Siunnersuutit pitsaanerpaat sumi nassaassaasut

SOORUNAMI kikkut tamarmik nalerisimaarnartumik inuuneqarusupput. Tamatumunnga tunngatillugu pingaartorujussuuvoq, silarsuarmi maani artornartorsiorfiusumi sumi pitsaasumik siunnersorneqarsinnaanissamik ilisimanninnissaq, taavalu siunnersuutinik malinninnissaq ilungersuutigalugu. Inuilli siunnersuutinik iluaqutaasunik tamatigut tusarnaarumasanngillat. Inuppassuit isumaqarput kikkut tamarmik nammineq piumanerusartik malillugu inuusinnaatitaasariaqaraluartut. Biibilimi oqaluttuarineqartoq naapertorlugu Saatani tassaasoq siullersaalluni Guutip kisimi oqartussaaneranut akerliliisoq, inunnik aappariinnik siullernik Guutimit siulersorneqarumajunnaarnissamut ussiisoq. Mosesimik allakkat siulliit 3:5-imi atuarsinnaavavut Evamut oqaasii: „Guutip nalunngilaa [orpik ajunngitsumik ajortumillu ilisimalersitsisoq] neriffigigaluarussiuk isisi uisitaajumaartut Guutisullu ilerumaartusi ajungitsoq ajortorlu nalujunnaassallugit.“

Adami Evalu pikitsitsinerup kingorna ilungersunartumik kingunerlutsitsinngivillutik namminneq ajunngitsuusorisamik maliinnarneratigut pilluarlutik inuusinnaappat? Naamik. Ingerlaannaq misigaat ajunngitsumik ajortumillu namminneq immikkoortitsisinnaasorinermik kinguneri pakatsinartut. Tamanna Guutip pissutissaqarluni iluarinngilaa, atugarliungaarlutillu inuulerput naammalluinnanngitsutut toqusussanngorlutik. (1 Mosesi 3:16-19, 23) Tamatta toqumit sunnerneqartarpugut. Biibilimi ima allassimavoq: „Inukkut ataasiinnakkut [Adamikkut] ajorti silarsuarmut [tikiuppoq], ajortikkullu toqu tikiulluni, taamatut toqu inunnut tamanut annguppoq tamarmik ajortuliormata.“ — Romamiut 5:12.

Naak Adamip Evallu aalajangiinnerat kissaatigisaanngitsunik kinguneqaraluartoq, inuppassuit suli qularaat inunnik Pinngortitsisup siunnersuutaanik malinninneq silatusaarnerusoq. Biibilimili allassimasutut ’Allakkat Guutimit anersaarfigineqartut [isumassarsiarititaasut, NV] tamarmik iluaqutaapput’ aamma ’ajunngitsuliornernut tamanut piginnaanngortissinnaalluta’. (2 Timotheusi 3:16, 17) Siunnersuutit Biibilimeersut malikkutsigik pilluarnerunissarput qularnanngilaq. Minnerunngitsumik ilaqutariittut aaqqissuussaanermut tunngatillugu taamaappoq.

 Aappariit ilumoorfigeqatigiinnerat

Biibili naapertorlugu Guutip aappariinnerup ataavartuunissaa siunertaraa. (1 Mosesi 2:22-24; Matthæusi 19:6) Aamma Biibilimi allassimavoq ’aappariit siniffiat minguitsuussasoq’, tassa aappariinneq mingutsinneqassanngitsoq aapparinngisamik atoqateqarnikkut. (Hebræerit 13:4) Soorlu nalugunanngikkit uiusut nuliaasullu amerlasuut najoqqutassaq taanna ullumikkut malinngilaat. Ilaasa suleqatiminnut qaninniarujoorneq ileqqoraat. Allat ilaquttaminnut sallusarput kinguaassiuutitigut ileqqorluttumik attaveqarnertik ingerlatiinnarniarlugu. Allaat ilaasa aappartik qimattarpaat inuusunnerusumik inooqateqalerniarlutik, inuusunnerusutut pilluarnerusutullu misigilernerarlutik, Verónicap uiatut allaaserisap matuma siuliani eqqaaneqartutut.

Kingunissaali puiorlugu imminut iluarusutseqqajaasarneq ataavartumik pillualersitsisanngilaq. Tamanna Ronaldip uppernarsarsinnaavaa. Upperilluinnarpaa ukiuni arfinilinni isertortumik arnaatini marlunnik meeraqarfigisani pillugu nuliani qimakkuniuk inuunini pitsaanerulissasoq. Sivitsunngitsorli taassuma qimappaa. Naggataatigut Ronald angajoqqaaminut nuuttariaqarpoq. Taassuma pissutsit atukkani nikanarsaataanerarpai. Taanna assersuutissarpassuit ilaannaraat. Namminissarsiorluni kissaatigisat maliinnarlugit iliuuseqarneq aatsaat taama avittoqartigineranut ilaqutariinnillu avissaartuuttoqartigineranut pissutaavoq, inersimasunik meeqqanillu inuttut kisissaangitsunik atugarliuuteqalersitsilluni.

Paarlattuanilli Biibilimi siunnersuutinik malinninneq pilluarnermik piviusumik kinguneqartarpoq. Tamanna Robertop uppernarsarsinnaavaa. Taanna oqarpoq: „Biibilimi siunnersuuteqarallartillugu nuliaralu aappariittuarpugut. Kajungerfigisaq qanorluunniit ilakkuminartigigaluarpat tunniutiinnarnikkut pilluarneq piviusoq anguneqarsinnaanngilaq. Biibilimi atuaqqissaarnikkut ilikkarsimavara ukiorpassuarni aapparisama pingaartinnissaa.“ Robertomut pingaartorujussuuvoq Biibilimi siunnersuut una: ’Inuusuttuunerminiilli nuliarisaminut ilumuunngitsuliortoqassanngitsoq.’ (Malakia 2:15) Sumut allamut tunngatillugu Biibilimi siunnersuutinik malinninneq iluaqutigaarput?

Meeqqanik perorsaaneq

Ukiut qulikkaat arlaqanngitsut matuma siorna inuppassuit angajoqqaat meeqqaminnik killilersuissannginnerannik isuma tapersersorpaat. Silatusaarnerusoraat meeqqat qanoq isumaqassanerlutik iliussanerlutillu namminneq aalajangertarpassuk. Siunertaraat meeqqat ineriartornerminni akornuserneqannginnissaat. Sumiiffiit ilaanni ilinniartitseriaaseq kiffaanngissuseqarnerusoq atulersinneqarpoq, soorlu atuartut namminneq aalajangersinnaallugu  atuassanerlutik atuassannginnerlutilluunniit, namminnerlu aalajangersinnaallugu qanoq sivisutigisumik anitsiassanerlutik ilinniartinneqassanerlutillu. Atuarfiup taamaattup politikkeraa „atuartut inersimasunit akuliuffigineqaratik namminneq iliuusererusutaminnik iliorsinnaatitaanissaat“. Ullumikkut siunnersuisartoqarpoq perorsaanermi pillaariaatsit ilaasa iluaqutaanerannik suli qularutiginnittunik, allaat pissutsini angajoqqaanit asannilluni perorsaanertut pisariaqartutut isigineqartuni.

Tamanna qanoq kinguneqarpa? Inuppassuit isumaqarput meeqqanik perorsaanermi maleruutiinnajassutsip meeqqat ’ingasattumik’ kiffaanngissuseqartikkai, maleruutiinnajassuserlu taanna pisuusoq pinerluttuliornerup ikiarornartumillu atornerluinerup malunnarsiartuinnarnerannut. USA-mi isumasiuinermi aperineqartut 70 procentingajai isumaqarput meeqqat inuusuttullu siunnersorneqartariaqarnermissut angajoqqaaminnit siunnersorneqanngitsut. Sooq inuusuttuaqqat atuarfimmi aallaasersortarnersut allanillu tataannartunik pinerluttuliortarnersut paasiniaraluarlugu, inuppassuit „angajoqqaat aalajangersimanngippallaarnerat“ pisuutippaat. Allaallu kinguneri taama alianartiginngikkaluaraangata, angajoqqaat meeqqallu meeqqanik perorsaanermik paatsuuinerup kinguneri annikilliornartut atortarpaat.

Tassunga tunngatillugu Biibilimi qanoq allassimasoqarpa? Tassani siunnersuuteqarpoq angajoqqaat asannittumik aalajangersimasumillu oqartussaanerminnik atuissasut. Assersuutigalugu ima allassimavoq: „Sianiissuseq nukappissap uummataanut qilersugaavoq; unataatip anusinngorsaataasup tamanna taassumannga peersissinnaavaa.“ (Ussatit 22:15) Oqaaseq unataat angajoqqaat oqartussaanerannut assersuutaavoq. Tamatigut qajassuussilluni atugassaavoq, saamasumik imminullu naalakkersinnaassuseqarluni. Taamatut perorsaaneq asanninnermut ersiutaassaaq. Angajoqqaat taamatut oqartussaassuserminnik asannittumik sukannersumiunngitsoq atuigaangata meeqqat ingerlalluarnissaat ilimanarnerusarpoq.

Siunnersuummik tamatuminnga malinninneq kinguneqarluartarpoq. Arturo 30-nik ukiulik, katernaaq Mexicomilu najugalik ima oqarpoq: „Uanga qatanngutikkalu ataatama erseqqissaavigaatigut anaanagalu ilaqutariinni oqartussaallutik. Naveernissatsinnut siunnersornissatsinnullu nangaanngisaannarput. Atorfissaqartitsigaangatta oqaloqatiginissatsinnut piffissaqartuaannarput. Maanna inersimasunngorlunga nuannersumik inuunera qujamasuutigaara, nalunngilaralu siunnersorneqarluartarsimanera pingaartumik pissutaasoq.“

 Siunnersuutit iluaqutaanerpaat iluaqutigikkit

Siunnersuutit inuup iluaqutigisinnaanerpaasai Guutip oqaasiani Biibilimiipput. Ilaqutariinermut tunngasuinnaanngitsunik siunnersuuteqarpoq. Aammattaaq assigiinngitsorpassuartigut iluaqutigisarparput, silarsuarmi amerlanerit Guutimit siunnersortikkumanngiffianni, qanoq iliortariaqarnitsinnik ilinniarfigalugu. Taanna tassaavoq ilisimassutsimut pilerfiusoq pingaarnerpaaq iluaqutissatsinnillu siunnersuisoq.

Pinngortitsisup, Jehova Guutip, tussiaasiortoq Daavi aqqutigalugu imaattumik neriorsorpaatigut: „Ilinniartissavakkit ilitsersorlutillu ingerlavissannik. Siunnersussavakkit, isigiuassavakkillu.“ (Tussiaat 32:8) Itinerusumik eqqarsaatigisimaviuk Pinngortitsisup navianartunut illersorniarluta nakkutigiuaraatigut qanoq isumaqarnersoq? Taamaattumik tamatta immikkut imminut ima aperisariaqarpugut: ’Jehovap sernissuilluni siulersuinera maniguullunga malikkusuppara?’ Guutip oqaasiani asannittumik ima kajumissaarneqarpugut: „[Jehova] tatigiuk uummatikkut iluunngarlutit, namminerlu paasisimasaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.“ — Ussatit 3:5, 6.

Aalajangeriataallaqqissuunissaq iliuuseqarnissarlu pisariaqarpoq Jehovamik ilisarisimannilerniaraanni, tamannali ajornanngilaq Biibili atorlugu. Guutip inooriaasereqqusaa ’inuunermut matumunnga piumaartussamullu immini neriorsuutitaqarpoq’ aammalu ’iluanaarnarluni’, iluaqutissartai eqqarsaatigalugit. — 1 Timotheusi 4:8; 6:5b

Biibili aqqutigalugu paasisimalikkatit Biibilimillu maleruaalluni inuunerup iluaqqutissartai nuannarigukkit, taava Guutip oqaasiata atuarnera eqqarsaatigeqqissaarneralu inuuninni pingaarnerpaatilikkit. Maannakkut siunissamilu unamminiarnartut naapitassavit anigornissaannut iluaqutigissavat. Aammattaaq Guutip silarsuassaani nutaami inuunissamik neriuuteqalissaatit, kikkut tamarmik Jehovamit ajoqersorneqarfigisaanni eqqissinermillu nuannaarutiginningaarfigisaanni. — Esaja 54:13. (wE 8/15 04)

[Qupp. 5-mi assiliartaq]

Biibilimi siunnersuutit aappariit attaveqatigiinnerannut nakussatsissutaasinnaapput

[Qupp. 6-mi assiliartat]

Siunnersuutit pitsaasut Biibilimiipput inuunermillu nuannaarutiginninnissamut akornutaanatik

[Qupp. 7-mi assiliartat]

Biibilimi siunnersuutinik malinnittut inuuneq nuannersoq nuannaarutigisinnaavaat