Imarisai

Imarisai

“Oqarfigitigut qaqugu tamanna pissasoq”

“Oqarfigitigut qaqugu tamanna pissasoq”

‘Oqarfigitigut suna nalunaaqutaassasoq silarsuup naggatissaanut.’ — MATT 24:3.

1. Apustilit paaserusutaat suna aamma uagut paaserusungaarparput?

JIISUSIP nunami kiffartornera naangajalersoq ajoqersugai siunissaq pillugu paasisaqarusungaarput. Jiisusip toqunissaa ullualunnik sioqqullugu taassuma ajoqersugaasa ilaasa sisamat taanna ima oqarfigaat: “Oqarfigitigut qaqugu tamanna pissasoq sunalu nalunaaqutaassasoq . . . [silarsuup] naggatissaanut.” (Matt 24:3; Mark 13:3) Jiisusip akissutitut siulittuutigai pisussarpassuit maluginiarnartut, taakkulu Matthæusip allagaani kapitali 24-mi 25-milu allassimapput. Siulittuutaa uagutsinnut pingaaruteqangaarpoq, uagummi aamma siunissaq pillugu paasisaqarusungaarpugut.

2. (a) Ukiut ingerlaneranni suna erseqqinnerusumik paaserusuttarsimavarput? (b) Apeqqutit pingasut suut sammissavavut?

2 Ukiut ingerlaneranni Jehovap kiffaasa Jiisusip ullussat kingulliit pillugit siulittuutaa paasiumallugu misissueqqissaarnerminni Guutimit ikiorneqarnissartik qinnutigisarsimavaat. Piffissaq Jiisusip oqaasiisa eqquuffissaat erseqqinnerusumik paasiumallugu misissueqqissaartarsimapput. Paasinnittaaserput qanoq erseqqinnerulersimanersoq paasiuminarsarniarlugu apeqqutit ‘qaqugu’-mik aallartittut pingasut sammeriartigit. Qaqugu ‘naalliunnartoqangaarneq’ aallartissava? * Qaqugu Jiisusip inuit ‘savatut savaasatulluunniit’ eqqartuutissavai? Qaqugu Jiisusi ‘tikiutissava’ imaluunniit ‘aggissava’? — Matt 24:21; 25:31-33.

QAQUGU NAALLIUNNARTOQANGAARNEQ AALLARTISSAVA?

3. Naalliunnartoqangaarneq pillugu siornatigut qanoq isumaqaraluarpugut?

3 Ukiorpassuarni isumaqaraluarpugut naalliunnartoqangaarneq 1914-imi sorsunnersuup siulliup nalaani aallartittoq, aamma 1918-imi Jehovap ‘ullut taakku  ikilisikkai’ sorsunneq naammat tanitat kinguleruttut nutaarsiassaq nuannersoq inuiannut tamanut oqaluussissutigisinnaaniassammassuk. (Matt 24:21, 22) Oqaluussineq tamanna aatsaat naammassereerpat Saatanip silarsuaa piuneeruttussaasorigaluaratsigu isumaqaraluarpugut naalliunnartoqangaarneq pingasunik immikkoortoqartoq: Aallaqqaateqassasoq (1914-1918), unitsinneqarallassasoq (1918-miit siumut) taavalu Harmagedonimi naggaserneqassasoq.

4. Jiisusip siulittuutaa pillugu suna paasivarput?

4 Jiisusip siulittuutaanik misissueqqissaaqqereerluta paasivarput ullussat kingulliit pillugit Jiisusip siulittuutaata ilaa marloriarluni eqquutissasoq. (Matt 24:4-22) Siullermik eqquuppoq Judæami ukiumi 33-miit ukiumut 70-imut taavalu nalitsinni silarsuarmi tamarmi eqquutissalluni. Tamanna paasigatsigu arlallit paasinarnerulerput. *

5. (a) Erloqinartorsiorfik suna 1914-imi aallartippa? (b) Nallisitsineq tamanna qanga eqquuteqqaarpa?

5 Assersuutigalugu paasivarput naalliunnartoqangaarneq 1914-imi aallartinngitsoq. Sooq? Biibilimi siulittuutinit ersermat naalliunnartoqangaarneq, inuiaat sorsunnerannik aallarniuteqarani, upperisarsiornerup eqqunngitsup saassunneqarneranik aallarniuteqassasoq. Taamaattumik pisut 1914-imi aallartittut, naalliunnartoqangaarneranut aallarniutaanatik “nallisitsinernut aallaqqaataapput”. (Matt 24:8) ‘Nallisitsinerit’ taakku eqquuteqqaarput Jerusalemimi Judæamilu ukiumi 33-miit ukiumut 66-imut.

6. Naalliunnartoqangaarnerup aallartinneranut suna nalunaaqutaassava?

6 Naalliunnartoqangaarnerup aallartinneranut suna nalunaaqutaassava? Jiisusi ima siulittuivoq: “Maajunnartoq Aseruisoq pruffiitikkut Danielikkut oqaatigisaq inimi illernartumiittoq takulerussiuk — tamatuminnga atuartup maluginiarliuk! — taava Judæamiittut qaqqanut qimaassapput.” (Matt 24:15, 16) Ukiumi 66-imi siullermik eqquuppoq Romamiut sakkutuuisa Jerusalemi naalaffillu tassaniittoq saassummatigit. Sakkutuut tassaapput ‘Maajunnartoq’ ‘inimi illernartumiittoq’, ‘ini’ taanna  tassaavoq naalaffik juutit illernartutut isigisaat. Siulittuutip tamatuma aappassaanik pingaarnerusumillu eqquunnissaani maajunnartoq ‘inimi illernartumiissaaq’ Naalagaaffiit Peqatigiit (nalitsinni ‘Maajunnartup’) upperisamik kristumiuunerartut upperisaannik (illernartutut isigisaannik) Babylonersuullu sinneranik saassussippata. Saassussineq tamanna Saqqummersitat 17:16-18-imi allaatigineqarpoq. Tamanna naalliunnartoqangaarneranut aallarniutaassaaq.

7. (a) Kristumiut siulliit nalaanni qanoq aniguisoqarpa? (b) Siunissami qanoq pisoqassava?

7 Jiisusi aamma ima siulittuivoq: “Ullut taakku ikilisinneqassapput.” Eqquunnerani siullermi, ukiumi 66-imi pisumi, Romamiut sakkutuuisa saassussinertik sivikillisippaat, saassussinermik ‘ullui ikilisillugit’. Taava kristumiut tanitat ‘annakkumallutik’ Jerusalemimiit Judæamiillu qimaapput. (Matthæusi 24:22 atuaruk; Mal 3:17) Aappassaanik eqquunnissaani qanoq pisoqassava? Jehovap Naalagaaffiit Peqatigiit upperisarsiornermik eqqunngitsumik saassussinerat sivikillisissavaa, saassussinerisa ‘ullui ikilisillugit’, upperisarsiorneq ilumoortoq piujunnaarseqataaqqunagu. Taamaattumik Guutip innuttai annaanneqassapput.

8. (a) Naalliunnartoqangaarnissap immikkoortuata siulliup kingorna susoqassava? (b) Qaqugu 144.000-it kingullersaata qilammi akissarsiassani pissagunarpaa? (Kisitsisilersukkat nassuiaataat takuuk).

 8 Naalliunnartoqangaarnissap ‘ullui ikilisinneqareerpata’ susoqassava? Jiisusip nassuiarpaa pisussat arlallit Harmagedonip aallartinnginnerani pissasut. Pisussat taakku allaatigineqarput ukunani: Ezekieli 38:14-16 aamma Matthæusi 24:29-31. (Atuakkit). * Tamakku pereerpata Harmagedonimik isiginnittuussaagut. Harmagedoni naalliunnartoqangaarnissap sakkortunerpaaffigissavaa, soorlu ukiumi 70-imi Jerusalemip aserugaanera siulittuutip siullermik eqquunnerata sakkortunerpaaffigigaa. (Mal 3:19) Naalliunnartoqangaarnissaq, Harmagedonimik sakkortunerpaaffeqartussaq, immikkut ittuussaaq — tassaassalluni ‘silarsuup pileqqaarneraniit asseqanngitsoq’. (Matt 24:21) Tamanna pereerpat  Kristusip ukiuni tusindini naalakkersuinissaa aallartissaaq.

9. Naalliunnartoqangaarnissaq pillugu Jiisusip siulittuutaa uagutsinnut qanoq sunniuteqarpa?

9 Naalliunnartoqangaarnissaq pillugu siulittuut nakussatsissutigaarput. Sooq? Qanorluunniit erloqinartunik aqqusaagaqaraluarutta Jehovap innuttai, eqimattatut isigalugit, naalliunnartoqangaarnissamit aniguiumaarnerannut uppernarsaataammat. (Saqq 7:9, 14) Nuannaarutiginerpaavarput Harmagedonimi Jehovap kisimi oqartussaanermi eqqortuunera uppernarsarlugulu aqqi angingaartoq illernarsisissammagu. — Tuss 83:19; Ez 38:23.

QAQUGU JIISUSIP INUIT SAVATUT SAVAASATULLUUNNIIT EQQARTUUTISSAVAI?

10. Savat savaasallu eqqartuunneqarnissaannut tunngatillugu siornatigut qanoq isumaqaraluarpugut?

10 Maanna Jiisusip siulittuutaata immikkoortuata allap — savanik savaasanillu eqqartuussinermik assersuutip — qagugu eqquunnissaa misissoriartigu. (Matt 25:31-46) Siornatigut isumaqaraluarpugut inunnik savatut savaasatulluunniit eqqartuussineq ullussat kingulliit aallartinneranniit aallartittoq, tassa 1914-imiit ullussat kingulliit naanissaata tungaanut. Isumaqaraluarpugut Guutip naalagaaffianik tusarliussamik itigartitsillutik naalliunnartoqangaarnissaq sioqqullugu toqusut tassaasut ‘savaasatut’ eqqartuunneqareeramik makititaanissamik neriuuteqanngitsut.

11. Sooq inunnik savatut savaasatulluunniit eqqartuussineq 1914-imi aallartissimanavianngila?

11 1995-imi Napasuliaq Alapernaarsuiffik-mi Matthæusi 25:31 sammineqaqqippoq, versilu imaappoq: “Inuup Ernera naalannassutsimini tikiukkuni inngilit tamaasa ilagalugit, taava naalannassutsimi issiavissaarsuanut ingissaaq.” Eqqaaneqarpoq 1914-imi Jiisusi Guutip naalagaaffiani kunnginngortoq piffissamilu tamatumani tassaalinngitsoq ‘inuiaqatigiinnik tamanik’ Eqqartuussisoq. (Matt 25:32; Danieli 7:13 naleqqiuguk). Savanilli savaasanillu assersuusiami Jiisusip Eqqartuussisuunera pingaartinneqarneruvoq. (Matthæusi 25:31-34, 41, 46 atuakkit). Jiisusi inuiaqatigiinnik tamanik Eqqartuussisutut 1914-imi suli sulilinnginnami ukiumi tamatumani inunnik savatut savaasatulluunniit eqqartuussilersimanavianngilaq. * Taavami Jiisusi qaqugu eqqartuussilissava?

12. (a) Qaqugu Jiisusi siullerpaamik inuiaqatigiinnik tamanik eqqartuussilissava? (b) Pisussat suut Matthæusi 24:30, 31-mi aamma Matthæusi 25:31-33, 46-mi allaatigineqarpat?

 12 Ullussat kingulliit pillugit Jiisusip siulittuutaanit erserpoq taanna siullerpaamik inuiaqatigiinnik tamanik eqqartuussissasoq upperisarsiornerup eqqunngitsup piuneerunneqarnerata kingorna.  Immikkoortoq 8-mi eqqaaneqartutut piffissami tamatumani pisussat ilaat Matthæusi 24:30, 31-mi eqqartorneqarput. Versit taakku misissoqqissaarukkit paasissavat pisussat Jiisusip matumani eqqaasai savat savaasallu pillugit assersuummi eqqaaneqartunut assingusut. Assersuutigalugu Inuup Ernera naalannassutsimini inngilit ilagalugit tikiutissaaq; naggueqatigiit inuiaqatigiillu tamarmik katersuutissapput; savatut eqqartuunneqartut ‘niaqqutik massitsissavaat’ ‘naassaanngitsumik inuusinnaanngoramik’. * Savaasatut eqqartuunneqartut “nimaarumaarput” “naassaangitsumik pillarneqassallutik”, tassa suujunnaarsitaassallutik, paasigunikku. — Matthæusi 25:31-33, 46.

13. (a) Qaqugu Jiisusip inuit savatut savaasatulluunniit eqqartuutissavai? (b) Paasinnittaaseq tamanna oqaluussinermut isiginnittaatsitsinnut qanoq sunniuteqarpa?

13 Taava qanoq isummersinnaavugut? Jiisusip naalliunnartoqangaarnissami tikiukkuni inuit inuiaqatigiinnit tamaneersut savatut savaasatulluunniit eqqartuutissavai. Taava Harmagedonimi, naalliunnartoqangaarnerup sakkortunerpaaffiani, savaasat naassaanngitsumik piujunnaarsinneqassapput. Paasinnittaaseq tamanna oqaluussinermut isiginnittaatsitsinnut qanoq sunniuteqarpa? Oqaluussinitta qanoq pingaaruteqartigineranik paasinnissutigaarput. Naalliunnartoqangaarnissap aallartinnissaata tungaanut inuit eqqarsartaatsiminnik allannguinissaminnut ‘inuussummullu aqqutikkut ameqisukkut’ ingerlalernissaminnut  suli piffissaqarput. (Matt 7:13, 14) Ilumoorpoq maanna inuit savatut savaasatulluunniit pissuseqarsinnaasut. Taamaakkaluartoq eqqaamasariaqarparput aatsaat naalliunnartoqangaarnissami kikkut savaanerannik kikkullu savaasaanerannik inaarutaasumik Jiisusi eqqartuussissammat. Taamaattumik pissutissaqarluarpugut oqaluussiuarnitsigut inuit amerlanerpaat Guutip naalagaaffianik tusarliussamik tusarnissaannik iliuuseqarnissaannillu periarfissinnissaannut.

Naalliunnartoqangaarnissap aallartinnginnerani inuit eqqarsaartaatsiminnik allannguinissaminnut piffissaqarput (Immikkoortoq 13 takuuk)

QAQUGU JIISUSI TIKIUTISSAVA, IMALUUNNIIT AGGISSAVA?

14, 15. Versit sisamat sorliit Kristusip siunissami Eqqartuussisutut tikiunnissaanut tunngatinneqarpat?

14 Jiisusip siulittuutaanik misissueqqissaaqqinnermit paasinarsissava pingaarutillit allat qanga pisimanerannik imaluunniit qaqugu piumaarnerannik paasinnittaatsitsinnik allannguisariaqartugut? Tamanna siulittuummi akissutissarsisinnaavarput. Misissoriartigu.

15 Jiisusip siulittuutimi ilaani Matthæusi 24:29-miit 25:46-mut allassimasuni ullussani kingullerni pisussat naalliunnartoqangaarnissamilu pisussat sammineruai. Versini taakkunani Jiisusip ‘tikiunnissani’ imaluunniit ‘aggernissani’ arfineq-pingasoriarluni eqqaavaa. * Naalliunnartoqangaarnissaq pillugu ima oqarpoq: “Isigiumaarpaallu Inuup Ernera qilaap nuiaasigut aggersoq.” ‘Naluarsi ulloq Naalakkassi tikiuffissaa.’ “Inuup Ernera tikiutissammat nalunaaquttap-akunnerani ilimasuffiginngisassinni.” Aamma savat savaasallu pillugit assersuusiamini Jiisusi ima oqarpoq: ‘Inuup Ernera naalannassutsimini tikiutissaaq.’ (Matt 24:30, 42, 44; 25:31) Versit sisamat taakku Kristusip siunissami Eqqartuussisutut tikiunnissaanik innersuussinerupput. Allassimaffiit arfineq-pingasuusut ilaat sisamat suli issuarneqanngitsut Jiisusip siulittuutaani sumi eqqaaneqarpat?

16. Jiisusip tikiunnissaa allassimaffinni allani sorlerni eqqaaneqarpa?

16 Inussiaq aalajaallunilu silatooq pillugu Jiisusi ima oqarpoq: “Pilluarpoq kiffaq [inussiaq, NW] taanna naalagaata taamaaliortillugu tikitaa.” Niviarsiat pillugit assersuusiami Jiisusi ima oqarpoq: ‘Pisiniariartortillugit uissaq tikiuppoq.’ Talentit pillugit assersuusiami Jiisusi ima oqaluttuarpoq: “Kingunerujussuatigut kiffat taakkua naalagaat tikiuppoq.” Assersuusiami tamatumani naalagaq ima oqarpoq: ‘Tikikkama piga erniaqalersimasoq tigussagaluarpara.’ (Matt 24:46; 25:10, 19, 27) Allassimaffiit sisamat taakku Jiisusip tikiunnissaanik  innersuussinerit eqquutereerpat, imaluunniit suli eqquutinngillat?

17. ‘Tikiunneq’ Matthæusi 24:46-mi eqqaaneqartoq pillugu qanoq isumaqaraluarpugut?

17 Atuagassiaatitsinni siornatigut saqqummersuni allassimavoq allassimaffiit pineqartut sisamat, immikkoortup matuma siuliani eqqaaneqartut, Jiisusip 1918-imi tikiunneranut tunngasut. Assersuutigeriartigu Jiisusip “inussiaq aalajaallunilu silatooq” (NW) pillugu oqaasii. (Matthæusi 24:45-47 atuakkit). Isumaqaraluarpugut ‘tikiunneq’ versi 46-mi eqqaaneqartoq 1918-imi Jiisusip tikiulluni tanitat anersaakkut qanoq innerannik misissuiartorneranut attuumassuteqartoq aamma 1919-imi inussiaq Naalakkap pigisaanut tamanut paarsisunngortinneqartoq. (Mal 3:1) Misissueqqissaaqqinnerulli ersersippaa Jiisusip siulittuutaata immikkoortuisa ilaasa eqquussimanerannik eqquussimannginnerannilluunniit paasinnittaatsitsinnik allannguisariaqartugut. Sooq?

18. Jiisusip siulittuutaa tamaat misissoqqissaareerlugu qanoq isummerpugut?

18 Versini Matthæusi 24:46-p siuliini ‘tikiunnermik’ imaluunniit ‘aggernermik’ allassimagaangat tamatigut pineqartarpoq naalliunnartoqangaarnissami Jiisusip eqqartuussut nalunaarutigalugulu naammassiartorlugu tikiuffissaa. (Matt 24:30, 42, 44) Aamma  immikkoortoq 12-imi paasisatsitut Jiisusip ‘tikiunnissaa’ Matthæusi 25:31-mi eqqaaneqartoq aamma tassaavoq piffissaq eqqartuussiffissaq. Taamaattumik tunngavissaqarluarpoq isummissalluni Jiisusip pigisaminik tamanik inussiamut aalajaatsumut paarsisunngortitsiartorluni tikiunnissaa, Matthæusi 24:46, 47-mi eqqaaneqartoq, aamma tassaasoq taassuma siunissami tikiuffissaa, naalliunnartoqangaarnissami. * Aap, Jiisusip siulittuutaata tamarmiusup eqqarsaatigeqqissaarnerani una erserpoq: Taassuma tikiunnissaanut innersuussinerit arfineq-pingasut tamarmik naalliunnartoqangaarnissami eqqartuussiffissamut tunngapput.

19. Paasinnittaatsitsinnik allannguinerit suut sammereerpavut, apeqqutillu suut allaaserisani tulliuttuni akineqassappat?

19 Suna paasivarput? Uteqqeeriarta: Allaaserisap matuma aallaqqaataani apeqqutit ‘qaqugu’-mik aallartittut pingasut apeqqutigaavut. Siullermik, paasivarput naalliunnartoqangaarnera 1914-imi aallartinngitsoq aatsaalli Naalagaaffiit Peqatigiit Babylonersuaq saassuppassuk aallartissasoq. Aappassaanik, eqqartorparput sooq Jiisusip savanik savaasanillu eqqartuussinera 1914-imi aallartinngitsoq, aallartissasorli naalliunnartoqangaarnissami. Pingajussaanik, paasivarput Jiisusip inussiaq aalajaatsoq pigisaminut tamanut paarsisunngortinngikkaa 1919-imi, tamannali pissasoq naalliunnartoqangaarnissami tikiukkuni. Tassa pisussat pingasut taakku tamarmik naalliunnartoqangaarnissami pissapput. Allannguinerit tamakku inussiaq aalajaatsoq pillugu assersuusiamik paasinnittaatsitsinnut qanoq sunniuteqarpat? Aamma Jiisusip assersuusiaanik allanik naggatissap nalaani eqquuttussanik paasinnittaatsitsinnut qanoq sunniuteqarpat? Apeqqutit pingaarutillit taakku allaaserisani tulliuttuni sammineqassapput.

 

^ par. 2 Allaaserisami matumani allaaserisanilu tulliuttuni pingasuni annikilliornartussarsuaq pineqaraangat oqaaseq naalliunnartoqangaarneq Matthæusi 24:21-meersoq atorneqartarpoq. Pisussaq tamanna Saqqummersitat 7:14-imi annikilliortitaangaarnermik taaneqarpoq.

^ par. 4 Immikkoortoq 4: Paasisaqarnerorusukkuit takukkit Napasuliaq Alapernaarsuiffik 1. marsi 1994-imoortoq, qupp. 8-22 aamma   aamma   aamma 1. maaji 1999-imoortoq, qupp. 8-20.

^ par. 8 Immikkoortoq 8: Pisussat ilaat versini taakkunani eqqaaneqartut tassaapput ‘qinikkat katersorneqarnissaat’. (Matt 24:31) Taamaattumik Harmagedonip aallartinnginnerani tanitat suli nunarsuarmiittut tamarmik qilaliartinneqassagunarput. Tamanna Vagttårnet 15. aggusti 1990-imoortoq, qupp. 30-mi “Spørgsmål fra læserne”-mi allaaserineqartup allannguutigaa.

^ par. 11 Immikkoortoq 11: Takuuk Napasuliaq Alapernaarsuiffik 1. novembari 1995-imoortoq, qupp. 10-21.

^ par. 12 Immikkoortoq 12: Takuuk tamatuma Lukasi 21:28-mi oqaluttuarineqarnera.

^ par. 15 Immikkoortoq 15: Oqaatsit ‘tikiuppoq’ aamma ‘aggerpoq’ immikkoortumi tamatumani issuarneqartut grækerit oqaluutaannit erʹchomai-mit nutsigaapput.

^ par. 18 Immikkoortoq 18: Eqqaaneqareersutut grækerisut oqaluut ataasiinnaq ukunani atorneqarpoq: Matthæusi 24:46-mi ( “tikitaa”) aamma Matthæusi 24:30, 42, 44-mi ( “aggersoq”, “tikiuffissaa”, “tikiutissammat”).