Bible katelelepo difuku dyābutulwe Yesu, kadi kanenapo amba tufwaninwe kuvuluka difuku dyaābutwilwe. Dibuku dya Mcclintock ne debuku Strong’s Cyclopedia dinena’mba: “Kufeta Noele kekusoñanibwepo na Leza, kadi kekudipo mu Kipwanino Kipya.”

Inoko, shi ulangulukile bininge pa mānga ya Noele, ukamona’mba i mitambe ku bisela bya bajentaila. Bible ulombola’mba shi tutōta Leza mu muswelo wapelele, ufītwanga.​—Divilu 32:5-7.

1. Kufeta kubutulwa kwa Yesu: “Bene Kidishitu babajinji kebādipo bafeta kubutulwa [kwa Yesu], mwanda bādi bamona kufeta kubutulwa kwa muntu ye-yense bu kisela kya bajentaila.”​—The World Book Encyclopedia.

2. 25 Kweji 12: I kutupu bukamoni bulombola’mba Yesu wābutwilwe mu dino difuku. Padi bendeji ba bipwilo batongele dino difuku mwanda wa dikwatañane na mafetyi a bajentaila ādi alongwa dya mu buyo.

3. Kwipa byabuntu, kusoba, kufeta: Dibuku dimo (The Encyclopedia Americana) dinena’mba: “Masobo a Saturne, fetyi ya bene Loma yādi ifetwa pa bukata bwa Kweji 12, ādi bu kimfwa kya kulondela’po pa kutūla’ko byobya bitwa bu bibidiji bya Noele. Kimfwa ku ano masobo, ye kobalupwile mafetyi, bepa byabuntu, ne kwakija mabuji.” Dibuku dimo (The Encyclopædia Britannica) dinena’mba, “mingilo ne twaji tonso twādi twimana” pa masobo a Saturne.

4. Bitōkeji bya pa Noele: Dibuku dimo (The Encyclopedia of Religion) dinena’mba, bene Bulaya badi baneñenya mobo abo “na bitōkeji ne mityi ya mani mabishi ya miswelo yonso” mwanda wa kufeta buyo ne kulwa na mishipiditu mibi.

5. Kamutyi ketwa bu gui, ne ketwa bu houx: “Tumityi twitwa bu gui twādi tumonwa bu tupanga mulundu bukomo bwa maleñanya. Kamutyi ka houx ka mani mabishi kadi katōtwa mwanda kadi kebakulupija kujoka kwa dyuba.”​—The Encyclopedia Americana.

6. Mutyi wa Noele: “Bajentaila bene Bulaya bavule bādi batōta mutyi, kadi buno butōtyi kebwājiminepo ne pobapwile kwalamuka ke bene Kidishitu.” Butōtyi bwa mutyi kebwājiminepo mu bibidiji bimo, kimfwa “kutūla mutyi mupente pa kibelo nansha munda mwa njibo mu bitatyi bya mafetyi a mu buyo.”​—Encyclopædia Britannica.