Kpohọ eme nọ e riẹ eva

Kpohọ oria izoẹme

Jud 1:1-25

  • Uyere (1, 2)

  • U muẹro nọ a ti bruoziẹ kpe otu-iwuhrẹ erue (3-16)

    • Maekẹl avọ Ẹdhọ a jẹ vravro (9)

    • Eruẹaruẹ Enọk (14, 15)

  • Wha gbẹ hai ru eware nọ Ọghẹnẹ o re ro you owhai (17-23)

  • Ọ rehọ oruaro kẹ Ọghẹnẹ (24, 25)

1  Jud, ọrigbo Jesu Kristi, rekọ nọ ọ rrọ oniọvo Jemis, ro se enọ a se na nọ Ọghẹnẹ Ọsẹ na o you jẹ be sẹro kẹ Jesu Kristi:  Jọ Ọghẹnẹ o gbe dhesẹ ohrọ-oriọ gbe uyoyou kẹ owhai je ru owhai wo udhedhẹ vi epaọ anwẹdẹ.  Iyoyou, dede nọ mẹ jẹ daoma kpobi re me kere se owhai kpahe epanọ Ọghẹnẹ o ti ro siwi omai, mẹ ruẹ nọ u fo re me kere se owhai rọ tuduhọ owhai awọ nọ wha họre gaga rọkẹ ẹrọwọ na onọ a rọ kẹ erezi na ẹsiẹvo bẹdẹ bẹdẹ.  Ẹjiroro nọ me bi ro kere onana họ, ezae jọ a lẹlẹ ruọ udevie rai no, enọ Ikereakere na e ta kpahe ẹdhoguo obrukpe rai no anwẹdẹ; ahwo omuomu nọ a be rẹriẹ uwowou ulogbo Ọghẹnẹ mai fihọ uvẹ nọ a bi ro duomahọ uruemu nọ u fo ho nọ a re ru ababọ omovuọ,* jẹ be rọ uruemu rai wọso ọnọ o wo omai jẹ rrọ Olori mai, Jesu Kristi.  Dede nọ wha riẹ eware nana kpobi ziezi, mẹ gwọlọ kareghẹhọ owhai inọ, dede nọ Jihova* o siwi ahwo riẹ no otọ Ijipti ze, ọ raha enọ i je dhesẹ ẹrọwọ họ uwhremu na.  Yọ ikọ-odhiwu nọ e daji oria rai hi rekọ nọ e nyasiọ oria nọ u fo nọ a rẹ rria ba, ọ rehọ egbregba ebẹdẹ bẹdẹ gba ae fihọ ebi ọlala be hẹrẹ oke ẹdhoguo rai evaọ ẹdẹ ologbo na.  Epọvo na re, Sọdọm avọ Gomora gbe ikpewho nọ e wariẹ e rai họ a roma kẹ ọfariẹ-ogbe* ọgaga gbe isiuru uwo nọ a rẹ ghọ. A rehọ erae ebẹdẹ bẹdẹ raha ae, fikiere a rrọ oriruo unuovẹvẹ kẹ omai.  Ghele onana, ezae nana re a bi ru lele iroro ethọthọ rai, a bi gbe oma amọfa ku, rri udu-esuo vo, jẹ be ta eme iyoma kpahe enọ i wo oruaro.  Rekọ okenọ Maekẹl ukọ-odhiwu oride na avọ Ẹdhọ a jẹ vravro kpahe ugboma Mosis, ọ daeriẹ rehọ eme ekela brukpe Ẹdhọ họ, rekọ ọ ta nọ: “Jọ Jihova* ọ whọku owhẹ.” 10  Rekọ ezae nana a be ta eme iyoma kpahe eware kpobi nọ a wo otoriẹ rai hi. Yọ eware kpobi nọ a wo otoriẹ rai epanọ oma o ta kẹ ae wọhọ epaọ erao nọ i wo iroro ho, a be jarai gbe oma rai ku. 11  U yoma kẹ ae kẹhẹ, keme a lele edhere Keni no, a họrọ ruọ edhere ọthọthọ Belam nọ ọ jẹ rọ gwọlọ osohwa no, yọ ọraha o te rai no fikinọ a be ta eme ọwọsuọ wọhọ Kora. 12  Ahwo nana họ itho nọ i dhere obotọ ame evaọ ehaa rai nọ wha bi ro dhesẹ uyoyou, ithuru-igodẹ nọ e be kuọ omobọ rai ababọ ozọ; ẹgho nọ ọ kare ame nọ ofou ọ be wọ kpenẹ avọ enẹ; ire nọ e be mọ ibi hi evaọ ezi* rai, nọ i whu no riẹriẹriẹ* a te je vi ai no otọ no; 13  a wọhọ ẹkporo ọgaga abade nọ ọ be wọ ivuhu erọ iruemu etọtọ rai nọ e rẹ wha omovuọ ze fihọ okpa; isi obọ ehru nọ i bi ghoro, enọ a ruẹrẹ ebi ọlala nọ o thesiwa họ kẹ bẹdẹ bẹdẹ. 14  Ẹhẹ, Enọk ohwo avọ ihrẹ evaọ uyẹ Adamu ọ ruẹaro kpahe ae re nọ ọ ta nọ: “Rri! Jihova* ọ nyaze avọ ikọ-odhiwu erẹri riẹ gbidi gbidi, 15  re o bruoziẹ ahwo kpobi, re o brukpe ahwo omuomu kpobi fiki iruẹru imuomu rai kpobi nọ a ru evaọ edhere omuomu, gbe fiki eme aghọ kpobi nọ erahaizi nana nọ e be gọ Ọghẹnẹ hẹ na a ta kpahe iẹe.” 16  Ezae nana yọ enọ e rẹ go, nọ e rẹ go kpahe uyero akpọ rai, nọ i re kie lele isiuru obọrai, a rẹ rọ unu rai seha nọ i thesiwa, yọ a rẹ faki jiri amọfa fiki erere nọ a re wo noi ze. 17  Rọkẹ owhai iyoyou mẹ, jọ wha kareghẹhọ eme nọ ikọ Olori mai Jesu Kristi a ta no vẹre,* 18  nọ a jẹ hae ta kẹ owhai nọ: “Evaọ oke urere na isẹkoko e te jariẹ, nọ i ti ru wọhọ epaọ isiuru imuomu obọrai.” 19  Enana họ enọ e rẹ wha ohẹriẹ ze, ezae nọ e wọhọ erao, nọ i wo ẹzi Ọghẹnẹ hẹ. 20  Rekọ whai iyoyou mẹ, wha kru oma ga evaọ ẹrọwọ ọrẹri rai jẹ hae lẹ rọwokugbe ẹzi ọfuafo na, 21  re wha ruẹsi gbe ru eware nọ Ọghẹnẹ o re ro you owhai, nọ wha be hẹrẹ ohrọ-oriọ Olori mai Jesu Kristi nọ o te wha uzuazọ ebẹdẹ bẹdẹ ze. 22  Ofariẹ, wha hai dhesẹ ohrọ-oriọ kẹ enọ i wo avro; 23  wha siwi ai ẹkwoma erae na nọ wha re fru rai no ze. Rekọ wha hai dhesẹ ohrọ-oriọ kẹ amọfa, wha ru ere avọ ozọ, yọ wha re mukpahe ewu nọ iruo uwo u gbeku no na. 24  Ajọ ọnọ ọ rẹ sae thọ owhai nọ wha gbe zoruẹ hẹ, je ru owhai kare epe evaọ aro oruaro riẹ avọ oghọghọ ulogbo, 25  Ọghẹnẹ ọvo nọ ọ rrọ Osiwi mai ẹkwoma Jesu Kristi Olori mai na o wo oruaro. Adhẹẹ, ogaga gbe udu-esuo riẹ e rrọ no anwẹdẹ ze, gbe enẹna je rite ebẹdẹ bẹdẹ. Ami.

Eme-Obotọ

Hayo “uruemu otọtọ nọ a re ru odode.” Evaọ Griki, a·selʹgei·a. U dhesẹ aro nọ a re keke fihọ raha izi Ọghẹnẹ avọ orivo gbe ababọ omovuọ.
Rri oria Otofa Eme.
Rri oria Otofa Eme.
Rri oria Otofa Eme.
Koyehọ, “ezi okpakpọ.”
Evaọ Griki, “a whu isiava no.”
Rri oria Otofa Eme.
Hayo “eware nọ a ta nọ e te via.”