Go dayrɛkt to di men tin

Go dayrɛkt to di say we di difrɛn difrɛn atikul dɛn de

Kɔntinyu fɔ Tink Gud Wan bɔt Gɔd Biznɛs

Kɔntinyu fɔ Tink Gud Wan bɔt Gɔd Biznɛs

“Tink gud wan bɔt dɛn tin ya; ɔndastand dɛn gud gud wan, so dat ɔlman go si klia wan se yu de go bifo pan Gɔd biznɛs.”—1 TIM. 4:15.

SIŊ DƐN: 57, 52

1, 2. Us impɔtant we dɛn we mɔtalman in bren spɛshal?

DI BREN we mɔtalman gɛt na wɔndaful tin. I kin ɛp wi fɔ lan langwej dɛn ɛn langwej kin mek wi ebul fɔ rid, rayt, tɔk, ɔndastand we pɔsin tɔk, pre, ɛn siŋ to Jiova fɔ prez am. Ɔl dɛn tin ya we wi kin du rili wɔndaful ɛn na sɔm pat dɛn na di bren kin mek wi du dɛn tin ya. Bɔt sayɛnsman dɛn nɔ rili ɔndastand aw wi bren kin mek wi du ɔl dɛn tin ya. Bikɔs wi bren spɛshal, wi kin ebul fɔ lan ɛni langwej. Wan man we stɔdi langwej tɔk se: “Wan pan di tin dɛn we mek wi difrɛn frɔm animal dɛn na di we aw wi pikin dɛn kin ebul fɔ lan langwej.”

2 Di ebul we wi ebul fɔ tɔk difrɛn langwej dɛn na wɔndaful gift we Jiova dɔn gi wi. (Sam 139:14; Rɛv. 4:11) Wan ɔda we we wi bren spɛshal na dat Gɔd mek mɔtalman “lɛk aw insɛf tan,” bɔt nɔto so i mek di animal dɛn. Gɔd gi mɔtalman di fridɔm fɔ du wetin dɛn want ɛn dɛn kin disayd fɔ yuz dɛn langwej fɔ prez Gɔd.—Jɛn. 1:27.

3. Us wɔndaful gift Jiova dɔn gi wi we go mek wi gɛt sɛns?

3 Gɔd we mek langwej, dɔn gi wi wan wɔndaful gift we na di  Baybul so dat ɔl di wan dɛn we want fɔ prez am go ebul fɔ du dat. Di wan ol Baybul ɔ af pat pan di Baybul de insay lɛk 2,800 langwej dɛn so. We yu stɔdi di tin dɛn we de insay di Baybul, yu go bigin fɔ tink di we aw Gɔd de tink. (Sam 40:5; 92:5; 139:17) So yu go ɛnjɔy fɔ tink gud wan bɔt tin dɛn we “go mek yu gɛt sɛns ɛn ɛp yu fɔ sev.”—Rid Sɛkɔn Lɛta To Timoti 3:14-17.

4. Wetin i min fɔ tink gud wan? Us kwɛstyɔn dɛn wi go tɔk bɔt?

4 Fɔ tink gud wan min se yu fɔ pe atɛnshɔn pan sɔntin ɛn tink gud wan bɔt da tin de, ilɛksɛf i gud ɔ bad. (Sam 77:12; Prɔv. 24:1, 2) Di tu impɔtant pipul dɛn we wi fɔ tink bɔt na Jiova Gɔd ɛn in Pikin, Jizɔs Krays. (Jɔn 17:3) Sɔntɛm wi go de wɔnda wetin i min fɔ rid ɛn tink gud wan bɔt wetin wi rid? Wetin wi fɔ tink bɔt? Ɛn wetin go ɛp wi fɔ de tink gud wan ɔltɛm ɛn ɛnjɔy we wi de du am?

MEK SHƆ SE YU BƐNIFIT WE YU DE STƆDI

5, 6. We yu de rid, wetin go ɛp yu fɔ ɔndastand mɔ ɛn mek yu mɛmba wetin yu dɔn rid?

5 Yu bren ebul mek yu du wɔndaful tin dɛn, ɛn sɔntɛnde yu nɔ kin ivin no we yu bren de du dɛn tin ya. Fɔ ɛgzampul, we yu de blo, waka, rayd baysikul, ɔ we yu de tayp. Dis na tin dɛn we yu go ebul fɔ du ɛn nɔ ivin tink we yu de du dɛn. Ɛn sɔntɛnde, yu kin rid ɛn nɔ ivin tink bɔt wetin yu rid. I impɔtant fɔ pe atɛnshɔn we yu de rid so dat yu go no wetin i min. We yu de rid, dɔn yu rich usay di paregraf ɛnd, ɔ bifo yu stat nyu sɔbɛdin na wan buk ɔ magazin, i go fayn lɛ yu wet smɔl ɛn tink bɔt wetin yu jɔs dɔn rid so dat yu go ɔndastand wetin yu dɔn rid fayn fayn wan. Na tru se ɔda tin dɛn de we go ambɔg yu we yu de rid ɛn i kin mek yu nɔ pe atɛnshɔn, sɔntɛm dis go mek yu bigin fɔ tink bɔt ɔda tin dɛn ɛn yu nɔ go bɛnifit we yu de rid. Aw wi go avɔyd dis?

6 Sayɛnsman dɛn dɔn tɔk se we wi de rid lawd wan we wi de stɔdi dat kin mek am izi fɔ mɛmba wetin wi dɔn rid. Di Pɔsin we mek wi bren no dis. Na dat mek i tɛl Jɔshwa se we i de rid di buk usay di Lɔ de, i “fɔ put [in] vɔys dɔŋ.” (Rid Jɔshwa 1:8.) We yu de rid di Baybul saful wan ɔ put yu vɔys dɔŋ we yu de rid, dat go rili ɛp yu fɔ pe atɛnshɔn ɛn mɛmba mɔ.

7. Ustɛm na di bɛst tɛm fɔ tink gud wan bɔt Gɔd in Wɔd? (Luk di pikchɔ nia dis atikul in taytul.)

7 Na tru se fɔ rid nɔ at bɛtɛ, bɔt fɔ tink gud wan, i min se yu fɔ rili pe atɛnshɔn. Na dat mek i izi fɔ lɛ wi bren we nɔ pafɛkt bigin fɔ tink bɔt ɔda tin dɛn we nɔ at fɔ du. So di bɛst tɛm fɔ tink na we yu dɔn blo gud gud wan ɛn we yu de na say usay natin nɔ de ambɔg yu. Wan pan di man dɛn we rayt di Sam buk bin kam fɔ no se di bɛst tɛm fɔ tink na we i wek pan slip na nɛt. (Sam 63:6) Jizɔs we gɛt pafɛkt maynd, bin no wetin mek i fayn fɔ de na say we kwayɛt we yu want fɔ tink gud wan ɛn pre.—Lyuk 6:12.

GUD TIN DƐN FƆ TINK BƆT

8. (a) Apat frɔm Gɔd in Wɔd, wetin bak wi fɔ tink bɔt? (b) Aw Jiova kin fil bɔt di tɛm we wi de spɛn fɔ tɔk bɔt am?

8 We yu de mɛmba di tin dɛn we yu dɔn rid na di Baybul, na wan impɔtant we fɔ tink gud wan, bɔt ɔda we dɛn de. Fɔ ɛgzampul, as yu de wach di tin dɛn we Gɔd mek, i go fayn fɔ wet smɔl ɛn tink. Dis go mek yu prez Jiova fɔ di gud tin dɛn we i dɔn du ɛn if yu de wit ɔda pipul dɛn yu go want fɔ tɛl dɛn aw yu fil. (Sam 104:24;  Akt 14:17) Yu tink se Jiova valyu dis we aw yu de tink ɛn di we yu de tɔk bɔt am to ɔda pipul dɛn? Mek in Wɔd, di Baybul, ansa dat. We di Baybul de tɔk bɔt di las dez, i tɔk se: “Da tɛm de, di wan dɛn we bin de fred Jiova bin de tɔk to dɛnsɛf, ɛn Jiova bin de pe atɛnshɔn ɛn lisin to dɛn. Dɛn bin de rayt wan buk bifo am fɔ mɛmba di wan dɛn we de fred Jiova ɛn we de tink bɔt in nem.”—Mal. 3:16.

Yu kin tink gud wan bɔt aw fɔ ɛp yu Baybul stɔdi dɛn? (Luk na paregraf 9)

9. (a) Wetin Pɔl bin tɛl Timoti fɔ de tink bɔt? (b) Aw wi go fala Pɔl in advays we wi de pripia fɔ go prich?

9 Di apɔsul Pɔl bin tɛl Timoti se lɛ i “tink gud wan” bɔt aw di tin dɛn we i de tɔk, di we aw i de biev, ɛn di tin dɛn we i de tich go afɛkt ɔda pipul dɛn. (Rid Fɔs Lɛta To Timoti 4:12-16.) Lɛk Timoti, we i kam pan Gɔd biznɛs, wi gɛt bɔku tin dɛn fɔ tink bɔt. Fɔ ɛgzampul, wi nid tɛm fɔ tink gud wan we wi de pripia fɔ stɔdi pipul dɛn di Baybul. We wi de pripia fɔ ɛni Baybul stɔdi, wi fɔ de tink bɔt kwɛstyɔn dɛn we wi go aks fɔ no wetin dɛn tink ɔ ɛgzampul dɛn we wi go yuz fɔ ɛp dɛn fɔ go bifo. Na fayn we dis fɔ yuz wi tɛm. We wi de tink bɔt dɛn tin ya, i kin mek wi gɛt mɔ fet ɛn i kin ɛp wi fɔ gɛt zil we wi de stɔdi wi Baybul studɛnt dɛn. Na di sem tin wi fɔ du we wi de pripia wi at fɔ go prich. (Rid Ɛzra 7:10.) If wi rid wan chapta na di Baybul buk we nem Akt, i go mek wi “gɛt zil lɛk faya” fɔ du di prichin wok. We wi de tink bɔt Baybul vas we wi go want fɔ yuz da de de, ɛn di buk ɔ magazin we wi plan fɔ gi, i go ɛp wi fɔ du wi prichin wok. (2 Tim. 1:6) I fayn fɔ tink bɔt di pipul dɛn we de na di eria usay wi de go prich ɛn wetin dɛn go lɛk fɔ yɛri bɔt. We wi pripia dis kayn we, i go mek wi prich gud gud wan fɔ sho “di spirit ɛn pawa” frɔm Gɔd in Wɔd.—1 Kɔr. 2:4.

10. Us ɔda chans dɛn wi gɛt fɔ tink gud wan bɔt Gɔd biznɛs?

 10 Yu kin tek not we dɛn de gi pɔblik tɔk na mitin, ɛn we dɛn kin gi tɔk dɛn na asɛmbli ɛn kɔnvɛnshɔn? We yu tek yu tɛm fɔ rid dɛn not ya, i go gi yu di chans fɔ tink gud wan bɔt di tin dɛn we yu bin dɔn lan frɔm Gɔd in Wɔd ɛn in ɔganayzeshɔn. Wi kin tink bak bɔt di nyu tin dɛn we wi kin gɛt frɔm wi kɔnvɛnshɔn ɛn di Wachtawa ɛn Awake! magazin dɛn we wi kin gɛt ɛni mɔnt. We yu de rid di stori dɛn na di Yearbook, i go fayn lɛ yu wet smɔl bifo yu go to di ɔda stori. Dat go gi yu tɛm fɔ tink gud wan ɛn mek wetin yu dɔn rid tɔch yu at. Sɔntɛm yu go want fɔ ɔndalayn sɔm men tin dɛn ɔ mek not kɔna say na di pej we yu tink se go ɛp yu we yu de pripia fɔ ritɔn visit, fɔ go ɛnkɔrej yu kɔmpin Kristian, ɔ di tɛm we yu go gɛt tɔk na di kɔngrigeshɔn. I rili impɔtant fɔ de wet smɔl ɛn tink ɔltɛm we yu de rid wi buk ɛn magazin dɛn. Wetin du? Na bikɔs dis go gi yu di chans fɔ ɔndastand di tin we yu de rid gud gud wan ɛn pre to Jiova fɔ tɛl am tɛnki fɔ di gud tin dɛn we yu de lan.

TINK BƆT GƆD IN WƆD ƐVRIDE

11. Wetin na di men tin we wi fɔ de tink bɔt? Wetin mek? (Luk di futnot.)

11 Fɔ tru, Gɔd in Wɔd na di men tin we wi fɔ de tink bɔt. Lɛ wi se yu de sɔm say we dɛn nɔ gri fɔ lɛ yu gɛt Baybul. * Bɔt dɛn nɔ go ɛva ebul fɔ stɔp yu lɛ yu nɔ tink gud wan bɔt di tin dɛn we yu bin dɔn lan, lɛk di skripchɔ dɛn we yu lɛk ɛn di wɔd dɛn we de na wi siŋ buk. (Akt 16:25) Ɛn Gɔd in spirit kin mek yu mɛmba di gud tin dɛn we yu dɔn lan.Jɔn 14:26.

12. Aw yu dɔn plan fɔ rid di Baybul we go bɛnifit yu?

12 Wi kin pik sɔm dez dɛn insay di wik fɔ rid ɛn tink gud wan bɔt wi Baybul ridin we wi kin du na wi Tiokratik Ministri Skul. Yu kin yuz ɔda de dɛn fɔ tink gud wan bɔt wetin Jizɔs bin se ɛn du. Yu go mɔs gri se pan ɔl di difrɛn difrɛn buk dɛn we de na di Baybul we pipul dɛn sabi, na Matyu, Mak, Lyuk ɛn Jɔn we tɔk bɔt Jizɔs ɛn in prichin wok na in mɔ pipul dɛn sabi. (Rom 10:17; Ibru 12:2; 1 Pit. 2:21) Jiova in ɔganayzeshɔn dɔn gi wi wan buk we de tɛl wi bɔt Jizɔs in stori lɛk aw dɛn apin di tɛm we i bin de na di wɔl. Dis buk na wɔndaful tin we go ɛp wi we wi de stɔdi di Baybul buk dɛn we nem Matyu, Mak, Lyuk, ɛn Jɔn.Jɔn 14:6.

WETIN MEK I IMPƆTANT FƆ TINK GUD WAN?

13, 14. Wetin mek i rili impɔtant fɔ de tink bɔt Gɔd biznɛs? Wetin dis go mek wi du?

13 We pɔsin de tink gud wan bɔt Gɔd biznɛs dat go ɛp am fɔ bi machɔ Kristian. (Ibru 5:14; 6:1) Ɛnibɔdi we nɔ gɛt bɛtɛ tɛm fɔ tink bɔt Jiova ɛn Jizɔs nɔ go kɔntinyu fɔ gɛt mɔ fet. Dis kayn pɔsin de pan trɔbul we go mek smɔl smɔl i lɛf di trut. (Ibru 2:1; 3:12) Jizɔs wɔn wi se if wi nɔ yɛri ɔ du wetin Gɔd in Wɔd se “wit gud at,” wi nɔ go “kip” wetin wi dɔn yɛri. Bifo dat, i go izi fɔ lɛ “di tin dɛn we kin mek [wi] wɔri, di jɛntri dɛn we de na di wɔl, ɛn di ɛnjɔymɛnt na layf mek [wi] fɔgɛt ɔl wetin [wi] dɔn yɛri . . . ɛn i kin mek [wi] nɔ machɔ.”—Lyuk 8:14, 15.

14 So lɛ wi kɔntinyu fɔ tink bɔt Gɔd in Wɔd. Dis go mek wi gɛt Gɔd in glori, ɛn in kwaliti dɛn we di Baybul sho wi. (2 Kɔr. 3:18) Wetin igen wi go aks fɔ? We wi de  kɔntinyu fɔ no Gɔd in Wɔd ɛn we i de alaw wi fɔ gɛt in glori, na big big ɔnɔ ɛn na sɔntin we nɔ de dɔn, as wi de kɔntinyu fɔ lan aw fɔ falamakata wi Papa we de na ɛvin we lɛk wi.—Ɛkli. 3:11.

15, 16. (a) Aw wi kin bɛnifit we wi de tink bɔt tin dɛn we gɛt fɔ du wit Gɔd biznɛs? (b) Wetin mek sɔntɛnde i nɔ kin izi fɔ tink gud wan? Bɔt wetin mek wi fɔ kɔntinyu?

15 We wi de kɔntinyu fɔ tink bɔt Gɔd biznɛs, dat go mek wi gɛt mɔ zil fɔ di trut. Dɔn wi go ebul fɔ ɛnkɔrej wi brɔda dɛn ɛn di wan dɛn we wi de mit na fil savis we want fɔ no mɔ. Di gift we Gɔd dɔn gi wi we pas ɔl, na di day we i mek Jizɔs kam day fɔ wi. We wi de tink gud wan bɔt dis gift, i go ɛp wi fɔ valyu di tayt padi biznɛs we wi gɛt wit wi Papa, Jiova. (Rom 3:24; Jems 4:8) Wan brɔda na Sawt Afrika we nem Mak, we spɛn tri ia na prizin bikɔs i nɔ put an pan wɔ ɔ pɔlitiks, bin tɔk se: “Fɔ tink gud wan i jɔs tan lɛk we pɔsin de du fayn tin we de mek i gladi. Di mɔ we wi de tink bɔt Gɔd in biznɛs na di mɔ wi go sabi nyu tin dɛn bɔt wi Gɔd, Jiova. Sɔm tɛm dɛn de, we mi at kin pwɛl ɔ we a kin wɔri bɔt tumara bambay, a kin tek di Baybul ɛn tink gud wan bɔt di vas dɛn we de insay de. A dɔn si se dis kin rili ɛp mi.”

16 Di kayn layf we de na di wɔl tide, ful-ɔp wit bɔku tin dɛn we kin ambɔg wi, ɛn dɛn tin ya kin mek i nɔ izi fɔ tink gud wan bɔt Gɔd biznɛs. Wan ɔda fetful brɔda na Afrika, we nem Patrik, bin tɔk se: “Mi maynd tan lɛk wan bɔks usay dɛn kin kip imel dɛn, ɛn i ful-ɔp wit difrɛn difrɛn tin dɛn, tin dɛn we a want ɛn tin dɛn we a nɔ want, ɛn a nid fɔ ajɔst dɛn tin ya ɛvride. As a kin luk di tin dɛn we de na mi maynd, a kin si ‘bɔku tin dɛn we kin mek a wɔri,’ ɛn a kin gɛt fɔ pre to Jiova bɔt dɛn bifo a go ebul fɔ tink wit klia maynd. Pan ɔl we fɔ du dis kin tek smɔl tɛm bifo a bigin fɔ tink bɔt tɔpik dɛn we gɛt sɔntin fɔ du wit Gɔd, a kin fil lɛk se a de nia Jiova. Dis dɔn ɛp mi fɔ ɔndastand di trut bɛtɛ wan.” (Sam 94:19) Fɔ tru, wɔndaful bɛnifit dɛn de fɔ di wan dɛn we de “tek tɛm fɔ rid di Skripchɔ dɛn ɛvride” ɛn tink bɔt wetin dɛn de lan.—Akt 17:11.

AW YU GO EBUL FƆ FƐN TƐM?

17. Aw yu kin fɛn tɛm fɔ tink gud wan?

17 Sɔm pipul dɛn kin grap ali mɔnin fɔ rid, tink gud wan, ɛn pre. Ɔda pipul dɛn kin du am di tɛm we dɛn kin gɛt lɔnch. Sɔntɛm yu go dɔn kam fɔ no se yu go ebul fɔ du am ivintɛm ɔ bifo yu slip. Sɔm pipul dɛn kin ɛnjɔy fɔ rid di Baybul na mɔnin ɛn dɛn kin rid am bak bifo dɛn slip. So dis de sho se dɛn kin “rid am de ɛn nɛt,” ɔ ɔltɛm. (Jɔsh. 1:8) Di tin we rili impɔtant na dat wi fɔ lɛf fɔ spɛn bɔku tɛm pan tin dɛn we nɔ impɔtant so dat wi go gɛt mɔ tɛm fɔ tink gud wan bɔt Gɔd in Wɔd.—Ɛfi. 5:15, 16.

18. Wetin di Baybul se bɔt ɔl di wan dɛn we de tink gud wan bɔt Gɔd in Wɔd ɛn we de tray tranga wan fɔ du wetin dɛn de lan?

18 Gɔd in Wɔd tɔk se bɔku blɛsin de fɔ di wan dɛn we de rid di Baybul, we de tink gud wan bɔt wetin dɛn rid, ɛn we de tray tranga wan fɔ du wetin dɛn de lan. (Rid Sam 1:1-3.) Jizɔs se: “Di wan dɛn we de yɛri Gɔd in wɔd ɛn du wetin i se go gladi!” (Lyuk 11:28) Di tin we impɔtant pas ɔl na dat we wi de tink gud wan bɔt Gɔd biznɛs dat go ɛp wi fɔ ɔnɔ wi wɔndaful Gɔd, Jiova we mek wi bren, ɛn i go mek wi gɛt gladi at naw ɛn layf we go de sote go na di nyu wɔl usay ɔlman go de du wetin rayt.—Jems 1:25; Rɛv. 1:3.

^ par. 11 Rid di atikul we gɛt di taytul “Our Fight to Stay Spiritually Strong,” insay di Disɛmba 1, 2006, Wachtawa.