DILONGI 8
Bifuani yina kena kulonga
Matayo 13:34, 35
NA NKUFI: Kudisa makoki na nge ya kulonga na kusadilaka bifuani ya mindondo ve, yina kesepedisa bantu yina kena kuwa nge mpe yina kelonga bau mambu ya mfunu.
MUTINDU YA KUSALA YAU:
-
Pona bifuani ya mindondo ve. Mutindu mosi na Yesu, sadila mambu ya fiotifioti samu na kusasila mambu ya nene, mpe mambu ya pete samu na kusasila mambu ya mpasi. Kubuela ve mambu yankaka mekondua mfunu yina kesala ti kifuani na nge vuanda mpasi na kubakusa. Sala ti mambu yina kifuani na nge kena kutubila wizana mpenza na dilongi yina nge kena kulonga samu yabika tula mvualangani na makanisi ya bantu yina kena kuwa nge.
-
Kanisa bantu yina kekuwa nge. Pona bifuani yina kena kutubila mambu yina bantu yina kena kuwa nge kesalaka to yina bakesepelaka na yau. Keba ti bifuani na nge monisa bantu nsoni to yafuemisa bau.
-
Longa dikanisi ya ngudi. Pesa kifuani na mambu yina kele mfunu kasi ve na mambu ya fiotifioti. Sala nionso samu bantu yina kena kuwa nge babambukila kifuani mpe malongi ya mfunu yina kifuani yango tubilaka.
