ٶمىربايان
ٴبىز «اسا قۇندى مەرۋەرتتى» تاپتىق
ۋينستون مەن پامەلا (پەم) باۋىرلاستار اۆسترالازياداعى فيليالدا قىزمەت ەتەدى. بۇل جۇپ قيىندىعى مەن قىزىعى قاتار ورىلگەن ومىرلەرىندە تالاي بەلەستەن ٶتتى. مىسالى، وزگە مادەنيەتكە ٴسىڭىسىپ كەتۋدىڭ قيىندىقتارىن، بۇعان قوسا ٵلى تۋىلماعان ىشتەگى نارەستەدەن ايىرىلۋدىڭ قانداي اشى بولاتىنىن كوردى. بۇل سىناقتاردىڭ ەشبىرى ۋينستون مەن پەمنىڭ ەحوباعا جانە ونىڭ حالقىنا دەگەن سۇيىسپەنشىلىكتەرىن سۋىتا المادى. ولار قىزمەتتەرىن قۋانىشپەن اتقاردى. بۇل جايىندا قازىر ٶز اۋىزدارىنان ەستيمىز.
ۋينستون باۋىرلاس، قۇدايدى ىزدەگەنىڭىز جايىندا تارقاتىپ ايتىپ بەرىڭىزشى.
بالالىق شاعىم اۆستراليانىڭ كۆينسلەند شتاتىنداعى فەرمادا ٶتتى. ۇيدەگىلەر دىنگە اسا جاقىن ەمەس ەدى. جۇرتشىلىقتان شالعايدا، وقشاۋ تۇرعاندىقتان، ٶز وتباسىمنان بوتەن كىسىلەردى كورمەي ٶستىم دەسەم دە بولادى. قۇدايدى شامامەن 12 جاسىمنان باستاپ ىزدەدىم. وعان سيىنىپ، ٶزى تۋرالى شىندىقتى اشۋىن تىلەدىم. كەيىن فەرمادان كەتىپ، وڭتۇستىك اۆسترالياداعى ادەلايدا قالاسىندا جۇمىس ىستەدىم. بىردە سيدنەيدە دەمالىپ جۇرگەنىمدە، پەمدى كەزدەستىردىم. ول كەزدە جاسىم 21 دە ەدى. پەم ماعان انگلو-يزراەليزم ٴدىني اعىمى تۋرالى ايتىپ بەردى. بۇل ٴدىندى ۇستاناتىندار بريتان حالقى ەجەلگى يسرايل حالقىنىڭ جات جەرگە تاراپ كەتكەن رۋلارىنان شىققان، ياعني ب.ز.ب. سەگىزىنشى عاسىردا قۇلدىققا ايدالعان ون رۋلى سولتۇستىك يسرايل پاتشالىعىنان قالعان ۇرپاق دەپ ەسەپتەيدى ەكەن. ادەلايداعا ورالعان سوڭ، مەن وسى جايىندا ٴبىر ارىپتەسىممەن سويلەستىم. ول ەحوبا كۋاگەرلەرىمەن كيەلى كىتاپتى زەرتتەيتىن. نەبارى بىرنەشە ساعاتتىڭ ىشىندە ەحوبا كۋاگەرلەرىنىڭ ىلىمدەرى جايىندا اڭگىمەلەسە كەلە، سوناۋ بالا كەزىمدە ايتقان دۇعاما جاۋاپ العانىمدى ٴتۇسىندىم. وسىلاي جاراتۋشىم مەن ونىڭ پاتشالىعى تۋرالى شىندىقتى ٴبىلىپ، «اسا قۇندى مەرۋەرتتى» تاپتىم! (مات. 13:45، 46).
پەم باۋىرلاس، اسا قۇندى مەرۋەرتتى ٴسىز دە جاستايىڭىزدان ىزدەي باستاپسىز. ەندەشە، ٴسوز تىزگىنى وزىڭىزدە.
مەن جاڭا وڭتۇستىك ۋەلس شتاتىنداعى كوفس-حاربور دەگەن قالادا تۋىپ-ٶستىم. جانۇيامىزبەن ٴدىنشىل ادامدار ەدىك. اكە-شەشەم مەن اتا-اجەم انگلو-يزراەليزم ىلىمدەرىنە سەنەتىن. اپكەم، ٸنىم جانە بولەلەرىم — ٴبارىمىز دە بريتاندىقتاردان تاراعان ادامدار قۇداي تاڭداعان حالىق دەپ وستىك. ٴبىراق مەن بۇنىمەن ىشتەي كەلىسە الماي، قۇداي جايلى بىلىمگە سول كۇيى سۋساپ ٴجۇردىم. 14 جاسىمدا ٵرتۇرلى شىركەۋگە — انگليكان، باپتيستەر مەن جەتىنشى كۇن ادۆەنتيستەرىنىڭ شىركەۋىنە — باردىم. ٴبىراق ولاردىڭ ەشقايسىسى سۋساعان جانىما ٴنار بەرە المادى.
كەيىنىرەك ٴبىز سيدنەيگە كوشىپ كەلدىك. سول جەردە ۋينستونمەن تانىستىم. ول سيدنەيگە دەمالۋعا كەلگەن ەكەن. ٶزى ايتقانداي، ەكەۋىمىزدىڭ ٴدىني تاقىرىپتاعى اڭگىمەمىز ونىڭ ەحوبا كۋاگەرلەرىمەن كيەلى كىتاپتى زەرتتەۋىنە ۇلاستى. وسىدان كەيىن ونىڭ ماعان جازاتىن حاتتارى جازبالارعا تولىپ كەلەتىن بولدى. شىنىمدى ايتسام، العاشىندا بۇعان مازالاندىم، ٴتىپتى نارازى بولدىم. ٴبىراق ۋاقىت وتە مۇنىڭ شىندىق ەكەنىن تۇسىنە باستادىم.
1962-جىلى ادەلايداعا، ۋينستون تۇرىپ جاتقان قالاعا كوشىپ باردىم. ول مەنى ٴبىر ەرلى-زايىپتىنىڭ ۇيىنە قونىستاندىردى. ولار پاپۋا — جاڭا گۆينەيادا ميسسيونەر بولىپ قىزمەت ەتكەن توماس پەن دجانيس سلومەندەر ەدى. ول كەزدە 18 گە تولار-تولماس ۋىلجىعان جاس قىز ەدىم. سلومەندەر وتباسى ماعان ەرەكشە قايىرىممەن قاراپ، ەحوباعا جاقىنداي تۇسۋىمە كوپ كومەكتەستى. سودان، قۇداي ٴسوزىن زەرتتەپ-زەردەلەي كەلە شىندىقتى تاپقانىما كوزىم جەتتى. كەيىن ۋينستون ەكەۋمىز وتاۋ قۇرىپ، نەكەلىك ٶمىرىمىزدى ەحوباعا قىزمەت ەتۋدەن باستادىق. ٴسۇيتىپ، باقىت پەن باتاسى مول ٶمىر جولىنا اياق باستىق. بۇل جولدا قيىنشىلىقتار بولمادى ەمەس، بولدى. ايتسە دە ۋينستون ەكەۋمىز تاپقان اسىل مەرۋەرتتىڭ قۇنى وسپەسە، ەش ازايعان جوق.
ۋينستون باۋىرلاس، ەحوباعا قىزمەت ەتكەن العاشقى جىلدارىڭىز جايلى ايتىپ بەرسەڭىز.
1. اۋداندىق قىزمەتتە ارالاعان جەرلەرىمىز
2. ٴبىز ارالاعان كەيبىر ارالداردىڭ پوچتا ماركالارى. كيريباتي جانە تۋۆالۋ ارالدارى بۇرىن گيلبەرت جانە ەلليس ارالدارى دەپ اتالعان
3. تۋۆالۋ ەلىندەگى فۋنافۋتي مارجان ارالى. ميسسيونەرلەر تاعايىندالماي تۇرىپ ٴبىز كوپتەگەن ارالعا باردىق. فۋنافۋتي — سولاردىڭ ٴبىرى
پەمگە ۇيلەنگەن سوڭ، كوپ ۇزاماي ەحوبا بىزگە قىزمەتتىڭ ۇلكەن ەسىكتەرىن اشا باستادى (قور. 1-ح. 16:9 ٴسىلت.). مۇنداي ەسىكتەردىڭ العاشقىسى دجەك پورتەر باۋىرلاس ارقىلى اشىلدى. ول ٴبىزدىڭ كىشىگىرىم قاۋىمىمىزعا اۋداندىق باقىلاۋشى رەتىندە كەلىپ تۇراتىن. قازىر ول — اۆسترالازياداعى فيليال كوميتەتىنىڭ مۇشەسى. دجەك پەن جۇبايى روزلين باۋىرلاستار بىزگە تۇراقتى ىزاشارلىق قىزمەتتى باستاۋعا سەرپىن بەردى. سودان پەم ەكەۋمىز بۇل قىزمەتتى بەس جىل بويى قۋانا اتقاردىق. 29 جاسقا كەلگەنىمدە، ٴبىز وڭتۇستىك تىنىق مۇحيت ارالدارىنا اۋداندىق قىزمەتكە تاعايىندالدىق. ولار ساموا، امەريكا سامواسى، كيريباتي، ناۋرۋ، نيۋە، توكەلاۋ، تونگا، تۋۆالۋ، ۆانۋاتۋ ارالدارى ەدى. بۇلار كەيىن فيدجيدەگى فيليالعا قارايتىن بولدى.
قيىرداعى كەي ارالداردىڭ ادامدارى ەحوبا كۋاگەرلەرىنە كۇدىكپەن قارايتىن. سوندىقتان بىزگە ساق ٴجۇرۋ كەرەك بولدى (مات. 10:16). ونداعى قاۋىمدار شاعىن، باۋىرلاستار از بولعاندىقتان، تۇنەيتىن جەر تابۋ قيىن ەدى. سودان نە كەرەك، اۋىل ٸشىن ارالاپ، ٷيدى جەرگىلىكتى تۇرعىنداردىڭ ىشىنەن تاباتىنبىز. ولاردىڭ ٴبىز ٷشىن ەسىكتەرى دە، كوڭىلدەرى دە اشىق ەدى.
ٴسىزدىڭ اۋدارما ٸسىنىڭ جاناشىرى ەكەنىڭىزدى بىلەمىز. جالپى، بۇل ىسكە دەگەن اۋەستىگىڭىز قالاي پايدا بولدى؟
ساموادا اقساقالدارعا ارنالعان مەكتەپتى جۇرگىزۋىم
تونگا ٴتىلىن الاتىن بولساق، بۇل تىلدە تەك بىرنەشە عانا تراكتات پەن بۋكلەتتەر بولدى. تونگالىق باۋىرلاستار زەرتتەۋ ساباقتارىندا اعىلشىن تىلىندەگى «ماڭگىلىك ومىرگە الىپ باراتىن شىندىق» كىتابىن قولداناتىن. بىردە اقساقالدارعا ارنالعان ٴتورت اپتالىق مەكتەپ ٶتتى. جەرگىلىكتى ٷش اقساقال وسى كىتاپتى تونگا تىلىنە اۋدارىپ بەرۋگە كەلىستى. ولار مەكتەپتە وقىپ جۇرگەندەرىنە، اعىلشىنشا ازىن-اۋلاق بىلگەندەرىنە قاراماستان، وسى ىسكە بىلەك تۇرە كىرىسىپ كەتتى. قولمەن جازىلعان ٴماتىندى پەم جازۋ ماشيناسىمەن تەرىپ شىعىپ، ونى قۇراما شتاتتارداعى باسپاحاناعا جونەلتتىك. بۇل جوباعا باس-اياعى 8 اپتا جۇمسادىق. اۋدارمامىز اناۋ ايتقانداي كەرەمەت بولماسا دا، سونىڭ ارقاسىندا تونگا تىلىندە سويلەيتىن كوپ ادام شىندىقتىڭ جارىعىنا كەلدى. بۇعان دەيىن پەم ەكەۋمىزدىڭ اۋدارمادان حابارىمىز جوق ەدى. ٴبىراق وسى شارا ٴبىزدى اۋدارماشىلىقتىڭ قىزىعىنا باتىرىپ جىبەردى.
پەم باۋىرلاس، ارالداعى ٶمىر مەن اۆسترالياداعى ٶمىردىڭ ايىرماشىلىعى قانداي ەكەن؟
اۋداندىق قىزمەتتە بولعاندا تۇراقتاعان جەرىمىزدىڭ ٴبىرى
جەر مەن كوكتەي دەسە دە بولادى! قۇجىناعان ماسانى، ەگەۋقۇيرىقتاردى دا كوردىك. شىلىڭگىر ىستىق پەن وتە ىلعالدى اۋا رايىن دا كوردىك. اۋرۋ-سىرقاۋىمىز بەن اشقۇرساق جۇرگەن كەزدەرىمىز تاعى بار. ٴبىراق ٵر كۇننىڭ سوڭىندا فالەدەن تەڭىزگە كوز تاستاعاندا ٴبىر راقاتتانىپ قالاتىنبىز! «فالە» دەپ ساموالىقتار توبەسى سابانمەن جابىلعان، جان-جاعى اشىق ٷيدى ايتادى. اي جارىق بولعان تۇندەرى كوكوس اعاشتارى انىق كورىنەتىن. ايدىڭ ساۋلەسى تەڭىز بەتىندە دىرىلدەپ جاتقان وسىنداي كورىنىستەردى كورگەندە، جاعىمدى ويلارعا ەرىكسىز شومىپ، ەحوباعا دۇعا ەتەتىنبىز.
ٴبىز اسىرەسە بالالارعا قاتتى باۋىر باسىپ كەتتىك. ولار ٴبىزدى، اق ٴناسىلدى ادامداردى، قىزىق كورەتىن. بىردە نيۋە ارالىندا جۇرگەنىمىزدە، ٴبىر بالا ۋينستوننىڭ تۇك باسقان قولىن ۇستاپ كورىپ: «قاۋىرسىندارىڭىز كۇشتى عوي!»— دەگەنى بار ما؟! ول وسىنداي تۇكتى قولدى ومىرىندە ٴبىرىنشى رەت كورىپ تۇرعاندىقتان، مۇنى قالاي ايتارىن بىلمەگەنگە ۇقسايدى.
ادامداردىڭ تۇرمىس جاعدايى قانشالىقتى ناشار ەكەنىن كورگەندە، جۇرەگىمىز سىزداپ كەتەتىن. ولار كوز تارتار تابيعات اياسىندا ٶمىر سۇرگەنمەن، اۋىزسۋلارى تاپشى بولاتىن، مەديسينالىق قىزمەت تە دۇرىس كورسەتىلمەيتىن. ٴبىراق باۋىرلاستار ٷشىن بۇل ۇيرەنشىكتى جايت بولعاندىقتان، مۇڭايىپ جۇرگەندەرىن كورمەيتىنبىز. بالا-شاعالارى كوز الدىندا، عيبادات ەتەتىن ورىندارى بار، ەحوبانى ماداقتاي الادى. وسىنىڭ بارىنە ولار دان ريزا ەدى. ولارعا قاراپ ٴبىز دە قاراپايىم ٶمىر كەشىپ، ماڭىزدى ىستەردى نازاردان تايدىرمادىق.
سىزگە مۇلدەم وزگەشە جاعدايلاردا تاماق ىستەۋگە، ٴتىپتى قۇدىقتان سۋ تارتۋعا تۋرا كەلىپتى. سول تۋرالى كوبىرەك بىلگىمىز كەلگەن ەدى.
پەم كىر جۋىپ وتىر (تونگا ەلى)
جالپى، وت جاعىپ، تاماق ٴپىسىرۋدى اكەمنەن ۇيرەنگەنمىن. ول ماعان جوقتان بار جاساۋدى ۇيرەتتى دەسەم دە بولادى. وسى ٷشىن اكەمە ريزاشىلىعىم شەكسىز. بىردە كيريباتيدە بولعاندا، توبەسى سابانمەن جابىلعان شاعىن ۇيدە تۇردىق. ونىڭ ەدەنىنە جالپاق كورالل تاستار توسەلگەن ەدى. ال قابىرعالارى بامبۋك اعاشتارىنان تۇرعىزىلعان بولاتىن. تاماق ٴپىسىرۋ ٷشىن جەر قازىپ، وشاق جاساپ، كوكوس قابىقتارىنان وت جاعاتىنمىن. سۋ الۋ ٷشىن قۇدىق باسىنا بارىپ، جەرگىلىكتى ايەلدەرمەن بىرگە كەزەككە تۇراتىنمىن. ولار ۇزىندىعى 2 مەتردەي تاياقپەن سۋ تارتىپ شىعاراتىن. مەن ونى قارماققا ۇقساتتىم. ٴبىراق تاياقتىڭ باسىنداعى جىپكە ىلگەك ەمەس، شەلەك بايلاناتىن. كەزەگى كەلگەندە، ٵر ايەل تاياعىن سىلكىپ قالىپ، شەلەگىن سۋعا تولتىرىپ الاتىن. سىرتتان باقىلاعانىمدا ٴبارى وڭاي سياقتى كورىندى. ٴبىراق كەزەگىم كەلگەندە تاياعىمدى قانشا سەرمەسەم دە، شەلەگىم سۋعا باتپاي، قالقىپ تۇرا بەردى. ٴبارى ٴبىر كۇلىپ باسىلعاننان كەيىن، ٴبىر ايەل كومەكتەسىپ جىبەردى. جەرگىلىكتى ايەلدەر قاشاندا كومەك كورسەتۋگە دايىن، اقپەيىل ەدى.
ەكەۋىڭىز دە ارالدارداعى قىزمەتتى جاقسى كورىپ كەتتىڭىزدەر. ەستەن كەتپەس وقيعالارىڭىز بولسا، ايتا وتىرساڭىزدار.
ۋينستون باۋىرلاس: مۇنداي وقيعالار جەرگىلىكتى مادەنيەتتى تۇسىنبەگەن كەزدەرى بولدى. مىسالى، باۋىرلاستار تاماققا شاقىرعاندا، داستارقانعا سول كۇنگى اس-اۋقاتتىڭ ٴبارىن قويادى ەكەن. ولارعا دا قالدىرۋ كەرەكتىگى ويىمىزعا كىرىپ تە شىقپاپتى، الدىمىزعا قويىلعاننىڭ ٴبارىن جەي بەرىپپىز. ٴمان-جايدى تۇسىنگەننەن كەيىن بۇلاي ەتۋدى قويدىق. كوپ نارسەنى بىلمەي قاتەلەسسەك تە، باۋىرلاستار ٴبىزدى تۇسىنەتىن. التى اي سايىن قاۋىمدارعا بارعاندا، ولار ٴبىزدى قۇشاق جايا قارسى الاتىن. جەرگىلىكتى باۋىرلاستار بىزدەن باسقا سىرتتان كەلگەن كۋاگەرلەردى كورمەگەن ەدى.
نيۋە ارالىندا ٴبىر توپ باۋىرلاستى ۋاعىزعا باستاپ بارۋىم
قاۋىمداردى ارالاعان كەزدە سول اۋىلداردىڭ ادامدارىنا جاقسى كۋالىك بەرەتىنبىز. ولاردىڭ كوبىسى جەرگىلىكتى باۋىرلاستاردىڭ شاعىن توبىنا قاراپ، ەحوبا كۋاگەرلەرىن دۇنيەجۇزىلىك ۇيىم دەپ ويلاماعان ەكەن. ٴبىراق ٴبىزدى، تەڭىز اسىپ كەلگەن شەتەلدىكتەردى كورگەن كەزدە جۇرت تاڭىرقاپ قالاتىن.
پەم باۋىرلاس: كيريباتيدە بولعان ٴبىر وقيعا جادىمنان كەتەر ەمەس. ول جاقتاعى باۋىرلاستار ساۋساقپەن سانارلىقتاي ەدى. ولاردىڭ سينيكاي ماتەرا دەگەن جار دەگەندە جالعىز اقساقالدارى بولاتىن. ول ۇنەمى ٴبىزدىڭ قامىمىزدى ويلاپ جۇرەتىن. ول ٴبىر كۇنى كەلىپ: «مىناۋ سەندەرگە»،— دەپ قولىمىزعا ٴبىر سەبەت ۇستاتتى. ىشىندە ٴبىر ٴتۇيىر جۇمىرتقا بار ەكەن. بۇل كىشكەنە عانا زات بولسا دا، دارقان كوڭىلمەن بەرىلگەندىكتەن، جۇرەگىمىز تەبىرەنىپ كەتتى. سول ۋاقىتتارى جۇمىرتقا دەگەندى سيرەك جەيتىن ەدىك.
پەم باۋىرلاس، ىشىڭىزدەگى بالا شەتىنەپ كەتكەن جاعداي بولعان ەكەن. بۇل قيىندىقتان قالاي ٶتتىڭىز؟
1973-جىلى وڭتۇستىك تىنىق مۇحيت ارالدارىندا جۇرگەندە بالا كوتەردىم. ٴبىز اۆسترالياعا ورالدىق، ٴبىراق ٴتورت ايدان كەيىن بالام شەتىنەپ كەتتى. ۋينستون ەكەۋىمىزدىڭ كوكىرەگىمىز قارس ايىرىلدى. ۋاقىت وتە جۇرەگىمنىڭ سىزداعانى باسىلا باستادى. 2009-جىلدىڭ 15-ساۋىرىندەگى «كۇزەت مۇناراسىندا» ٴبىر ماقالا جارىق كوردى. «وقىرمان ساۋالدارى» ايدارىندا «ەگەر ايەل تۇسىك تاستاسا نە بالاسى ٶلى تۋىلسا، ونىڭ قايتا تىرىلەتىنىنە ٷمىت بار ما؟» دەگەن سۇراق كوتەرىلىپتى. بۇل ماقالا مەنى كوكىرەگىمە تولعان شەردەن ارىلتقانداي بولدى. ٵرى وسى ماسەلەدە دە ەحوبا دۇرىس ارەكەت ەتەتىنىنە يلاندىردى. ول ٴبىزدى وسى زۇلىم دۇنيەدە كورگەن بار ازاپتان ارىلتادى، ٵرى ۇلى يسا ارقىلى «ٸبىلىستىڭ ىستەرىن تالقاندايدى» (جوح. 1-ح. 3:8). وسى ماقالادان كەيىن ەحوبانىڭ حالقى رەتىندە يە بولعان «مەرۋەرتىمىزدى» ودان بەتەر باعالاي تۇستىك. پاتشالىققا دەگەن ٷمىتىمىز بولماسا، نە ىستەر ەدىك؟!
وسى جاعدايدان كەيىن ٴبىز تولىق ۋاقىتتى قىزمەتكە قايتا كىرىستىك. بىرنەشە اي اۆستراليا فيليالىندا قىزمەت ەتتىك. سودان كەيىن اۋداندىق قىزمەتكە ورالدىق. جاڭا وڭتۇستىك ۋەلس شتاتى مەن سيدنەيدە ٴتورت جىل قىزمەت ەتكەن سوڭ، 1981-جىلى فيليالعا قايتا شاقىرىلدىق. ٴبىز ٵلى كۇنگە دەيىن وسىندامىز.
ۋينستون باۋىرلاس، وڭتۇستىك تىنىق مۇحيت ارالدارىندا جيناعان تاجىريبەڭىز اۆسترالازيا فيليالىندا كوميتەت مۇشەسى بولىپ قىزمەت ەتۋدە كادەگە جارادى ما؟
ارينە، جارادى. باستاپقىدا اۆستراليا فيليالىنىڭ قاراماعىندا ساموا مەن امەريكا سامواسى بولدى. اۆستراليا فيليالى كەيىن جاڭا زەلانديا فيليالىمەن بىرىگىپ، اۆسترالازيا فيليالى بولدى. قازىر بۇل فيليالدىڭ قاراماعىنا اۆستراليا، ساموا، امەريكا سامواسى، كۋك ارالدارى، جاڭا زەلانديا، نيۋە، تيمور-لەستە، توكەلاۋ جانە تونگا كىرەدى. مەن وسى اتالعان ەلدەردىڭ كوبىنە فيليال وكىلى رەتىندە بارا العانىما قۋانامىن. ارالدارداعى ادال باۋىرلاستارمەن قىزمەت ەتە ٴجۇرىپ جيناعان تاجىريبەمنىڭ پايداسى زور بولدى. قازىر بەتەلدە دە ولار ٷشىن قىزمەت ەتەمىن.
ۋينستون مەن پەم اۆسترالازيا فيليالىندا
ٴسوز سوڭىندا ايتارىم، ٴبىر نارسەگە كوزىمىز جەتتى: قۇدايدى تەك ۇلكەن كىسىلەر عانا ىزدەمەيدى ەكەن. بۇعان ٶز ٶمىرىمىز دالەل. «اسا قۇندى مەرۋەرتتى» جاستار دا تاپقىلارى كەلەدى، ٴتىپتى جاقىندارى قولداماسا دا (پات. 2-ج. 5:2، 3؛ شەج. 2-ج. 34:1—3). سۇيىسپەنشىلىگى مول ەحوبا قۇداي ۇلكەندەرگە دە، جاستارعا دا — بارلىق ادامعا شىنايى ٶمىر سيلاعىسى كەلەدى.
50 جىلدان اسا ۋاقىت بۇرىن پەم ەكەۋىمىز قۇدايدى ىزدەي باستاعان ەدىك. بۇل ساياحاتىمىز قايدا جەتەلەپ اپاراتىنىن كىم بىلگەن؟ راسىندا دا، پاتشالىق جايلى شىندىق — قۇنى ولشەۋسىز مەرۋەرت! بار كۇشىمىزبەن وسى مەرۋەرتتى قولىمىزدا مىقتاپ ۇستاپ قالعىمىز كەلەدى.
