Marũa Kũrĩ Aefeso 3:1-21
3 Nĩ ũndũ wa gĩtũmi gĩkĩ, niĩ Paulo, o niĩ njohetwo+ ndĩ thĩinĩ wa Kristo Jesu nĩ ũndũ wanyu, inyuĩ andũ a ndũrĩrĩ—
2 angĩkorũo kũna nĩ mũiguĩte ũhoro wĩgiĩ ũramati+ wa ũtugi mũnene wa Ngai ũrĩa ndaheirũo nĩ ũndũ wanyu,
3 atĩ kũgerera ũguũrio nĩ ndamenyithirio hitho ĩrĩa theru, o ta ũrĩa ndandĩkire na njĩra nguhĩ hau kabere.
4 Kwoguo, mwathoma ũhoro ũyũ nĩ mũkũmenya ũrĩa ndaũkĩirũo nĩ hitho ĩrĩa theru+ ĩgiĩ Kristo.
5 Njiarũa-inĩ iria ingĩ, hitho ĩyo ndĩamenyithanirio kũrĩ ariũ a andũ ta ũrĩa rĩu ĩguũrĩirio atũmwo ake arĩa aamũre o hamwe na anabii kũgerera roho,+
6 na hitho ĩyo nĩyo atĩ, andũ a ndũrĩrĩ, arĩa marĩ na ũiguano na Kristo Jesu na kũgerera ũhoro ũrĩa mwega, nĩ magĩrĩirũo gũtuĩka agai hamwe nake na matuĩke ciĩga cia mwĩrĩ+ na manyitanĩre na ithuĩ harĩ kĩĩranĩro.
7 Niĩ ndatuĩkire ndungata ya ũndũ ũcio kũringana na kĩheo kĩa ũtugi mũnene wa Ngai kĩrĩa ndaheirũo o ũguo tũhũ kũgerera wĩra wa hinya wake.+
8 Niĩ, mũndũ mũnini gũkĩra ũrĩa mũnini mũno gatagatĩ-inĩ ka arĩa othe aamũre,+ ndaheirũo ũtugi ũcio mũnene+ nĩguo hunjĩrie ndũrĩrĩ ũhoro ũrĩa mwega wĩgiĩ ũtonga ũrĩa ũtangĩtuĩrĩka wa Kristo
9 na ndũme andũ othe mone ũrũgamĩrĩri wa hitho ĩrĩa theru,+ ĩrĩa ĩtũire ĩrĩ hithe kuuma tene thĩinĩ wake, o we wombire indo ciothe.
10 Ũndũ ũcio wekĩkire nĩguo rĩu, kũgerera kĩũngano,+ ũũgĩ wa Ngai ũrĩa wonanagio na njĩra nyingĩ itiganĩte ũmenyithio thirikari na anene arĩa marĩ kũrĩa igũrũ.+
11 Ũndũ ũcio nĩ kũringana na muoroto wa tene na tene ũrĩa aambĩrĩirie wĩgiĩ Kristo,+ Jesu Mwathani witũ,
12 ũrĩa kũgerera harĩ we tũkoragwo na wĩyathi ũyũ wa kwaria na wa gũkuhĩrĩria Ngai+ tũrĩ na ũmĩrĩru kũgerera wĩtĩkio witũ harĩ we.
13 Nĩ ũndũ ũcio ngũmũũria atĩ mũtigakue ngoro tondũ wa mĩnyamaro yakwa nĩ ũndũ wanyu, nĩ gũkorũo ĩtũmaga inyuĩ mũgĩe na riri.+
14 Nĩ ũndũ wa gĩtũmi kĩu-rĩ, nĩ ndaturĩria Ithe witũ maru,
15 o we ũheete famĩlĩ ciothe rĩĩtwa igũrũ na thĩ.
16 Ndahoya atĩ kũgerera riri wake mũnene atũme mũndũ wanyu wa na thĩinĩ+ agĩe na hinya kũgerera hinya wa roho wake,
17 na atĩ kũgerera wĩtĩkio wanyu, Kristo atũũre ngoro-inĩ cianyu na wendo.+ Mũroikaraga mwĩhandĩte wega+ na mũrũmĩte mũthingi-inĩ ũcio,+
18 nĩguo mũrĩ hamwe na arĩa othe aamũre mũhote biũ gũtaũkĩrũo wega nĩ wariĩ, ũraihu, ũraihu wa na igũrũ na ũriku,
19 na mũmenye wendo wa Kristo,+ ũrĩa ũkĩrĩte ũmenyo, nĩgetha mũiyũrũo na ũiyũru wothe ũrĩa Ngai aheanaga.
20 Rĩu-rĩ, kũringana na hinya wake ũrĩa ũrutaga wĩra thĩinĩ witũ,+ o we ũngĩhota gwĩka o na agakĩrĩrĩria mũno makĩria maũndũ marĩa tũmũhoyaga kana tũngĩĩcirĩria,+
21 arogĩa na riri kũgerera kĩũngano na kũgerera Kristo Jesu njiarũa-inĩ ciothe tene na tene. Ameni.
