Kpohọ eme nọ e riẹ eva

Kpohọ oria izoẹme

 IKUIGBE AVỌ 29

Oware nọ Osoriẹ Ze nọ Mosis Ọ Jẹ Dhẹ

Oware nọ Osoriẹ Ze nọ Mosis Ọ Jẹ Dhẹ

RRI Mosis nọ ọ be dhẹ no Ijipti. Whọ sae ruẹ ezae nọ i bi lei na? Kọ whọ riẹ oware nọ osoriẹ ze nọ a jẹ be gwọlọ kpe Mosis? Ma dai rri sọ ma sae riẹ oware riẹ.

Mosis ọ whẹro eva uwou Fẹro, osu Ijipti. O ti zihe ruọ ohwo ologbo nọ o wo areghẹ gaga. Mosis ọ riẹ nọ ọye Ohwo-Ijipti hi, rekọ nnọ uvi ọsẹ gbe oni riẹ Ahwo-Izrẹl erigbo na.

Ẹdẹ jọ, nọ ọ kpako te ikpe 40 no, Mosis ọ tẹ ta nọ ọ rẹ nya e ruẹ ahwo riẹ re ọ riẹ epanọ a rọ. Epanọ a je rua’i yoma gaga. Ọ ruẹ Ohwo-Ijipti jọ nọ ọ jẹ tehe Ohwo-Izrẹl ọrigbo jọ. Mosis o te rri wariẹ, nọ ọ gbẹ ruẹ ohwo ọvuọvo nọ o bi riwai hi, ọ tẹ tehe Ohwo-Ijipti na, koyehọ Ohwo-Ijipti na o whu. Koyehọ Mosis ọ whẹ ẹkpẹ ru rue’i.

Okiokiọ riẹ Mosis ọ tẹ jẹ nya e ruẹ ahwo riẹ. O roro nọ ọye ọ sai fiobohọ kae re a se erigbo ba ẹjọ. Rekọ ọ tẹ ruẹ ezae Ahwo-Izrẹl ivẹ nọ e be họre, koyehọ Mosis ọ ta kẹ ọnọ o ru thọ na nọ: ‘Fikieme whọ jẹ be tehe omoni ra?’

Ọzae na ọ tẹ ta nọ: ‘Ono ọ rehọ owhẹ mu osu gbe oguẹdhọ mai? Who bi ti kpe omẹ epanọ who kpe Ohwo-Ijipti na?’

Ozọ u te ti mu Mosis. Ọ riẹ nọ ahwo a ti du ku oware nọ o ru Ohwo-Ijipti na no. Tobọ Fẹro dede o yo kpahiẹe, o te vi ahwo re a kpe Mosis. Oye osoriẹ ze nọ Mosis ọ rọ dhẹ no Ijipti.

Okenọ Mosis o no Ijipti no, ọ tẹ nya thethabọ kpohọ otọ Midian. Obei ọ jẹ nya ku uviuwou Jẹtro, ọ tẹ rọo omọvo emetẹ riẹ nọ a re se Zipora. Mosis o te zihe ruọ othurigodẹ, ọ tẹ jẹ rehọ ẹro te igodẹ Jẹtro. Ikpe 40 ọ ria otọ Midian. Enẹna ọ kpako te ikpe 80 no. Koyehọ ẹdẹ jọ, nọ Mosis ọ jẹ rehọ ẹro te igodẹ Jẹtro, oware ugbunu jọ o tẹ via nọ u nwene uzuazọ Mosis soso. Rovie ẹwẹobe na re ma ruẹ onọ oware ugbunu onana orọ.