TAQSIṬ TIS 101

Nɣan Ɛisa ɣef tgejdit

WALI kan! Atan la yeţmeţţat Ɛisa. Iɛdawen-​is ɛellqen-​t ɣef tgejdit (wejgu), semmṛen-​as ifassen d iḍarren. Mačči d lmut igezzmen tasa? Lameɛna acuɣer ara yebɣu walbeɛḍ ad ixdem lḥaǧa yecban tagi i Ɛisa?

Axaṭer aṭas i gkeṛhen Ɛisa. Teẓriḍ anwa-​ten wigi meṛṛa i t-​ikeṛhen? Yiwen gar-​asen d Cciṭan Iblis, lmelk-​nni amcum i gewwin Adam d Ḥewwa ad ɛaṣin Yahwa. D neţţa daɣen i gdemmren iɛdawen n Ɛisa a t-​nɣen.

Uqbel ad semmṛen Ɛisa ɣef wejgu, aṭas n leḥwayeǧ n diri i s-​xedmen yeɛdawen-​is. Tecfiḍ asmi i ṛuḥen a t-​id-​ṭṭfen di tmazirt n Jitsimani? Anwa-​ten yeɛdawen-​nni? D lɛulama n ddin. A nwali d acu yeḍran d Ɛisa umbeɛd.

Mi t-​ṭṭfen ineḥkamen-​agi n ddin, imceggɛen meṛṛa n Ɛisa rewlen. Ǧǧan-​t weḥd-​es ger yeɛdawen-​is axaṭer ugaden. Lameɛna Buṭrus d Yuḥenna, ur nessebɛed ara mliḥ, tebɛen-​t iwakken ad ẓren d acu ara yeḍrun yid-​es.

Di tazwara, lmuqeddmin wwin Ɛisa ɣer Ḥanna, yiwen n wemɣar yellan zik d lmuqeddem ameqran. Lameɛna ur ɛeṭṭlen ara dinna. Wwin-​t umbeɛd ɣer wexxam n Kayef, yellan d lmuqeddem ameqran di lawan-​nni. Yuɣ lḥal nnejmaɛen dinna aṭas n lɛulama n ddin.

Deg wexxam-​agi n Kayef ara sɛeddin Ɛisa di ccṛeɛ. Wwin ɣer din lɣaci akken ad cehhden fell-​as s ẓẓur. Ineḥkamen meṛṛa n ddin ţɛeggiḍen: ‘Ɛisa yuklal lmut!’ Dɣa susfen-​t ɣer wudem yerna fkan-​as lbunyat.

Yuɣ lḥal, m’akken iḍerru wayagi meṛṛa, Buṭrus deg wefrag i gella. Imdanen ceɛlen times, zzin-​as iwakken ad sseḥmun axaṭer yella usemmiḍ deg yiḍ-​nni. Yiwet n tqeddact tmuqel Buṭrus, tenna: ‘Ula d argaz-​agi yedda d Ɛisa.’

Buṭrus yerra-​yas: ‘Xaṭi, d lekdeb!’

Lɣaci nnan tlata iberdan i Buṭrus belli yedda d Ɛisa, lameɛna tlata iberdan yeggumma a d-​iqirr. Mi t-​inkeṛ tikkelt tis tlata, Ɛisa yezzi ɣur-​es, imuqel-​it. Dɣa Buṭrus yeffeɣ ɣer beṛṛa, yeṭṭerḍeq d imeṭṭi axaṭer yendem imi iskaddeb.

Ass n lǧemɛa, lawan n lefjer, lmuqeddmin wwin Ɛisa ɣer wexxam ameqran n ccṛeɛ yeţţusemman Sanhedrin. Dinna, mcawaṛen wway gar-​asen ɣef wayen ara s-​xedmen. Mbeɛd wwin-​t ɣer Bunṭus Bilaṭus yellan d aneḥkam n tmurt n Yahuda.

Lmuqeddmin nnan i Bilaṭus: ‘Argaz-​agi d amcum. Yuklal lmut.’ Bilaṭus yesteqsa Ɛisa acḥal d abrid, lameɛna ur s-​d-​issukkes acemma. Iceggeɛ ihi Ɛisa ɣer Hiṛudus Antifas, aneḥkam n tmurt n Jlili, yellan deg wussan-​nni di temdint n Yarucalim. Lameɛna ula d neţţa ulac ayen i s-​d-​issukkes. Dɣa yerra-​t i Bilaṭus.

Bilaṭus yebɣa ad iserreḥ i Ɛisa. Lameɛna iɛdawen n Ɛisa, d ameḥbus nniḍen i bɣan a d-​issufeɣ deg wemkan-​is. Ameḥbus-​agi d yiwen umaker iţţusemman Barabas. Mi tewweḍ leǧwahi n ṭṭnac, Bilaṭus yussufeɣ Ɛisa ɣer beṛṛa. Yenna i lɣaci: ‘Atan ugellid-​nwen!’ Lameɛna imeqranen n lmuqeddmin ţɛeggiḍen: ‘Kkes-​it ssyagi! Neɣ-​it! Neɣ-​it!’ Bilaṭus iserreḥ ihi i Barabas, ma d Ɛisa yefka-​yasen-​t iwakken a t-​nɣen.

Mi tɛedda ṭṭnac n uzal, Ɛisa yeţwasemmeṛ ɣef tgejdit. Ɣas akken ur llin ara di ţţeswiṛa-​yagi, ţwasemmṛen daɣen sin yemcumen: yiwen ɣer tama-​s tayeffust ma d wayeḍ ɣer tama-​s tazelmaṭ. Cwiṭ n lweqt uqbel ad immet Ɛisa, yiwen seg-​sen yenna-​yas: ‘Mmekti-​yi-​d m’ara tḥekmeḍ di tgelda-​k.’ Ɛisa yenna-​yas: ‘Ɛuhdeɣ-​k aţ-​ţiliḍ yid-​i di Lǧennet.’

Mačči d lemɛahda ifazen? Teẓriḍ anta lǧennet iɣef i d-​immeslay dagi Ɛisa? Di tazwara, anda i d-​yexleq Ṛebbi lǧennet? Ɣef lqaɛa. Ihi, asm’ara yuɣal Ɛisa d agellid deg igenni, a d-​iḥyu argaz-​agi akken ad istummen s Lǧennet-​agi tajdiṭ ɣef lqaɛa. Mačči d ayen i ɣ-​issefṛaḥen?

Matta 26:57-75; 27:1-50; Luqa 22:54-71; 23:1-49; Yuḥenna 18:12-40; 19:1-30.