Nassuerneq anersaakkut peqqississutaasinnaavoq

„NIPANGIINNARAMA timiga taroriartorpoq anersaarulunninni ulloq tamaat. Nanertungaarmanga assavit ullukkullu unnuakkullu inuussutiga sakkukilliartorpoq aasap kiassuanit.“ (Tussiaat 32:3, 4) Oqaatsit taakkua ersersippaat Israelikkut kunngiata Daavip misigissutsimigut erloqingaarnera. Imminut erloqisinnera pineqarunarpoq sualuttumik ajortuliaminik nassuerutiginninani isertuigami.

Daavi asseqanngitsunik piginnaaneqarpoq. Sakkutuujuvoq qunusuitsoq, naalakkersuisuulluni pikkorissoq, taalliortuulluni nipilersortartuullunilu. Taamaattoq piginnaanini tatiginagit Guutili tatigaa. (1 Samueli 17:45, 46) Jehovamut ’Guutiminut uummammigut iluunngarluni ilumoorpoq’ soorlu Biibilimi paasineqarsinnaasoq. (1 Kunngit 11:4) Ajortuliaasali ilaat sualuttuppoq, tamannalu Tussiaat 32-mi pigunarpaa. Pissutsit ajortuliorneranik kinguneqartitsisut misissoqqissaarnerat ilinniutigilluarsinnaavarput. Mianersoqquneqarpugut suut ajortuliorfiginaveersaartariaqarigut aamma sooq Guutimut attaveqaqqilerniarluta ajortuliatsinnik nassuerutiginninnissarput pisariaqartoq.

Kunngi ilumoortoq ajortuliorpoq

Israelikkut Ammonikkunnut sorsutsillugit Daavi Jerusalemimiiginnarpoq. Unnuit ilaanni illussaarsuami qaavani pisorusaartilluni angerlarsimaffimmi eqqaaniittumi arnaq pinnersoq uffartoq takulerpaa. Imminut killilernani pilerissuseqangaalerpoq. Paasigamiuk arnaq taanna tassaasoq Batseba Uriap sakkutuumi ilaata nulia qaaqqutippaa allasiorfigalugulu. Kingunerileraa Batsebap naartunerminik Daavi nalunaarfigaa. — 2 Samueli 11:1-5.

Daavi qilorartuummi pisaritippoq. Ajortuliornertik paasineqarpat inatsisit naapertorlugit marluullutik toqumut pillagaasussaapput. (3 Mosesi 20:10) Taamaattumik pilersaarusiorpoq Batseballu uia Uria sorsuffimmit aggeqqullugu. Sorsunneq pillugu apersoqqissaarsinnarlugu Daavip Uria angerlaqquaa. Daavip neriuutigaa Uria Batsebap meeraanut ataataasorineqassasoq. — 2 Samueli 11:6-9.

Daavip ugguaatigisaanik Uria nuliaminut angerlanngilaq. Sakkutuut allat sorsunnermi tamaviaartillugit angerlarnissani takorloorsinnaanagu oqarpoq. Israelikkut sakkutuui sorsukkaangamik allaat nuliaminnik atoqateqarnaveersaartarput. Ileqqulersuutitigut minguittuujuartussaapput. (1 Samueli 21:6) Taava Daavip Uria neriartoqquaa aalakuulersillugulu, sulili nuliaminut angerlarumanngilaq. Iliuutsimigut aalajaatsukkut Uriap Daavip ajortuliornera sualuttoq assuaraa. — 2 Samueli 11:10-13.

Ajortuliornerminit Daavi pisaritippoq, maannalu qilorartuummit sukagussaalluni. Isumatsangaarluni isumaqarpoq ataasiinnarmik aaqqiissutissaqartoq. Uria sorsuffimmut utertippaa Joabimut sakkutuut naalagaannut nalunaarummik nassartillugu. Allakkat naatsut siunertaat erseqqippoq: „Uria inissiguk sallerpaanngorlugu tamaviaarnerpaamik akiuuffiusumut, tunuarlusilu imminiiginnarisiuk toqutaaqqullugu.“ Ajornanngitsuaqqamik kunngip pissaanilissuup Uria aallatippaa toqutaasussanngorlugu iliuutsinilu paasineqatsaaligunarlugit. — 2 Samueli 11:14-17.

Batsebap uiminik aliasuffia qaangiunniariartoq Daavip nuliartaaraa. Piffissaq ingerlavoq, meerarlu inunngorpoq. Pissutsini tamakkunani tamani Daavip ajortuliornini nipangiusimaannarpaa. Immaqa iliuuserisimasani eqqortutut isiginiaraluarpai. Uria sakkutuutut allatulli sorsunnermi ataqqinartumik toqutaannginnerpa? Aamma nuliaminukarumanani kunngiminut naalanngissimannginnerpa? Ajortuliorneq eqqortutut  isigineqalersinniarlugu ’uummat tatigisassaanngitsoq’ sunilluunniit nassuiaatissarsiortarpoq. — Jeremia 17:9; 2 Samueli 11:25.

Kukkunerit ajortuliortsisut

Daavi iluarnermik nuannarisaqartoq qanoq taama nakkaatsigisinnaava allasiorluni toqutsillunilu? Ajortuliornerup naatsiiassai piffissap ingerlanerani siaruarterneqarsimaneri nalunanngilaq. Sooq Daavip sakkuttuuni Jehovap akeraanut sorsunnermi tapersersorniarlugit ilaginngilai? Kisiannili Daavi illussaarsuamini qasuersaarpoq, tassanilu sorsunnermi pisimasut sualuttut ima soqutiginngitsigai sakkuttuup aalajaatsup nulianut illigussusipiloqarnini nangartarsinnaanagu. Ullumikkut kristumiunut ilumoortunut ilagiit peqatigalugit anersaakkut suliassanik aallussaqarneq nutaarsiassamillu nuannersumik aalajangersimasumik oqaluusseqataaneq illersuutaapput. — 1 Timotheusi 6:12.

Israelimi kunngiusoq inatsisit assilillugit allaqquneqarpoq ullullu tamaasa taakkunannga atuaqquneqarluni. Biibilimi imaattumik tunngavilersuuteqarpoq: „Allakkat imminiitissavai inuuninilu tamaat atuartassallugit ilikkaqqullugu [Jehova] Guutini mianerissagamiuk oqaatsillu inatsisit allassimaffianniittut inatsisillu taakku maleruaqqissaassagamigit. Makitasaarluni nunaqqatini anneruniarfigissanngilai peqqussutillu nigussanagit talerpimmut saamimmulluunniit.“ (5 Mosesi 17:18-20) Sualuttumik ajortuliorami Daavip peqqussut tamanna maleruarunanngilaa. Guutip oqaasianik aalajangersimasumik atuaqqissaartarutta eqqarsaatiginneqqissaartaruttalu ulluni atugarliungaarfiusuni makkunani eqqunngitsuliunnginnissatsinnut illersussavaatigut. — Ussatit 2:10-12.

Aammattaaq inatsisit qulit kingullersaat erseqqilluartoq imaappoq: ’Pileritsaatissanngilat tullivit nulia.’ (2 Mosesi 20:17) Daavi arlalinnik nuliaqarpoq panerfaqarlunilu. (2 Samueli 3:2-5) Arnalli allap kajungernartup pileritsaatinnginnissaanut tamanna illersuutigisimanngilaa. Oqaluttuap tamatuma eqqaasissagunarpaatigut Jiisusip oqaasiisa ilumoornerannik ima oqarmat: „Kialuunniit allap nulia pilerigalugu isigiguniuk taanna uummatimigut allasiorfigereerpaa.“ (Matthæusi 5:28) Eqqunngitsunik taamaattunik kissaateqaqinata uummatitsinniititaqaqinatalu, puiupallattartigilli.

Allamik isumataarneq nallittuinerlu

Daavip ajortuliorneranik oqaluttuaq isertuanngitsoq Biibilimut ilanngunneqanngilaq soqutigisat ileqqorluttut iluarisimaarutigeqqullugit. Oqaluttuap periarfissippaatigut Jehovap pissusimi malunnarnerpaat ilaannik — nallittuinermik — kimittuumik killinnartumillu takutitsineranik misigisaqarnissatsinnut. — 2 Mosesi 34:6, 7.

Batseba ernertaarmat Jehovap pruffiiti Natani aallartippaa Daavi ajortuliaanik eqqaaseqqullugu. Tamanna nallittuineruvoq. Daavi saaffigineqanngitsuuguni nipangiussiinnarsimagaluarunilu piffissap sivikitsup ingerlanerani ajortuliortarnermini manngertiinnarsinnaagaluarpoq. (Hebræerit 3:13) Qujanartumik Daavip Jehovap nallittuinera ajunngitsumik qisuariarfigaa. Natanip silatuumik erseqqissumilli oqaasiisa nalunngeqatiginnissusia qisuariartippaat, maniguullunilu nassuerpoq Guutimut ajortuliorsimalluni. Soqutiginarpoq allamik isumataarnermi unioqqutitsisimanerminillu nassuernermi kingornatigut Daavip Tussiaat 51, Batsebamik ajortuliorfiginninnerminut attuumassuteqartoq, erinniarimmagu. Sualuttumik ajortuliussagaluarutta qanortoq uummaterput manngertinngisaannartigu. — 2 Samueli 12:1-13.

Daavi isumakkeerfigineqarpoq, perorsartinnermulli ajortuliamilu kingunerinut illersorneqanngilaq. (Ussatit 6:27) Tamanna pissusissamisuuginnarpoq. Guutip suut tamaasa isiginngitsuusaartuugunigit najoqqutassiani sumiginnassagaluarpai. Taamaappallu palasiuneq sanngiitsoq Eli, ernerminik ajortunik naveersilaaginnartoq iliuusiinillu kanngutaatsunik ilaginnaasoq, assigissagaluarpaa. (1 Samueli 2:22-25) Taamaattumik Jehovap peqqissimisoq tunniusimanerminik ilumoortumik iluaqutiginnninneranit akornusernavianngilaa. Nallittuinera, imertut nillertutut inuummarissinartoq, ikiortigalugu ajortuliortup ajortuliami kinguneri qasusuilluni atorsinnaavai. Guutip isumakkeerfiginninnera inussiarnerneralu misigisimagaanni uppeqatinillu ineriartornartumik peqateqartaraanni nakussatsinnarpoq. Aap, Kristusip utertitsissutaa  tunngavigalugu peqqissimisup ’Guutip saammaannera angingaartoq’ misigiumaarpaa. — Efesosimiut 1:7.

’Uummat minguitsoq anersaarlu aalajaatsoq’

Soorlu Tussiaat 51-imit paasineqarsinnaasoq ajortuliani nassuerutigereeramiuk Daavi naleqanngitsutut misigisimaqqinngilaq. Nassuernermi kingorna Tussiaasiamini eqqissiallangaarnini Guutimillu aalajaatsumik kiffartuussiniarnini aalajangiusimalluinnarniarlugu ersersippaa. Assersuutigalugu taaneqarsinnaavoq Tussiaat 32 versi 1 imatut allassimasoq: „Pilluarpoq unioqqutitsinerminik isumakkeerfigineqartoq, ajortuliaminillu matooriffigineqartoq.“ Ajortuliorneq qanorluunniit sualutigisoq pineqaraluarpat ilumoorluni allamik isumataarneq pilluarnermik kinguneqartuaannarpoq. Ilaatigut allamik isumataarneq tamanna takutinneqarsinnaavoq Daavitut iliuuserisimasanut nammineq akisussaalluinnarluni. (2 Samueli 12:13) Jehovamut imminut iluartuutinnianngilaq allallu pisuutinniarnagit. Vers 5-imi allassimavoq: „Ajortuliannik anngiiarfigaakkit isertorunnaarlugulu kukkussutiga. Oqarpunga: Unioqqutitsinikka anngiiaatigissavakka [Jehovamut], ajortuliannillu isumakkeerfigaarma.“ Ilumoortumik nassuerneq eqqissiallannartarpoq ajortuliarisimasamit nalunngeqatiginnissut naalliutsinneqarunnaartarmat.

Jehovap isumakkeerfiginninnissaa qamannga pisumik qinnutigisinnarlugu Daavi ima nangippoq: „Uummammik minguitsumik pinngortitsiviginnga, Guuti, aammaarlutit anersaamik aalajaatsumik tuninnga!“ (Tussiaat 51:12) ’Uummat minguitsoq’ qinnutigigamiuk ersersippaa Daavip ajortuliorajunnini uummatimilu minguiarnissaanut aallaqqaataaniillu aallatinnissaminut Guutimit ikiortariaqarnini miserratiginagu. Imminut nalliginermut nakkaannarnissamininngarnit Guutimut kiffartuinnarniarluni aalajangerluinnarsimavoq. Ima qinuvoq: „[Jehova], qarlukka ammakkit qaninnit nersorneqaqqullutit.“ — Tussiaat 51:17.

Daavip ilumoorluni allamik isumataarnera kiffartuunniarluni aalajangersimalluinnartumik suliniuteqarnera Jehovap qanoq qisuariarfigaa? Daavi asannittumik qiimmaallannartumillu ima neriorsorpaa: „Ilinniartissavakkit ilitsersorlutillu ingerlavissannik. Siunnersussavakkit, isigiuassavakkillu.“ (Tussiaat 32:8) Ajortuliortup peqqissimisup misigissusiinik pisariaqartitaanillu Jehovap nammineq soqutiginninneranik oqaatsit taakku qularunnaarsitsipput. Daavi siuneqassuseqarnerulersinniarlugu, tunuliaqutaasunik takunnissinnaalersinniarlugu,  Jehova neriorsuivoq. Siunissami usserniarneqalissaguni piginnaanerup tamatuma takunnissinnaatissavaa iliuutsini qanoq kinguneqassanersut allanullu qanoq sunniuteqassanersut, silatuumillu iliuuseqartissavaa.

Sualuttumik ajortuliorsimasut tamarmik Daavip inuunerani pisimasoq tamanna qiimmassaatigissavaat. Ajortuliamik nassuerutiginnilluni ilumoorlunilu peqqissimilluni Jehova Guutimut naleqangaartumik attaveqaleqqittoqarsinnaavoq. Immaqa anniaateqarallartariaqarneq kanngusuuteqarallartariaqarnerlu nipangiussiinnarluni naalliuutigisassanit manngertiinnarnerullu pikitsitsilernerullu kingunipilugisassaannit perusunnarnerungaarput. (Tussiaat 32:9) Akerlianik Guutitsinnit asannillunilu naakkinnittumit ’Ataatamit nallittuisumit Guutimillu tuppallersaajuartumit’ isumakkeerfigineqarnermik misigineq iluarsinartoq misigiumaarparput. — 2 Korinthimiut 1:3. (wE 1/6 01)

[Qupp. 31-mi assiliartaq]

Uria toqutaatikkamiuk Daavi neriuppoq ajortuliaminik kingunerlutsitsissanani