Jehovap oqaasia uumavoq

Tussiaatit immikkoortuisa aappaannit pingaarnersat

JEHOVAMUT kiffaagatta nalunngilarput atugarliortassallutalu misilinneqartassalluta. „Guuti mianeralugu Kristusi-Jiisusimi inuujumasut tamarmik qinugineqartarput,“ apustili Paulusi allappoq. (2 Timotheusi 3:12) Misilinneqarnermi malersorneqarnermilu aalajaannissatsinnut suna iluaqutigisinnaavarput taamaalillutalu Guutimut ilumoorfiginninnerput takutillugu?

Tussiaatit immikkoortuisa tallimaasut aappaat tamatumani iluaqutigisinnaavarput. Tussiaatini 42-miit 72-imut takutinneqarpoq annikilliornermi aalajaassagutta Jehova tatigilluinnartariaqaripput ilinniartariaqarippullu akuliunnissaata uagutsinnillu aniguisitsinissaata utaqqinissaa. Tamanna pingaarutilimmik paasisaqarfigaarput! Tussiaatit immikkoortuisa aappaanni tusarliunneqarpoq allaat nalitsinni Guutip oqaasia ’uumasoq sunniisinnaassuseqarlunilu’. — Hebræerit 4:12.

JEHOVA „TASSA QIMARNGUFFIPPUT NAKUUSSUTERPULLU“

(Tussiaat 42:1–50:23)

Levikkuusoq qimaasutut inuuvoq. Jehovap illernartuutaani taassuminnga pallorfiginnissinnaannginnini aliasuutigalugu imminut ima tuppallersarpoq: „Sullutit isumatsappit tarniga? Sooq ilunni sajuppit? Guuti utaqqiuk!“ (Tussiaat 42:6, 12; 43:5) Versip tamatuma, uteqqinneqartup, Tussiaat 42-mi 43-milu titarnerit pingasuusut ataqatigiilersippai taallaq ataasinngorlugu. Tussiaat 44 Judamik — inuiaqatigiinnik annikilliortitaasunik, immaqa Hizkijap nalaani Assyriamiunit isaaffigiteriaannaasunik — ilungersortumik qinnussineruvoq.

Tussiaat 45, kunngip katinneranik erinarsuut, Missiarsitut kunngiusoq pillugu siulittuutaavoq. Tussiaatini tulliuttuni pingasuni Jehova ’qimarnguffittut nakuussutitullu’, ’nunarsuarmi tamarmi kunngisut pissarsuartut’ aamma ’sernissortitut’ taalliarineqarsimavoq. (Tussiaat 46:2; 47:3; 48:4) Tussiaat 49-mi ersersinneqarpoq ’kialuunniit qatanngut utertitaassussinnaanngikkaa’. (Tussiaat 49:8) Tussiaatit immikkoortuisa aappaanni tussiaatit arfineq-pingasut siulliit Korap erneranit allataapput. Qulingiluaat, Tussiaat 50, Asafimit allataavoq.

Allassimaffiit pillugit apeqqutit akineqartut:

44:20 — ’Sjakalit inaat’ suua? Tussiaasiortup innersuussutigigunarpaa sorsuffiusoq sjakalit toqutanik neriffigisaat.

45:14, 15a — ’Kunngip pania kunngimut sassartinneqartoq’ kinaava? Tassaavoq ’naassaanngissutsip kunngiata’ Jehova Guutip pania. (Saqqummersitat 15:3, NV) Taanna kristumiut 144.000-it ilagiissaannut naalannarsisitanut, Jehovap anersaaminik tanillugit qitornarsiartaarisaanut, sinniisuuvoq. (Romamiut 8:16) Jehovap ’pania’ taanna ’nuliassatut uissaminut assukkersorsimasutut piareersimasoq’ Missiarsitut kunngiusumut uissamukaanneqassaaq. — Saqqummersitat 21:2.

45:15b, 16 — ’Niviarsiartat’ kikkunnut assersuutaappat? Tassaapput pallorfiginnittut ilumoortut ’amerlangaartut’ tanitanik sinneruttunik tapersersuisut. Tassaagamik „annikilliortitaangaarnermit  aniguisimasut“ Missiarsitut kunngiusoq qilammi katereerpat nunarsuarmiissapput. (Saqqummersitat 7:9, 13, 14) Taamaalinerani ’nuannaarnermit erinarsortoqassaaq qiimmattartoqarlunilu’.

45:17, 1900/1961 — Ernerit kunngip siuaasaasa inaanni ineqalissasut qanoq paasisariaqarpa? Jiisusi nunami inunngorami nunamiunik siuaasaqarpoq. Ukiuni 1000-ini naalakkersuinermi nalaani toqusunit makitikkunigit ernerilissavai. Taakkualu ilaat ’nunarsuarmi tamarmi naalagarsuaasussatut’ toqqarneqassapput.

50:2 — Sooq Jerusalemi ’niaqorutitut alutornarnerpaatut’ taaneqarpa? Illoqarfiup isikkua pineqarnani, illoqarfiup Jehovamit atorneqarnera, naalaffimminik tassani sanatitsinermigut illoqarfimmik alutornangaartitsinera naalannarsisitsineralu kunnginngortitaminullu tanitanut pingaarnertut illoqarfigitinnera pineqarpoq.

Ilinniarfigisinnaasavut:

42:2-4. Tuttorsuartut nunami panertumiittutut imermut qiisasutut Levikkuusup Jehova kipitsavigaa. Angutip taassuma Jehovamik taassuma illernartuutaani pallorfiginnissinnaannginnini aliasuutigingaaramiuk ’qullini nerisarilerpai ullukkut unnuakkullu’ — nererusussuseeruppoq. Uppeqatitsinnik pallorfiginneqateqarsinnaanerput pingaartittariaqarparput!

42:5, 6, 12; 43:3-5. Arlaannik nammineq susinnaanngisatsinnik pissuteqarluta ilagiinnut attaveerukkallarutta, uppeqatitta katerisimaaqatigisarnerannik nuannaarutiginnittarnitsinnik eqqaamanninnerput napassutigissavarput. Naak aallaqqaammut kiserliorneq sakkortusisinnaagaluartoq, attaveerukkallarnitsinni eqqaassavarput Guuti tassaasoq qimarnguffipput taassumalu aniguisitsinissaa utaqqisariaqaripput.

46:2-4. Qanorluunniit annikilliortigissagaluarutta qularnngilluinnartariaqarparput Guuti tassaasoq „qimarnguffipput nakuussuterpullu“.

50:16-19. Kinaluunniit peqquserlulluni oqaluttartoq ajortuliortartorlu, Guutimut sinniisuusinnaatitaanngilaq.

50:20. Allat kukkussutaat oqallisiginagit isiginngitsuusaartariaqarpavut. — Kolossemiut 3:13.

’GUUTI KISIAT UTAQQIUK NIPANGERLUTIT’

(Tussiaat 51:1–71:24)

Tussiaatini taakkunani siulliuvoq Daavip Batsebamik ajortulioqateqareerluni qamannga pisumik qinnutaa. Tussiaatini 52-imiit 57-imut ersersinneqarpoq inuit nanertuutigisaminnik Jehovamut tunniussisut taassumanngalu annaanneqarnissaminnik utaqqisut Jehovap aniguisikkumaarai. Soorlu Tussiaatini 58-imiit 64-imut saqqummiunneqartoq Daavip annikilliungaarnermini Jehova qimarnguffigaa. Ima erinarsorpoq: ’Guuti kisiat utaqqiuk nipangerlutit, tarniga, neriugisara taassumannga pissammat.’ — Tussiaat 62:6, 1900/1961.

Jehova Guuti, Aniguisitsiserput, qanittumik ikinngutigigatsigu ’erinalimmik unnersiutigissavarput aqqa naalannartoq’. (Tussiaat 66:2) Tussiaat 65-imi Jehova pilersuisutut tukkusuutut, Tussiaat 67-imi 68-imilu Guutitut annaassiniarluni iliuuseqartutut aamma Tussiaat 70-imi 71-imilu aniguisitsisutut unnersiutigineqarpoq.

Allassimaffiit pillugit apeqqutit akineqartut:

53:2 — Guutip piuneranik miserratiginnittup ’sianiitsuunera’ qanoq paasisariaqarpa? Sianiitsuuneq uani pineqartoq tassaanngilaq silassorissusermik amigaateqarneq, tassaallunili ileqqussatigut sianissuseqannginneq. Tamanna erserpoq Tussiaat 53:2-5-imi, sianiitsuunerup kingunerisaanik ileqqussatigut najoqqutaarunnerup allaatigineqarnerani.

58:4-6 — Iluaatsut pulateriaarsuttut ittuunerat qanoq paasisariaqarpa? Guutiitsut allat  pillugit salluliuutaat pulateriaarsuit toqunartuattulli ipput. Salluliuutigineqartut tusaamaneqarnerat toqunartulertarpaallusooq tusaamanerlugaalersillugit. „Pulateriaarsuttut tusilartutut siutiminnik milissisutut“ guutiitsut siunnersorneqarumaneq ajorput.

58:8 — Iluaatsut „imertut koorusaarluni nungujartortutut“ qanoq „nunguinnassappat“? Nunami neriorsuutigisami kuuit kuuffigisaanni aalajangersimasuni erngup kuunnera Daavip eqqarsaatigisimasinnaavaa. Sialussuarnerani kuuit kuuffigisaat imeqarlualersinnaapput, imerli kuupallattarpoq peerullunilu. Daavip guutiitsut peerutipallannissaat qinnutigaa.

68:14 — Qanoq paasisariaqarpa: „Tuiusaliap sului sølvimik qalligaapput, meqqui kuultimik sungaarluni qorsuusumik“? Tuit ilaat qasertuupput tungujuaartut meqquisa ilaat uillut qaleruaasa qillaalasortaannut assingusumik qalipaateqartarlutik. Taamaalillutik meqqui seqernup qaamarnani saffiugassatut qillaalalersarput. Immaqa Daavip Israelikkut ajugaasaqattaartut sorsoreerlutik utertut tuimut nukittuunik sululimmut alutornartumut taamaattumut assingutissimavai. Biibilimut tunngasunik oqaaseqartartut ilaasa isumaqarnerattut, tui pillugu taamatut allaaserinninnermi aamma pineqarsimasinnaavoq eqqumiitsuliaq sorsunnermi ujajagaq, ajugaasimaarutissaq. Sunaluunniit pineqaraluarpat Daavip oqaatiginiarpaa Jehovap innuttaminik akeraasunut ajugaatitsisarnera.

68:19, NV —’Inuit tunissutaasut’ versimi eqqaaneqartut kikkuuppat? Tassaapput nunamik neriorsuutigisamik tiguaanermi angutit tigusat. Kingusinnerusukkut angutit taakkua Levikkunnut ikiortaalersinneqarput. — Ezra 8:20.

68:31 — ’Nersutit ivissuarniittut, ussippassuit, ersitsatsinneqarnissaannik’ qinnut qanoq paasisariaqarpa? Matumani Daavip Jehovap innuttaanut akeraasut assersuusiorluni uumasutut nujuartatut oqaluttuarai, Guutilu qinnuigaa naveeqqullugit, imaluunniit nukiminnik ajoqusiinngitsoorteqqullugit.

69:24 — Akeqqat ’makisaat soraajuitsumik sajuttunngortinnissaat’ qanoq paasisariaqarpa? Oqimaatsulerissagaanni, soorlu oqimaatsunik kivitsissagaanni tigumiassagaannilu, makisiup nalaani nukeqartariaqarpoq. Makisik sajuppat nukeerussimanermik isumaqassaaq. Daavip akeqqami nukeerutitinneqarnissaat qinnutigaa.

Ilinniarfigisinnaasavut:

51:3-6, 19. Sualuttumik ajortulioraluarluta imaattariaqanngilaq Jehovamut attaveqarnerput aserortoq. Peqqissimigutta naakkinnittuliorfigissagaatigut qularutigissanngilarput.

51:7, 9-12. Ajortiliuneq kingornussaraarput, ajortulioraangattali Jehovamut isumakkeerfigeqqusinnaavugut. Aamma qinnuigisinnaavarput minguiaqqulluta, anersaakkut ingerlallualernissatsinnut nakussatseqqulluta, ajortulioqqajaanerillu uummatitsinnit peeqqullugit anersaamillu aalajaatsumik tuneqqulluta.

 51:20. Daavip ajortuliorami inuiaqatigiit tamarmiusut atugarissaarnerat ulorianartorsiortippaa. Taamaattumik Zioni ajunngisaarfigeqqullugu qinnuigaa. Sualuttumik ajortulioraangatta Jehovap aqqanut ilagiinnullu kanngunarsaataagajuppoq. Taamaattumik ajoqusiinerput iluarseqqullugu Guuti qinnuigisariaqarparput.

52:10. Uagut ’Guutip illuani olivenequtitut qorsuusutut issinnaavugut’ — Jehova qanissinnaavarput kiffartorfigineranilu angusaqarluarsinnaalluta — taassumunnga naalannikkut perorsaatissiineranillu ilassinninnikkut. — Hebræerit 12:5, 6.

55:5, 6, 13-15, 17-19. Daavip ernermi Absalomip imminut perlulioqatigiinnianik pilersitsinera siunnersuisartumilu tatigisami Akitofelip imminik killuutiginninnera aliasuutigingaarpaa. Tamannali Jehovamik tatiginnippiarunnaassutiginngilaa. Aliasuutigingaakkatsinnik iliuuseqarfigineqarutta uaguttaaq tamanna Jehovamik tatiginnippiarunnaassutigissanngilarput.

55:23. Nanertuutigisavut Jehovamut qanoq tunniussinnaavavut? Taamaaliorsinnaavugut (1) sunik isumakuluuteqarnerluta qinunikkut Jehovamut oqaluttuarnikkut, (2) oqaasianut peqatigiiffianullu siunnersortissarsiortarnikkut ikiortissarsiortarnikkullu, aamma (3) pissutsit atugarisatta oqinnerulersinniarlugit sapinngisatsinnik iliuuseqartarnikkut. — Ussatit 3:5, 6; 11:14; 15:22; Filippimiut 4:6, 7.

56:9. Pissutsit atukkavut qanoq ittuunersut Jehovap ilisimaannanngilai, aammattaarli misigissutsikkut qanoq attortinnersugut nalunngilaa.

62:12. Guutip nukimmik allameersumik pinissani pisariaqartinngilaa. Taannaavormi nukiit tamarmik pilerfiat. „Guutimiippoq pissaaneq.“

63:4. Guutip ’ilumoorsusia pitsaaneruvoq inuunermit’, ilumoorsuseqanngitsuuppammi inuuneq siunertaqassanngikkaluarpoq. Taamaattumik Jehovamut ikinngutaaneq ineriartortikkutsigu silatusaassaagut.

63:7. Unnuaanera — nipaallunilu eqqissisimaffiusoq — eqqarsaatiginneqqissaarnissamut piffissatsialaasinnaavoq.

64:3-5. Oqaatissuaanerit nikallornartut inummik pisuussuteqanngitsumik tusaamanerlutsitsisinnaapput. Uagut taamatut oqaatissuaanerit tusarnaartassanngilagut tamatuminngaluunniit siaruarterisassanata.

69:5. Kukkussuteqarsimanngitsutut misigigaluarluta eqqisseqatigiiginnarumalluta utoqqatsernikkut ’utertitsinissaq’ ilaatigut pisariaqartarpoq.

70:2-6. Ikioqqulluta kimigiisernivut Jehovap tusartarpai. (1 Thessalonikamiut 5:17; Jaaku 1:13; 2 Petrusi 2:9) Immaqa misilinneqarnerup ingerlaannarnissaa Guutip akueraa, tamatumali iliuuseqarfiginissaanut ilisimassuseqartissavaatigut naammagalugulu atornissaanut nakussatsissalluta. ’Akuersaarumanngilaa artukkatsinnik usserneqarnissarput’. — 1 Korinthimiut 10:13; Hebræerit 10:36; Jaaku 1:5-8.

71:5, 17. Daavi inuusunnermini Jehovamik tatiginninnermigut sapiissuseqalersimavoq nakussatsinneqarsimallunilu — aamma filisterip Goliatip naapinnerata siorna. (1 Samueli 17:34-37) Inuusuttut iliuutsiminni tamani Jehova tunaarisarunikku silatusaassapput.

„Naalannassusiata nunarsuaq tamakkissavaa“

Tussiaatit immikkoortuisa aappaanni, Tussiaat 72-imi, erinarsuummi kingullermi Salomop naalakkersuinera sammineqarpoq, aamma erinarsuut taanna Missiarsip naalakkersuinerata nalaani nunarsuarmi pissutsit qanoq ikkumaarnerannik siulittuutaavoq. Pilluaqqussutissartai tassani allaatigineqartut nuanningaartuupput — eqqissineqangaarneq, nakuusertoqannginneq, naqisimannittoqannginneq karrillu naammangaartut! Tamakkuninnga Guutillu naalagaaffiata pilluaqqussutissartaanik allanik nuannaarutiginnittunut ilaassaagut? Aap, ilaassaagut tussiaasiortutut Jehova utaqqerukkutsigu taassuma qimarnguffigineratigut nakuussutigineratigullu.

Daavip qinnutai ima naapput: „Unnersiutigineqarli Guuti [Jehova], Israelip Guutia, kisimi tupinnartuliortartoq. Unnersiutigineqarli aqqa naalannartoq naassaanngitsumik! Naalannassusiata nunarsuaq tamakkissavaa. Amen. Amen.“ (Tussiaat 72:18-20) Taamatuttaaq uagut uummatikkut iluunngarluta Jehova taassumalu aqqa naalannartoq unnersiutigisigu. (wE 6/1 06)

[Qupp. 19-mi assiliartaq]

„Kunngip pania“ kimut assersuutaava?

[Qupp. 20-mi assiliartaq]

Sooq Jerusalemi ’niaqorutitut alutornarnerpaatut’ taaneqarpa?