ٴسىز ەحوبانىڭ جاعىنداسىز با؟
«ەحوبا قۇدايلارىڭنان قورقىڭدار، سوعان عانا قىزمەت ەتىپ، ەتەنە جاقىن بولىڭدار» (مۇسانىڭ 5-جازباسى 10:20).
اندەر: 28، 32
1، 2. ا) ەحوبانىڭ جاعىندا بولۋ نەلىكتەن دانالىقتىڭ بەلگىسى؟ ٵ) بۇل ماقالادا ٴبىز نە تالقىلايمىز؟
ەحوباعا ەتەنە جاقىن ٴجۇرۋ — دانالىقتىڭ نىشانى. ودان اسقان قۇدىرەتتى دە دانا ەشكىم جوق، ٵرى ەشكىم ول سياقتى سۇيىسپەنشىلىك تانىتپايدى! ارينە، ٴبىز وعان ٵرقاشان دا ادال بولىپ، ونىڭ جاعىندا جۇرگىمىز كەلەدى (ٴزابۇر 96:4—6). ٴبىراق قۇدايعا عيبادات ەتكەن كەيبىر ادامدار ونىڭ جاعىندا قالمادى.
2 بۇل ماقالادا ٴبىز ەحوبانىڭ جاعىندامىن دەي تۇرا، ول جەك كورەتىن ىستەرمەن اينالىسقان ادامداردىڭ مىسالىن قاراستىرامىز. ولاردىڭ مىسالىنان الاتىن ماڭىزدى ساباعىمىز ەحوباعا ادال بولىپ قالۋعا كومەكتەسپەك.
ەحوبا جۇرەگىمىزدەگىنى كورەدى
3. نەگە ەحوبا قابىلعا كومەكتەسۋگە تىرىستى جانە ول وعان نە دەدى؟
3 قابىل جايلى ويلانىپ كورەيىكشى. ول جالعان تاڭىرلەرگە قۇلشىلىق ەتكەن جوق، سويتە تۇرا ەحوبا ونىڭ عيباداتىن قابىل المادى. نەگە؟ ويتكەنى ەحوبا ونىڭ جۇرەگىندەگى زۇلىمدىققا دەگەن بەيىمدىلىكتى كوردى (جوحاننىڭ 1-حاتى 3:12). ەحوبا قابىلدى ەسكەرتىپ بىلاي دەدى: «ەگەر جاقسىلىققا بەت بۇرساڭ، مەنىڭ ىقىلاسىما يە بولاسىڭ عوي. ال جاقسىلىققا بەت بۇرماساڭ، وندا ٴبىلىپ قوي، بوساعاڭدى كۇنا جاعالاپ ٴجۇر، ول سەنى يەمدەنۋدى كوكسەيدى. ٴبىراق ودان ۇستەم بولار ما ەكەنسىڭ؟!» (مۇسانىڭ 1-جازباسى 4:6، 7). ەحوبانىڭ سوزدەرىنەن انىق كورىنەتىندەي، ەگەر قابىل وكىنىپ، قۇدايدىڭ جاعىنا شىققاندا، ول دا قابىلدىڭ جاعىندا بولار ەدى.
4. ەحوبانىڭ جاعىنا شىعۋدىڭ مۇمكىندىگى تۋعاندا قابىل نە ىستەدى؟
4 قابىل وي قالپىن وزگەرتكەندە، ەحوبا ونىڭ عيباداتىن قايتا قابىلدار ەدى. ٴبىراق ول قۇدايدىڭ ٴتىلىن المادى، سودان ونىڭ بۇرىس وي قالپى مەن قۇمارلىعى بۇرىس ارەكەتكە اكەپ سوقتى (جاقىپ 1:14، 15). جاستاۋ بولعان كەزىندە قابىل ەحوباعا قارسى شىعامىن دەپ ەش ويلاماعان شىعار. الايدا ول قۇدايدىڭ ەسكەرتۋىن ەلەمەي، قۇدايعا قارسى باس كوتەرىپ، ٴتىپتى ٶز ٸنىسىن ٶلتىردى.
5. قانداي ويلار ٴبىزدى ەحوبانىڭ ىقىلاسىنان ايىرۋى مۇمكىن؟
5 قابىل سياقتى، بۇگىندە قانداي دا ٴبىر ٴماسىحشى ەحوباعا عيبادات ەتەمىن دەپ، ٴبىراق شىن مانىندە ەحوبا جەك كورەتىن ىستەردى ىستەپ ٴجۇرۋى مۇمكىن (ياھۋدا 11). ول قىزمەتكە جانە قاۋىمعا جۇيەلى تۇردە بارىپ تۇراتىن شىعار. سويتە تۇرا ونەگەسىز ويلار مەن اشكوز قالاۋلارعا بەرىلىپ، جەككورىنىش سەزىمىنىڭ جەتەگىندە ٴجۇرۋى مۇمكىن (جوحاننىڭ 1-حاتى 2:15—17؛ 3:15). مۇنداي ويلاردىڭ كۇناعا اكەپ سوعۋى عاجاپ ەمەس. وزگەلەر ٴبىزدىڭ نە ويلاپ، نە ىستەپ جۇرگەنىمىزدى بىلمەسە دە، ەحوبا بىلەدى. ەگەر تولىقتاي ونىڭ جاعىنا شىقپاساق، ول بۇنى كورەدى (ەرەميا 17:9، 10 وقىڭىز).
6. ەحوبا بۇرىس قالاۋلارىمىزدى جەڭۋگە قالاي كومەكتەسەدى؟
6 ٴتىپتى شالىس قادام باسقاندا دا، ەحوبا بىزدەن بىردەن تەرىس اينالىپ كەتپەيدى. ەگەر قاۋىپتى جولعا اۋىتقىپ بارا جاتساق، ەحوبا ٴبىزدى شاقىرىپ: «ماعان بەت بۇرىڭدار، سوندا مەن دە سەندەرگە بەت بۇرامىن»،— دەيدى (مالاحي 3:7). ول ٴبىزدىڭ كۇرەسىپ جۇرگەن السىزدىكتەرىمىز بار ەكەنىن جاقسى تۇسىنەدى. ٴبىراق ول ٴبىزدىڭ نىق تۇرىپ، جاماندىققا قارسى تۇرعانىمىزدى قالايدى (يشايا 55:7). ەگەر وسىلاي ەتسەك، ول بىزگە كومەكتەسىپ، بۇرىس قالاۋلارىمىزدى جەڭۋگە قاجەتتى كۇش بەرەدى (مۇسانىڭ 1-جازباسى 4:7).
الدانىپ قالماڭىز
7. سۇلەيمەن ەحوبامەن دوستىق قارىم-قاتىناسىن قالاي جوعالتىپ الدى؟
7 جاس كەزىندە سۇلەيمەننىڭ ەحوبامەن قارىم-قاتىناسى جاقسى ەدى. قۇداي وعان اسقان دانالىق دارىتىپ، يەرۋساليمدە سالتاناتتى عيباداتحانا سوعۋدى تاپسىردى. ٴبىراق سۇلەيمەن ەحوبامەن دوستىق قارىم-قاتىناسىن جوعالتىپ الدى (پاتشالار 1-جازبا 3:12؛ 11:1، 2). قۇداي زاڭىندا پاتشانىڭ «جۇرەگى بۇزىلىپ كەتپەس ٷشىن، كوپ ايەل الۋعا» تىيىم سالىناتىن (مۇسانىڭ 5-جازباسى 17:17). سۇلەيمەن وسى زاڭعا مويىنسۇنبادى. اقىرىندا ونىڭ 700 ايەلى جانە 300 كانيزاگى بولدى (پاتشالار 1-جازبا 11:3). ولاردىڭ كوبىسى جالعان تاڭىرلەرگە تابىناتىن جاتجەرلىكتەر ەدى. وسىلاي سۇلەيمەن جاتجەرلىكتەرگە ۇيلەنىپ، تاعى ٴبىر زاڭدى بۇزدى (مۇسانىڭ 5-جازباسى 7:3، 4).
8. سۇلەيمەن قانداي سوراقى ىستەر جاسادى؟
8 سۇلەيمەن بىرتە-بىرتە ەحوبانىڭ زاڭدارىن جاقسى كورۋدەن قالدى. اقىرىندا ول وتە سوراقى ىستەرگە باردى. ايەل ٴتاڭىرى اشتارعا جانە حاموس قۇدايىنا ارناپ قۇرباندىق شالاتىن ورىن تۇرعىزدى، ٴسۇيتىپ ايەلدەرىمەن بىرگە سول جالعان تاڭىرلەرگە قۇلشىلىق ەتتى. ٴبىر قىزىعى، بۇل ورىنداردى ول كەزىندە ٶزى سوققان يەرۋساليمدەگى عيباداتحاناعا قاراما-قارسى ورنالاسقان تاۋدا سوقتى (پاتشالار 1-جازبا 11:5—8؛ پاتشالار 2-جازبا 23:13). بالكىم، سۇلەيمەن: «عيباداتحانادا ەحوباعا قۇرباندىقتار شالىپ جۇرسەم، ول بارلىق جامان ىستەرىمە كوز جۇمادى»،— دەپ ويلاپ، ٶز-ٶزىن الداعان بولار.
9. سۇلەيمەننىڭ قۇداي بەرگەن ەسكەرتۋلەرگە قۇلاق اسپاعانىنىڭ سالدارى قانداي بولدى؟
9 ەحوبا كۇناعا ەشقاشان كوز جۇمىپ قارامايدى. كيەلى كىتاپتا سۇلەيمەن جايلى: «ەحوبادان تەرىس اينالىپ كەتكەنى ٷشىن، ەحوبا وعان قاھارلاندى»،— دەلىنگەن. قۇداي سۇلەيمەنگە كومەكتەسۋگە تىرىسقان بولاتىن. ەحوبا وعان ەكى رەت كورىنىپ، «بوتەن قۇدايلارعا قۇلشىلىق ەتپە دەپ بۇيىرعان ەدى، ٴبىراق ول قۇلاق اسپادى». ناتيجەسىندە سۇلەيمەن قۇدايدىڭ ىقىلاسى مەن قولداۋىنان ايىرىلىپ قالدى. ەحوبا ونىڭ ۇرپاعىنىڭ يسرايل حالقىنا تۇگەلدەي بيلىك ەتۋىنە جول بەرمەدى جانە ولار جۇزدەگەن جىلدار بويى تالاي قيىندىقتاردى باستان وتكەردى (پاتشالار 1-جازبا 11:9—13).
10. ەحوبامەن جاقسى قارىم-قاتىناسىمىزدى نە بۇزۋى مۇمكىن؟
10 ەگەر قۇدايدىڭ تالاپتارىن تۇسىنبەيتىن يا سىيلامايتىن ادامدارمەن دوستاسساق، ولار ٴبىزدىڭ ويىمىزعا جامان ىقپال ەتىپ، ەحوبامەن دوستىعىمىزعا زاقىم كەلتىرەدى. مۇنداي ادامدار قاۋىمدا دا بولۋى مۇمكىن، ايتسە دە ولاردىڭ ەحوبامەن قارىم-قاتىناستارى بەرىك ەمەس. سونداي-اق دوستارىمىزدىڭ اراسىندا ەحوباعا عيبادات ەتپەيتىن تۋىستارىمىز، كورشىلەرىمىز، ارىپتەستەرىمىز بەن سىنىپتاستارىمىز بولۋى مۇمكىن. ەگەر ەحوبانىڭ تالاپتارىنا ساي ٶمىر سۇرمەيتىن ادامدارمەن كوپ ۋاقىت وتكىزەر بولساق، ولاردىڭ ىقپالىنىڭ كەسىرىنەن قۇدايمەن جاقسى قارىم-قاتىناسىمىزدى جوعالتىپ الۋىمىز ابدەن مۇمكىن.
بىرگە ۋاقىت وتكىزەتىن ادامدارىڭىز ەحوبامەن قارىم-قاتىناسىڭىزعا قالاي اسەر ەتەدى؟ (11-ابزاستى قاراڭىز)
11. دوستار تاڭداۋعا نە كومەكتەسەدى؟
11 قورىنتتىقتارعا 1-حات 15:33 وقىڭىز. ارينە، ادامداردىڭ كوبىسىندە جاقسى قاسيەتتەر بار. ەحوباعا عيبادات ەتپەيتىن ادامداردىڭ ٴبارى بىردەي جامان ىستەرمەن اينالىسا بەرمەيدى. بالكىم، ٴسىز دە سونداي ادامداردى تانيتىن شىعارسىز. ٴبىراق بۇل ادامدار ٴبىز ٷشىن جاقسى ورتا ما؟ ويلانىپ كورىڭىزشى، ولار ٴسىزدىڭ ەحوبامەن قارىم-قاتىناسىڭىزعا قالاي اسەر ەتەدى؟ قۇدايعا جاقىنداي تۇسۋگە كومەكتەسە مە؟ ولار ٷشىن ومىردە نە ماڭىزدى؟ اڭگىمەلەرى نە جايلى؟ ايتاتىندارى تەك ٴساندى كيىم، اقشا، تەلەفون، پلانشەت، ويىن-ساۋىق سياقتى نارسەلەر مە؟ ولار وزگەلەردى ٴجيى سىناپ-مىنەمەي مە؟ تۇرپايى دا ادەپسىز قالجىڭدار ايتقاندى ۇناتا ما؟ يسا: «ادامنىڭ جۇرەگى نەگە تولى بولسا، اۋزى سونى ايتار»،— دەپ ەسكەرتكەن (ماتاي 12:34). ەگەر بىرگە ۋاقىت وتكىزەتىن ادامدارىڭىز ەحوبامەن قارىم-قاتىناسىڭىزعا زاقىم كەلتىرىپ جاتقانىن اڭعارساڭىز، بىردەن ارەكەت ەتىڭىز! ولارمەن وتكىزەتىن ۋاقىتتى شەكتەڭىز، قاجەت بولسا، دوستىعىڭىزدى ٷزىڭىز (ناقىل سوزدەر 13:20).
ەحوبا بىزدەن ادالدىقتى تالاپ ەتەدى
12. ا) مىسىردان شىققان يسرايلدىكتەرگە كوپ ۇزاماي ەحوبا نە دەدى؟ ٵ) قۇداي ادال بولۋدى تالاپ ەتكەندە، يسرايلدىكتەر قالاي جاۋاپ بەردى؟
12 ەحوبا يسرايلدىكتەردى مىسىردان ازات ەتكەننەن كەيىن ولارمەن بولعان جاعدايدان دا جاقسى ساباق الامىز. سيناي تاۋىنىڭ ەتەگىندە جينالعان حالىققا ەحوبا ٶزىن قالاي تانىتقانى وتە اسەرلى بولدى! ولار قارا بۇلت پەن ٴتۇتىندى جانە نايزاعايدىڭ ويناعانىن كورىپ، كۇن كۇركىرى مەن كەرنەيدىكىندەي اسا قاتتى داۋىس ەستىدى (مۇسانىڭ 2-جازباسى 19:16—19). سوسىن ەحوبا: «وزىمە قالتقىسىز بەرىلۋدى تالاپ ەتەتىن قۇدايمىن»،— دەدى. ول ٶزىن جاقسى كورىپ، زاڭدارىن ورىندايتىن ادامدارعا ادال بولاتىنىن ۋادە ەتتى (مۇسانىڭ 2-جازباسى 20:1—6 وقىڭىز). ەحوبا يسرايلدىكتەر وزىنىڭ جاعىندا بولسا، ول دا ولاردىڭ جاعىندا بولاتىنىن مالىمدەدى. ەگەر ٴسىز دە سول حالىقتىڭ اراسىندا بولساڭىز، ەحوبانىڭ سوزدەرى ٴسىزگە قالاي اسەر ەتەر ەدى؟ بالكىم، ٴسىز دە سول يسرايلدىكتەردىڭ: «ەحوبانىڭ ايتقاندارىنىڭ ٴبارىن دە ورىندايمىز!»— دەپ ايتقان سوزدەرىنە قوسىلارسىز (مۇسانىڭ 2-جازباسى 24:3). ٴبىراق كوپ ۇزاماي يسرايلدىكتەردىڭ قۇدايعا دەگەن ادالدىعىن سىنعا العان ٴبىر جاعداي بولدى. قانداي جاعداي؟
13. يسرايلدىكتەردىڭ ادالدىعى قالاي سىنالدى؟
13 قۇداي قۇدىرەتىنىڭ وتە اسەرلى كورىنىسىنەن كەيىن، يسرايلدىكتەر قاتتى قورىققان ەدى. سودان مۇسا حالىق ٷشىن ەحوبامەن سويلەسۋگە سيناي تاۋىنا كوتەرىلىپ كەتتى (مۇسانىڭ 2-جازباسى 20:18—21). ارادا ۋاقىت ٶتىپ جاتتى، ال مۇسا ٵلى قوسقا ورالعان جوق ەدى. حالىق باسشىسىز ٴشول دالادا قالىپ كەتكەندەي كورىندى. ەندى ولار نە ىستەمەك؟ ولار ادامي باسشى مۇساعا تىم كوپ سەنىم ارتىپ ۇيرەنىپ قالعانعا ۇقسايدى. بويلارىن ۋايىم بيلەپ، ولار حارونعا: «كانە، ٴبىزدى باستاپ جۇرەتىن قۇداي ىستەپ بەر. ويتكەنى ٴبىزدى مىسىردان الىپ شىققان اناۋ مۇسامەن نە بولعانىن بىلمەيمىز»،— دەدى (مۇسانىڭ 2-جازباسى 32:1، 2).
14. يسرايلدىكتەر وزدەرىن قالاي الدادى جانە بۇل ەحوباعا قالاي اسەر ەتتى؟
14 يسرايلدىكتەر پۇتتارعا تابىنۋدىڭ دۇرىس ەمەس ەكەنىن جاقسى بىلگەن (مۇسانىڭ 2-جازباسى 20:3—5). ٴبىراق ولار سوندا دا ٵپ-ساتتە التىن بۇزاۋعا تابىنىپ كەتتى! ەحوبانىڭ زاڭىنا مويىنسۇنباسا دا، ولار ٵلى دە ەحوبانىڭ جاعىندامىز دەپ ويلاپ، وزدەرىن الدادى. حارون ٴتىپتى بۇزاۋعا تابىنۋدى «ەحوباعا ارنالعان مەيرام» دەپ اتادى! سوندا ەحوبا نە ىستەدى؟ ول مۇساعا حالىقتىڭ «ازعىندىققا سالىنىپ»، «نۇسقاعان جولدان تايىپ كەتكەنىن» ايتتى. ەحوبانىڭ اشۋلانعانى سونشا — بۇكىل حالىقتى جويىپ جىبەرمەكشى بولدى (مۇسانىڭ 2-جازباسى 32:5—10).
ەحوبا يسرايلدىكتەرگە ٶز جاعىنا شىعۋعا مۇمكىندىك بەردى
15، 16. مۇسا مەن حارون تولىقتاي ەحوبانىڭ جاعىندا ەكەندەرىن قالاي كورسەتتى؟ (ماقالانىڭ باسىنداعى سۋرەتتى قاراڭىز.)
15 ەحوبا مەيىرىمدى قۇداي بولعاندىقتان، حالىقتى جويامىن دەگەن رايىنان قايتتى. ٴسۇيتىپ، يسرايلدىكتەرگە ٶز جاعىنا شىعۋعا مۇمكىندىك بەردى (مۇسانىڭ 2-جازباسى 32:14). پۇتتىڭ الدىندا ۋلاپ-شۋلاپ، ٵن ايتىپ، بي بيلەپ جاتقان حالىقتى كورگەندە، مۇسا التىن بۇزاۋدى قيراتىپ، ۇنتاقتاپ تاستادى. سوسىن: «كىم ەحوبانىڭ جاعىندا بولسا، سول قاسىما كەلسىن!»— دەپ ايقايلادى. «سوندا ونىڭ قاسىنا لەۋىلىكتەر تۇگەل جينالدى» (مۇسانىڭ 2-جازباسى 32:17—20، 26).
16 حارون التىن بۇزاۋدى جاساسا دا، وكىنىپ، باسقا لەۋىلىكتەرمەن بىرگە ەحوبانىڭ جاعىنا شىقتى. بۇل ادال كىسىلەر كۇناكارلاردىڭ جاعىندا ەمەس ەكەنىن انىق كورسەتتى. بۇنىسى دانا شەشىم بولدى، ويتكەنى ٴدال سول كۇنى التىن بۇزاۋعا تابىنعان مىڭداعان ادام ٶلىم قۇشتى. ال ەحوبانىڭ جاعىندا بولعاندار امان قالدى، ٵرى قۇداي ولارعا باتاسىن بەرەتىنىن ۋادە ەتتى (مۇسانىڭ 2-جازباسى 32:27—29).
17. پاۋىلدىڭ التىن بۇزاۋ جايلى جازعانىنان نە بىلەمىز؟
17 بۇدان قانداي ساباق الامىز؟ ەلشى پاۋىل: «بۇل بىزگە ساباق بولدى. سوندىقتان سولار سياقتى... پۇتقا تابىنۋشى بولمايىق»،— دەگەن. ول مۇنداي وقيعالار «زامانداردىڭ سوڭىندا ٶمىر ٴسۇرىپ جاتقان بىزدەرگە ەسكەرتۋ رەتىندە جازىلىپ قالدىرىلعانىن» ايتتى. سوسىن: «كىم نىق تۇرمىن دەپ ويلاسا، قۇلاپ قالۋدان ساق بولسىن!»— دەپ ەسكەرتتى (قورىنتتىقتارعا 1-حات 10:6، 7، 11، 12). پاۋىلدىڭ سوزدەرىنەن كورەتىنىمىزدەي، ٴتىپتى ەحوباعا عيبادات ەتەتىندەردىڭ وزدەرى جامان ىسكە ورتاقتاسىپ كەتۋى مۇمكىن. ولار ٴتىپتى ەحوبانىڭ ماقۇلداۋىنا يەمىز دەپ ويلاۋى مۇمكىن. دەگەنمەن الدەكىمنىڭ جاي عانا ەحوبانىڭ دوسى بولعىسى كەلەتىنى نەمەسە ەحوباعا ادالمىن دەپ ويلاعانى ونىڭ شىن مانىندە ەحوبانىڭ ماقۇلداۋىنا يە ەكەنىن بىلدىرمەيدى (قورىنتتىقتارعا 1-حات 10:1—5).
18. ەحوبادان ٴبىزدى نە نارسە الشاقتاتۋى مۇمكىن جانە ونىڭ سالدارى قانداي بولادى؟
18 يسرايلدىكتەر مۋسانىڭ سيناي تاۋىنان وزدەرى كۇتكەن ۋاقىتتا تۇسپەگەنىن كورىپ، ۋايىمداي باستادى. وسى زاماننىڭ اقىرى ٶزىمىز ويلاعان ۋاقىتتا كەلمەي جاتقانىن كورگەندە، ٴبىز دە ۋايىمداي باستاۋىمىز مۇمكىن. سودان ەحوبانىڭ بولاشاققا قاتىستى ۋادەلەرى جاقىن ارادا ورىندالمايدى نەمەسە بۇل ٴبىز ٷشىن جاي عانا ارمان دەپ ويلاپ، ەحوبانىڭ ەمەس، وزىمىزدىڭ قالاۋىمىزعا كوبىرەك نازار اۋدارا باستاۋىمىز مۇمكىن. ساق بولماساق، ەحوبادان الشاقتاي باستاپ، ويىمىزعا كىرىپ-شىقپاعان ىستەرمەن اينالىسۋىمىز عاجاپ ەمەس.
19. ٴبىز ٵرقاشان نەنى ەستە ۇستاۋىمىز كەرەك جانە نەگە؟
19 ەحوبا بىزدەن وزىنە تولىقتاي مويىنسۇنۋدى جانە تەك وزىنە عانا عيبادات ەتۋدى تالاپ ەتەدى (مۇسانىڭ 2-جازباسى 20:5). نەگە؟ ويتكەنى ول ٴبىزدى جاقسى كورەدى. ەگەر ەحوبانىڭ ايتقانىن ىستەمەسەك، دەمەك شايتاننىڭ ايتقانىمەن جۇرگەنىمىز. ال بۇل وزىمىزگە كەسىرىن تيگىزەدى. پاۋىل: «ەحوبانىڭ دا، جىنداردىڭ دا توستاعانىنان بىردەي ىشە المايسىڭدار! ەحوبانىڭ دا، جىنداردىڭ دا داستارقانىنان بىردەي جەي المايسىڭدار!»— دەگەن (قورىنتتىقتارعا 1-حات 10:21).
ەحوباعا ەتەنە جاقىن بولىڭىز
20. قاتەلىك جاساساق تا، ەحوبا بىزگە قالاي كومەكتەسەدى؟
20 قابىل مەن سۇلەيمەننىڭ جانە يسرايلدىكتەردىڭ وكىنىپ، ٴجۇرىس-تۇرىسىن وزگەرتۋگە مۇمكىندىگى بولدى (ەلشىلەردىڭ ىستەرى 3:19). ەحوبا قاتەلىك جىبەرگەنىنە بولا ادامداردان بىردەن تەرىس اينالمايتىنى انىق. ول حاروندى كەشىردى عوي. بۇگىندە ەحوبا ٴبىزدى بۇرىس ىستەردەن قورعاۋ ٷشىن سۇيىسپەنشىلىكپەن ەسكەرتۋلەر بەرەدى. بۇل ٷشىن ول كيەلى كىتاپتى، باسىلىمداردى، ٴتىپتى باۋىرلاستاردى قولدانادى. ونىڭ ەسكەرتۋلەرىنە دەن قويساق، ول مەيىرىمىن تۇسىرەتىنىنە سەنىمدى بولا الامىز.
21. ەحوباعا دەگەن ادالدىعىمىز سىنعا الىنعاندا نە ىستەۋىمىز كەرەك؟
21 ەحوبا راقىمىن بەلگىلى ٴبىر ماقساتپەن كورسەتەدى (قورىنتتىقتارعا 2-حات 6:1). بۇل بىزگە «ۇنامسىز ٴجۇرىس-تۇرىستان جانە وسى دۇنيەلىك قۇمارلىقتاردان باس تارتۋعا» مۇمكىندىك بەرەدى (تيتكە 2:11—14 وقىڭىز). وسى دۇنيەدە ەحوباعا دەگەن ادالدىعىمىزدى سىنعا الاتىن جاعدايلار ٵردايىم بولادى. سوندىقتان تولىقتاي ەحوبانىڭ جاعىندا بولىڭىز، ال بۇل «ەحوبا قۇدايدان قورقۋدى، سوعان عانا قىزمەت ەتىپ، ەتەنە جاقىن بولۋدى» بىلدىرەتىنىن ۇمىتپاعايسىز! (مۇسانىڭ 5-جازباسى 10:20).
