2 Pita 2:1-22
2 Rekọ eruẹaro erue e romavia evaọ udevie ahwo Izrẹl, wọhọ epanọ iwuhrẹ erue e te jọ udevie rai re na. Enana e te lẹlẹ wha omohẹriẹ ze rọ raha ẹrọwọ rai, yọ a te tubẹ siọ olori nọ ọ dẹ rai na, rọ ere wha ọraha se omarai vẹrẹ vẹrẹ.
2 Ofariẹ, ibuobu i ti lele ai ru uruemu nọ u fo ho nọ a re ru ababọ omovuọ,* yọ fiki rai ahwo a te ta eme iyoma kpahe edhere uzẹme na.
3 U te no ere no, a te rehọ eme iwhayo fru owhai re avọ uvou-uthei. Rekọ uye nọ a ta fihọ otọ anwẹdẹ nọ u ti te ai o be tha kpata kpata, ọraha rai ọ te seba ẹtha ha.
4 Ababọ avro, Ọghẹnẹ ọ siọ uye ba ẹrọkẹ ikọ-odhiwu nọ e ghẹmeeyo ho, o gbolo i rai fihọ Tatarọs, rehọ egbregba kare ae fihọ* ebi ọlala be hẹrẹ oziẹobro.
5 Yọ ọ siọ uye ba ẹrọkẹ akpọ oke anwae he, rekọ o siwi Noa, ọtausiuwoma ẹrẹreokie, avọ imahrẹ efa okenọ ọ rehọ owhe ku akpọ ahwo nọ a riẹ Ọghẹnẹ hẹ.
6 Ọ rọ ẹkwoma erae nọ ọ rọ mahe okpẹwho Sọdọm avọ Gomora muotọ dhesẹ nọ a fo obrukpe, rọ ere kẹ oriruo oware nọ o te via kẹ ahwo nọ a riẹ Ọghẹnẹ hẹ evaọ oke nọ o be tha.
7 O siwi Lọt nọ o kiẹrẹe, ọnọ uruemu ahwo nọ a jẹ raha izi ababọ omovuọ* o jẹ kẹ idhọvẹ—
8 keme no ẹdẹ te ẹdẹ, eware iyoma nọ a je ru nọ ọzae okiẹrẹe yena ọ jẹ ruẹ je yo evaọ okenọ ọ jẹ rria udevie rai na e jẹ kẹe uye gaga.
9 Fikiere, Jihova* ọ riẹ epanọ o re ro siwi ahwo nọ a roma kẹ Ọghẹnẹ no odawọ, rekọ ọ rẹ nyasiọ ahwo nọ a kiẹrẹe he ba re a raha ae evaọ ẹdẹ oziẹobro,
10 maero enọ e rẹ gwọlọ gbe oma amọfa ku gbe enọ i re rri udu-esuo vo.
A rẹ wharo, a te je wo udu ogaga, a rẹ ta eme iyoma kpahe enọ i wo oruaro ababọ ozọ,
11 rekọ ikọ-odhiwu nọ i wo ẹgba gbe ogaga vi ae dede, a rẹ rehọ eme ekela rọ whọku ae he fiki adhẹẹ kẹ Jihova.*
12 Rekọ ezae nana a rẹ ta eme iyoma kpahe eware nọ a rrọ ogbori rai. A wọhọ erao nọ i wo iroro ho nọ oma o rẹ sa ru eware, nọ a yẹ re a mu je kpe. Ọraha o ti te ai fiki edhere omuomu obọrai,
13 a te ruẹ uye, onọ o te jọ osohwa edhere oyoma obọrai.
Oma o rẹ were ae re a roma kẹ uzuazọ akpọriọ, makọ evaọ oke uvo. Ahwo nana yọ epe gbe eka-afuẹwẹ evaọ udevie rai, nọ e rẹ wereva evaọ iwuhrẹ eviẹhọ rai okenọ a rrọ ehaa kugbe owhai.
14 A wo ibiaro ẹnwae-obro, yọ a rẹ sai siobọno uzioraha ha, a rẹ viẹ ahwo nọ a dikihẹ ga ha họ. A rehọ uvou-uthei wuhrẹ udu rai no. Emọ nọ a duwu iyei a rrọ.
15 Fikinọ a nyasiọ edhere ọliọliọ na ba no, a su rai vru no. A lele edhere Belam ọmọ Bẹo, ọnọ o you osohwa eyoma oruo,
16 rekọ nọ a whọku fikinọ ọ raha uzi. Eketekete nọ ọ rẹ ta ẹme he nọ ọ rehọ urru ohwo-akpọ ta ẹme ọ whaha ọruẹaro na oware uyoma nọ ọ jẹ nyai ru.
17 Ahwo nana yọ iyeri-ame nọ e kpọ no, gbe igrigri nọ ofou ọgaga o bi fou, yọ a ruẹrẹ ebi ọlala nọ o thesiwa họ kẹ ae.
18 A rẹ ta ikpeme ifofe. A rẹ rehọ eme nọ e rẹ kpare isiuru uwo na gbe iruemu nọ i fo ho nọ a re ru ababọ omovuọ* rọ lẹliẹ enọ e nwane vabọ obọ no usu ahwo nọ a bi yeri uzuazọ uzioraha.
19 A be ya eyaa ufuoma kẹ ae, kpakiyọ ae omarai yọ erigbo ogbekuo; keme otẹrọnọ ohwo o te fi ohwo jọ kparobọ, ọyena yọ ọrigbo riẹ.*
20 Ẹhẹ, otẹrọnọ a dhẹ siọ eware ogbekuo akpọ na ba no ẹkwoma eriariẹ egbagba Olori gbe Osiwi na Jesu Kristi, a tẹ be wariẹ duomahọ eware evona je kie kẹ ae, uyero rai uwhremu na u yoma kẹ ae vi orọ ọsosuọ no.
21 O hae mai woma kẹ ae o hae jọnọ a riẹ edhere ẹrẹreokie na totọ họ, viukpenọ a rẹ riẹe no a vẹ nyasiọ ujaje ọrẹri nọ a kẹ rai na ba.
22 Ẹme itẹ na u gine rugba no evaọ oma rai, inọ: “Arakọ na o zihe nyae re eware nọ ọ kpa ze, esi nọ a họ fo no na ọ wariẹ nyai du oma họ ọloho.”
Eme-Obotọ
^ Hayo “uruemu otọtọ nọ a re ru odode.” Evaọ Griki, a·selʹgei·a. U dhesẹ aro nọ a re keke fihọ raha izi Ọghẹnẹ avọ orivo gbe ababọ omovuọ.
^ Hayo o sae jọ nọ, “fi ae họ egọdọ.”
^ Hayo “uruemu otọtọ nọ a re ru odode.” Evaọ Griki, a·selʹgei·a. U dhesẹ aro nọ a re keke fihọ raha izi Ọghẹnẹ avọ orivo gbe ababọ omovuọ.
^ Rri oria Otofa Eme.
^ Rri oria Otofa Eme.
^ Hayo “iruemu etọtọ nọ a re ru odode.” Evaọ Griki, a·selʹgei·a. U dhesẹ aro nọ a re keke fihọ raha izi Ọghẹnẹ avọ orivo gbe ababọ omovuọ.
^ Hayo “oware jọ o te fi ohwo jọ kparobọ, ohwo na yọ ọrigbo oware na.”
