Thaburi 21:1-13
Kũrĩ mũrũgamĩrĩri. Rwĩmbo rwa Daudi.
21 Atĩrĩrĩ Jehova, mũthamaki nĩ akenaga nĩ ũndũ wa hinya waku;+Nĩ akenaga mũno nĩ ũndũ wa ciĩko ciaku cia kũhonokania.+
2 Nĩ ũmũhingĩirie merirĩria ma ngoro yake,+Na ndwagĩte kũmũhe ũndũ ũrĩa ahoete na mĩromo yake. (Sela)
3 Nĩ gũkorũo ũmũtũngaga na irathimo nyingĩ;Ũmũhumbaga thũmbĩ ya thahabu ĩrĩa njega* mũtwe.+
4 Aakũhoire muoyo, nawe ũkĩmũhe,+Ũkĩmũhe ũtũũro mũraihu,* nginya tene na tene.
5 Ciĩko ciaku cia kũhonokania imũrehagĩra riri mũnene.+
Ũmũheaga gĩtĩo na riri.
6 Ũtũmaga atũũre arĩ mũrathime tene na tene;+Ũtũmaga akene na gĩkeno gĩa gũkorũo mbere yaku.*+
7 Nĩ gũkorũo mũthamaki nĩ ehokaga Jehova;+Tondũ wa wendo mwĩhokeku wa Ũrĩa ũrĩ Igũrũ Mũno, gũtirĩ hĩndĩ akenyenyeka.*+
8 Guoko gwaku nĩ gũkaanyita thũ ciaku ciothe;Guoko gwaku kwa ũrĩo nĩ gũkaanyita arĩa magũthũire.
9 Ũgaatũma mahaane ta riiko rĩrĩ na mwaki mũnene rĩrĩa ihinda rĩrĩa rĩtuĩtwo rĩa gwĩciria ũhoro wao rĩgaakinya.
Jehova nĩ akaamameria nĩ ũndũ wa marakara make, naguo mwaki ũmacine mathire.+
10 Ũkaaniina njiarũa ciao ciehere* thĩinĩ wa thĩ,Na rũciaro rwao rwehere gatagatĩ-inĩ ka ariũ a andũ.
11 Tondũ nĩ maathugundĩte gũgwĩka ũndũ mũũru;+Nĩ mabangĩte njama no itikaagaacĩra.+
12 Nĩ gũkorũo nĩ ũgaatũma macoke na thutha more+
Na njĩra ya kwerekeria ũta* waku harĩ o.*
13 Arahũka wee Jehova wonanie hinya waku.
Nĩ tũkũina nyĩmbo tũgooce ũhoti waku mũnene.
