Go dayrɛkt to di men tin

Go dayrɛkt to di say we di difrɛn difrɛn atikul dɛn de

I Gud we A Kam Nia Gɔd

I Gud we A Kam Nia Gɔd

WE A bin ol nayn ia, a stɔp fɔ gro. I dɔn pas 34 ia we dis bin apin na wan kɔntri we dɛn kɔl Ayvri Kost, ɛn ivin tide mi ayt na jɔs tri fit (1 mita). We mi mama ɛn papa kam fɔ no se a nɔ go tɔl pas aw a de so, dɛn bin ɛnkɔrej mi fɔ wok tranga wan, so dat a nɔ go de tink tumɔs bɔt mi ayt. A put wan tebul bifo wi os fɔ sɛl frut dɛn ɛn a bin de klin di ples fayn fayn wan. Dat bin mek a gɛt bɔku kɔstɔma dɛn.

Bɔt pan ɔl we a bin de wok tranga wan, dat nɔ bin chenj ɔltin. A bin stil shɔt ɛn i nɔ bin izi fɔ du simpul tin dɛn, lɛk fɔ pe fɔ di tin dɛn we a dɔn bay na di kawnta. I luk lɛk se ɔltin we dɛn mek na fɔ pipul dɛn we gɛt ayt pas mi tu tɛm. A bin de fil sɔri fɔ misɛf, bɔt dat bin chenj we a ol 14 ia.

Wan de, tu uman dɛn we na Jiova Witnɛs dɛn kam bay frut to mi, ɛn dɛn bigin stɔdi di Baybul wit mi. I nɔ tu te, a kam fɔ no se fɔ no Jiova ɛn di tin dɛn we i want fɔ du fɔ mɔtalman impɔtant pas mi prɔblɛm we a gɛt. Dat bin ɛp mi. Di skripchɔ we a lɛk mɔ na Sam 73:28. Di fɔs pat pan da vas de tɔk se: “I gud fɔ mek a kam nia Gɔd.”

I nɔ tu te, wi famili muf go na Bɔkina Faso, ɛn mi layf bin chenj. Di tɛm we a bin de na Ayvri Kost, pipul dɛn bin dɔn yus fɔ si mi tinap nia di frut we a de sɛl. Bɔt na di nyu say we wi dɔn go, mi na strenja ɛn bɔku pipul dɛn bin de luk mi lɛk se dɛn nɔ wande si pɔsin we tan lɛk mi. Pipul dɛn bin de wach mi tumɔs. Fɔ sɔm tɛm, a nɔ bin de gri fɔ kɔmɔt na do. Dɔn a mɛmba se tin bin bɛtɛ fɔ mi we a kam nia Jiova. A rayt to Jiova Witnɛs dɛn branch ɔfis ɛn dɛn sɛn di rayt pɔsin to mi, dat na wan mishɔnari we nem Nani. Nani bin gɛt wan smɔl ɔnda we i bin de rayd.

Di sansan rod na wi eria bin slipul, ɛn di tɛm we ren kin kam i kin gɛt pɔtɔpɔtɔ. Nani bin de fɔdɔm bɔku tɛm wit in smɔl ɔnda we i bin de kam fɔ stɔdi mi, bɔt dat nɔ bin mek i lɛf fɔ kam. Dɔn i se i go kɛr mi go na mitin. A kam fɔ no se a gɛt fɔ kɔmɔt na do ɛn bia di luk we pipul dɛn go de luk mi tumɔs. Apat frɔm dat, di sidɔm we a gɛt fɔ sidɔm biɛn Nani in smɔl ɔnda min se a gɛt fɔ ad mɔ wet pan di smɔl ɔnda we nɔ bin izi fɔ rayd. Bɔt a bin gri, a mɛmba di sɛkɔn pat pan di skripchɔ we a lɛk. Di  skripchɔ tɔk se: “A dɔn tek Jiova, we na di Rula we gɛt pawa pas ɔlman as di wan we de sev mi.”

Sɔm tɛm dɛn de, mi ɛn Nani bin de fɔdɔm insay di pɔtɔpɔtɔ, bɔt bikɔs wi lɛk di mitin dɛn wi nɔ bin de wɔri. Di fayn we aw dɛn kin smayl to mi we a de insay di Kiŋdɔm Ɔl bin rili difrɛn frɔm di luk we dɛn kin de luk mi tumɔs we a kin de na do! Nayn mɔnt leta, a bin baptayz.

Di tɔd pat pan di skripchɔ we a lɛk na di wan we se: “A go tɛl ɔlman bɔt ɔl di tin dɛn we yu de du.” A bin no se fɔ prich na sɔntin we nɔ go rili izi fɔ mi. A stil mɛmba di fɔs tɛm we a bigin fɔ prich frɔm os to os. Pikin dɛn ɛn big pipul dɛn bin de wach mi, fala mi, ɛn dɛn bin de waka lɛk aw a bin de waka. A bin rili fil am, bɔt a bin de mɛmba misɛf se dɛn nid Paradays jɔs lɛk aw misɛf nid am, so a bin kɔntinyu fɔ prich.

Fɔ mek tin izi fɔ mi, a bin kam gɛt wan traysikul we a bin de rayd wit mi an. Mi fil savis patna bin de push mi we wi rich na il ɛn jomp pan di traysikul we wi de rɔn dɔŋ di il. Fɔs, we a bin bigin fɔ prich, i nɔ bin izi fɔ mi, bɔt leta a bigin fɔ rili ɛnjɔy am. Ɛn dis bin mek insay 1998, a bigin fɔ rɛgyula payɔnia.

A stɔdi bɔku pipul dɛn di Baybul, ɛn 4 pan dɛn bin baptayz. A bin rili gladi we wan pan mi sista dɛn tek di trut! We a kin yɛri aw ɔda pipul dɛn de go bifo pan Gɔd biznɛs, dat kin ɛnkɔrej mi di rayt tɛm we a nid am. Wan de we maleria bin de mɔna mi, dɛn bin kam wit wan lɛta to mi frɔm Ayvri Kost. A bin dɔn bigin fɔ stɔdi di Baybul wit wan yunivasiti studɛnt na Bɔkina Faso ɛn a bin gi am to wan brɔda. Leta, dis Baybul stɔdi ya bin muf go na Ayvri Kost. A bin rili gladi we a kam fɔ no se i dɔn bi ɔnbaptayz pɔblisha!

Wetin a de du fɔ sɔpɔt misɛf? Wan ɔganayzeshɔn we de ɛp di wan dɛn we gɛt prɔblɛm wit dɛn bɔdi gri fɔ tich mi aw fɔ so. Wan pan di uman dɛn we bin de tich wi, notis aw a bin de wok ɛn tɔk se: “Wi fɔ tich yu aw fɔ mek sop.” Ɛn na dat dɛn bin du. A kin mek sop fɔ yuz na os. Pipul dɛn bin lɛk mi sop ɛn dɛn bin de tɛl ɔda pipul dɛn bɔt di fayn sop we a de mek. Na misɛf bin de kɛr di sop to di pipul dɛn. A bin de yuz mi smɔl ɔnda we gɛt tri taya fɔ go lɛf di sop.

Bɔt insay 2004, di pen we a bin de fil na mi spayna kɔd we bin gɛt prɔblɛm bin bigin fɔ mɔna mi bad bad wan. I mɔna mi te, a kam si se i go bɛtɛ fɔ mek a lɛf fɔ payɔnia. Bɔt pan ɔl dat, a stil de du mɔ na di prichin wok.

Pipul dɛn se dɛn sabi mi fɔ di smayl we a lɛk fɔ smayl. A gɛt bɔku rizin dɛn fɔ gladi bikɔs fɔ kam nia Gɔd rili gud fɔ mi.—Na Sera Maygay tɛl wi in stori.