Mwanda Waka Batumoni ba Yehova Kebafetengapo Noele?

VUMIJA MU

Milangwe mibi idi na bantu bavule

Lufumo: Batumoni kebafetengapo Noele mwanda kebetabijepo mudi Yesu.

Bubine: Twi bene Kidishitu. Tukulupile amba tukapandila enka padi Yesu Kidishitu.—Bilongwa 4:12.

Lufumo: Pomufundija bantu baleke kufeta Noele, mukalañanyanga bisaka.

Bubine: Tutele bisaka mutyima bininge, kadi twingidijanga Bible mwanda wa kukwasha bisaka bikale bikomo.

Lufumo: Kemukankamikangapo mushipiditu wa buntu wa pa “Noele,” wa ndoe pano pa ntanda, ne wa kulongela bantu biyampe.

Bubine: Tuloñanga bukomo bwa kwikala bantu ba buntu kadi ba ndoe difuku ne difuku. (Nkindi 11:25; Bene Loma 12:18) Kimfwa, tupwilanga ne kusapula musapula kukwatañana na musoñanya wa Yesu wa amba: “Mubatambula ku bitupu, nenu pānai ku bitupu.” (Mateo 10:8) Ne kadi tutele mutyima ku Bulopwe bwa Leza, mwanda tukulupile amba bo bukaleta ndoe pano pa ntanda.—Mateo 10:7.

Mwanda waka Batumoni ba Yehova kebafetengapo Noele?

Yesu wētusoñenye kuvuluka lufu lwandi, ke kubutulwapo kwandi.—Luka 22:19, 20.
Batumibwa ba Yesu ne bana ba bwanga babajinji kebādipo bafeta Noele. Dibuku dimo (The New Catholic Encyclopedia) dinena’mba, “Fetyi ya kubutulwa yātūdilwe’ko ku ngalwilo kwa myaka ya 243 Yesu ke Mwiye,” pa kupwa’tu kwa kufwa kwa batumibwa.
I kutupu bubinga bulombola’mba Yesu wābutwilwe mu mafuku 25 Kweji 12, difuku dyandi dya kubutulwa keditelelwepo mu Bible.
Tukulupile amba Noele keitabijibwepo na Leza mwanda i mitambe ku bibidiji ne bisela bya bajentaila.—2 Bene Kodinda 6:17.

Le Noele i mwanda’tu mukatampe?

Bavule bakifetanga Noele nansha byobayukile amba i mitambe ku bajentaila ne amba keikwatañenepo na binena Bible. Bano bantu bakokeja padi kwiipangula’mba: Lelo bene Kidishitu bafwaninwe kupela bintu bitabijibwe na bavule? Lelo Noele i mwanda’tu mukatampe?

Bible witukankamika tulanguluke, twingidije ‘bukomo bwetu bwa kulanga.’ (Bene Loma 12:1, 2) Witufundija tumone bubine na mvubu. (Yoano 4:23, 24) Shako tutanga mutyima ku mwitumwena bantu, inoko tulondanga misoñanya ya mu Bible nansha shi bantu abetumone bibi namani.

Nansha byotutongele kuleka kufeta Noele, tulēmekele lupusa lwa kwitongela ludi na muntu mu uno mwanda. Ketwielangapo mu bakwetu bafeta Noele.