Mathayo 13:1-58
-
NGEREKANO CIA ŨTHAMAKI (1-52)
-
Mũhuri wa mbeũ (1-9)
-
Kĩrĩa gĩatũmaga Jesu ahũthĩre ngerekano (10-17)
-
Ngerekano ya mũhuri wa mbeũ gũtaarĩrio (18-23)
-
Ngano na itindiĩ (24-30)
-
Mbegũ ya karatarĩ na ndawa ya kũimbia mũtu (31-33)
-
Kũhũthĩra ngerekano nĩ kwahingirie ũrathi (34, 35)
-
Ngerekano ya ngano na itindiĩ gũtaarĩrio (36-43)
-
Kĩndũ kĩa goro na ruru ĩrĩa njega (44-46)
-
Neti (47-50)
-
Indo iria njerũ na ngũrũ (51, 52)
-
-
Jesu kũregwo itũũra-inĩ rĩa kwao (53-58)
13 Mũthenya ũcio, Jesu oima nyũmba, agĩthiĩ agĩikara thĩ hakuhĩ na iria.
2 Na kĩrĩndĩ kĩnene gĩgĩũka harĩ we, nake akĩhaica gatarũ na agĩikara thĩ, nakĩo kĩrĩndĩ kĩarũgamĩte rũteere-inĩ rwa iria.
3 Agĩcoka akĩmeera maũndũ maingĩ na njĩra ya ngerekano, akiuga ũũ: “Atĩrĩrĩ, mũhuri ũmwe nĩ aathiire kũhura mbeũ.
4 Na rĩrĩa aahuraga, mbeũ imwe ikĩgwa njĩra-inĩ, na nyoni igĩũka igĩcirĩa.
5 Ingĩ ikĩgwa kũndũ kũrĩ mahiga, kũrĩa gũtaarĩ na tĩri mũingĩ, na ikĩmera narua tondũ tĩri ũcio ndwarĩ mũriku.
6 No rĩrĩa riũa rĩaarire, ikĩhĩa na ikĩũma tondũ itiarĩ na mĩri.
7 Ingĩ ikĩgwa mĩigua-inĩ, nayo mĩigua ĩyo ĩkĩneneha ĩgĩcihatĩka.
8 Ningĩ ingĩ ikĩgwa tĩri-inĩ ũrĩa mwega, na ikĩambĩrĩria kũgĩa maciaro, imwe maita igana, ingĩ maita mĩrongo ĩtandatũ, nacio ingĩ maita mĩrongo ĩtatũ.
9 Ũrĩa ũrĩ matũ nĩ aigue.”
10 Nĩ ũndũ ũcio arutwo ake magĩũka kũrĩ we makĩmũũria atĩrĩ: “Ũmaragĩria na njĩra ya ngerekano nĩkĩ?”
11 Akĩmacokeria ũũ: “Inyuĩ nĩ mwĩtĩkĩrĩtio gũtaũkĩrũo nĩ hitho cia Ũthamaki wa Ngai, no andũ acio matiĩtĩkĩrĩtio.
12 Tondũ mũndũ o wothe ũrĩ na ũtaũku, nĩ akaaheo ũtaũku makĩria, na akĩrĩrĩrie kũgĩa naguo, ĩndĩ ũrĩa wothe ũtarĩ na ũtaũku, o na ũrĩa arĩ naguo nĩ agaatunywo.
13 Kĩu nĩkĩo gĩtũmaga njarie nao na njĩra ya ngerekano, tondũ maroraga no mationaga, magathikĩrĩria no matiguaga; na matitaũkagĩrũo nĩ maũndũ macio.
14 Na ũrathi wa Isaia nĩ ũrahinga harĩ o, ũrĩa ugaga ũũ: ‘Kũigua nĩ mũkaigua, no mũtitaũkĩrũo, na kũrora nĩ mũkarora no mũtione.
15 Nĩ gũkorũo andũ aya nĩ momĩtie ngoro ciao, kũigua nĩ maiguaga no makahinga matũ mao, na makahinga maitho mao, nĩguo matikanone na matikanaigue na matikanataũkĩrũo na magarũrũke, ndĩmahonie.’
16 “No rĩrĩ, gũkena nĩ maitho manyu tondũ nĩ monaga, na matũ manyu tondũ nĩ maiguaga.
17 Nĩ ũndũ ngũmwĩra atĩrĩ na ma, anabii na andũ aingĩ athingu nĩ meeriragĩria kuona maũndũ marĩa inyuĩ mũrona no matiamonire, na kũigua maũndũ marĩa mũraigua no matiamaiguire.
18 “Rĩu gĩthikĩrĩriei ngerekano ya mũndũ ũrĩa wahurire mbeũ.
19 Mũndũ o wothe angĩigua ũhoro wa Ũthamaki na age gũtaũkĩrũo nĩguo, ũrĩa mũru okaga akaiya kĩrĩa kĩhurĩtwo ngoro-inĩ yake; ũcio nĩwe mbeũ ĩrĩa yahurirũo njĩra-inĩ.
20 Nacio iria ciahurirũo kũndũ kũrĩ na mahiga, nĩ mũndũ ũrĩa ũiguaga ũhoro na akawĩtĩkĩra o na ihenya akenete.
21 Ĩndĩ, ndakoragwo na mĩri no nĩ athiaga na mbere kwa ihinda, na kwagĩa magerio kana mĩnyamaro nĩ ũndũ wa ũhoro wa Ũthamaki, o rĩmwe akahĩngĩka.
22 Nacio iria ciagũire mĩigua-inĩ, nĩ mũndũ ũrĩa ũiguaga ũhoro, no mĩtangĩko ya mũtabarĩre ũyũ wa maũndũ* na hinya wa maheeni wa ũtonga ikahatĩka ũhoro ũcio, ũkaaga maciaro.
23 Na iria ciahurirũo tĩri-inĩ mwega, nĩ mũndũ ũrĩa ũiguaga ũhoro na agataũkĩrũo nĩguo, ũrĩa kũna ũciaraga maciaro, ũmwe maita igana, ũngĩ mĩrongo ĩtandatũ, na ũngĩ mĩrongo ĩtatũ.”
24 Agĩcoka akĩmahe ngerekano ĩngĩ, akiuga: “Ũthamaki wa igũrũ no ũhaananio na mũndũ wahurire mbeũ njega mũgũnda-inĩ wake.
25 Rĩrĩa andũ maarĩ toro, thũ yake ĩgĩũka na ĩkĩhura itindiĩ* kũu ngano-inĩ na ĩgĩthiĩ.
26 Ngano ĩyo yamera na yaciara maciaro, itindiĩ o narĩo rĩkĩambĩrĩria kuoneka.
27 Nĩ ũndũ ũcio ngombo ciake igĩthiĩ kũrĩ we na ikĩmũũria, ‘Mwathi witũ, githĩ ndwahurire mbeũ njega mũgũnda-inĩ waku? Gũthiĩte atĩa gũgakorũo na itindiĩ?’
28 Agĩcicokeria, ‘Nĩ thũ yakwa ĩkĩte ũguo.’ Nacio ikĩmũũria atĩrĩ, ‘Nĩ ũkwenda tũthiĩ tũkamunye itindiĩ rĩu?’
29 Agĩciĩra, ‘Aca; nĩguo mũkĩmunya itindiĩ mũtikarĩmunyanĩrie na ngano.
30 Rekei ikũranĩre nginya hĩndĩ ya magetha, na hĩndĩ ĩyo-rĩ, nĩ ngeera agethi ũũ: Ambai mũrĩcokanĩrĩrie nĩguo mũrĩcine; mũcoke mũcokanĩrĩrie ngano thĩinĩ wa ikũmbĩ rĩakwa.’”
31 Agĩcoka akĩmahe ngerekano ĩngĩ, akĩmeera: “Ũthamaki wa igũrũ ũtariĩ ta mbegũ ya karatarĩ,* ĩrĩa mũndũ ũmwe aahandire mũgũnda wake.
32 Ĩyo nĩyo mbegũ ĩrĩa nini biũ, no rĩrĩa yakũra, ĩnenehaga gũkĩra mĩmera ĩrĩa ĩngĩ ya mũgũnda na ĩgatuĩka mũtĩ, nginya nyoni cia rĩera-inĩ igoka ikoona handũ ha gũikara honge-inĩ ciaguo.”
33 Akĩmahe ngerekano ĩngĩ: “Ũthamaki wa igũrũ ũtariĩ ta ndawa ya kũimbia, ĩrĩa mũtumia ũmwe oire na agĩtukania na mũtu thĩinĩ wa ibaba ithatũ nene nginya mũtu ũcio wothe ũkĩimba.”
34 Maũndũ macio mothe-rĩ, Jesu aaragĩria kĩrĩndĩ na njĩra ya ngerekano. Gũtirĩ hĩndĩ aaragia nao hatarĩ ngerekano,
35 nĩguo ahingie ũhoro ũrĩa waaririo kũgerera mũnabii ũrĩa woigire: “Nĩ ngaatumũra kanua gakwa njarie na ngerekano; Nĩ ngaamenyithania maũndũ marĩa makoretwo marĩ mahithe kuuma o kĩambĩrĩria.”*
36 Ningĩ thutha wa gũtigana na kĩrĩndĩ, akĩingĩra nyũmba. Na arutwo ake magĩthiĩ kũrĩ we makĩmwĩra: “Tũtaarĩrie ngerekano ĩyo ya itindiĩ thĩinĩ wa mũgũnda wa ngano.”
37 Akĩmacokeria akĩmeera: “Mũhandi wa mbeũ ĩrĩa njega nĩ Mũrũ wa mũndũ;
38 mũgũnda nĩ thĩ. Nayo mbeũ ĩrĩa njega, nĩ ariũ a Ũthamaki, no itindiĩ nĩ ariũ a ũrĩa mũru,
39 nayo thũ ĩrĩa yahandire itindiĩ nĩ Mũcukani. Magetha nĩ ithirĩro rĩa mũtabarĩre ũyũ wa maũndũ,* nao agethi nĩ araika.
40 Nĩ ũndũ ũcio, o ta ũrĩa itindiĩ rĩmunyagwo na rĩgacinwo-rĩ, noguo gũkaahana hĩndĩ ya ithirĩro rĩa mũtabarĩre ũyũ wa maũndũ.*
41 Mũrũ wa mũndũ nĩ agaatũma araika ake, nao nĩ magaacokanĩrĩria andũ arĩa othe matũmaga arĩa angĩ mehie na arĩa aganu mehere Ũthamaki-inĩ wake,
42 nao araika nĩ makaamaikia thĩinĩ wa mwaki mũnene. Kũu nĩkuo makaarĩragĩra na makahagarania magego.
43 Hĩndĩ ĩyo arĩa athingu magaakenga o ta riũa Ũthamaki-inĩ wa Ithe wao. Ũrĩa ũrĩ matũ nĩ aigue.
44 “Ũthamaki wa igũrũ ũtariĩ ta kĩndũ kĩa goro kĩahithĩtwo mũgũnda-inĩ, kĩrĩa mũndũ ũmwe onire na agĩcoka akĩhitha, na nĩ ũndũ wa gĩkeno kĩrĩa aarĩ nakĩo, agĩthiĩ akĩendia indo ciake ciothe na akĩgũra mũgũnda ũcio.
45 “Ningĩ Ũthamaki wa igũrũ ũtariĩ ta mũhũri biacara wagendaga agĩcaria ruru njega.
46 Arĩkia kuona ruru ĩmwe ya goro, agĩthiĩ na akĩendia indo ciake ciothe na ihenya na akĩmĩgũra.
47 “Ningĩ Ũthamaki wa igũrũ ũtariĩ ta neti ĩikĩtio thĩinĩ wa iria ĩkanyita thamaki cia mĩthemba yothe.
48 Rĩrĩa yaiyũrire, ategi makĩmĩgucia makĩmĩiga rũteere-inĩ rwa iria, na maikara thĩ magĩthuura iria njega magĩcikia ikabu-inĩ, no iria itaarĩ njega magĩte.
49 Ũguo nĩguo gũkaahana hĩndĩ ya ithirĩro rĩa mũtabarĩre ũyũ wa maũndũ:* Araika nĩ magaathiĩ na maamũranie arĩa aganu kuuma kũrĩ arĩa athingu
50 na nĩ makaamaikia thĩinĩ wa mwaki ũrĩa mũnene. Kũu nĩkuo makaarĩragĩra na makahagarania magego.
51 Agĩcoka akĩmoria atĩrĩ: “Hihi nĩ mwataũkĩrũo nĩ maũndũ macio mothe?” Makĩmwĩra: “Ĩĩ.”
52 Nake akĩmeera ũũ: “Angĩkorũo nĩ mwataũkĩrũo-rĩ, mũrutani o wothe angĩrutwo ũhoro wa Ũthamaki wa igũrũ, atariĩ ta mũndũ mwene nyũmba, ũrĩa ũrutaga indo iria njerũ na ngũrũ kuuma mũthithũ-inĩ wake.”
53 Rĩrĩa Jesu aarĩkirie kũheana ngerekano icio, akiuma kũu agĩthiĩ.
54 Thutha wa gũkinya itũũra rĩa kwao, akĩambĩrĩria kũruta andũ ũhoro thĩinĩ wa thunagogi, nao makĩgega na makĩũria atĩrĩ: “Mũndũ ũyũ arutĩte kũ ũũgĩ ũyũ na nũ wamũheire ũhoti wa gwĩka maũndũ maya manene?
55 Githĩ ũyũ ti mũrũ wa bundi ũrĩa wa mbaũ? Githĩ nyina ti Mariamu? Na githĩ ariũ a nyina ti Jakubu na Jusufu na Simoni na Judasi?
56 Nao aarĩ a nyina githĩ othe matiikaraga o gũkũ hamwe na ithuĩ? Hakĩrĩ ũguo-rĩ, mũndũ ũyũ arutĩte kũ maũndũ maya mothe?”
57 Kwoguo makĩambĩrĩria kũhĩngĩka nĩ ũndũ wake. No Jesu akĩmeera atĩrĩ: “Mũnabii ndaimagwo gĩtĩo tiga o itũũra-inĩ rĩa kwao na gwake mũciĩ.”
58 Na ndaaringire ciama nyingĩ kũu nĩ ũndũ wao kwaga wĩtĩkio.
Tũũhoro twa magũrũ-inĩ
^ Rora Ũthathaũri wa Ciugo.
^ Nĩ mũthemba wa mũmera ũkoragwo na thumu na ũhanaine na ngano.
^ Nĩ kabegũ kanini mũno konekaga mwena wa Palestina. No gakũre gatuĩke mũtĩ ũrĩ na ũraihu wa mita ta inya na nĩ ũrĩ honge.
^ Ciugo ici ciaragia ũhoro wa ciana cia Adamu na Hawa.
^ Rora Ũthathaũri wa Ciugo.
^ Rora Ũthathaũri wa Ciugo.
^ Rora Ũthathaũri wa Ciugo.
