Kpohọ eme nọ e riẹ eva

Kpohọ oria izoẹme

2 Pita 3:1-18

  • Isẹkoko a be daezọ ọraha nọ ọ be tha ha (1-7)

  • Jihova ọ be kpẹlẹ obọ họ (8-10)

  • Roro kpahe oghẹrẹ ahwo nọ u fo nọ wha rẹ jọ (11-16)

    • Idhiwu ekpokpọ gbe otọakpọ ọkpokpọ (13)

  • Yọroma re a gbe su owhẹ vru hu (17, 18)

3  Iyoyou mẹ, onana họ ileta avọ ivẹ nọ me bi kere se owhai na. Yọ wọhọ orọ ọsosuọ na, mẹ be rọ ẹkwoma eware nọ mẹ be kareghẹhọ owhai rọ jaja ẹgba iroro ivevẹ rai vi,  re wha kareghẹhọ eme nọ eruẹaro Ọghẹnẹ e ta oke nọ u kpemu jegbe ujaje Olori gbe Osiwi na nọ ọ rehọ ikọ rai kẹ owhai.  Orọ ọsosuọ kpobi, jọ wha riẹ onana, inọ evaọ edẹ urere na isẹkoko e te romavia nọ i ti se ẹkoko, ru wọhọ epaọ isiuru obọrai  yọ a be ta nọ: “Kọ ọzino* riẹ nọ a tubẹ ya eyaa riẹ na ọ rrọ? Whaọ, no anwọ okenọ esẹ-ode mai a ro whu* rite inẹnẹ, eware kpobi e gbẹ rrọ epọvo na nọ e rrọ no emuhọ emama ze.”  A bi keke aro fihọ kpairoro vrẹ uzẹme nana inọ evaọ oke nọ u kpemu, idhiwu e jariẹ gbe otọakpọ nọ u dikihẹ kothi kpehru vi ame gbe evaọ udevie ame ẹkwoma ẹme Ọghẹnẹ;  yọ ẹkwoma eware yena a rọ raha akpọ oke yena okenọ ame o ku ei.  Rekọ ẹkwoma ẹme ọvo yena, a vu idhiwu gbe otọakpọ nọ e rrọ enẹna wa kẹ erae je bi vu ai wa bọo ẹdẹ ẹdhoguo gbe ẹdẹ nọ a te rọ raha ahwo nọ a riẹ Ọghẹnẹ hẹ.  Rekọ iyoyou, wha jọ onana o thọrọ owhai ẹro ho, inọ ẹdẹ ọvo Jihova* yọ odu-ikpe yọ odu-ikpe ọ wọhọ ẹdẹ ọvo.  Jihova* ọ be kpẹlẹ obọ evaọ erugba eyaa riẹ hẹ, wọhọ epanọ ahwo jọ a bi roro, rekọ o bi wo odiri kẹ owhai keme ọ gwọlọ nọ a raha ohwo ọvo ho rekọ ọ gwọlọ nọ ahwo kpobi a wo uvẹ nọ a re ro kurẹriẹ. 10  Rekọ ẹdẹ Jihova* ọ te nyaze wọhọ oji, nọ idhiwu na e te rọ vrẹ avọ edo ọgaga, ekwakwa nọ e be rrorro na e vẹ te ghra, yọ a te fere otọakpọ na gbe iruo nọ e rrọ eva riẹ via. 11  Nọ orọnọ eware nana kpobi e te ghra no evaọ oghẹrẹ nana, jọ wha roro kpahe oghẹrẹ ahwo nọ u fo nọ wha rẹ jọ. Jọ wha wo uruemu ọrẹri je wobọ evaọ iruẹru omarọkẹ Ọghẹnẹ, 12  nọ wha be hẹrẹ je bi wo ẹnyaze ẹdẹ Jihova* họ iroro ẹsikpobi na, onọ a te jọ rehọ erae raha idhiwu na, ekwakwa na e vẹ te ghra evaọ erri ọgaga na! 13  Rekọ idhiwu ekpokpọ gbe otọakpọ ọkpokpọ e riẹ nọ ma be hẹrẹ wọhọ epaọ eyaa riẹ, yọ ẹrẹreokie ọ te jọ eva rai. 14  Fikiere, iyoyou, nọ wha be hẹrẹ eware nana, wha dawo ẹgba rai kpobi, re evaọ ukuhọ riẹ, ọ ruẹ owhai nọ wha kare epe jẹ kare afuẹwẹ je wo udhedhẹ. 15  Ofariẹ, wha rehọ odiri Olori mai wọhọ uvẹ nọ a re ro wo esiwo, wọhọ epanọ oniọvo oyoyou mai Pọl o kere se owhai re wọhọ epaọ areghẹ nọ a kẹ riẹ, 16  ẹhẹ, ọ jọ ileta riẹ kpobi ta kpahe eware nana. Rekọ eware jọ e rrọ eva rai nọ e rrọ bẹbẹ re a wo otoriẹ rai, yọ enọ e rrọ igbori gbe enọ i dikihẹ ga ha a be gale eware nana uzou vi, wọhọ epanọ a bi ru Ikereakere na nọ i kiọkọ, onọ o te wha ọraha se ae. 17  Fikiere, iyoyou, nọ wha riẹ onana no na, wha yọroma re ahwo nọ a re koko uzi hi a gbẹ rọ oruthọ rai su owhai vru kugbe ae he, nọ wha gbe ro dikihẹ ga ha. 18  Ukpoye, jọ Olori gbe Osiwi mai Jesu Kristi ọ gbẹ hai dhesẹ uwowou ulogbo riẹ kẹ owhai, wha vẹ jẹ hae rro evaọ eriariẹ kpahe iẹe. Jọ oruaro u tei enẹna je rite ebẹdẹ bẹdẹ. Ami.

Eme-Obotọ

Rri oria Otofa Eme.
Evaọ Griki, “kie ruọ owezẹ uwhu.”
Rri oria Otofa Eme.
Rri oria Otofa Eme.
Rri oria Otofa Eme.
Rri oria Otofa Eme.