Letre ya Kimvuka ya Ntuadisi
‘Yalombaka ti . . . beno vuanda banlongi.’ (Ebr. 5:12) Kanisa ntete! Yehova—Nlongi yina meluta banlongi nionso na luyalanganu ya mvimba—kena kulomba beto na kulonga bantu yankaka mambu metadila yandi! Mbala nionso yina beto mebaka kiyekua ya kulonga kedika yina metadila Yehova—na dibuta, na kimvuka, to na kisalu ya kusamuna—yakevuandaka diluaku mosi ya mfunu mpe kiyekua mosi ya kubaka na diseki ve. Yinki mutindu beto lenda kokisa yau mbote?
Beto kekuta mvutu na bampova yina ntumua Paulo sonikinaka Timoteo: ‘Tatamana kukipesa na kutanga na meso ya bantu, na kusiamisa, mpe na kulonga.’ Paulo buelaka: ‘Na kusalaka plina nge kekukivukisa mpe nge kevukisa bantu yina kena kuwa nge.’ (1 Tm. 4:13, 16) Nge kele na nsangu yina kevukisaka luzingu samu na kutubila bantu. Na yau, yakele na mfunu nge sala ngolo samu na kubongisa mutindu na nge ya kutanga mpe ya kulonga. Mua mukanda yayi mesalama samu na kusadisa nge na kusala yau. Beto tadila mua mambu ya mfunu yina beto kekuta na kati.
Konso paje kele na verse yina kele na nsikudukusu ya Biblia yina kele na nguizani na dilongi yina nge kena kulonguka to yakele na kifuani yina kena kumonisa mutindu ya kusadila dilongi yango
Yehova kele ‘Nlongi ya Nene.’ (Yez. 30:20) Mua mukanda yayi kesadisa nge na kukudisa makoki na nge ya kutanga mpe ya kulonga, kuzimbakana ve ti Yehova kele Yinto ya nsangu yina beto kelongaka mpe yandi nde kebendaka bantu na kimvuka. (Yoa. 6:44) Yau yina, sambilaka mingi samu na kulomba mpeve ya nlongo. Sadilaka Mpova ya Nzambi mbala na mbala. Bendaka dikebi ya bantu na Yehova, kasi na nge mosi ve. Sala ngolo samu na kukindisa bantu yina kena kuwa nge bazola Yehova na ntima na bau ya mvimba.
Nge kele na kiyekua ya kulonga nsangu yina meluta mfunu yina bantu fueti kuwa. Beto kele na kivuvu ti na lusadusu ‘ya ngolo yina Nzambi kepesaka,’ nge kenunga kutanga mpe kulonga mbote.—1 Pi. 4:11.
Bampangi na beno banlongi,
Kimvuka ya Ntuadisi ya Bambangi ya Yehova
