Argaz yesɛan lhiba
TAQSIṬ TIS 54
Argaz yesɛan lhiba
TEẒRIḌ anwa i d argaz iǧehden akk ɣef wiyaḍ seg wasmi i d-yexleq Ṛebbi ddunit? D yiwen lqaḍi yeţţusemman Cimcun. D Yahwa i s-yefkan tazmert i gesɛa. Uqbel akk a d-ilal Cimcun, Yahwa yenna i yemma-s: ‘Qrib a d-tesɛuḍ aqcic. D neţţa ara yezwiren zdat n wat Isṛayil akken a ten-isellek si ger ifassen n Ifilistiyen.’
Ifilistiyen d yir lɛibad iɛacen di tmurt n Kanɛan. Sɛan ayendin n iɛsekṛiwen, yerna sseṛwan lmeḥna i wat Isṛayil. Yiwen wass, asmi iteddu Cimcun ɣer Ifilistiyen, immuger-ed yiwen yizem i d-iṛeɛden fell-as. Lameɛna Cimcun yenɣa-t, yerna s ifassen-is kan. Yenɣa daɣen imeyyaten n Ifilistiyen.
Mi gɛedda kra n lweqt, Cimcun yeɛceq deg yiwet n tmeṭṭut, isem-is Dalila. Imeqranen n Ifilistiyen ɛuhden ad fken i Dalila, yal yiwen deg-sen, 1 100 iṣurdiyen n lfeṭṭa ma temla-yasen ansi i d-ikka lǧehd yesɛa Cimcun. Dalila tebɣa idrimen-agi meṛṛa, yerna ur tḥemmel ara maḍi Cimcun d wegdud n Ṛebbi. Ihi, yal ass teţruẓu aqerru n Cimcun akken a s-d-yini ansi i s-d-yekka lǧehd i gesɛa.
Ɣer taggara tessaweḍ Cimcun armi i s-d-yenna lbaḍna-s. Yenna-yas: ‘Leɛmeṛ yekki lmus n ţţesḍila aqerruy-iw. Yahwa yextaṛ-iyi uqbel akk a d-laleɣ akken ad iliɣ d aqeddac ur necbi wayeḍ, iwumi qqaren anazari. Lemmer ad seṭṭleɣ a yi-iṛuḥ lǧehd-iw.’
Mi twala Dalila belli yeldi-yas ul-is, tesgen Cimcun deg irebbi-s. Mbeɛd tessawel i yiwen wergaz i s-iseṭṭlen aqerruy-is. Mi d-yekker Cimcun, yufa-d belli iṛuḥ-as akk lǧehd-is. Imiren usan-d Ifilistiyen, ṭṭfen Cimcun, sderɣlen-t, yerna rran-t d akli-nsen.
Yiwen wass, Ifilistiyen xedmen tameɣra tameqrant akken ad ɛebden aṛebbit-nsen iwumi qqaren Dagun. Ssufɣen-d Cimcun si lḥebs akken ad ḍṣen fell-as. Yuɣ lḥal ixlef-ed ucebbub-is. Cimcun yenna i ilemẓi-nni i s-yeṭṭfen afus: ‘Awi-yi ad nnaleɣ tigejda iɣef ibedd wexxam-agi.’ Mbeɛd yeẓẓull Yahwa akken a s-d-yefk lǧehd. Yeṭṭef tigejda-nni n wexxam, dɣa iɛeggeḍ: ‘Eǧǧ-iyi ad mmteɣ nekk d Ifilistiyen.’ Yuɣ lḥal 3000 n Ifilistiyen i gellan di tmeɣra-nni. Mi gtekka Cimcun s lǧehd-is meṛṛa ɣef tgejda, yeɣli wexxam-nni, dɣa mmuten lɣaci meṛṛa yellan dinna.
Inezzurfa ixef wis 13 alamma d wis 16.
