’Nalusap nipaa’ mianersorfigiuk
’Nalusap nipaa’ mianersorfigiuk
„Nalusartik malikkumanngisaannassavaat, allaammi qimarratigissavaat nipaa nalugamikku.“ — JOHANNESI 10:5.
1, 2. (a) Maria Jiisusimit atermigut taaneqarami qanoq qisuariarpa, tamatumalu Jiisusip siusinnerusukkut oqaasii suut paasinarsisippai? (b) Suna iluaqutigalugu Jiisusi ungasillinaveersaarsinnaavarput?
JIISUSIP toqusunit makissimasup nammineq ilivermi imaqanngitsup eqqaani arnaq qeqartoq takulerpaa. Ilisarisimalluarpaa. Tassaana Maria Magdalene, ukiut marlungajaat tamatuma siorna anersaapiloqartoq ajorunnaarsitaa. Taamanimiilli Mariap Jiisusi apustiliilu malilerpai ullormullu pisariaqartitaannik isumassorlugit. (Lukasi 8:1-3) Ullorli taanna Maria qiavoq. Aliasungaarpoq Jiisusip toquneranik isiginnittuugami, maannalu allaat timaa peqanngilaq! Jiisusip ima aperaa: „Arnaq-aa, sooq qiavit? Kina ujarpiuk?“ Naatsiivilerisuutikkamiuk, ima akivaa: „Naalagaq, illit allamut nuussimagukku ilisimatinnga sumut ilinerit, aaniassagakku.“ Maanna Jiisusi ima oqarpoq: „Maria!“ Imminut saaffiginneriaasia ingerlaannaq ilisaraa. „Ajoqersuisoq!“ nuannaarluni nillerpoq eqitaarlugulu. — Johannesi 20:11-18.
2 Oqaluttuap tamatuma siusinnerusukkut Jiisusip oqaasii killitsinnartumik paasinarsisippai. Imminut savanut paarsisumut assersuussimavoq ajoqersukkanilu savanut assersuussimallugit, oqarlunilu savanik paarsisup savaatini aqqisigut taallugit qaaqqusarai nipaalu ilisarisaraat. (Johannesi 10:3, 4, 14, 27, 28) Savap paarsisuminik ilisarinnissinnaaneratulli, Mariap Paarsisuni, Kristusi, ilisaraa. Ullumikkut Jiisusip ajoqersugaanut aamma taamaappoq. (Johannesi 10:16) Sava tutsarissuugami paarsisuni ungasillinaveersaarsinnaavaa, taamatulli anersaakkut siuneqassuserput iluaqutigalugu Paarsisup Ajunngitsup, Jiisusi Kristusip, tumai atuarsinnaavavut. — Johannesi 13:15; 1 Johannesi 2:6; 5:20.
3. Jiisusip savanut ungalusaq pillugu assersuusiaata suut apeqqutaalersippai?
3 Assersuusialli tamatuma aamma ersersippaa savap inuit nipaat ilisarisinnaagamigit ikinngutiniinnaanngitsoq aammattaarli akeqqani ilisarisinnaagai. Tamanna pingaaruteqarluinnarpoq akeqqavummi peqqusersuujupput. Kikkuuppat? Qanoq periaaseqarpat? Qanoq taakkununnga illersorsinnaavugut? Apeqqutit taakku akissutissarsiniarlugit Jiisusi savanut ungalusaq pillugu assersuusiamini aamma qanoq oqarnersoq misissussavarput.
’Isertarfiatigut pinnani allakkulli isertoq’
4. Savanik Paarsisoq Ajunngitsoq pillugu assersuusiami savat kina malikkumavaat, kinalu malikkumanngilaat?
4 Jiisusi ima oqarpoq: „Isertarfiatigut isertoq tassaavoq savat paarsisaat. Isertarfimmimmi paarsisup taanna mappiuttarpaa, nipaalu savat tusartarpaat; taassumalu nammineq savaatini aqqisigut qaaqqusarpai anisittarlugillu. Savaatini tamaasa anisereeraangamigit siulersortarpai, savallu malittarpaat nipaa nalunnginnamikku. Nalusartilli malikkumanngisaannassavaat, allaammi qimarratigissavaat nipaa nalugamikku.“ (Johannesi 10:2-5) Malugiuk Jiisusip oqaaseq „nipaa“ pingasoriarluni atoraa. Marloriarluni savanik paarsisup nipaa pillugu, oqaaserli pingajussaanik atoramiuk ’nalusap nipaa’ pivaa. Jiisusip ’nalusaq’, imaluunniit ’takornartaq’ (1900/1961), kinaana pigaa?
5. Sooq takornartaq Johannesi, kapitali 10-mi eqqaaneqartutut ittoq inoroorsaarfigiumaneqanngila?
5 Jiisusip pinngilaa takornartaq inoroorsaarfigiumasaq — naak oqaaseq „inoroorsaarneq“-mik isumaqartoq Biibilip allassimaqqaarfiani atorneqartoq nutsiinnavillugu isumaqaraluartoq „takornartamut asanninneq“. (Hebræerit 13:2) Jiisusip assersuusiaani takornartaq qaaqqusaanngilaq. ’Savanut ungalusamut isertarfiatigut pinnani allakkulli ungaloq qarsullugu iserpoq.’ Taanna „tillittuuvoq piiaasuullunilu.“ (Johannesi 10:1) Guutip oqaasia naapertorlugu kina siullersaalluni tillittartunngorpa piiaasunngorlunilu? Tassaavoq Saatani Diaavulu, tamannalu Mosesimik allakkat siulliit-ni ersersinneqarpoq.
Takornartap nipaa tusarneqaqqaarmat
6, 7. Sooq Saatani takornartatut tillinniatullu eqqortumik taaneqarsinnaava?
6 Mosesimik allakkat siulliit 3:1-5-imi allaatigineqarpoq takornartap nipaa nunarsuarmi tusarneqaqqaarmat qanoq pisoqarnersoq. Oqaluttuaq naapertorlugu Saatanip arnaq siulleq, Eva, pulateriaarsuk aqqutigalugu saaffigaa tammarsaarillunilu oqaluffigalugu. Oqaluttuami tassani Saatani ’nalusamik’, imaluunniit takornartamik, taaneqanngikkaluarpoq, iliuusiisali takutippaat Johannesi, kapitali 10-mi Jiisusip assersuusiaani takornartamut assigiinngitsorpassuartigut assingusoq. Assigiissutaasa ilaat misissoriartigik.
7 Jiisusi oqarpoq takornartup ungalusami savat tammartinniakkani peqqusersusaartumik qanillattorai. Taamatulli Saatanip tammartinniakkani toqqaannanngitsumik, pulateriaarsuk aqqutigalugu, saaffigaa. Taamatut nakutitseriaaseqarnerata qulaarpaa Saatani tassaasoq qaaqqusaanani pulaartoq peqqusersooq. Aammattaaq assersuusiami takornartap savat piginnittuimmit tillinnissaat siunertaraa. Allaat tillinniamit ajorneruvoq, tassami aamma „toqutsiniaannarluni aserorteriniaannarlunilu“ pivoq. (Johannesi 10:10) Saatani aamma tillinniaavoq. Evap tammartinneratigut ilumoorfiginninnera Guutimit tillippaa. Aammattaaq Saatani toqup piulerneranut pisuuvoq. Taamaattumik toqutsisuuvoq.
8. Saatani Jehovap oqaasianik pissutiginiagaanillu qanoq eqqunngitsumik oqaatiginnippa?
8 Saatanip unneqqaserluttuunera erseqqippoq Jehovap oqaasianik pissutiginiagaanillu eqqunngitsumik oqaatiginninneratigut. „Ilumut Guuti oqarpa naatsiiviup orpii neriffigissanngikkisi?“ Eva aperaa. Saatani uissuummerpasittuusaarpoq, soorlulusooq ima oqartoq: ’Guuti qanoq taama ingasatsigisinnaava?’ Ima nangippoq: „Guutip nalunngilaa [paarnaq] neriffigigaluarussiuk isisi uisitaajumaartut.“ Oqaasii uku malugikkit: „Guutip nalunngilaa.“ Saatani-una ima oqarniartoq: ’Guutip nalunngisaa uanga nalunngilara. Pissutiginiagai nalunngilakka, ajunngitsuunngillallu.’ (1 Mosesi 2:16, 17; 3:1, 5) Ajoraluartumik Evap Adamillu takornartap taassuma nipaa tununngilaat. Tusarnaarpaat imminnullu kinguaassaminnullu ajornartorsiortitsingaalerlutik. — Romamiut 5:12, 14.
9. Sooq ilimagisinnaavarput takornartat nipaasa ullumikkut tusarneqartarnissaat?
9 Ullumikkut Saatani Guutip innuttaanik tammartitsiniaanermini assingusumik periaaseqarpoq. (Saqqummersitat 12:9) Taanna ’sallumut ataataavoq’, taassumatullu Guutip kiffaanik tammartitsiniaasut taassumunnga qitornaapput. (Johannesi 8:44) Takornartat taakkua nipaat ullumikkut qanoq tusarneqarsinnaanersut misissoriartigik.
Takornartat nipaat ullumikkut qanoq tusarneqartartut
10. Takornartat nipaat ullumikkut qanoq tusarneqartarpat?
10 Tunngavilersuutit tammarsaarutaasut. Apustili Paulusi ima allappoq: „Ajoqersuutinit allanertanit nalinginnarnit tammartitaaqinasi.“ (Hebræerit 13:9) Ajoqersuutit qanoq ittut eqqarsaatigai? ’Tammartitaassutigisinnaagatsigik’ erseqqippoq Paulusip eqqarsaatigisai tassaasut ajoqersuutit anersaakkut oqimaaqatigiissaariunnaassutigisinnaasavut. Kina allanertanik taamaattunik ajoqersuuteqarpa? Paulusi utoqqaanertanut kristumiunut ima oqarpoq: „Allaat ilissi akornassinnit saqqummersoqarumaarpoq angutinik ilumoortuunngitsumik oqaluttunik ajoqersukkat imminnut malinnaatikkumallugit.“ (Apustilit Suliaat 20:30) Paulusip nalaanisulli ilagiinnut kristumiunut ilaasimagaluartut ullumikkut savanik tammartitsiniaapput ’oqalullutik ilumoortuunngitsumik’ — salluliuutinik ilumoortortalinnillu. Apustili Petrusi allappoq oqaatsit ’salluliuutit’ — oqaatsit ilumoortunut assingusut, aningaasaasatulli naleqanngitsigisut — atussagaat. — 2 Petrusi 2:3.
11. Petrusip allagaasa aappaat 2:1, 3-mi tunussisut periaasii anguniagaallu qanoq qulaarneqarpat?
11 Petrusip tunussisut periaasii aamma qulaarpai oqarluni ’taakkua ajoqersuinerluutit aserornartut anngiortumik eqqunniassagaat’. (2 Petrusi 2:1, 3) Jiisusip assersuusiaani tillinniap ’savanut ungalusamut isertarfiatigut pinnani allakkulli ungaloq qarsullugu iserneratulli’, tunussisut peqqusersusaartumik saaffigisarpaatigut. (Galatiamiut 2:4; Judasi 4) Suna anguniarpaat? Petrusi ima nangippoq: „Iluaqutissarsiffiginiarpaasi.“ Aap, tunussisut qanorluunniit oqaraluarunik, anguniagaviat tassaavoq ’tillinniaannarneq, toqutsiniaannarneq aserorteriniaannarnerlu’. (Johannesi 10:10) Takornartat taakku mianersorfigikkit!
12. (a) Ilagisartakkatsinnit takornartat nipaannik qanoq navianartorsiortinneqarsinnaavugut? (b) Saatanip periaasii takornartallu ullumikkut periaasii qanoq assigiissuteqarpat?
12 Ilagisartakkat ajortut. Takornartat nipaat aamma ilagisartakkavut aqqutigalugit tusarneqarsinnaapput. Ilagisartakkat ajortut ingammik inuusuttunut navianarput. (1 Korinthimiut 15:33) Eqqaamajuk Saatani Evamut — nukarlermut misilittagakinnerusumullu — saaffiginneqqaarmat. Isumaqalersippaa Jehova kiffaanngissusianik ingasattumik killilersuisoq, uffa piviusoq tamatuma akerlerigaa. Jehovap inuit pinngortitani asavai, ingerlalluarnissaallu kissaatigaa. (Esaja 48:17) Taamatulli takornartat ullumikkut ilissi inuusuttut isumaqalersinniarpaasi angajoqqaassi kristumiut killilersorpallaaraasi. Takornartat qanoq sunnersinnaavaasi? Niviarsiaraq kristumiu ima nassuerpoq: „Uppernera atuaqatima sanngiillisikkaluarpaat. Oqarfigiuarpaannga upperisara killiliisuusoq ingasaassisuusorlu.“ Ilumoortorli unaavoq: Angajoqqaassi asavaasi. Taamaammat atuaqatissi oqarfigigaangasi angajoqqaasi tatigisinnaanngikkisi Evap tammartitaaneratut tammartitaaqinasi.
13. Daavi silatusaartumik qanoq periaaseqarpa, qanorlu ilaarsinnaavarput?
13 Ilagisartakkat ajortut pillugit tussiaasiortoq Daavi ima allappoq: „Sallutuut peqatigisarinngilakka, peqquserluttut ilagineq ajorpakka.“ (Tussiaat 26:4) Takornartat ilisarnaatiginerusartagaat malugeqqiguk: Peqquserluttuupput; kinaassusertik isertortarpaat — Saatanip pulateriaarsuk atorlugu kinaassutsiminik isertuineratut. Ullumikkut inuit inuunerluttut ilaasa interneti atoraangamikku kinaassusertik siunertavitsillu isertortarpaat. Chatroomini inersimasut kinguaassiuutitigut maajunnartuliorumatuut allaat inuusuttuunerarsinnaapput allat napitinniarlugit. Inuusuttuususi, mianersoqqissaartariaqarpusi anersaakkut ajoquserneqaqqunasi. — Tussiaat 119:101; Ussatit 22:3.
14. Ilaannikkut nutaarsiassaqartitsiviit takornartat nipaannik qanoq tusarliisarpat?
14 Unnerluutiginninnerit eqqunngitsut. Naak nutaarsiassaqartitsiviit ilaasa Jehovap Nalunaajaasui eqqortumik tusarliuttarluaraat, ilaannikkut nutaarsiassaqartitsiviit takornartanit atorneqartittarput, taamaalillutillu taakkua nipaat paqumisuttut siaruartertarpaat. Assersuutigalugu nunami ataatsimi nutaarsiassaqartitsivinni salluliuutigalugu oqaluttuarineqarpoq Jehovap Nalunaajaasuisa sorsunnersuup kingulliup nalaani Hitlerip naalakkersuisui suleqatigisimagaat. Nunami allami Jehovap Nalunaajaasui oqaluffinnik aserorterisartutut unnerluutigineqarput. Nunani arlalinni Jehovap Nalunaajaasui nutaarsiassaqartitsivinnit unnerluutigineqartarput qitornaminnik nakorsartitsiumanngitsutut uppeqatiminnillu sualuttumik ajortuliortunik isiginngitsuusaarisutut. (Matthæusi 10:22) Inuilli eqqortuliorusuttut uagutsinnik ilisarisimannittut paasisarpaat unnerluutiginnissutit taamaattut eqqunngitsuusut.
15. Sooq silatusaarnerunngila tusagassiuutini saqqummiunneqartunik tamanik upperinninnissaq?
15 Unnerluutiginnissutit takornartanit siaruarterneqartut tusaraangatsigik qanoq periaaseqartassaagut? Silatusaassaagut Ussatit 14:15-imi siunnersuut una malikkutsigu: „Misilittagaqanngitsup tatigisarpai oqaaserineqartut suut tamaasa, silatuup alloriarnini sianigeqqissaartarpai.“ Tusagassiuutini saqqummiunneqartunik tamanik upperinninnissaq silatusaarnerunngilaq. Soorunami silamiut paasissutissaataat tamaasa apeqqusertanngilavut, eqqaamajuarparpulli „silarsuaq tamarmi Ajortumut naalatsigitittoq“. — 1 Johannesi 5:19.
„Misilissigik oqaatsit isumassarsiarititaasut“
16. (a) Savat pissusilersornerisa Johannesi 10:4-mi Jiisusip oqaasiisa ilumoorneri qanoq takutippaat? (b) Biibilimi qanoq kajumissaarneqarpugut?
16 Qanoq qulakkeersinnaavarput ikinngutaanersoq akeraanersorluunniit? Jiisusi oqarpoq savat savanik paarsisoq malittaraat „nipaa nalunnginnamikku“. (Johannesi 10:4) Tassa savat paarsisup isikkua pillugu malittanngilaat; nipaali pillugu malittarpaat. Nunat Biibilimi taaneqartut pillugit atuakkami oqaluttuarineqarpoq ilaanni tikeraaq oqartoq savat paarsisup atisai, nipaa pinnagu, ilisarisaraat. Savanik paarsisup taamatut oqaatiginnittup ilumuunnginnera uppernarsarniarlugu takornartarlu atisatik paarlaappaat. Takornartap savanik paarsisup atisaanik atisaqarluni savat qaaqquai, savalli qisuarianngillat. Nipaa ilisarinngilaat. Paarsisulli qaaqqummatik ingerlaannaq pangalillutik aggerput naak allatut atisalersorsimagaluartoq. Tassa savanut qaaqqusisup paarsisumut assingunera naammanngilaq. Soorlulusooq qaaqqusisup nipaa misileqqaartaraat paarsisup nipaanut assingunersoq. Guutip oqaasiani allassimavoq uagut aamma taamaaliussasugut; ’misilissavavut anersaat [oqaatsit isumassarsiarititaasut, NV] Guutimit pisuunersut.’ (1 Johannesi 4:1; 2 Timotheusi 1:13) Taamaaliornissatsinnut suna iluaqutigisinnaavarput?
17. (a) Jehovap nipaata ilisimaarilernissaa qanoq ilikkarsinnaavarput? (b) Jehova pillugu ilisimasaqarutta susinnaalissaagut?
17 Paasinarpoq Jehovap nipaa, imaluunniit tusarliussaa, ilisimalluarnerujartortillugu, takornartap nipigigaa paasisinnaanerujartussagipput. Taamatut qanoq ilisimasaqalersinnaanersugut Biibilimi ima oqaatigineqarpoq: „Nammineq siutinnik tusassavat tununnit oqaaseq: ’Aajuna aqqusineq, taanna ingerlavigissavarsi!’“ (Esaja 30:21) „Oqaaseq“ tunutsinneersoq taanna Guutip oqaasianeersuuvoq. Biibilimik atuarnerit tamaasa Paarsisorsuup, Jehovap, nipaa tusaasutut ittarparput. (Tussiaat 23:1) Taamaattumik Biibilimik atuaqqissaarnerujartortilluta Guutip nipaa ilisimaarilluarnerujartussavarput. Taamatut ilisimasaqarluarutta aamma takornartat nipigigaat ingerlaannaq paasisinnaalissavarput. — Galatiamiut 1:8.
18. (a) Jehovap nipaanik ilisimanninnermut suna ilaava? (b) Matthæusi 17:5-imi allassimasoq naapertorlugu sooq Jiisusip nipaa naalassavarput?
18 Jehovap nipaanik ilisimanninnermut aamma suna ilaava? Tusaaneq naammanngilaq, aammattaaq naalattariaqarpugut. Esaja 30:21-mi oqaatsit atuaqqikkit. Guutip oqaasiani ima allassimavoq: „Aajuna aqqusineq.“ Aap, Biibilimik atuaqqissaarnikkut Jehovap ilitsersuutai tusaasarpavut. Taava ima peqquaatigut: „Taanna ingerlavigissavarsi!“ Jehovap kissaatigaa tusakkavut naapertorlugit iliuuseqassasugut. Ilikkakkatta malinnerisigut takutittarparput Jehovap nipaa tusaaginnarnagu aammattaarli naalakkipput. (5 Mosesi 28:1) Jehovap nipaanut naalannermut aamma ilaavoq Jiisusip nipaanut naalanneq, Jehovami taama peqqusivoq. (Matthæusi 17:5) Jiisusip, Paarsisup Ajunngitsup, qanoq ilioqquaatigut? Ilinniartippaatigut ajoqersuganngortitsiortornissamik aamma ’kiffap ilumoortup silatuullu’ tatiginissaanik. (Matthæusi 24:45; 28:18-20) Nipaanut naalanneq naassaanngitsumik inuunissatsinnut aalajangiisuuvoq. — Apustilit Suliaat 3:23.
„Qimarratigissavaat“
19. Takornartat nipaat qanoq periaaseqarfigissavavut?
19 Takornartat nipaat qanoq periaaseqarfigissavavut? Savat periaaseqarnerattut. Jiisusi ima oqarpoq: „Nalusartik malikkumanngisaannassavaat, allaammi qimarratigissavaat.“ (Johannesi 10:5) Periaatsivut marluupput. Siullermik, takornartaq ’malikkumanngisaannassavarput’. Nakimaalluta itigartissavarput. Grækerisut allassimaqqaarfinni sakkortunerpaamik itigartitsinermi oqaatsit atorneqartartut atorneqarput. (Matthæusi 24:35) Aappassaanik, ’qimarratigissavarput’, imaluunniit tunussavarput. Paarsisup Ajunngitsup nipaanut naapertuutinngitsumik ajoqersuuteqartunut periaaseq tamanna eqqortutuaavoq.
20. Qanoq periaaseqassaagut (a) tunussisut sallutuut siumoraangatsigik? (b) ilagisartakkanit ajortunit navianartorsiortinneqaraangatta? (c) tusagassiuutini oqaluttuanik paqumisuttortalinnik tusagaqaraangatta?
20 Tunussisut eqqarsaataannik oqaatiginnittut siumoraangatsigik, Guutip oqaasiani ima allassimasutut iliorusuppugut: „Oqaaqqissaarpassi, qatanngutit, sianigeqqullugit ajoqersuummut ilassisimasassinnut akerliullutik avissaartortitsiniartut allanillu tammartitsisut. Taakku nigorsimaniarsigit!“ (Romamiut 16:17; Titusi 3:10) Taamatulli inuusuttut kristumiut ilagisartakkanit ajortunit navianartorsiortinneqartut Paulusip Timotheusimut inuusuttumut siunnersuutaa una malikkusuttarpaat: „Inuusuttut kajungerisaat ingalassimaniakkit [qimarratiginiakkit, 1900/1961].“ Tusagassiuutinilu eqqunngitsumik unnerluutigineqaraangatta Paulusip Timotheusimut allagaasa ima nanginnerat eqqaamasassavarput: ’[Takornartat nipaannik tusaasut] oqaluttuatoqqat sammisarilerumaarpaat. Illilli pututitaanaveersaarniarit.’ (2 Timotheusi 2:22; 4:3-5) Takornartat nipaat qanorluunniit tusarnertigigaluarpata, uppernitsinnik qajannarsisitsisinnaasut suulluunniit qimarratigissavavut. — Tussiaat 26:5; Ussatit 7:5, 21; Saqqummersitat 18:2, 4.
21. Takornartat nipaannik tusaajumanngitsut qanoq akissarsiassaqarpat?
21 Takornartat nipaannik tusaajumannginnermikkut kristumiut tanitat Paarsisup Ajunngitsup Lukasi 12:32-mi kajumissaarutaa malippaat. Tassani Jiisusi ima oqarfigai: „Erseqinasi savarpannguususi ukorsii; Ataatarsimi aalajangiisimavoq Naalagaaffik ilissinnut tunniukkumallugu.“ Taamatulli ’savat allat’ Jiisusip ima oqarnissaa qilanaaraat: „Qaagitsi, ataatama pilluaqqusai, naalagaaffik silarsuup tunngavilerneqarneraniit ilissinnut pisassarititaasoq kingornussarisiuk.“ (Johannesi 10:16; Matthæusi 25:34) ’Nalusap nipaa’, imaluunniit takornartat nipaat, tusaajumanngikkutsigu siunissami akissarsiassatta nuannissusissaa! (wE 9/1 04)
Uteqqiineq
• Jiisusip assersuusiaani takornartap allaatigineqarnera Saatanimut qanoq atorneqarsinnaava?
• Ullumikkut takornartat nipaat qanoq tusarneqartarpat?
• Takornartat nipigigaat qanoq paasisinnaavavut?
• Takornartat nipaat qanoq periaaseqarfigisariaqarpavut?
[Atuaqqissaarnermi apeqqutit]
[Qupp. 18-imi assiliartaq]
Takornartaq savanut saaffiginnikkami toqqaannartumik unneqqarissumillu pinngilaq
[Qupp. 21-mi assiliartaq]
Takornartat nipaat qanoq periaaseqarfigisarpavut?