Xwendevanên Delal:

Em, xizmetkarên Yehowa, Kitêba Pîroz hiz dikin, çimkî ew Xebera Xwedê ye. Em bawer in, wekî serhatiyên ku wê kitêbêda nivîsar in, bi rastî qewimîne û wê rêberiyên baş bidin emirê me, û emê îzbat bin, wekî Yehowa meriva hiz dike (Zebûr 119:105; Lûqa 1:3; 1 Yûhenna 4:19). Em dil û can dixwazin alî yên din bikin, wekî ewana qîmetê rastiya Xebera Xwedê pêbihesin. Lema jî kitêba bi navê, “Dersên Qîmet ji Xebera Xwedê” hatiye sazkirinê. Em dixwazin hinekî derheqa vê kitêbê wera gilî kin.

Çaxê ew kitêb dihate sazkirinê, nihêrandina zara hildidane hesab. Usa jî ev kitêb dikare alî wan bike, kê dixwaze hê zêde derheqa Kitêba Pîroz pêbihese. Femdarî ye, wekî Kitêba Pîroz seva her kesa ye, lema her kes dikare ji van serhatiya xwera karê bistîne û bextewar be.

Ev kitêb hatiye sazkirinê ser hîmê Kitêba Pîroz, û têda tê gilîkirinê, wekî meriv ça serê-sêrîda hatine efirandinê. Gelek qewat hatiye xerckirinê ser wê kitêbê, wekî ew zelal û femdarî be. Usa jî vira hatiye nivîsarê serhatiyên ku pey hev diqewimîn.

Vê kitêbêda ne ku tenê derheqa serhatiya nivîsar e, lê usa jî şiklên cûre-cûre hene. Têkst û şikil usa hatine çêkirinê, wekî em bikaribin derecên wan meriva bidine ber çevê xwe û êmosiyên wan fem bikin.

Vê kitêbêda tê gilîkirinê derheqa wan meriya, yên ku guh didane Yehowa, û usa jî derheqa wan kîjana guh nedidane wî. Ji meselên wan emê dersên qîmet hîn bin (Romayî 15:4; 1 Korintî 10:6). Vê kitêbêda 14 par hene. Her parek destpêdibe pê fikirên kêrhatî, ji kîjana em dikarin karê bistînin.

 Hergê zarên we hene, hûn dikarin van dersa û şikla wanara şirovekin. Û van serhatiyên ji Kitêba Pîroz tevayî bixûnin. Alî zarên xwe bikin, wekî ewana bikaribin bivînin, ku serhatiyên ji vê kitêbê û ji Kitêba Pîroz hevva girêdayî ne. Mêtoda wî cûreyî, ne tenê seva zara kêrhatî ye, lê usa jî dikare alî mezina bike, wekî pêbihesin derheqa nivîsarên Kitêba Pîroz.

Em bawer in, wekî ev kitêb wê alî merivên dilsax bike. Çawa cahil usa jî yên emirda mezin, dikarin dersên qîmet hîn bin ji Xebera Xwedê û emirê xweda biqedînin. Ew meriv, yên ku guh didine wan hînkirina, axiriyêda dikarin bibine para malbeta Xwedêye hizkirî.