Ki Jinghikai kiba Ai Jingkyrmen
U Blei u la kular ïa ka lawei baphyrnai na ka bynta jong ngi. Un sa pynkut noh ïa ki jingjynjar baroh bad un ai ruh ïa ki briew ka jingim kaba suk bakmen ha kane ka pyrthei. (Salm 37:11) Balei ngi lah ban ngeit ïa kane ka jingkular? Namar “U Blei um long u briew, ba un lamler.” (Jingkheiñ 23:19) To ngin ïa peit katto katne kiei kiei kiba U Nongthaw jong ngi un sa leh.
U Blei un sa Weng noh ïa ki Briew Bymman
“Haba kiba sniew ki ïamih kum u phlang, bad haba baroh ki nongleh ïa ka bymman ki phuh; kata ka long ba yn pynjot noh ïa ki junom.”—SALM 92:7.
Kumba ngi la pule ha ka lynnong kaba la dep, ngi ïohi ba ka jingsniew ka nangroi. Kane kam dei ban pynlyngngoh ïa ngi namar ïa kane la ïathuhlypa ha ka Baibl ha shithi 2 Timothi 3:1-5 ba, “ha ki sngi kiba khatduh” ki briew kin nang kham sniew shuh shuh. Ki sngi kiba khatduh jong kaei? Jong ki briew kibym kwah ban kohnguh ïa U Blei. Shen U Blei un sa weng noh ïa ki briew kiba sniew kibym treh ban kylla. Hadien kata, tang ki briew kiba bha, kiba kohnguh ïa U Blei, kin ïoh ban shong sah ha pyrthei. “Kiba hok kin ïoh kynti ïa ka ri, bad kin shong ha ka ha la ka rta.”—Salm 37:29
U Blei Un sa Pynjot noh ïa u Soitan
U Blei Un sa Pynduh noh ïa ki Jingpang bad ka Jingïap
‘Ka tabernakl U Blei ka don ryngkat bad ki briew . . . Bad U Blei un niad noh ïa ka jingjaw ummat baroh na ki khmat jong ki, bad ka jingïap kan ym don shuh, lymne ka jingsngewsih, lymne ka jingïam, lymne ka jingpang kan ym don shuh.’—JINGPYNPAW 21:3, 4.
Ki jingpang bad ki jingjynjar kin kut namar U Blei un sa weng noh ïa baroh ki jingsniew kiba la pynlong da u Soitan, u Adam bad ka Im, bad ka jingbym janai jong ngi. Namarkata, wat ka jingïap ruh kan ym don shuh; ki briew kiba ieid bad kiba kohnguh ïa u Nongthaw kin im shi junom. Hynrei haei pat kin im?
U Nongthaw jong Ngi Un sa Pynkylla ïa kane ka Pyrthei sha ka Paradais
“Ka ri khlaw bad ka jaka kynjah kin sngewbha, ka ri shyïap ruh kan shad kmen, bad kan phuh kum u tiew kulab.”—ISAÏAH 35:1.
Ynda U Blei u la pynduh ïa ki briew kiba sniew, ka pyrthei kan sa kylla long ka paradais. Kan sa dap da ki kper bad ki jaka kiba itynnad, bad ka bam ka dih ruh kan dap kyrhai. (Salm 72:16) Ki duriaw, ki pung bad ki wah kin long kiba khuid bad kin dap da ki jingthaw kiba im ha um. Ka pyrthei jong ngi kan sa khuid haduh katta katta haduh ba tharai ka kyntien “jaboh” ruh kan jah noh. Ki briew kin sa tei ïa la ki ïing bad kin sah ha ki, bad yn ym don shuh ki briew kiba ïapthngan ne kiba duk.—Isaïah 65:21, 22.
U Blei Un sa Pynim Biang ïa kiba Ïap
“Kan sa don ka jingmihpat kiba ïap.”—KAM 24:15.
Hato phi kwah ban ïohi biang ïa kiba ieid ba thoiñ jong phi kiba la ïap? U Blei un sa pynmihpat ne pynim biang ïa ki ha ka pyrthei paradais. Phin ithuh ïa ki bad ki ruh kin ithuh ïa phi. Shu mutdur ïa ka jingkmen ka jong ki bad ka jong ngi. Balei ngi lah ban thikna ba kane kan jia shisha? Namarba ha ka Baibl, ki don ki nuksa jong ki briew kiba la shah pynmihpat bad kiba la im biang bad la ka ïing ka sem. Bad bunsien, ki briew ki la ïohi ba u Jisu u la pynmihpat ïa kiba la ïap.—Loukas 8:49-56; Ïoannis 11:11-14, 38-44.
