Betani wajinga muzhi mucheche waikejile palepele makilomita asatu kufuma ku Yelusalema. (Yoa. 11:18) Mu uno muzhi, mwamwekele kintu kyatama bingi saka kwashala milungu icheche kuba’mba Yesu afwe. Lazalasa mulunda wa kwa Yesu wabelele bingi kabiji wafwile.

Yesu byo aumvwine kino, wabujile baana banji ba bwanga amba Lazalasa walala ne kuba’mba usa kumubusha. (Yoano 11:11) Bino baana banji ba bwanga kechi baumvwine mo atazhizhe ne, onkao mambo, Yesu wibalumbulwijile nzolo kijoma kuba’mba: “Lazalasa wafwa.”—Yoano 11:14.

Byo papichile moba ana kufuma po bamuzhikijile, Yesu wafikile ku Betani ne kutekenesha Mata nyenga wa kwa Lazalasa. Mata waambile amba: “Nkambo umvwe mwajinga kuno, bayaya inge kechi bafwa ne.” (Yoano 11:17, 21) Yesu wamukumbwile amba: “Amiwa yami lusanguko ne bumi. Awa wangitabila, nangwa wafwa, ukasanguka.”—Yoano 11:25.

Pa kuba’mba amweshe kuba’mba bino byambo byajinga bya kine, Yesu wayile ku kilende ne kubijika na jiwi jikatampe amba: “Lazalasa, lupukamo!” (Yoano 11:43) Bantu bajingako bakuminye bingi pa kumona Lazalasa wafwile wasanguka.

Pa kikye kimye, Yesu saka asangulapo kala bantu babiji. Pa kimye kimo, wasangwile mwana wamukazhi wafwile wa kwa Yelusa. Saka akyangye kumusangula, Yesu waambile kuba’mba walala tulo.—Luka 8:52.

Monai kuba’mba Yesu waesakenye lufu lwa kwa Lazalasa ne mwana wa mukazhi wa kwa Yelusa ku kulaala. Ino ñambilo yaijilemo bingi. Mambo ka? Kulaala kulumbulula kubula kuyuka kiji kyonse kabiji kechi kwikala kumvwa misongo nangwa kuyanda ne. (Musapwishi 9:5; monai ne kakitenguluzha kaamba amba  “Lufu Luji Nobe Kulaala mu Tulo Tukatampe.”) Buku wa Encyclopedia of Religion and Ethics waamba’mba: “Baana ba bwanga ba kwa Yesu batanshi bayukile bikala muntu umvwe wafwa. Ku baana ba bwanga ba kwa Yesu, abo bayukile kuba’mba lufu lwajinga nobe kulaala, kabiji kilende  yajinga mpunzha ya kukokolokelako ku bantu bafwile na lwitabilo.” *

Kitutekenesha bingi kuyuka kuba’mba bafwa balaala mu bilende kabiji amba kechi babena kuyanda ne. Na mambo a bino, twayuka byo twikala umvwe twafwa kabiji kechi twafwainwa kwikala na moyo ne.

Nangwa kya kuba’mba twiyowa bingi kulaala bufuku, kafwako ukeba kulajijila ne. Ñanyi luketekelo lo tuji nalo lwa kuba’mba bafwa balaala tulo mu bilende bakasangulwa byonkatu byo kyajinga kwi Lazalasa ne mwana wa mukazhi wa kwa Yelusa?

Mushakulu aye Yoba waipwizhe bwipuzho buntutu bumo kimye kyo ajinga pepi na kufwa amba: “Umvwe muntu wafwa wakonsha kwikala jibiji na bumi nyi?”—Yoba 14:14.

Pa kukumbula bwipuzho bwanji, Yoba wakumbwile Lesa wa Bulume bonse amba: “Po po mukangita ne amiwa nkemwitaba; ne anweba mukasaka kwikala ne amiwa ye mwalenga.” (Yoba 14:15) Yoba washiinwe kuba’mba Yehoba ukebesha kwiya kwa juba jo akasangula kalume Wanji wa kishinka. Nanchi kintu kyakebelenga Yoba kechi kyakonshekele kubiwa ne nyi? Kechi kyakatezhe ne.

Lusanguko lwaubile Yesu pa kubusha bantu, lwamwesheshenga amba Lesa wamupeele bulume bwa kushinda lufu. Baibolo wamba’mba Yesu uji na “makii a lufu.” (Lumwekesho 1:18) Byonkatu Yesu byo ajinga na bulume bwa kusangula Lazalasa, uji na bulume bwa kukasangula bafu mu kimye kya kulutwe.

Baibolo waambapo bingi pa uno mulaye wa lusanguko. Malaika wamulayile ngauzhi Danyela amba: “Ukakokoloka kabiji ukemana pobe po bakutongwela ku mpelo ya moba.” (Danyela 12:13) Yesu waambijile Basadusea, bantangi ba Yudea bakaine mulaye wa lusanguko amba: “Anweba mwaya mungi, mambo kechi mwayuka Binembelo nangwa bulume bwa Lesa ne.” (Mateo 22:23, 29) Mutumwa Paulo waambile amba: “Naketekela mwi Lesa . . . kuba amba kukekala lusanguko lwa baoloka ne babula koloka.”—Byubilo 24:15.

Lusanguko lwa bantu baoloka ne babula koloka lukobiwa kimye ka? Malaika waambijile Danyela wajinga waoloka kuba’mba ukabuka “ku mpelo ya moba.” Mata naye waketekejile kuba’mba kolojanji Lazalasa “ukasanguka mu juba jikapelako.”—Yoano 11:24.

Baibolo wakwatankanya jino “juba jikapelako” na bukalama bwa Bufumu bwa kwa Kilishitu. Paulo wanembele amba: “Mambo aye [Kilishitu] wafwainwa kwikala mfumu kufikatu ne kimye Lesa kyo akabika balwanyi bonse kwikala munshi ya maulu anji. Lufu ye mulwanyi ukapelako konaunwa.” (1 Kolinda 15:25, 26) Kino ke kishinka kyanema bingi kyakonsha kwitulengela kulomba’mba Bufumu bwa Lesa bwiye kabiji kyaswa muchima wa Lesa kyubiwe pano pa ntanda. *

Byonkatu Yoba byo ayukile, kyaswa muchima wa Lesa ke kusangula bafu. Jino juba umvwe jafika, lufu kechi lukekalako ne. Kabiji kafwako muntu ukeipuzhanga amba, ‘Nanchi lufu yo mpelo ya bantu bonse nyi?’