1. (a) Qajuusiassanik naasupilunnillu assersuusiaq oqaluttuariuk. (b) Jiisusip assersuusiani qanoq nassuiarpaa?

JIISUSIP Naalagaaffik pillugu assersuusiami ilaanni oqaluttuarai naasorissaasoq qajuusiassanik pitsaasunik siaruarterisoq qinngarsuisorlu qajuusiassat taakkua akornanni naasupilussanik siaruarterisoq. Naasupiluit qajuusiassanit amerlanerummata naasorissaasup kiffani peqquai ‘katersuinissap tungaanut tamarmik naajartoqatigiissasut’. Katersuiffimmi naasupiluit suujunnaarsinneqarumaarput qajuusiassallu katersorneqarumaarlutik. Jiisusip assersuusiani qanoq paasisariaqarnersoq nammineq nassuiarpaa. (Matthæusi 13:24-30, 37-43 atuakkit). Assersuusiamit tamatumannga suna ersersinneqarpa? (Ungalusaq “Qajuusiassat naasupiluillu” takuuk).

2. (a) Qajuusiassanik naasupilunnillu assersuusiamit suna ersersinneqarpa? (b) Assersuusiami oqaluttuarineqartoq suna sammissavarput?

² Assersuusiami naasorissaasup narsaataani pisunit ersersinneqarpoq Jiisusi kristumiunik tanitanik naalagaaffimmini naalakkersueqatissaminik inuiannit qanoq katersuissanersoq aamma katersuinissaa qaqugu aallartissanersoq. Ukiumi 33-mi Kr.in.king. piinsip ulluani siaruarterineq aallartippoq. Naalliunnartoqangaarnissami, tassa annikilliornartussarsuarmi, tanitat suli nunarsuarmiittut inaarutaasumik naqissuserneqareerlutik qilaliartinneqarpata katersuineq naammassissaaq. (Matt 24:31; Saqq 7:1-4) Inuup qaqqap qaavaniit nasittup isikkivik tamaat takusinnaavaa. Tamatumunnga assingusumik qajuusiassanik naasupilunnillu assersuusiaq iluaqutigalugu ukiut 2000-it missaata ingerlanerani pisimasut pisussallu paasilluarnerulersinnaavavut. Assersuusiami siaruarteriffik, naajartorfik katersuiffillu oqaluttuarineqarput. Allaaserisami matumani katersuiffik sammineqarnerussaaq. *

3. (a) Kristumiut siulliit nalaata kingorna suut saqqummerpat? (b) Matthæusi 13:28 naapertorlugu qanoq aperisoqarpa, kikkullu aperippat? (Kisitsisilersukkat nassuiaataat takuuk).

³ Ukiut 100-kkut aallartinneranni “naasupiluit puttussuupput”  kristumiut tunussisut silarsuarmi takussaalermata. (Matt 13:26) Ukiuni 300-kkunni kristumiuunerartut ‘naasupiluttut’ ittut kristumiunit tanitanit amerlanerungaarput. Assersuusiami kiffat naalagartik aperaat naasupilunnik piiaassanerlutik. * (Matt 13:28) Naalakkap qanoq akivai?

4. (a) Naalakkap Jiisusip akissutaanit suna erserpa? (b) Kristumiut tanitat kikkuunersut qanga erseqqippa?

⁴ Qajuusiassat naasupiluillu pillugit Jiisusi ima oqarpoq: “Katersuinissap tungaanut tamarmik naajartoqatigiiginnarlit.” Jiisusip oqaasiinit erserpoq ukiunit hundredenit siullerniilli ulloq manna tikillugu nunarsuarmi kristumiunik ‘qajuusiassatut’ ittunik tanitaqartuaannarsimasoq. Tamanna uppernarsarneqarpoq Jiisusi kingusinnerusukkut ajoqersukkaminut ima oqarmat: “Ullut tamaasa najorpassi silarsuup naggatissaanut allaat.” (Matt 28:20) Taamaattumik kristumiut tanitat silarsuup naggatissaata tungaanut ullut tamaasa Jiisusimit illersorneqarumaarput. Kristumiuunerartulli amerlanerungaarnerat pissutigalugu ukiorpassuarni taakkunani kikkut ilumut tanitaanersut ilisimarpianngilarput. Katersuiffiulli aallartinnginnerani ukiut 30-t missaat sioqqullugit kristumiut tanitat kikkuunersut erseqqippoq. Qanoq pisoqarami?

5. Malakip siulittuutaa qanoq eqquuteqqaarpa?

⁵ Jiisusip qajuusiassanik naasupilunnillu assersuusiornera sioqquterujussuarlugu Jehovap pruffiitini Malaki aqqutigalugu pisussat Jiisusip assersuusiaanut tunngasut siulittuutigai. (Malaki 3:1-4 atuakkit). Johannesi Kuisisoq tassaavoq ‘inngili’, imaluunniit aallartitaq, ‘aqqutissamik iluarsaassisussaq’. (Matt 11:10, 11) Ukiumi 29-mi saqqummermat Israelikkut eqqartuunneqarnissaat qanillisimavoq.  ‘Inngilit’, imaluunniit aallartitat, aappaat Malakip siulittuutaani eqqaaneqartoq tassaavoq Jiisusi. Taassuma Jerusalemimi naalaffik marloriarluni — oqaluussinermi aallartinnerani naggataatungaanilu — minguiarpaa. (Matt 21:12, 13; Joh 2:14-17) Taamaattumik minguiaanera piffissap aalajangersimasup ingerlanerani pisimassaaq.

6. (a) Malakip siulittuutaa qanoq pingaarnerusumik eqquuppa? (b) Jiisusip qanga naalaffik anersaakkut ittoq misissuiffigaa? (Kisitsisilersukkat nassuiaataat takuuk).

⁶ Malakip siulittuutaa qanoq pingaarnerusumik eqquuppa? C. T. Russellip suleqataasalu 1914 sioqqullugu ukiuni qulikkuutaani suliaat Johannesip Kuisisup suliarisimasaanut assersuunneqarsinnaavoq. Biibilimi sorpiaat ajoqersuutigineqarnersut paasiumallugit Biibili atuaqqissaarpaat. Biibilimik Atuaqqissaartartut Kristusip utertitsissutitut pilliutaa pillugu ilumoortoq ilinniartitsissutigisarpaat, anniarfik pillugu ajoqersuut eqqunngitsoq qulaarpaat Guutimillu nalusunut piffissarititaasut qaangiunnissaat oqaluussissutigalugu. Taamaakkaluartorli upperisarsioqatigiit Kristusimik malinninnerartut amerlaqaat. Taamaattumik apeqqut pingaarutilik una akineqartariaqarpoq: ‘Qajuusiassanut’ assersuunneqartut kikkuuppat? Apeqqutip tamatuma akissutaa qulakkeerumallugu 1914-imi Jiisusip naalaffik anersaakkut ittoq misissuiffigilerpaa. Jiisusip misissuinera minguiaaneralu piffissap aalajangersimasup ingerlanerani pisimavoq, tassa 1914-imiit 1919-ip aallartinnerata tungaanut. *

7. Jiisusip 1914-imi misissuilerami suna paasivaa?

⁷ Jiisusip misissuilerami suna paasivaa? Ukiuni 30-nit amerlanerusuni Biibilimik Atuaqqissaartartut aallussilluartut ikittunnguit  nukitik pigisatillu atorlugit oqaluussinermik immikkut suliniuteqarsimapput. * Jiisusip inngilillu nuannaarutigingaarsimassavaat paasillugu qajuusiassat Saatanip naasupiluinit ipitinneqarsimanngitsut. Taamaakkaluartorli ‘Levikkut’, tassa tanitat, minguiarnissaat pisariaqarsimavoq. (Mal 3:2, 3; 1 Petr 4:17) Sooq?

8. 1914-ip kingorna qanoq pisoqarpa?

⁸ 1914-ip naalernerani Biibilimik Atuaqqissaartartut ilaat qilaliartitaasimannginnamik pakatsipput. 1915-ip 1916-illu ingerlaneranni akerlilersorneqaleramik oqaluusserpiarunnaarput. Qatanngut Russell 1916-imi oktobarimi toqummat allaat ilagiinniittut ilaat akerlilersuilerput. Peqatigiiffimmi Watch Tower Bible and Tract Society-mi siulersuisunut ilaasortat arfineq-marluusut ilaat sisamat qatanngutip Rutherfordip siulittaasutut toqqagaanera pissutigalugu pikitsitsipput. Taakku qatanngutinik avissaartuutitsiniaraluarput, 1917-imili aggustimi Beteli qimappaat. Minguiarneqarneq ersareqaaq! Aamma Biibilimik Atuaqqissaartartut ilaat inunnut qunulerput. Taamaakkaluartorli taakku ataatsimut isigalugit Jiisusip minguiaanera akueraat pisariaqartunillu allannguillutik. Taamaattumik Jiisusip taakku kristumiutut ilumoortutut, qajuusiassatut, ‘eqqartuuppai’. Kristumiulli ilumuunngitsut tamaasa, aamma kristumiuuneraqatigiit ilagiivineersut tamaasa, ajattorpai. (Mal 3:5; 2 Tim 2:19) Taava susoqarpa? Tamanna paasiumallugu qajuusiassanik naasupilunnillu assersuusiaq sammeqqeriartigu.

9, 10. (a) Katersuiffik pillugu suna sammissavarput? (b) Katersuiffimmi qanoq pisoqaqqaarpa?

⁹ Jiisusi oqarpoq katersuiffik tassaasoq “pissutsit aaqqissuussaanerata naggataatungaa”. (Matt 13:39, NW) Katersuiffik 1914-imi aallartippoq. Jiisusip katersuiffik pillugu siulittuutigisai tallimat sammeriartigit.

¹⁰ Siullermik, naasupiluit katersorneqarumaarput. Jiisusi ima oqarpoq: “Katersuiffik nalliuppat katersuisussat ima oqarfigiumaarpakka: Naasupiluit siulliullugit nutsussigit qilertanngorlugillu qilersorlugit.” 1914-ip kingorna tamanna eqquuppoq kristumiuunerartut tanitanit, ‘Naalagaaffiup qitornaanit’, immikkoortinneqarnerat inngilit aallartimmassuk. — Matt 13:30, 38, 41.

11. Ulloq manna tikillugu kristumiut ilumoortut kristumiuunerartunit suna immikkoorutigaat?

¹¹ Katersukkat amerlanerujartortillugit eqimattat taakkua marluk assigiinngissutaat ersarinnerulerpoq. (Saqq 18:1, 4) 1919-imi erseqqilluinnarpoq Babylonersuaq uppissimasoq. Kristumiut ilumoortut kristumiuunerartunit suna ingammik immikkoorutigaat? Oqaluussineq. Biibilimik Atuaqqissaartartunik siuttuusut Guutip naalagaaffia pillugu oqaluusseqataanissap pingaaruteqassusia erseqqissarpaat. Assersuutigalugu quppersakkami 1919-imi saqqummertumi (tuluttooq) “Suliamik isumagisassanngortitaasut”-mik qulequtalimmi kristumiut tanitat tamarmik illumiit illumut oqaluussinissamut kajumissaarneqarput. Tassani ima allassimavoq: “Suliaq annertorpasikkaluarpoq, tassaavorli Naalakkap suliaa, Naalakkamillu nakussatsinneqarluta naammassissavarput. Illit suleqataanerit immikkut pisinnaatitaaffigaat.” Kajumissaarut tamanna maleruarneqarpa? 1922-mi The Watch Tower-imi nalunaarutigineqarpoq Biibilimik Atuaqqissaartartut oqaluussinerulersimasut. Sivitsunngitsoq kristumiut ilumoortut illumiit illumut oqaluussineq ilisarnaatigilerpaat — ullumikkullu suli taamaappoq.

12. Qajuusiassanik katersuineq qanga aallartippa?

¹² Aappassaanik, qajuusiassat katersorneqarumaarput. Jiisusip inngilini ima peqquai: ‘Qajuusiassat quinnut katersorsigit.’ (Matt 13:30) 1919-imiilli kristumiut tanitat ilagiinnut pilerseqqitaasunut katersorneqarput. Tanitat taakku naalliunnartoqangaarnissami suli inuusut inaarutaasumik katersorneqarumaarput qilammi akissarsiassartik pigunikku. — Dan 7:18, 22, 27.

13. Saqqummersitat 18:7 naapertorlugu arnaq atortittartoq, imaluunniit Babylonersuaq, kristumiuunerartut ilanngullugit, ullumikkut qanoq isiginnittaaseqarpa?

 ¹³ Pingajussaanik, qiallutillu qorsaqqortarumaarput. Inngilit naasupilunnik qilersuereerpata qanoq pisoqassava? Jiisusip naasupiluit pillugit ima oqarpoq: “Tassaniittut qiallutillu qorsaqqortassapput.” (Matt 13:42) Ullumikkut tamanna eqquuppa? Suli naamik. Ullumikkut kristumiuunerartut, ‘arnamut atortittartumut’ ilaasut, imminut pillutik suli ima oqartarput: “Dronningiullunga issiavissaarsuanni issiavunga uillarnerunangalu, aliasunnartunillu misigisaqanngisaannassaanga.” (Saqq 18:7) Kristumiuunerartut pissaaneqartutut misigipput, allaat ‘dronningitut’ politikkikkut siuttuusunit qaffasinnerusoripput. Ullumikkut naasupiluttut ittut qianatik oqarataarput. Pissutsilli allanngorumaarput.

14. (a) Qaqugu aamma sooq kristumiuunerartut ‘qorsaqqortassappat’? (b) Matthæusi 13:42 pillugu paasinnittaaserput Tussiaat 112:10-mi allassimasumut qanoq naapertuuppa? (Kisitsisilersukkat nassuiaataat takuuk).

¹⁴ Naalliunnartoqangaarnissami upperisarsioqatigiit eqqunngitsut tamarmik suujunnaarsinneqareerpata upperisarsioqatigiinnut ilaasortaasimasut toqqorfissarsiorumaarput, toqqorfissarsinavianngillalli. (Luk 23:30; Saqq 6:15-17) Aniguisinnaannginnertik paasigunikku isumatsangaarlutik ‘qiassapput’ kamallutillu ‘qorsaqqortassallutik’. Jiisusi naalliunnartoqangaarnissaq pillugu siulittuivoq taakku ‘tamarmik nimaarumaartut’. * — Matt 24:30; Saqq 1:7.

15. Naasupiluit qanoq pineqassappat, qaqugulu tamanna pissava?

¹⁵ Sisamassaanik, aatsitsivimmut ikumasumut iginneqarumaarput. Naasupiluit qilertat qanoq pineqassappat? Inngilinit ‘aatsitsivimmut ikumasumut iginneqassapput’. (Matt 13:42) Tamanna taakkua suujunnaarsinneqarluinnarnissaattut paasisariaqarpoq. Taamaattumik upperisarsioqatigiinnut eqqunngitsunut ilaasortaasimasut naalliunnartoqangaarnissap naggataatungaani, Harmagedonimi, suujunnaarsinneqarumaarput. — Mal 3:19.

16, 17. (a) Jiisusip assersuusiamini pisoq kingulleq eqqaasaa suua? (b) Sooq isummersinnaavugut aatsaat siunissami tamanna eqquutissasoq?

¹⁶ Tallimassaannik, qaammarikkumaarput. Jiisusip siulittuutini ima naggaserpaa: “Taava iluartut Ataatamik naalagaaffiani seqinertut qaammarikkumaarput.” (Matt 13:43) Qaqugu sumilu tamanna pissava? Oqaatsit taakku suli eqquutinngillat. Jiisusip ullumikkut nunarsuarmi pisut siulittuutiginagit qilammili pisussat siulittuutigai. * Sooq taamatut isummersinnaavugut? Pissutaasut marluk tulliuttut eqqarsaatigeriakkit.

¹⁷ Sammeqqaassavarput qaqugu tamanna pissasoq. Jiisusi oqarpoq ‘taava iluartut qaammarikkumaartut’. Jiisusip oqaaseq ‘taava’  atoramiuk siuliani eqqaasani — naasupiluit ‘aatsitsivimmut ikumasumut iginneqarnissaat’ — pivaa. Naasupiluit naalliunnartoqangaarnissap naggataatungaani suujunnaarsinneqassapput. Taamaattumik ‘iluartut qaammarikkumaarnerat’ aamma taamanikkussamut piumaarpoq. Taava sumi tamanna pissava? Jiisusi oqarpoq ‘iluartut naalagaaffimmi qaammarikkumaartut’. Tamanna qanoq paasisariaqarpa? Harmagedonimi sorsunnissap aallartinnginnerani tanitat aalajaatsut tamarmik suli nunarsuarmiittut inaarutaasumik naqissuserneqareersimassapput. Tamatumalu kingorna qilammut katersorneqarumaarput, soorlu Jiisusip naalliunnartoqangaarnissaq pillugu siulittuutaani eqqaaneqartoq. (Matt 24:31) Tassani “Ataatamik naalagaaffiani” qaammarikkumaarput, Harmagedonimilu sorsunnerup kinguninngua “Savaaqqap katinnerani” Jiisusip nuliassaatut pilluartutut sassarumaarput. — Saqq 19:6-9.

18, 19. Jiisusip qajuusiassanik naasupilunnillu assersuusiaa pillugu paasinnittaaserput tamatta immikkut qanoq iluaqutigisinnaavarput?

¹⁸ Assersuusiamit ilikkakkavut qanoq iluaqutigisinnaavavut? Iluaqutigisinnaasavut pingasut sammissavavut. Siullermik, paasisimasavut annertusissapput. Assersuusiami Jehovap ajussutsimik akuerinninneranut pissutaasoq pingaarutilik paasinarsisinneqarpoq. Jehovap “immersakkat kamaanneqaraluartut” asattuukkallarpai ‘immersakkat nallittorneqartut’, tassa qajuusiassat, piareersarniarlugit. * (Rom 9:22-24) Aappassaanik, tatiginninnerput nakussatsinneqassaaq. Silarsuup naggatissaa qanilliartortillugu uagutsinnut akeraasut akerlilersuinerulissapput, ‘artorsartissinnaanngilaatigulli’. (Jeremia 1:19 atuaruk). Jehovap ukiorpassuarni qajuusiassanik sernissuisimaneratut Ataatatta qilammiusup Jiisusi inngilillu aqqutigalugit ‘ullut tamaasa silarsuup naggatissaanut allaat’ najussavaatigut. — Matt 28:20.

¹⁹ Pingajussaanik, assersuusiaq iluaqutigalugu ‘qajuusiassat’ kikkuunerat paasisinnaavarput. Sooq tamanna pingaaruteqarluinnarpa? Kristumiut ilumoortut qajuusiassatut ittut kikkuunerat paasigutsigu Jiisusip ullut kingulliit pillugit siulittuutimini apeqqutaa akisinnaavarput. Ima aperivoq: “Kinaavami inussiaq aalajaallunilu silatooq?” (Matt 24:45, NW) Allaaserisani tulliuttuni marlunni apeqqut tamanna sukumiisumik akineqassaaq.