Inuuninni atugassatit nammineq aalajangersinnaavigit?

INUUNITSINNI atugassavut siumut aalajangeriigaappat? Inuunitsinni aalajangikkavut siunissatsinnut sunniuteqannginnamik?

Inuk inuunermini atugassaminut nammineq naalagaaguni, taava inuit ataasiakkaat suliassamut immikkut ittumut akisussaaffimmulluunniit immikkut ittumut siumut aalajangeriigaasinnaappat? Qanorlu ililluni Guutip nunamut siunertani naammassisinnaavaa inuit inuunerminni atugassatik sunniuteqarfigisinnaappatigik? Apeqqutit taakkua Biibilimi naammaginartumik akineqarput.

Siunissap siumut aalajangeriigaaneranik ajoqersuut namminerlu piumasamik iliorsinnaatitaaneq — imminnut naapertuuppat?

Eqqarsaatigiuk Jehova Guutip qanoq pinngortissimagaatigut. „Guuti assilillugu pinngortippaa [inuk]. Pinngortippai tassaatillugit angut arnarlu,“ Biibilimi allassimavoq. (1 Mosesi 1:27) Guuti assilillugu pinngortitaagatta pissusiinik, soorlu asanninnermik, naapertuilluarnermik, ilisimassusermik pissaanermillu, ersersitsisinnaavavut. Guutip aamma piumasatsitut iliorsinnaatippaatigut, imaluunniit nammineq aalajangiisinnaatippaatigut. Tamanna pinngortitaanit nunamiittunit allanit immikkoorutigaarput. Guutip ileqqussatigut najoqqutassiai malissanerlugit malissannginnerlugilluunniit aalajangersinnaavugut. Taamaattumik pruffiiti Mosesi ima oqarsinnaasimavoq: „Ullumi qilak nunalu ilisimannittoralugit ilissinnut saqqummiuppakka inuuneq toqulu, pilluaqqussut perloqqussullu. Inuuneq qinerniaruk illit kinguaassatillu inuuginnaqqullusi! [Jehova] Guutit asassavat naalassallugulu attavigittuinnarlugulu!“ — 5 Mosesi 30:19, 20.

Aalajangiisinnaanermut tamatumunnga kiffaanngissuseqartitaagatta, imaanngilaq tamatigorluinnaq  kiffaanngissuseqartugut. Aamma pisussaaffeqarpugut silarsuaq eqqissisimaffioqqullugu allanngujuitsooqqullugulu Guutip pinngortitami ileqqussatigullu inatsisaanik maleruaanissamut. Inatsisit taakkua uagutsinnut iluaqutaasussatut inatsisiliarineqarput, unioqqutitsinerillu tamarmik ajortumik kinguneqarsinnaapput. Eqqarsaatigiinnaruk nunarsuup nusussisimanninnera soqutiginagu illup portusuup qaavanit pissikkuit qanoq pisoqassasoq! — Galatiamiut 6:7.

Aalajangiisinnaanermut kiffaanngissuseqaratta akisussaaffilerneqarpugut, akisussaaffimmik pinngortitat taamatut kiffaanngissuseqanngitsut akisussaaffiginngisaannik. Isumaliutersortartoq Corliss Lamont ima aperisimavoq: „Qanoq oqarsinnaavugut inuit ileqqussatigut akisussaaffeqartut, eqqunngitsuliorpatalu pillarlugit, akuerigutsigu . . . aalajangigaat iliuuserisaallu siumut aalajangeriigaasut?“ Isummat taakku imminnut assortuuttutut ipput. Uumasut eqqarsaatigeqqaarnagu iliuuseqartartut iliuutsiminnut akisussaatinneqarsinnaanngillat, soorluttaaq qarasaasiaq programmini naapertorlugu inerniliisoq akisussaatinneqarsinnaanngitsoq. Taamaattumik aalajangiinissamut kiffaanngissuseqaratta akisussaafferujussuaqarpugut iliuutitsinnullu akisussaatitaalluta.

Suli inunngunngitsugut qanoq inuussanersugut siumut aalajangereerlugu Jehova Guutip iliuutsitsinnut akisussaatippatigut tamanna asannittuliornerussanngilaq naapertuilluartuliornerussananilu, ilaa? Aammami taamaaliunngilaq „Guutimi tassaavoq asanninneq“, aamma „innarluitsuupput aqqutigisai“. (1 Johannesi 4:8; 5 Mosesi 32:4) Guutip aalajangiinissamut kiffaanngissusiliitigaluta, aalajangereersinnaanngilaa ’naassaanngitsumut kina annaatissanerlugu kinalu eqqartuutissanerlugu’ — siunissap siumut aalajangeriigaaneranik ajoqersuummik tapersersuisut oqarnerattut. Nammineq aalajangiinissamut kiffaanngissuseqartoqarpat siunissaq siumut aalajangeriigaasinnaanngilaq.

Biibilimi erseqqissumik takutinneqarpoq aalajangikkavut qanoq ingerlanissatsinnut sunniuteqartartut. Assersuutigalugu Guuti ajortumik iliortunik kajumissaarilluni ima oqarpoq: ’Saanniassasusi nungullusi ingerlavissinnit ajortunit ajortuliornissinnillu, . . . taava ajortumik pissanngilassi.’ (Jeremia 25:5, 6, 1900/1961) Sooq Guuti taamatut kajumissaarissava inuit ataasiakkaat inuunerminni atugassaat aalajangereersimagunigit! Tamanna asuliinnaassaaq. Aammattaaq Guutip oqaasiani ima allassimavoq: „Taamaattumik allamik isumataaritsi saanniarlusilu ajortisi piiarneqaqqullugit; taava [Jehovap] nalliutitissavai ullut inuummarissiffissat.“ (Apustilit Suliaat 3:19, 20) Jehovap nalunngereeruniuk inuit inuunerminni atugassatik allanngortissinnaanngikkaat, taava sooq kajumissaassavai allamik isumataaqqullugit saaqqullugillu?

Biibilimi eqqartorneqarpoq inuit ilaat Jiisusi Kristusimik kunngitut qilammi naalakkersueqateqarnissamut Guutimit qaaqquneqarsimasut. (Matthæusi 22:14; Lukasi 12:32) Biibilimili allassimavoq naggatissamut aalajaanngikkunik immikkut  pisinnaatitaaffik taanna annaassagaat. (Saqqummersitat 2:10) Sooq Guutip taakku qaaqqussavai aalajangereersimaguniuk qinigaassanngitsut? Malugikkittaaq Paulusip uppeqatiminut oqaasii uku: „Sallusuissut ilisimalereeraluarlugu piaaraluta ajortuliorutta taava pilliutissaqarunnaassaaq ajortit pillugit.“ (Hebræerit 10:26) Inuunerminni atugassaat Guutip aalajangereersimasuuppagit mianersoqqussut taamaattoq naleqassanngikkaluarpoq. Guutilli inuit ataasiakkaat Jiisusi Kristusimik qilammi naalakkersueqateqarnissaat siumut aalajangereersimannginnamiuk?

Siunissaq siumut aalajangeriigaq — inuttut ataasiakkaatut eqimattatulluunniit?

’Guuti . . . uatsinnik Kristusimi pilluaqqusivoq qilaap pilluaqqussutaanik anersaamut atasunik tamanik,’ apustili Paulusi allappoq, „silarsuaq tunngavilerneqanngikkallarmalli Guutip taassumuuna qinersimavaatigut . . . Siumut aalajangiisimavoq Jiisusi-Kristusikkut immini qitornaassuseqartikkumalluta.“ (Efesosimiut 1:3-5) Sunaana Guutip siumut aalajangereersimagaa, qanorlu isumaqarpa ilaat qinigaasimasut „silarsuaq tunngavilerneqanngikkallarmalli“?

Versinit taakkunannga erserpoq inuup siulliup Adamip kinguaavisa ilaat Kristusimik qilammi naalakkersueqateqartussatut Guutip qinersimagai. (Romamiut 8:14-17, 28-30; Saqqummersitat 5:9, 10) Kikkulli immikkut taamatut pisinnaatitaaffeqalissanersut inunngornissat ukiunik hundredelinnik sioqqullugu Jehova Guutip siumut aalajangereersimassappagu, inuit namminneq aalajangiinissamut kiffaanngissusiligaasimanerannut naleqqutinngilaq. Guutip siumut qinersimasai eqimattaapput, imaluunniit inuit katersat, inuit ataasiakkaajunngitsut.

Assersuutigisinnaavavut naalakkersuisut immikkoortortamik nutaamik, naalakkersuisut allaffeqarfissaannik, immikkut oqartussaassuseqarfiusumik pilersitsiniarlutik aalajangertut. Immikkoortortami tassani suliassat, pisinnaatitaaffiit qanorlu angitigissanersoq naalakkersuisunit aalajangerneqarput. Kiisami pilersinneqarmat tassani sulisut ima nalunaaruteqarput: „Naalakkersuisut aalajangigaat ullormi tassani ullulerneqarsimasoq naapertorlugu suliassiissutaat naammassiniarlugit maanna aallartippugut.“ Imatut paasineqassava naalakkersuisut aallaqqaammulli aalajangersimagaat suleqataasussat ataasiakkaat kikkuussanersut? Taamaakkunanngilaq. Taamatuttaaq Jehova immikkoortortamik immikkut ittumik, Adamip ajortuliaata sunniutaanut iluarsiissutissamik, pilersitsiniarluni aalajangersimavoq. Siumut aalajangerpaa immikkoortortami tassaniissasut inuit eqimattat, aalajangernaguli ilaasortaasut ataasiakkaat kikkuussanersut. Taakkua kingusinnerusukkut qinerneqassapput, inuttullu ataasiakkaatut namminneq inuunerminni aalajangigaat aalajangiisuussapput inaarutaasumik iluarisaassanersut iluarisaassannginnersulluunniit.

Silarsuaq suna Paulusip eqqarsaatigaa ima allakkami: „Silarsuaq tunngavilerneqanngikkallarmalli Guutip taassumuuna qinersimavaatigut“? Uani Paulusip silarsuaq pisaa tassaanngilaq Guutip Adami Evalu pinngortikkamigit tunngaviligaa. Silarsuarmi tassaniittut tamarmik ’ajunngingaarput’, ajorteqanngivippoq ajortunngorsimasoqanngivillunilu. (1 Mosesi 1:31) Tassani ajortimit ’utertitaanissamik’ pisariaqartitsisoqanngilaq. — Efesosimiut 1:7.

Silarsuaq Paulusip immikkut eqqarsaatigisaa, tassaavoq Adamip Evallu naatsiivimmi Edenimi pikitsitsinerisa kingorna pilersoq — silarsuaq Guutip aallaqqaammut siunertaanit allaanerulluinnartoq. Silarsuaq taanna pilerpoq Adami Evalu meerartaarmata. Silarsuaq taanna tassaapput inuit Guutimut takornartaasut ajortimullu ajortunngorsimanermullu inussiaataasut. Silarsuaavoq utertinneqarsinnaasoq — Adamili Evalu piaaralutik ajortuliortut utertinneqarsinnaanngillat. — Romamiut 5:12; 8:18-21.

Jehova Guutip Edenimi pikititsinerup kingorna pissutsit atuutilersut ingerlaannaq iliuuseqarfigisinnaasimavai. Pisariaqartitsisoqalerniariarmat Guuti aalajangerpoq immikkut ittumik immikkoortortaliorniarluni — naalagaaffimmik missiarsikkoortumik Jiisusi Kristusimik siulersorneqartumik — inuiaat ajortimit Adamimeersumit annaanneqarnissaat siunertaralugu. (Matthæusi 6:10) Guuti taamaaliorpoq Adami Evalu suli meerartaanngitsut, „silarsuaq tunngavilerneqanngikkallarmat“, silarsuaq utertinneqarsinnaasunik inoqalinngikkallarmat.

Uagut inuusugut iliuusissagut naammassiniarlugit pilersaarut pisariaqartikkajupparput. Siunissap siumut aalajangeriigaaneranik ajoqersuummut ilaavoq Guutip annikitsualutsigut allaat silarsuarmut  pilersaaruteqarfiginninneranik, pilersaarummik suut tamarmik siumut aalajangeriigaanerannik, eqqarsaat. Roy Weatherford naapertorlugu „isumaliutersortartorpassuit isumaqarput pisussat tamarmik sukumiisumik pilersaarusiukkat kisimik Guutip Ataqqinartorsuuneranut naleqquttuusut“. Ilumut Guutip suut tamaasa siumut aalajangereertariaqarpai?

Jehova Guuti killeqanngitsumik pissaaneqarami asseqanngitsumillu ilisimassuseqarami, pinngortitami piumasamittut iliorsinnaatitaanerminnik atuinerisa kingunerisaannik pisut piareersimaffiginngisat naatsorsuutiginngisallu tamaasa iluatsittumik iliuuseqarfigisinnaavai. (Esaja 40:25, 26; Romamiut 11:33) Ingerlaannavik pilersaarusioqqaarani taamaaliorsinnaavoq. Inuit naammalluinnanngitsut killilimmik piginnaanillit assiginagit Guutip ajugaqanngitsup pisariaqartinngilai pilersaarutit sukumiisut piareersimasullu inuit ataasiakkaat nunami inuunerminni atugassaannik aalajangiisut. (Ussatit 19:21) Biibilimik nutsikkani arlalinni Efesosimiut 3:11-mi eqqartorneqarpoq Guuti ’naassaanngitsumik siunertaqartoq’, siumut aalajangeriikkamik pilersaaruteqarnera eqqartorneqarnani.

Qanoq illit siunissannut sunniuteqarsinnaasutit

Guutip nuna siunertaqarfigaa, siunertarlu taanna siumut aalajangeriigaavoq. Saqqummersitat 21:3, 4-mi ima allassimavoq: „Guuti ineqarfeqalerpoq inunni, taakkunani ineqarumaarpoq, innuttarissavaalu, Guutilu nammineq taakkunaniikkumaarpoq. Qulliillu tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.“ Aap, nuna taanna paratiisinngussaaq — Jehovap aallaqqaammut siunertarisaatulli. (1 Mosesi 1:27, 28) Una apeqqutaavoq: Illit paratiisimi tassaniissavit? Massakkut aalajangikkatit aalajangiisuussapput. Jehovap illit inuuninni atugassatit aalajanginngilai.

Guutip ernerata, Jiisusi Kristusip, utertitsissutitut pilliutaa, taassumunnga uppertunut tamanut naassaanngitsumik inuunissamik periarfissiivoq. (Johannesi 3:16, 17; Apustilit Suliaat 19:34, 35) „Ernermut uppertoq naassaanngitsumik inuuneqarpoq; Ernermut naalasseriitsup inuuneq takussanngilaa,“ Biibilimi allassimavoq. (Johannesi 3:36) Inuuneq qinersinnaavat Biibilimik atuartarnikkut Guuti, ernera, Guutillu piumasaa pillugit ilinniarnikkut, maleruarnerisigullu. Biibilimi saqqummersinneqartutut ilisimassutsip aqqutaatigut ingerlasut neriorsorneqarput ’najugaqassasut eqqissillutillu inuussasut perlussanik aarlerigisaqaratik’. — Ussatit 1:20, 33.  (wE 1/15 05)

[Qupp. 5-mi assiliartaq]

Uumasutut innatik inuit iliuutsiminnut akisussaapput

[Suminngaanneernera]

Nattoralik: Assiliisoq Cortesía de GREFA