Ajornartorsiutitsinnut Guuti pisuutissinnaavarput?

MARIONIP panini inersimasoq perulunnartumik qaratsamigut ajoqusermat allarpassuit iliuuserissagunagaattut iliorpoq. * Guutimut ikioqqulluni qinuvoq. „Eqqaamanngilara qangaluunniit taamak ikiortissaqanngitsutut kisimiittutullu misiginikuunerlunga,“ oqarpoq. Kingusinnerusukkut pania ajornerulerpoq, Marionillu Guuteqarnera qularilerpaa. „Sooq taama pisoqassava?“ aperivoq. Paasisinnaanngilaa Guutip asannittup isumassuisullu sumiginnarsinnaammani.

Marionip qisuariarnera allanit allaanerungaanngilaq. Silarsuarmi tamarmi inuit amerlasuut misigisimapput atorfissaqartitsinerpaaffimminni Guutip sumiginnarsimagaatik. „Suli paasiuminaatsippara sooq Guutip taama pisoqartikkaa,“ arnaq Lisamik atilik, ernuttami toqutaanerata kingorna, oqarpoq. „Guuti upperiunnaavinngilara, kisianni qangatut uppertigiunnaarpunga.“ Arnaq erninnguaminut atatillugu pisimasumik alianartumik eqqorneqartoq, imatut oqarpoq: „Pisimasup kingorna Guutip tuppallersanngilaanga. Sunnguamilluunniit misiginneqatiginngilaanga.“ Taanna nangippoq: „Guuti qaquguluunniit isumakkeerfigisinnaanngilara.“

Allat Guutimut narrutsassimapput silarsuarmi avatiminni takusatik pisut pissutigalugit. Takuaat piitsuungaarneq kaannersuaqarnerlu, qimaasut neriuutissaaruttut, aids pissutaalluni iliarsunngorsimasut kisissaanngitsut, inuillu millionillit nappaatinit allanit eqqungaasut. Taakku assingusullu alianartut allat pissutigalugit Guuti assuaraat, iliuuseqarniarunannginnera pissutigalugu.

Ilumoortorli unaavoq ajornartorsiutinut inuiaat naalliuutaannut Guuti pisuutinneqarsinnaanngimmat. Allaat silatusaarneruvoq upperissallugu Guutip erniinnaq anniaatit ilaqutariinnik inuinnaasunik eqquisimasut naggaserumaarai. Ilanngutassiami tulliuttumi Guutip ilumut isumassoraatigut sammineqassaaq.

[Quppernerup ataani ilanngussaq]