Mathayo 21:1-46
21 Rĩrĩa maakuhĩrĩirie Jerusalemu na magĩkinya Bethifage kĩrĩma-inĩ kĩa Mĩtamaiyũ, Jesu agĩtũma arutwo ake erĩ,
2 akĩmeera atĩrĩ: “Thiĩi gĩcagi-inĩ kĩĩrĩa mũrona, na mwakinya nĩ mũkuona ndigiri na njaũ yayo irĩ njohe. Mũciohore mũndehere.
3 Mũndũ angĩmũũria kĩũria, mũmwĩre atĩrĩ, ‘Mwathani nĩ aracibatara.’ Na o hĩndĩ ĩyo nĩ ekũmwĩtĩkĩria.”
4 Ũndũ ũcio wekĩkire nĩguo ciugo iria ciaaririo nĩ mũnabii ihinge, rĩrĩa oigire ũũ:
5 “Ĩrai mwarĩ wa Zayuni: ‘Atĩrĩrĩ, Mũthamaki waku nĩ aroka kũrĩ wee, nĩ mũhooreri na akuuĩtwo nĩ ndigiri, agagĩkuuo nĩ njaũ ya ndigiri.’”
6 Nĩ ũndũ ũcio arutwo magĩthiĩ na magĩka o ta ũrĩa Jesu aameerĩte.
7 Magĩtwara ndigiri ĩyo na njaũ yayo, na makĩigĩrĩra nguo ciao igũrũ rĩacio, nake agĩikarĩra njaũ ĩyo.
8 Andũ aingĩ thĩinĩ wa kĩrĩndĩ makĩara nguo ciao cia igũrũ njĩra-inĩ, nao arĩa angĩ maatuaga mathĩgĩ ma mĩtĩ makĩaraga njĩra-inĩ.
9 Makĩria ma ũguo, kĩrĩndĩ kĩrĩa kĩarĩ mbere yake na kĩrĩa kĩamũrũmĩrĩire kĩaanagĩrĩra gĩkiugaga ũũ: “Twahoya ũhonokie Mũrũ wa Daudi! Kũrathimwo nĩ ũrĩa ũroka na rĩĩtwa rĩa Jehova!* Twakũhoya ũmũhonokie ũrĩ kũu igũrũ mũno!”
10 Na rĩrĩa aakinyire Jerusalemu, andũ othe a itũũra rĩu makiumũrũrũka, makĩũranagia: “Ũyũ nũ?”
11 Nakĩo kĩrĩndĩ gĩgĩikara gĩkiugaga atĩrĩ: “Ũyũ nĩ Jesu wa Nazarethi ya Galili! Nĩwe mũnabii ũrĩa weranĩirũo.”
12 Jesu agĩtonya thĩinĩ wa hekarũ na akĩrutũrũra arĩa othe meendagia na makagũra indo thĩinĩ wa hekarũ, na akĩng’aũrania metha cia arĩa maakũũranagia mbeca, na itĩ cia arĩa meendagia ndutura.
13 Na akĩmeera: “Nĩ kwandĩke atĩrĩ, ‘nyũmba yakwa ĩgeetagwo nyũmba ya mahoya,’ no inyuĩ mũramĩtua ngurunga ya atunyani.”
14 Ningĩ andũ arĩa maarĩ atumumu na cionje magĩũka kũrĩ we hekarũ-inĩ, nake akĩmahonia.
15 Rĩrĩa athĩnjĩri-Ngai arĩa anene na andĩki-Watho moonire maũndũ ma magegania marĩa eekaga, na tũhĩĩ tũrĩa twaanagĩrĩra thĩinĩ wa hekarũ tũkiugaga: “Twahoya ũhonokie Mũrũ wa Daudi!” makĩrakara
16 makĩmũũria atĩrĩ: “Hihi nĩ ũraigua ũrĩa aya maroiga?” Nake Jesu akĩmacokeria ũũ: “Ĩĩ nĩ ndĩraigua. Kaĩ mũtathomete ũũ: ‘Nĩ ũhotithĩtie twana o na tũkenge tũkũgooce’?”
17 Agĩcoka akĩmatiga akiuma itũũra rĩu agĩthiĩ Bethania, akĩrara kuo.
18 Na rĩrĩa aacokaga itũũra-inĩ rĩu rũcinĩ tene, akĩigua ahũtiĩ.
19 Akĩona mũkũyũ mũkĩra-inĩ wa njĩra na agĩthiĩ harĩ guo, no gũtirĩ kĩndũ onire tiga o mathangũ matheri, akĩwĩra atĩrĩ: “Kuuma rĩu ndũkaagĩa matunda rĩngĩ.” Naguo mũkũyũ ũcio ũkĩũma o hĩndĩ ĩyo.
20 Na rĩrĩa arutwo moonire ũguo makĩgega, makĩũria: “Kũngĩhoteka atĩa mũkũyũ ũyũ ũũme o rĩmwe?”
21 Jesu akĩmacokeria ũũ: “Ngũmwĩra na ma atĩrĩ, mũngĩkorũo na wĩtĩkio na mwage nganja, to ũguo ndĩrekire mũkũyũ ũcio mũrĩhotaga gwĩka, o na mũngĩra kĩrĩma gĩkĩ ‘Uma haha ũthiĩ ũgwe iria-inĩ,’ noguo kũngĩkĩka.
22 Na maũndũ marĩa mothe mũrĩhoyaga mũrĩ na wĩtĩkio, nĩ mũrĩheagwo.”
23 Thutha wa gũthiĩ hekarũ-inĩ, athĩnjĩri-Ngai arĩa anene na athuri magĩthiĩ kũrĩ we akĩrutana makĩmũũria atĩrĩ: “Wĩkaga maũndũ maya na wathani ũrĩkũ? Na nũ ũkũheete wathani ũcio?”
24 Nake Jesu akĩmacokeria ũũ: “O na niĩ nĩ ngũmũria ũndũ ũmwe. Na mwanjokeria, nĩ ngũmwĩra njĩkaga maũndũ maya na wathani ũrĩkũ:
25 Johana aarutĩte kũ wathani wa kũbatithania? Hihi aarutĩte igũrũ kana kũrĩ andũ?” No makĩambĩrĩria kwĩrana atĩrĩ: “Tũngiuga ‘aarutĩte igũrũ,’ egũtũũria, ‘Mwakĩagire kũmwĩtĩkia nĩkĩ?’
26 No tũngiuga, ‘Aarutĩte kũrĩ andũ,’ nĩ tũretigĩra kĩrĩndĩ, nĩ ũndũ andũ othe metĩkĩtie atĩ Johana aarĩ mũnabii.”
27 Nĩ ũndũ ũcio magĩcokeria Jesu atĩrĩ: “Tũtiũĩ.” Nake akĩmeera ũũ: “O na niĩ ndikũmwĩra njĩkaga maũndũ maya na wathani ũrĩkũ.
28 “Mũkuona atĩa? Harĩ mũndũ warĩ na ariũ erĩ. Agĩthiĩ harĩ wa mbere, akĩmwĩra atĩrĩ, ‘Mũrũ wakwa, thiĩ ũkarute wĩra mũgũnda-inĩ wa mĩthabibũ ũmũthĩ.’
29 Nake akĩmũcokeria akĩmwĩra, ‘Ndigũthiĩ,’ no thutha-inĩ akĩona nĩ ahĩtia na agĩthiĩ.
30 Agĩthiĩ harĩ wa kerĩ, akĩmwĩra o taguo. Ũcio akĩmũcokeria atĩrĩ, ‘Nĩ ngũthiĩ Baba,’ no ndaathire.
31 Nĩ ũrĩkũ wekire wendi wa ithe?” Makiuga: “Nĩ ũcio wa mbere.” Jesu akĩmeera ũũ: “Ngũmwĩra o ma atĩ etia a mbeca cia igooti na ahũri maraya magaatonya Ũthamaki-inĩ wa Ngai mbere yanyu.
32 Tondũ Johana okire kũrĩ inyuĩ na akĩmuonia njĩra ya ũthingu, no mũtiamwĩtĩkirie. Ĩndĩ etia a mbeca cia igooti na ahũri maraya nĩ maamwĩtĩkirie, na rĩrĩ, o na gũtuĩka nĩ muoonire ũguo, mũtieririre mũmwĩtĩkie.
33 “Thikĩrĩriai ngerekano ĩngĩ: Kwarĩ mũndũ wahandire mĩthabibũ mũgũnda-inĩ wake, akĩũirigĩra na akĩenja kĩhihĩro kĩa ndibei thĩinĩ waguo na agĩaka nyũmba ya mũrangĩri ndaya na igũrũ;* agĩcoka akĩũkomborithia arĩmi, na agĩthiĩ bũrũri wa kũraya.
34 Hĩndĩ ya kũgetha thabibũ yakinya, agĩtũma ngombo ciake kũrĩ arĩmi acio ikagĩre maciaro.
35 No arĩmi acio makĩnyita ngombo ciake, makĩhũũra ĩmwe, makĩũraga ĩngĩ, na makĩhũũra ĩngĩ na mahiga.
36 Agĩcoka agĩtũma ngombo ingĩ, nyingĩ gũkĩra cia mbere, nao magĩciĩka o ũguo.
37 Mũthia-inĩ akĩmatũmĩra mũrũwe, akiuga atĩrĩ, ‘Nĩ mekũhe mũrũ wakwa gĩtĩo.’
38 No rĩrĩa moonire mũrũwe, arĩmi acio makĩĩrana atĩrĩ, ‘Ũyũ nĩwe mũgai wa mũgũnda ũyũ. Nĩ tũmũũragei na twĩyoere igai rĩake!’
39 Kwoguo makĩmũnyita na makĩmũikia nja ya mũgũnda ũcio makĩmũũraga.
40 Gũkĩrĩ ũguo, rĩrĩa mwene mũgũnda ũcio agooka-rĩ, ageka arĩmi acio atĩa?”
41 Makĩmwĩra atĩrĩ: “Akaamaniina biũ tondũ nĩ oru, na akomborithie arĩmi angĩ mũgũnda ũcio, arĩa marĩmũheaga matunda hĩndĩ ĩrĩa yagĩrĩire.”
42 Jesu akĩmoria atĩrĩ: “Kaĩ mũtarĩ mwathoma thĩinĩ wa Maandĩko atĩ, ‘ihiga rĩrĩa rĩaregirũo nĩ aaki nĩrĩo rĩtuĩkĩte ihiga rĩrĩa inene rĩa kona. Ihiga rĩu riumĩte kũrĩ Jehova,* na nĩ rĩa magegania harĩ ithuĩ’?
43 Nĩkĩo ngũmwĩra atĩrĩ, Ũthamaki wa Ngai nĩ ũkweherio kũrĩ inyuĩ na ũheo rũrĩrĩ rũrĩa rũrĩkoragwo na maciaro.
44 Ningĩ, mũndũ ũrĩa ũkaagwĩra ihiga rĩu nĩ akaahehenjwo. Nake ũrĩa wothe ũkaagwĩrũo nĩrĩo, nĩ rĩkaamũmemenda.”
45 Rĩrĩa athĩnjĩri-Ngai arĩa anene na Afarisai maaiguire ngerekano ciake, makĩmenya atĩ aaragia igũrũ rĩao.
46 O na gũtuĩka nĩ meendaga kũmũnyita, nĩ meetigagĩra kĩrĩndĩ tondũ gĩetĩkĩtie atĩ aarĩ mũnabii.
Tũũhoro twa magũrũ-inĩ
^ Rora Ũthathaũri wa Ciugo.
^ Nĩ handũ ha mũndũ gũikara akĩrangĩra mũgũnda nĩguo aici matigatonye o na kana nyamũ.
^ Rora Ũthathaũri wa Ciugo.
