Kpohọ eme nọ e riẹ eva

Kpohọ oria izoẹme

 IKUIGBE AVỌ 12

Ahwo A Bọ Ukpehru Ulogbo

Ahwo A Bọ Ukpehru Ulogbo

IKPE buobu e tẹ vrẹ. Emọ Noa i te wo emọ buobu gaga. Emọ rai e tẹ kpako ze, je wo emọ efa. U ri kri hi, ahwo buobu a tẹ vọ otọakpọ na.

Omọvo ahwo ọnana kọ ọmọ-uruọmọ ologbo Noa nọ a se Nimrod. Ohwo oyoma ọ jọ nọ o je kpe te erao te ahwo. Nimrọd ọ tẹ jẹ rehọ oma riẹ ru ovie nọ oje su amọfa. Nimrọd ọ were Ọghẹnẹ hẹ.

Ahwo oke oyena kpobi a jẹ ta ẹvẹrẹ ọvo. Nimrọd ọ tẹ gwọlọ nọ o re kru’ai kpobi fihọ oria ovo re o sua’e. Kọ whọ riẹ oware nọ o ru? Ọ ta kẹ ahwo na nọ a bọ okpẹwho re a fi ukpehru ulogbo fihiẹe. Riwae eva ifoto na nọ a be ma ibriki.

Ebabọ enana e were Jihova Ọghẹnẹ hẹ. Ọghẹnẹ ọ gwọlọ nọ ahwo na a vaha abọ re a ria otọakpọ na soso. Rekọ ahwo na a tẹ ta nọ: ‘Wha nyaze! Jọ ma bọ okpẹwho avọ ukpehru nọ u re kpehru te epanọ u re ro du họ obọ idhiwu na. Kẹsena odẹ mai u ve ti do!’ Ahwo na a jẹ gwọlọ orro k’oma rai, orọnikọ kẹ Ọghẹnẹ hẹ.

Fikiere Ọghẹnẹ o te ru ahwo na se ebabọ ukpehru na ba. Whọ riẹ oghẹrẹ nọ o ro ruei? Ẹkwoma ahwo na nọ o ru re a jẹ evẹrẹ oghoghẹrẹ ukpenọ a jẹ ọvo. Ebebabọ na a gbe je yo ẹme ohwo ohwo ho. Fiki onana a je se okpẹwho rai nọ Bebẹl, hayo Babilọn, otọ riẹ họ “Ozighi.”

Ahwo na a te muhọ ẹvaha no Bebẹl. Eko ahwo nọ a rẹ jẹ ẹvẹrẹ ọvo a tẹ nya e ria kugbe eva eria efa otọakpọ na.