Guutip ilumut isumassorpaatit

ISUMATSANNARTUMIK pisoqartillugu Guutimut ikioqqulluni kimigiiserluni qinunissaq pissusissamisuuginnarpoq. Nalunngilarpummi ’angingaartoq pissarsuusoq, paasisimasaqassusia killisissaanngitsoq’. (Tussiaat 147:5) Taanna ajornartorsiutitsinnik aniguisitsinissamut piginnaaneqarnerpaavoq. Aammattaaq Biibilimi kajumissaarneqarpugut ’uummammiugisavut tamaasa’ taassumunnga saqqummiuteqqullugit. (Tussiaat 62:9) Taamaappat taava sooq amerlasuut misigisarpat Guutip qinnutitik akinngikkai? Isumaqarpa Guutip soqutiginngikkaatigut?

Ilaasa Guuti avoqqaarilertortarpaat qisuariannginnguatsiarmat qinnutitillu tamarmik akineqanngimmata. Meeraanerilli kingumut eqqarsaatigeriaruk. Angajoqqaavit kissaatigisatit tamaasa tamatigut naammassinngikkaangatigit, immaqa pasillertarpatit asanngikkaatsit — ilaannimi meeqqat taamatut eqqarsaatersortarput. Massakkulli inersimasunngoreerlutit paasivat asanninneq assigiinngitsorpassuartigut ersersinneqarsinnaasoq, meeqqallu kissaatigisaanik tamanik tunniussisarneq asanninnermik pissuteqanngivissoq.

Aammattaaq Jehovap qinnutivut iluarisatsitut akiuaannartanngilai, uagutsinnulli qanoq asannitsigineranut tamanna takussutissaanngilaq. Tassami Guutip assigiinngitsorpassuartigut ersersittarpaa isumassorluta.

’Taassumani inuuvugut’

Pingaarnerpaamik Guuti pissutaalluni ’taassumani inuullutalu aalallutalu ippugut’. (Apustilit Suliaat 17:28, 1900/1961) Inuunermik tunimmatigut immini ersersitsereerpoq taassuma asalluta isumassoraatigut.

Aammattaaq Guutip tunivaatigut inuunitta piujuaannartinnissaanut pisariaqartunik. Atuarpugut: „Naatippatit ivikkat nersutaatit nerisassaat naasullu inunnut atuuttussat pilersillugit timiusat nunamit.“ (Tussiaat 104:14) Pinngortitsisup inuunermi pisariaqartitanik pingaaruteqarnerpaanik isumagiinnanngilaatigut. Avaaginnilluni tunivaatigut ’qilammit sialummik ullunillu naalluarfiusunik, qaarsillartittarluta uummativullu nuannaartittarlugit’. — Apustilit Suliaat 14:17.

Taamaattorli ilaat immaqa eqqarsarput: ’Guutip taama asatigigunisigut sooq taava naalliunnerput akueraa?’ Akissutaa nalunngiliuk?

Guuti pisuua?

Inuiaat naalliuutaasa annersaat nammineq pisuulluni pilersitaapput. Assersuutigalugu iliuutsit aalajangersimasut ilaasa navianartortaqarsinnaaneri ilisimaneqarluarput. Taamaakkaluartorli ilaat kinguaassiuutitigut kanngunartuliortarput, imigassamik ikiaroornartumillu atornerluisarlutik, tupatortarlutik, timersuutini ingasattuni peqataallutik, sukkavallaartumik biilerlutik ilaalu ilanngullugit. Taama navianarsinnaatigisumik pissuseqarnerup kingunerippagu anniaateqarneq, kina taava pisuua? Guutiua, imaluunniit taanna silatusaanngitsoq? Guutip oqaasiani isumassarsiarititaasumi allassimavoq: „Tammaqinasi! Guuti mitaatigeqqunngilaq. Inuup siaruartikkani aamma katersorumaarpai.“ — Galatiamiut 6:7.

Aammattaaq akuttunngitsunik inuit inoqatiminnut ajoqusiisarput. Naalagaaffik sorsulluni nalunaaraangat kingunerinut alianartunut Guuti assuarineqarsinnaanngivippoq. Pinerluttup nunaqqatini saassuppagu taannalu aqqunarpat toqutaalluniluunniit, taava Guuti pisuua? Soorunami naamik! Kisermaassilluni naalakkersuisoq naqisimannippat, innuttanilu anniartillugilluunniit toquppagit, taava Guuti pisuutissavarput? Tamanna naleqqutinngilluinnassaaq. — Oqaluussisartup oqaasii 8:9.

Millionillimmi neriuutissaqaratik piitsuullutik kaallutillu inuusut? Guuti pisuua? Naamerluinnaq! Nunarsuup sinnilinnik tamatta inuussutissaqartissinnaalluarpaatigut. (Tussiaat 10:2, 3; 145:16) Tassa Guutip ajunngitsuutinik tukkorluni uatsinnut tunniusaanik agguaanerlunneq kaannersuarmut  piitsuussusermullu pissutaavoq. Tassa inuup namminissarsiornera ajornartorsiutit aaqqinneqarsinnaannginnerannut pissutaavoq.

Tunngaviusumik pissutaasoq

Kinami ilaasa utoqqalineq pissutaalluni napparsimalernerannut toqunerannulluunniit pisuua? Immaqa isumaqarputit aamma Guutip pisuussutigigaa, taamaanngilarli. Guutip inuit pinngortikkamigit siunertarinngilaa utoqqalissasut toqullutillu.

Inuit aappariit siulliit, Adami Evalu, Edenip naatsiivianut pisinneqarmata Jehovap periarfissippai nunami paratiisiusumi naassaanngitsumik inuunermik. Ersarissumilli kissaatigaa nunarsuaq inunnit tunniunneqartunik pingaartitsiumasunit najugarineqassasoq. Taamaattumik inuuinnarumasunut piumasaqaatit aalajangersimasut eqquutitittariaqarpaat. Adami Evalu Pinngortitsisertik asannittoq naalattuartillugu paratiisimi najugaqarsinnaatitaapput. — 1 Mosesi 2:17; 3:2, 3, 17-23.

Alianaraluartumik Adami Evalu pikitsitsipput. Eva aalajangerpoq Saatani Diaavulu tusarnaarniarlugu. Taassuma salloqittarpaa oqarlunilusooq Guutip ajunngitsunik erliguukkaa. Taamaattumik namminersornialerpoq misiliillunilu „Guutisut ilerumaarluni ajunngitsoq ajortorlu nalujunnaassallugit“. Pikitsitsinera Adamip ilannguffigaa. — 1 Mosesi 3:5, 6.

Adami Evalu taamatut ajortulioramik naassaanngitsumik inuunissaminnut qinngaqqunnarnertik takutippaat. Ajortip kinguneri ajunaarutaasut malugilerpaat. Nukillaariartorput inuummarikkunnaariartorlutillu, naggataatigullu toqupput. (1 Mosesi 5:5) Pikitsitsinerli ilungersunarnerujussuarmik kinguneqarpoq. Adamip Evallu ajortuliornerata kinguneri suli atorpavut. Apustili Paulusi allappoq: „Soorlu inukkut ataasiinnakkut [Adamikkut] ajorti silarsuarmut tikiuttoq ajortikkullu toqu tikiulluni, taamatut toqu inunnut tamanut annguppoq tamarmik ajortuliormata.“ (Romamiut 5:12) Aap, Adamip Evallu pikitsitsinerat pissutaalluni toqu inunnut silarsuarmiunut tamanut nappaatitut ajortutut tikiuppoq.

Guutip uagutsinnik isumassuineranut uppernarsaatissat sakkortunersaat

Inuit maanna siunissamut neriuutissaaruppat? Naamerluinnaq; tamassaavorlu Guutip uagutsinnik isumassuineranut uppernarsaatissat sakkortunersaat. Naak Jehovamut  namminerminut akisugaluaqisoq, inuit kinguaariit ajortimit toqumillu utertinneqaatissaat isumagaa. Utertitsissutissaq tassaavoq Jiisusip inuunera naammalluinnartoq, pilluta kajumilluni tunniunneqartoq. (Romamiut 3:24) Taamaattumik apustili Johannesi ima allappoq: „Guutimmi silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.“ (Johannesi 3:16) Asanninnermik ersersitsineq nalissaqanngitsoq tamanna pissutaalluni inuit naassaanngitsumik inuunissamut periarfissaqaqqilerput. Paulusi Romamiunut allappoq: „Soorlu inuup ataatsip ajortuliornera inuit tamarmik pillagassanngortitaanerannik kinguneqartoq, taamatut inuup ataatsip naammassisaa iluartoq iluarninngorpoq inuuninngorlunilu inunnut tamanut.“ — Romamiut 5:18.

Qularissanngilarput Guutip piffissarititaa nalliuppat anniaatit toqulu nunamit peerutissasut. Pissutsillu Saqqummersitat-ni siulittuutigineqartut piviusunngussapput: „Guuti ineqarfeqalerpoq inunni, taakkunani ineqarumaarpoq, innuttarissavaalu, Guutilu nammineq taakkunaniikkumaarpoq. Qulliillu tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.“ (Saqqummersitat 21:3, 4) Immaqa oqarputit: ’Uanga nalinni pinavianngilaq.’ Kisianni eqqortoq unaavoq illit nalinni pisinnaasoq. Guutillu akuliutinnginnerani toqussagaluaruilluunniit toqusunit makitissinnaavaatit. (Johannesi 5:28, 29) Tamanna Guutip uagutsinnut siunertaraa, tamannalu pisussaavoq. Taamaattumik eqqunngitsuuvoq oqassalluni Guutip isumassunngikkaatigut.

„Guuti qaninniarsiuk“

Tuppallernarpoq nalunagu ajornartorsiutinut, inuit atugarliuutaannut tamanut, ataavartumik siunissaq ungasinnerusoq eqqarsaatigalugu, Guuti siulliulluni iliuuseqarsimasoq. Maannakkorpiarmi? Qanoq iliorsinnaavugut asasatta ilaannik annaasaqarutta, meeqqattaluunniit arlaat napparsimalerpat? Nappaatit toqullu piuneerunnissaannut Guutip piffissarititaa suli nalliutinngilaq. Biibilimi takutinneqarpoq taamatut pisoqannginnerani utaqqilaarallartariaqartugut. Guutilli puigunngilaatigut. Ajoqersugaq Jaaku oqarpoq: „Guuti qaninniarsiuk, taava taanna ilissinnut qanillissaaq.“ (Jaaku 4:8) Aap, Pinngortitsisup kajumissaarpaatigut qanittumik imminut attaveqaleqqulluta, taamaaliortullu taassumannga ikiorneqanngitsutut tapersersorneqanngitsutullu misiginngisaannassapput, allaat artornarnerpaanik pisoqartillugu.

Qanoq Guutimut qanillisinnaavugut? Ukiut 3000-it matuma siorna kunngi Daavi assingusumik aperivoq. Taanna oqarpoq: „[Jehova], kinaava . . . qaqqanni illernartumi inissarsisinnaasoq?“ (Tussiaat 15:1) Daavip nangilluni apeqqut nammineq akivaa: „Tassaavoq taanna assuarnaalluni inuusoq, innarluitsumik iliortoq ilumoortumillu uummammit pisumik oqalulluni, oqaasipalaanik angallassinngitsoq, tullimi ajoqutissaanik iliunngitsoq.“ (Tussiaat 15:2, 3) Allatut oqaatigalugu Jehovap aqqutikkut, Adamip Evallu narrugisaatigut, ingerlasut tamaasa ilassisarpai. Peqqusaminik iliortut qanippai. — 5 Mosesi 6:24, 25; 1 Johannesi 5:3.

Qanoq Guutip peqqusaanik iliorsinnaavugut? Qanoq paasisariaqarami ’inuuneq ajunngeqisoq Guutimullu annaassisitsinnut iluarinartuusoq’, tamanna paasiniartariaqarparput, taavalu aalajangerluta tamanna malillugu iliorniarluta. (1 Timotheusi 2:3) Tamanna isumaqarpoq Biibilimik, Guutip oqaasianik, eqqorluartumik ilisimasaqarneq pigiliuttariaqaripput. (Johannesi 17:3; 2 Timotheusi 3:16, 17) Qarsupinngitsumik Biibilimik atuarnissaq pisariaqarpoq. Paulusip nalunaajaataa tusarnaaramikku itsaq Berøami juutit iliorsimanerattut iliortariaqarpugut. Taakku pillugit allassimasoqarpoq: „Ullut tamaasa Allakkat misissuiffigisarpaat paasiniarlugu ilumut taamaannersut.“ — Apustilit Suliaat 17:11.

Ullumikkuttaaq taamaappoq. Peqqissaartumik Biibilimik misissuisarnerput Guutimik upperinninnitsinnut nakussatsissutaasarpoq taassumunngalu qanittumik attaveqarnitsinnut ineriartuutaasarluni. (Hebræerit 11:6) Aamma erseqqissumik paasisarparput Jehova inunnik qanoq isumaginnittartoq — massakkorluinnaq iluaqusiisarnera kisiat eqqarsaatiginagu, pingaartumilli siunissaq ungasinnerusoq eqqarsaatigalugu eqqortumik eqqarsartaaseqartut tamarmik iluaqutigisinnaasaannik.

 Kristumiut ataasiakkaat Guutimut qanittumik attaveqartut oqaasii tusaariakkit: „Jehova asaqaara, aamma qujassutissaqarfigeqaara,“ 16-inik ukiulik Danielle oqarpoq. „Asannittunik angajoqqaaqartippaanga Jehovamut asanningaartunik, oqaasiinillu ilinniartippaannga.“ Kristumiu Uruguayimiu allappoq: „Uummatiga qujamasunnermik ulikkaarpoq, Jehovalu qutsavigerusuppara ajunngissusia pisassarinngisaraluaq ikinngutaaneralu pillugit.“ Guutip aamma kissaatigaa meeqqat qanillissagaanni. Gabriela arfineq-marlunnik ukiulik oqarpoq: „Guuti silarsuarmi tamanit annermik asavara! Nammineq Biibileqarpunga, Guuti Jiisusilu pillugit ilinniarnera nuannaraara.“

Ullumikkut millionillit uummatimikkut iluunngarlutik tussiaasiortutut ima oqarput: „Guuti qanillugu inuuneq tassa pilluarnartora.“ (Tussiaat 73:28) Ajornartorsiutimik anigornissaannut ikiorneqarsimapput, neriuuteqarlutillu qularnaatsumik nunami paratiisiusumi inuunermik naassaanngitsumik. (1 Timotheusi 4:8) ’Guutimut qanillinissaq’ soormi anguniarukku? „Ilatsinnit kimilluunniit ungasinngitsoq“ neriorsoqqissaarneqarpugut. (Apustilit Suliaat 17:27) Aap, Guutip ilumut isumassorpaatigut. (wE 7/1 04)

[Qupp. 5-mi assiliartat]

Jehovap uagutsinnik isumassuinera assigiinngitsorpassuartigut ersersinneqartarpoq

[Qupp. 7-mi assiliartaq]

Allaat meerannguit Guutimut qanillisinnaapput

[Qupp. 7-mi assiliartat]

Jehovap pinertusaarnissatsinnut ikiussavaatigut. Piffissarititani nalliuppat nappaatit toqulu piiassavai