UNAMMINIARNARTUP AAQQIISSUTAA
Guutip naalagaaffiata aqutsinerani ‘eqqissineqangaarumaarpoq’
Erinigisarput Guutip naalagaaffia – tassa Guutip nunarsuarmut tamarmut naalakkersuisuutitassai – ungasinngitsukkut nunarsuarmi eqqissineqartitsissapput. Tussiaat 72:7-imi neriorsuutigineqartutut ‘eqqissineqangaarumaarpoq’. Qaquguli aqutsilissava? Aqutsilerniarluni qanoq iliussava? Naalagaaffiullu tamatuma aqutsinera qanoq iluaqutigisinnaaviuk?
QAQUGU TIKIUTISSAVA?
Pisussat Guutip naalagaaffiata tikiutingajalerneranut nalunaaqutaasussat Biibilimi siulittuutigineqarput. Tamakku ataatsimut isigalugit ‘nalunaaqutaassapput’, ilaatigullu tassaallutik nunani tamalaani sorsunnerit, kaannersuit, nappaatit, nunap sajunnerpassui inatsisaatsuliornerillu amerliartuinnarneri. – Matthæusi 24:3, 7, 12; Lukasi 21:11; Saqqummersitat 6:2-8.
Aamma ima siulittuuteqarpoq: “Ilisimassavalli ullussani kingullerni nalliukkumaarmata ullut atugarliungaarfissat. Taamanikkussamimi inuit tassaalerumaarput namminissarsiortut, aningaaserituut, ... angajoqqaaminnut naalanngitsut, qujasuitsut, mitalliisut, asanniuitsut, saammartitassaanngitsut, mamarliisut, naammatsiuitsut, qiningasut, ajunngitsunut akeraasut, ... puffajasut, makitaniartut, inuulluarniutit Guutimit pingaarnerutillugit.” (2 Timotheusi 3:1-4) Taamatut pissusiloqqajaasartunik inoqartuaannarsimavoq, maannali inuit amerlanerit taamaattuupput.
Siulittuutit tamakku 1914-imi eqquullutik aallartipput. Oqaluttuarisaanermik ilisimatuut, politikerit atuagassiortullu ukiumi tamatumani silarsuup qanoq allanngornera oqaaseqarfigisarpaat. Assersuutigalugu oqaluttuarisaanermik ilisimatooq qallunaaq Peter Munch ima allappoq: “1914-imi sorsunnerup aallartinnera inuit oqaluttuarisaanerannik allannguisitserujussuarpoq. Siunissamut isumalluarfiusumiit ... ajunaarfiusumut, amiilaarfiusumut uumissuiffiusumullu, toqqissisimananngilluinnarfiusumut, pivugut.”
Isumalluarnartoqarporli. Tamakkunanngami erserpoq Guutip naalagaaffiata nunarsuarmut aqutsilernissaa qanillisoq. Jiisusip naggatissamut nalunaaqutissamut isumalluarnartoq tamanna ilannguppaa: ‘Naalagaaffimmik iivangkiiliu [nutaarsiassaq nuannersoq] taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.’ – Matthæusi 24:14.
Nutaarsiassaq nuannersoq tamanna Jehovap Nalunaajaasuisa tusarliussaanni pingaaruteqarpoq. Atuagassiaataat pingaarneq ima taaguuteqarpoq: Napasuliaq Alapernaarsuiffik Jehovap naalagaaffianik tusarliisoq. Guutip naalagaaffiata inunnut nunarsuarmullu iliuuseriumaagai nuannersorpassuit sammineqartarput.
QANOQ AQUTSILISSAVA?
Akissutaanut pingaarutillit sisamat ukuupput:
-
Naalagaaffik taanna nunarsuarmi maannakkut politikkikkut siuttunit sinniisuuffigineqassanngilaq.
-
Nunarsuarmi politikikkut siuttut Guutip naalagaaffia sianiitsorpallallutik akerlilersussavaat. – Tussiaat 2:2-9.
-
Guutip naalagaaffiata naalagaaffiit politikikkut aqunneqartut inunnut naalagaaniartuartut piuneeruttariaqarpai. (Danieli 2:44; Saqqummersitat 19:17-21) Tamanna silarsuaq tamakkerlugu sorsunnerussaaq inaarutaasoq Harmagedonimik taaneqartoq. – Saqqummersitat 16:14, 16.
-
Guutimut naalakkusuttut Harmagedoni anigorlugu silarsuartaassami toqqissisimaffiusumi inuulissapput. Taakku millionilippassuussagunarput Biibilimi allassimammat ‘inuppassuit’ aniguissasut. – Saqqummersitat 7:9, 10, 13, 14.
AQUTSINERA QANOQ ILUAQUTIGISINNAAVIUK?
Guutip naalagaaffiani innuttaalissagaanni ilinniartinneqaqqaartariaqarpoq. Jiisusi Guutimut qinulluni ima oqarpoq: ‘Inuuneq naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq.’ – Johannesi 17:3.
Inuit Jehova Guuti kinaassusilittut ilisarisimaleraangamikku sorpassuartigut iluaqutigisarpaat. Marluinnaat eqqaariartigit: Siullertut, Guutimut upperluartunngortarput. Uppernarsaatinik tunngavilimmik upperamik Guutip naalagaaffia piviusuusoq aqutsilernissaalu qanillisoq upperilluinnartarpaat. (Hebræerit 11:1) Aappassaattut, Guutimut inoqatiminnullu asanninnerulertarput. Guutimut asanninnertik kajumississutigalugu taassumunnga naalakkusulertarput. Inoqatiminnut asanninnertik kajumississutigalugu Jiisusip oqaasii uku maleruarusulertarpaat: ‘Qanoq inunnut iliorfigeqqugussi ilississaaq taamatut iliorfigisigit.’ – Lukasi 6:31.
Ataataasutut asannittutut illuni Pinngortitsisitta pitsaanerpaamik kissaappaatigut. Kissaatigaa Biibilimi ‘inuunivimmik’ taaneqartoq misigissagipput. (1 Timotheusi 6:19) Ullumikkut inuuneq tassaanngilaq “inuunivik”. Inuit millionillit inuuniapiloorput. “Inuunivik” takorloorsinnaaniassagakku Guutip naalagaaffiata innuttaminut iliuuseriumaagai nuannersut eqqarsaatigikkit.