Go dayrɛkt to di men tin

Go dayrɛkt to di say we di difrɛn difrɛn atikul dɛn de

 DI TƆPIK NA DI FRƆNT PEJ | ƐNI BƐNIFIT DE WE PƆSIN DE PRE?

Wetin Mek Gɔd Tɛl Wi fɔ Pre to Am?

Wetin Mek Gɔd Tɛl Wi fɔ Pre to Am?

Gɔd want lɛ wi bi in padi.

Padi dɛn kin tɔk to dɛnsɛf fɔ lɛ dɛn padi biznɛs go tayt. Semweso, Gɔd tɛl wi fɔ tɔk to am so dat wi padi biznɛs wit am go tayt mɔ ɛn mɔ. Gɔd tɔk se: “Una go kɔl mi ɛn kam ɛn pre to mi, ɛn a go lisin to una.” (Jɛrimaya 29:12) As yu de tɔk to Gɔd, yu go “kam nia [am] ɛn i go kam nia” yu. (Jems 4:8) Di Baybul tɛl wi se: “Jiova de nia ɔl di wan dɛn we de kɔl am.” (Sam 145:18) Di mɔ we wi pre to am, na di mɔ wi padi biznɛs wit Gɔd go tayt.

“Jiova de nia ɔl di wan dɛn we de kɔl am.”Sam 145:18

Gɔd want fɔ ɛp yu.

Jizɔs bin se: “Fɔ tru, uswan pan una, we in pikin go aks fɔ bred, go gi am ston? Ɔ we i aks fɔ fish, i go gi am snek? So, if una . . . no aw fɔ gi gud gift to una pikin dɛn, una Papa we de na ɛvin go mɔs gi gud tin dɛn to di wan dɛn we de aks am!” (Matyu 7:9-11) Fɔ tru, Gɔd de tɛl yu fɔ pre to am bikɔs “i bisin bɔt [yu]” ɛn i want fɔ ɛp yu. (Pita In Fɔs Lɛta 5:7) Gɔd ivin de tɛl yu fɔ kɛr yu prɔblɛm dɛn to am. Di Baybul tɛl wi se: “Una nɔ wɔri fɔ ɛnitin, bɔt pan ɛnitin we una de du una fɔ de pre ɛn beg Gɔd ɛn tɛl am tɛnki; una fɔ mek Gɔd no di tin dɛn we una want.”—Lɛta Fɔ Filipay 4:6.

Mɔtalman want fɔ wɔship Gɔd.

Masta sabi bukman dɛn we de stɔdi bɔt mɔtalman dɔn kam fɔ no se bɔku bɔku pipul dɛn na di wɔl si am se dɛn nid fɔ pre. Ivin sɔm pipul dɛn we biliv se Gɔd nɔ de ɛn di wan dɛn we nɔ shɔ if Gɔd de, kin want fɔ lan bɔt Gɔd. * Dis dɔn sho se Gɔd bin mek mɔtalman dɛn fɔ wɔship am. Jizɔs bin se: “Di wan dɛn we no se dɛn fɔ lan bɔt Gɔd go gladi.” (Matyu 5:3) Wan we we wi kin du dat na we wi de pre to Gɔd ɔltɛm.

Us bɛnifit wi go gɛt if wi gri fɔ pre to Gɔd?

^ par. 8 Insay 2012, wan ripɔt sho se we yu kɔnt 100 pipul dɛn na Amɛrika we nɔ biliv se Gɔd de ɔ we nɔ shɔ if Gɔd de, 11 pan dɛn kin pre lɛk wan tɛm so pan mɔnt.