Mathayo 2:1-23
2 Thutha wa Jesu gũciarĩrũo Bethilehemu ya Judea matukũ-inĩ ma mũthamaki Herode,* atuĩria a njata kuuma mwena wa Irathĩro magĩũka Jerusalemu,
2 makĩũria atĩrĩ: “Arĩ kũ mũthamaki ũcio wa Ayahudi ũciarĩtwo? Tondũ nĩ twonire njata yake tũrĩ mwena wa Irathĩro, na rĩu tuoka kũmũinamĩrĩra.”
3 Rĩrĩa Mũthamaki Herode o na andũ a Jerusalemu othe maaiguire ũguo, magĩtangĩka mũno.
4 Agĩta athĩnjĩri-Ngai arĩa anene othe hamwe na andĩki-Watho, akĩmoria kũrĩa Kristo angĩaciarĩirũo.
5 Makĩmwĩra atĩrĩ: “Thĩinĩ wa Bethilehemu ya Judea, nĩ gũkorũo ũũ nĩguo mũnabii aandĩkire:
6 ‘Nawe, Bethilehemu ya bũrũri wa Juda, ngavana arĩa angĩ othe a Juda matiagĩrĩirũo nĩ gũkuona ta ũrĩ itũũra rĩtarĩ igweta, tondũ thĩinĩ waku nĩkuo gũkoima ũrĩa ũgaathana, ũrĩa ũkaarĩithia andũ akwa Isiraeli.’”
7 Herode agĩcoka agĩta atuĩria acio a njata na hitho akĩmoria hĩndĩ ĩrĩa njata ĩyo yoimĩrire.
8 Akĩmatũma Bethilehemu, akĩmeera: “Thiĩi mũtuĩrie wega ũhoro wĩgiĩ mwana ũcio, na mwamuona, mũgaacoka mũnjĩre, nĩguo o na niĩ thiĩ ngamũinamĩrĩre.”
9 Marĩkia gũthikĩrĩria mũthamaki, magĩthiĩ, nayo njata ĩrĩa moonete marĩ mwena wa Irathĩro ĩgĩthiĩ ĩrĩ mbere yao, nginya rĩrĩa yarũgamire igũrũ rĩa nyũmba ĩrĩa mwana ũcio aarĩ.
10 Rĩrĩa moonire njata ĩyo yarũgama, magĩkena mũno.
11 Na maingĩra nyũmba ĩyo, makĩona mwana ũcio na nyina Mariamu, magĩturia maru makĩinamĩrĩra mwana ũcio. Ningĩ makĩhingũra mĩhuko yao makĩmũhe thahabu, ũbani na manemane irĩ iheo.
12 No rĩrĩ, tondũ nĩ maakaanirio nĩ Ngai kĩroto-inĩ matigathiĩ kũrĩ Herode, magĩcoka bũrũri wao magereire njĩra ĩngĩ.
13 Marĩkia gũthiĩ, mũraika wa Jehova* akiumĩrĩra Jusufu kĩroto-inĩ, akĩmwĩra: “Ũkĩra, woe mwana ũcio na nyina mũũrĩre Misiri, na mũikare kuo nginya rĩrĩa ngaakwĩra, tondũ Herode arĩ hakuhĩ kwambĩrĩria gũcaria mwana ũcio nĩguo amũũrage.”
14 Agĩũkĩra na akĩoya mwana ũcio na mũtumia wake ũtukũ o ũcio magĩthiĩ Misiri.
15 Agĩikara kuo nginya rĩrĩa Herode aakuire, nĩguo ciugo iria Jehova* aaririe kũgerera mũnabii wake ihinge atĩ: “Nĩ ndeetire mũrũ wakwa kuuma Misiri.”
16 Nake Herode, amenya atĩ nĩ aaheenirio nĩ atuĩria a njata, akĩrakara mũno, na agĩathana tũhĩĩ tuothe twa mĩaka ĩĩrĩ gũcoka na thĩ tũũragwo thĩinĩ wa Bethilehemu na matũũra marĩa maarigicĩirie, kũringana na ũrĩa aatuĩrĩtie kũrĩ atuĩria a njata ũhoro wa ihinda rĩrĩa njata yoimĩrĩte.
17 Kwoguo ciugo iria ciaarĩtio kũgerera mũnabii Jeremia ikĩhinga, atĩ:
18 “Mũgambo nĩ waiguirũo Rama, wa kĩrĩro na mbugĩrĩrio nene; Rakeli akĩrĩrĩra ciana ciake, na gũtirĩ mũndũ ũngĩahotire kũmũũmĩrĩria tondũ itiarĩ ho.”
19 Rĩrĩa Herode aakuire, mũraika wa Jehova* akiumĩrĩra Jusufu kĩroto-inĩ arĩ Misiri
20 akĩmwĩra: “Ũkĩra, woe mwana ũcio na nyina mũthiĩ bũrũri wa Isiraeli, tondũ arĩa meendaga kũũraga mwana ũcio nĩ makuĩte.”
21 Kwoguo agĩũkĩra na akĩoya mwana ũcio na mũtumia wake magĩthiĩ bũrũri wa Isiraeli.
22 No rĩrĩa aaiguire atĩ Arikelau nĩwe waathanaga arĩ mũthamaki wa Judea ithenya rĩa ithe Herode, agĩtigĩra gũthiĩ kuo. Ningĩ-rĩ, tondũ nĩ aakanĩtio nĩ Ngai kĩroto-inĩ, agĩthiĩ Galili.
23 Agĩikara itũũra-inĩ rĩtagwo Nazarethi, nĩguo ciugo iria ciaaririo kũgerera anabii ihinge atĩ: “Ageetagwo Mũnazarini.”
Tũũhoro twa magũrũ-inĩ
^ Rora Ũthathaũri wa Ciugo.
^ Rora Ũthathaũri wa Ciugo.
^ Rora Ũthathaũri wa Ciugo.
^ Rora Ũthathaũri wa Ciugo.
