mulangwe wamweka bu muyampe kudi Hamane, penepo washimikija mutyi.
Kunshi kwa Dyani
^ Nansha’mba “njibo mikatakata.”
^ Kintu kya mametele 22,3 (mayo 73). Tala Mbwejo B14.
