Mak 4:1-41
4 Ọ tẹ wariẹ mu ae họ ewuhrẹ evaọ akotọ abade na, yọ ogbotu ahwo nọ a bu gaga a kokohọ kẹle iẹe. Fikiere ọ tẹ ruọ eva okọ keria, o te go no okpa omojọ, rekọ ogbotu na kpobi a dikihẹ akotọ abade na.
2 O te mu ae eware buobu họ ewuhrẹ avọ etadhesẹ, nọ o je wuhrẹ na ọ ta kẹ ae nọ:
3 “Wha gaviezọ. Rri! Ọkibi ọ nyae kọ ibi.
4 Epanọ ọ jẹ rọ kọ na, ibi jọ i te kie fihọ akotọ edhere, nọ evra e ra ze e tẹ soro ae lọ.
5 Efa i kie fihọ otọ itho, oria nọ u wo ẹkpẹ bu hu, e tẹ nwane dhẹ lahwe fikinọ ẹkpẹ na o diwi hi.
6 Rekọ nọ ọre ọ va ze, i te lo je whu no fikinọ i wo awọ họ.
7 Ibi efa i kie fihọ udevie idhigbo, nọ idhigbo na e rro ze, e tẹ lẹliẹ ekakọ na ko no, e gbẹ mọ ibi hi.
8 Rekọ efa i kie fihọ emamọ otọ, nọ e be rro na i te mu ibi họ ẹmọ, ejọ ẹko ọgba, ejọ udhosa, ejọ udhusoi.”
9 Kẹsena o te fibae nọ: “Jọ ọnọ o wo ezọ nọ o re ro yo, o yo.”
10 Whaọ nọ ogbotu na a nyavrẹ no, enọ e gbẹ jọ kugbei gbe Ikpegbivẹ na a tẹ be nọe kpahe etadhesẹ na.
11 Ọ tẹ ta kẹ ae nọ: “Whai họ enọ a kuvẹ re a wo otoriẹ oware udidi ọrẹri Uvie Ọghẹnẹ, rekọ rọkẹ amọfa etadhesẹ na ọvo a re yo ba,
12 re, dede nọ a bi rri, a rẹ ruẹ ghele he, dede nọ a bi yo, a re wo otoriẹ ghele he; yọ a ti zihe bru omẹ ze vievie he re a wo erọvrẹ.”
13 Ofariẹ, ọ tẹ ta kẹ ae nọ: “Nọ wha wo otoriẹ ọtadhesẹ nana ha na, kọ ẹvẹ wha ti ro wo otoriẹ etadhesẹ efa na kpobi?
14 “Ibi nọ ọkibi na ọ kọ na họ ẹme Ọghẹnẹ.
15 Ibi nọ i kie fihọ akotọ edhere na họ enọ i yo ẹme na; rekọ nọ a nwani yoi no, Setan ọ tẹ nyaze ọ tẹ tọlọ ẹme nọ a kọ fihọ ae udu na no.
16 Ibi nọ i kie fihọ otọ itho na họ enọ i yo ẹme na, a tẹ nwane rọ oghọghọ jẹe rehọ.
17 Rekọ ẹme na ọ dowọ mu otọ evaọ udu rai hi, ghele na a jọ evaọ omoke; nọ uye hayo ukpokpoma o nwane ze fiki ẹme na, a te zoruẹ.
18 Efa e riẹ nọ i kie fihọ udevie idhigbo. Enana họ enọ i yo ẹme na,
19 rekọ awaọruọ uyero-akpọ nana gbe ogaga eviẹhọ efe, gbe isiuru kẹ eware efa kpobi e tẹ ruọ ae oma e tẹ lẹliẹ ẹme na ko no, o gbẹ mọ ibi hi.
20 Ukuhọ riẹ, enọ i kie fihọ emamọ otọ na họ enọ e gaviezọ kẹ ẹme na a tẹ jẹe rehọ ziezi, a tẹ mọ ibi, ejọ ẹko ọgba, ejọ udhosa, ejọ udhusoi.”
21 Ọ tẹ jẹ ta kẹ ae nọ: “Ahwo a rẹ rọ ukpẹ tu a ve fi ei họ otọ ekete* hayo otọ ehwa ha, manikọ ere? Kọ ogbẹrọnọ ehru adada-ukpẹ a re fi ei họ?
22 Keme oware ovo nọ a sino nọ a te fere via ha o rrọ họ; oware ovo nọ a nabe kodhere nọ o te bẹre via ha o rrọ họ.
23 Ohwo kpobi nọ o wo ezọ nọ o re ro yo, jọ o yo.”
24 Ọ tẹ jẹ ta kẹ ae nọ: “Wha rehọ eme nọ wha bi yo na te udu. Epaọ owawọ nọ wha be rọ wawo kẹ amọfa, a te rọ wawo kẹ owhai, ẹhẹ, a ti fibae kẹ owhai.
25 Keme ohwo kpobi nọ o wo a rẹ te kẹe efa kugbe, rekọ ohwo kpobi nọ o wo ho, a ti mi ei makọ onọ o wo na dede.”
26 Ọ tẹ jẹ ta kẹ ae nọ: “Uvie Ọghẹnẹ o wọhọ ẹsenọ ohwo ọ vaha ibi kuotọ.
27 Aso o te te o ve kiẹzẹ, ohiohiẹ ọ vẹ kpama, ibi na e tẹ dhẹze jẹ rro—ọ riẹ epanọ e rọ dhẹze jẹ rro ho.
28 Otọ na ọvo u ru ekakọ na mọ ibi ẹmẹrera, orọ ọsosuọ ugbe nọ u vi ze, kẹsena o tẹ whẹ iluelue họ, ukuhọ riẹ kọ eruọka.
29 Rekọ nọ ekakọ na e nwane who no, ọ tẹ be rehọ ojale kọrọ ae keme oke ivuẹvu u te no.”
30 Ọ tẹ jẹ ta kẹ ae nọ: “Eme ma sae rọ wawo Uvie Ọghẹnẹ, hayo kọ ọtadhesẹ vẹ ma sai ro dhesẹ iẹe?
31 O wọhọ ubi mọstad, onọ evaọ okenọ a rọ kọe o jọ ubi nọ o mae kawo evaọ usu ibi kpobi nọ e rrọ otọakpọ na.
32 Rekọ nọ a kọe no, o tẹ dhẹze, o tẹ rro vi ekakọ efa kpobi nọ a rẹ re, je wo egha ilogbo, u te ru nọ evra ehru e be sae rọ rria edhedhẹ riẹ.”
33 Ọ rehọ etadhesẹ itieye buobu ta ẹme Ọghẹnẹ kẹ ae te epanọ a jẹ sai wo otoriẹ te.
34 Evaọ uzẹme, ababọ ọtadhesẹ ọ rẹ ta ẹme ọvo kẹ ae he, rekọ ọ rẹ fa otọ eware kpobi kẹ ilele riẹ nọ ae ọvo a tẹ rrọ.
35 Evaọ ẹdẹ yena nọ owọwọ u te, ọ tẹ ta kẹ ae nọ: “Joma fa kpohọ abọdekọ abade na.”
36 Fikiere nọ ogbotu na a nyavrẹ no, a te muhọ ebi vrẹ epanọ ọ rọ keria na, yọ ekọ efa i je lele iei.
37 Whaọ, ofou ọgaga o te muhọ efou, ẹkporo o te bi kpo ame ruọ okọ na, te epanọ okọ na o rọ kẹle ezue.
38 Rekọ ọ jọ obọ emuokọ, rọ uzou kpahe othuzou be wezẹ. Fikiere a tẹ rọwo iẹe no owezẹ ze, a tẹ ta kẹe nọ: “Owuhrẹ, kọ whọ be daezọ nọ ewhu ma rrọ na?”
39 Ọ tẹ kpama ọ tẹ whọku ofou na jẹ ta kẹ abade na nọ: “Seba! Fọ!” Ofou na o te serihọ, oria kpobi o tẹ fọ rirẹ.
40 Ọ tẹ ta kẹ ae nọ: “Fikieme ozọ u bi ro mu owhai ga tere? Kọ wha ri wo ẹrọwọ ghele?”
41 Rekọ ozọ u te mu ai gaga, a tẹ ta kẹ ohwohwo nọ: “Oghẹrẹ ohwo vẹ ọna? Makọ ofou gbe abade dede a bi yoẹme kẹe.”
Eme-Obotọ
^ Hayo “ekete nọ a rẹ rọ wawo eware.”
