Imarisai

Imarisai

Guutip naalliuutit naassaanngitsumik akuerinngilai

Guutip naalliuutit naassaanngitsumik akuerinngilai

 Guutip naalliuutit naassaanngitsumik akuerinngilai

SUMULLUUNNIIT qiviaraanni naalliuttoqarpoq. Ilaat namminneq pilersitaapput. Kinguaassiuutitigut atoqatigiinnermi naappaatipalaamik tunillatsittoqartarpoq imaluunniit tupamik ikiaroornarmillu atornerluinerup kinguneri misigineqartarput. Immaqalu peqqinartunik nerisaqatannginnamik peqqiilliulertarlutik. Naalliuuterpassuilli ilaat inuinnaat namminneq pisuussutiginngilaat: Sorsunnerit, inuiaqatigiit akersuunneri, inatsisaatsuliornerit, piitsuuneq, kaanneq nappaatillu. Anniaallu alla inuit namminneq sunniuteqarfiginngisaat tassaavoq utoqqalisarneq toqulu.

Biibilip ilisimatippaatigut ’Guuti tassaasoq asanninneq’. (1 Johannesi 4:8) Soormiuna Guutip asannittup naalliuuteqarnerujussuaq ukiuni hundredelinni akuerisimagaa? Qaqugu pissutsit aaqqiiviginiarpai? Apeqqutit taamaattut akissutissarsiumallugit inuit pillugit Guutip siunertaa misissortariaqarparput. Tamatuma paasitissavaatigut sooq Guutip naalliuutit akerigai ajornartorsiullu qanoq iliuuseqarfiginiarneraa.

Piumasamik iliorsinnaaneq

Inuk siulleq Guutip pinngortikkamiuk, timimik qarasaliinnakkamik pinngortitsinngilaq. Adami Evalu robottitut pinngortitaanngillat, namminnerli aalajangiisinnaatitaallutik pinngortitaapput.  Tamannalu tunissutaavoq ajunngingaartoq ’Guutimmi pinngortitani tamaasa isigai, takuaalu ajunngingaartut’. (1 Mosesi 1:31) Aap, ’naammalluinnartuupput suliai’. (5 Mosesi 32:4) Nammineq aalajaangiisinnaatitaanerput tamatta pingaarteqaarput, tassami qanoq eqqarsassanerluta iliuusissagullu nammineq aalajangersinnaanngikkutsigit nuannarinngilarput.

Namminerli aalajangiisinnaatitaanermik tunissut nuanningaartoq killeqanngila? Tamatumunnga Guutip oqaasia kristumiunut siullernut najoqqutassiivoq: „Kiffaanngitsuuvusimi, tamannalu iluaatsuliornermut isertuiniutigissanngilarsi, Guutilli kiffaasut atussavarsi.“ (1 Petrusi 2:16) Killeqarneq tamanut pitsaanerpaajuvoq, taamaattumik piumasamik iliorsinnaatitaaneq inatsisiliuuttariaqarpoq, taamaattoqanngippat inaatsisaannermik kinguneqaratarsinnaavoq.

Kia inatsisai?

Piumasamik iliorsinnaanerup naleqquttumik killeqarnissaa kia inatsisaata aalajangissavaa? Naalliuutinut Guutip akuerinninnerata apeqqummut tamatumunnga akissutip tunngavissaqartilerpaatigut. Guuti inunnik pinngortitsisuugami, nalunnginnerpaavaa inatsisit suut uagutsinnut allanullu iluaqutaasussatut naalattariaqarivut. Biibilip imatut oqaatigaa: „Uanga tassa [Jehova], Guutit, iluaqutaasunik ilinnik ajoqersuisoq, illit ingerlavigisassakkut ingerlatitsisoq.“ — Esaja 48:17.

Maluginiaqqissaagassarput unaavoq: Inuit Guuteqartussatut pinngortitaapput. Imatut pinngortippai inatsisiminut naapertuilluartunut naalakkunik aatsaat pilluartussanngorlugit. Guutip pruffiitia Jeremia oqarpoq: „Nalunngilara, [Jehova], inuup ingerlavissani nammineq aalajangigassarinngikkaa, angalaartup aalajangigassarinngilaa allorarnermi aalajaatsuutinnissaat.“ — Jeremia 10:23.

Guutip inuit pinngortitami inatsiseqartillugit pinngortippai, soorlu silaannaap nutsuineranut, taamatuttaaq ileqqussatigut inatsiseqartippai eqqisseqatigiissitsisussamik ataasiussuseqartitsisussamillu. Taamaattumik Guutip oqaasiani ima kajumissaarneqarpugut: „Naalagaq tatigiuk uummatikkut iluunngarlutit, namminerlu paasisimasaqassutsit tatigeqinagu!“ — Ussatit 3:5.

Taamaammat inuit inuiaqatigiinnik aqutsiniarnerigalui Guutimik aqunneqaratik iluatsinngisaannassapput. Taamaaliussagaluarunik innuttaaqatimik ajornartorsiutaat kisiisa, aningaasaqarnikkut, politikkikkut upperisarsiornikkullu ingerlatseriaatsit imminnut assortuuttut eqqarsaatigissagaluarpaat, aammalu ’inuit ilaat ataaseq inoqatiminnut ajoqutaasumik pissaaneqarpallaalissalluni’. — Oqaluussisartup oqaasii 8:9.

Sunaana ajoqutaasoq

Angajoqqaavut siulliit Adami Evalu Guutip naammalluinnartumik aallartiffeqartissimavai. Timaat eqqarsartariaasiilu naammalluinnartuupput, nunamilu paradiisiusumi najugaqarlutik. Guutip naalakkersuineranut naalatsigitissimagaluarunik naamaalluinartuujuaannarlutillu pilluassagaluarput. Piffissap ingerlanerani  inuiannut naammalluinnartunut pilluartunullu nunami paradiisiusumi inuusussanut angajoqqaanngussagaluarput. Tassa Guutip inunnut siunertarigalua. — 1 Mosesi 1:27-29; 2:15.

Siuaasattali siulliit piumasamik iliorsinnaatitaanertik atornerluppaat. Kukkullutik isumaqarsimapput Guuteqaratik ingerlasinnaallutik. Piumasamik iliorsinnaatitaanerminnik Guutip inatsisiminik killigititai qaangerpaat. (1 Mosesi, kapitali 3) Guutip naalakkersuiunera itigartikkamikku, naammalluinnartuutiinnarnissaannut pissutissaaruppoq. „Eqqarleriit aserorsimasut tammarsimasullu ilumuunngitsuliorfigimmanni Guutip ajortuliaat pillugit qitornarinngilai.“ — 5 Mosesi 32:5.

Adami Evalu Guutimut naalannginnamik, ullormi tassani eqqarsartaatsimikkut timimikkullu aseroriartulerput. Inuunerup pilerfia Jehovamiippoq. (Tussiaat 36:10) Jehovamit avinngarukkamik aappariit inuit siulliit naammalluinnartuujunnaarput naggataatigullu toqullutik. (1 Mosesi 3:19) Kingornussinissamik inatsisit naapertorlugit naammalluinnanngissuseq toqulu taamaallaat meeqqaminnut kingornutsissinnaavaat. Tamanna eqqarsaatigalugu apustili Paulusi ima allapoq: „Taamaattumik: Soorlu inukkut ataasiinnakkut ajorti silarsuarmut tikiuttoq ajortikkullu toqu tikiulluni, taamatut toqu inunnut tamanut annguppoq tamarmik ajortuliormata.“ — Romamiut 5:12.

Kina naalakkersuisussaviua?

Adami Evalu Guutimut pikititsigamik naalakkersuisussaviunera, kisimi oqartusaanera, suusupagaat. Jehovap suujunnaarsissimasinnaagaluarpai aappariinnillu nutaanik allaqqaataaniit pilersitsilluni, kisiannili inunnut kia aqutsinerata pitsaaneruneranik apeqqut akineqarsimassanngikkaluarpoq. Inuiannik namminneq takorluukkaminnik pilersitsinissaannut piffissaqartippai. Taamaalillutik inuit ersarissumik takutissavaat Guutimik aqunneqaratik ingerlasinnaanerlutik.

Inuup oqaluttuassartaa qanoq ersersitsiva? Ukiuni hundredelikkuutaani inuiaqatigiinni, aningaasaqarnikkut, politikkikkut upperisarsiornikkullu aaqqissuussinerit amerlaqisut misiligarneqartarsimapput, ajortoqartuaannarlunilu naalliuttoqartuaannarpoq. „Inuilli ajortut peqquserluttullu ajortumut nakkaakkiartuinnartussaapput“, ingammik ullutsinni. — 2 Timotheusi 3:13.

1900-kkunni suliffissuaqarnikkut ilisimatusarnikkullu siuariarluarsimaqaat, ilutigalugulu oqaluttuarisaanermi aatsaat taama inuiaat naalliuuteqartigipput. Qanorluunniit nakorsaatitigut siuariartoqartigigaluarpat, Guutip inatsisaa atuuttuassaaq: Inuit Guutimit — inuunerup tamarmi pilerfianit — avinngarussimasut napparsimasarput, utoqqalisarput toqussarlutillu. Paasinarpoq ’inuit ingerlavissatik nammineq aalajangersinnaanngikkaat’.

Guutip oqartussaassusiata qutsissisinneqarnera

Inuit Guuteqaratik misiliigaluarput, misiliisaraluarnerullu alianartup tamatuma ataatsimut takutippaa Guuti ikiortiginagu nalakkersuisinnaanngitsut. Guutip naalakkersuinera kisimi pilluarnermik, ataasiussusermik, peqqinnermik inuunermillu pilersitsisinnaavoq. Guutillu oqaasiata kukkujuitsup, Biibilip, ersersippaa inuit Guutimik naalakkersorneqaratik aqutsineranni ’ulluni kingullerni’ inuusugut. (2 Timotheusi 3:1-5) Jehovap aqutseriaaseq tamanna ajussuserluunniit naalliuutillu atuutitingaarnavianngilai.

Erniinnaq Guuti inuit inuunerannut akuliutissaaq. Biibilimi allassimasoqarpoq: „Kunngit taakkua inuutillugit qilaap Guutiata naalagaaffik qaqugumulluunniit atasussaq pilersikkumaarpaa, kingornalu inuiaat allat kunngiussutsimik pilersitsisinnaassanngillat. Guutip naalagaaffiata kunngeqarfiit allat tamaasa aserortissavai suujunnaarsillugillu, namminerli soraajuitsumik atassaaq.“ — Danieli 2:44.

Tamannarpiaq Biibilip qulequtaraa: Naalagaaffik qilammiusoq ikiortigalugu Jehova Guutip oqartussaassusianik qutsissisitsineq, pingaarnerusumillu Jiisusip ajoqersuutaa, oqarami: „Naalagaaffimmik iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu  naggatissaq nalliutissaaq.“ — Matthæusi 24:14.

Inuit aqutsinerat Guutip naalakkersuineranik taarserneqarpat kikkut annassappat? Ussatit 2:21, 22-mi ima uppernarsaavigineqarpugut: „Peqqusersuitsummi [Guutip aqutsineranik tapersersuisut] nunami najugaqassapput, assuarnaatsut kisimik tassaniilissapput. Kisianni iluanngitsut [Guutip aqutsineranik tapersersuinngitsut] nunamit piiagaassapput tunussisullu tassannga aallarunneqarlutik.“ Tussiaasiortoq isumassarsisitaalluni ima erinarsorpoq: „Iluanngitsoq erniinnaq peeruttussaavoq . . . Kisianni qanilaartut nuna kingornutissavaat pilluangaarnertillu nuannaarutigissallugu. Iluartut nuna kingornutissavaat najugaqassallutillu tassani naassaangitsumik.“ — Tussiaat 37:10, 11, 29.

Silarsuaq nuanningaartoq nutaaq

Guutip naalagaaffiata aqutsinerani pissutsit aaqqissuussaanerannit maanna atuuttumit annattut nunami ajussuseerussimasumi naalliunnartuerussimasumilu najugaqarsinnaassapput. Inuiaat Guutimit ilinniartinneqassapput, piffissallu ingerlanerani ’[Jehovamik] ilisimasaqarnerup nuna tamakkerumaarpaa soorlu ermit matoqqagaat immap naqqa’. (Esaja 11:9) Ilinniartitsineq tamanna iluaqutaallunilu ineriartornartoq inuiaqatigiinnik eqqissisitsiumaarpoq. Taamaattumik sorsunnerit, toqutsinerit, nakuusernerit, tillinnerit kinguaassiuutitigullu atornerluinerit allalluunniit pinerlunnerit atorunnaassapput.

Guutimut naalattunut silarsuaq nutaaq timikkut pilluaqqussutaassaaq, Guutimmi, naalagaasussaviunerminut assortuisut pikititsinerisa kingunipilui peerumaarmagit. Naammalluinnanngissuseq, nappaatit, utoqqalineq toqulu qanganngorsimassapput. Biibilip neriorsorpaatigut: „Innuttaasoq kinaluunniit oqassanngilaq: ’Napparsimavunga!’ Imatut nangippoq: „Taava tappiitsut isaat uisitaassapput, tusilartut siutaat ammarneqassapput. Tusiattoq tuttorsuartut pissigarumaarpoq, oqajuitsuugaluaq qiimmattarluni appikkumaarpoq puilalerumaarmata erngit puilasuitsumi, kuunnguillu kuulerumaarlutik inuilaami.“ (Esaja 33:24; 35:5, 6) Qanoq nuannertigissava ullut tamarluinnaasa peqqittuarluni — naassaanngitsumik!

Guutip asannittumik aqutsinerani, silarsuarmi nutaami inuttaaqatigiit nukitik piginnaanitillu nunarsuup paradiisinngortinnissaanut atussavaat. Piitsuuneq, kaanneq, angerlarsimaffissaaleqinerlu takkuteqqinngisaannassapput, Esajap siulittuutaani ima allassimammat: „Illuliorumaarput namminneq inigisassaminnik viinnequtinillu ikkussuillutik inerititaat nerisassaminnik. Illuliaat allanit inigineqassanngillat ikkussugaalluunniit allanit nerineqassanatik.“ (Esaja 65:21, 22) „Tamarmik eqqissillutik inuussapput viinnequtaatimik figenequtaatimillu ataanni kimilluunniit peersinneqarnatik.“ — Mika 4:4.

Guutimit naalattaanillu peqqissaarunneqarnini nunarsuup iluaqutigissavaa. Allassimaffiit ukua tamanna uppernarsarpaat: „Inoqajuitsoq nunalu panertoq tipaatsussapput. Inuilaaq qiimmattassaaq naasunillunilu . . . Puilalerumaarmata erngit puilasuitsumi,  kuunnguillu kuulerumaarlutik inuilaami.“ (Esaja 35:1, 6) „Karrit naammangaartut nunami naasimassapput, qaqqat qaanni aalataarumaarput.“ — tugsiaut 72:16 (nutaanngitsoq).

Inuimmi milliardilippassuit toqusimasut? Guutip eqqaamasai inuunermut makikkumaarput, ’tassa toqusut makikkumaarmata — iluartut iluaatsullu.’ (Apustilit Suliaat 24:15) Aap, toqusimasut makeqqikkumaarput. Guutip naalagaasussaviunera pillugu sallusuissummik nuanningaartumik ilinniartinneqassapput, naassaanngitsumillu paratiisimi inuusinnaalissallutik. — Johannesi 5:28, 29.

Taamaalilluni erloqinartut ukiuni tusindilikkuutaani inunnik naqisimannissimasut Jehova Guutip iluarsiivigilluinnassavai. Naappaatit, innarluutit toqulu peerluinnassavai, Guutimmi „qulliit tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata“. — Saqqummersitat 21:3, 4.

Silarsuarmi aserorsimasumi matumani naalliuutit Guutip atorunnaarsinniarpai, aaqqissuussaanerlu ’nutaaq iluassutsip najugarisassaa’ pilersillugu. (2 Petrusi 3:13) Tamanna nutaarsiassaavoq nuanningaartoq, Guutimmi silarsuassaa nutaaq atorfissaqartingaarparput. Tamanna misiginiarlugu utaqqinerput sivisungaarnavianngilaq. Biibilimi siulittuutit eqquussimasut naapertorlugit nalunngilarput silarsuassaq nutaaq qanittuararsuarmiittoq, aamma Guutip naalliuutit sivisunerusumik atuutitinnavianngikkai. — Matthæusi 24:13-14. (wE 15/5 01)

[Qupp. 8-mi ungalusaq]

Inuit aqutsinerat qatagiinnarpoq

Inuit aqutsinerat pillugu Tysklandimi forbundskansleriusimasoq Helmut Schmidt oqarsimavoq: „Uagut inuit . . . ilaannakuusumik silarsuaq aquttuarsimavarput, piffissallu annersaani ajorluinnartumik. . . . Eqqissineqartitsinngisaannarsimavugut.“ FN-p Human Development Report-iani 1999-imi allassimavoq: „Nunani tamani inuiaqatigiit ineriartornerata ajorsiartornera, inuiaqatigiinni eqqissisimajunnaarnermik, pinerluttoqarnerulerneranik angerlarsimaffinnilu nakuusertoqarnerulerneranik kinguneqartoq, nalunaarutigineqarpoq. . . . Nunarsuarmi aarlerinartut, inuiannit inuiaqatigiinnilluunniit malinnaaffigineqarsinnaanatik amerliartupiloorput.“

[Qupp. 8-mi assiliartat]

’Pilluangaarnertik nuannaarutigissavaat.’ — Tussiaat 37:11

[Suminngaanneernera]

Alliup tullia, anaanaq meeraalu: Assit: FAO/B. Imevbore; alleq, qaarnersuaq: assit: U.S. National Archives-imiit