1 Timoti 4:1-16
4 Rekọ, ẹme nọ o no obọ Ọghẹnẹ ze o ta vevẹ nọ evaọ obaro, otujọ a ti kie no ẹrọwọ na, gaviezọ kẹ eme eviẹhọ nọ a ta nọ i no obọ Ọghẹnẹ ze gbe iwuhrẹ idhivẹri,
2 ẹkwoma eviẹhọ ahwo nọ a be ta erue, enọ obruoziẹ-iroro rai o whu-ikpi no wọhọ ohọoma nọ a rọ ayọno ọrrorro mahe.
3 A be ghọ orọo je jie uzi kẹ ahwo inọ a siọ oghẹrẹ emu jọ ba ẹre, emu nọ Ọghẹnẹ ọ ma inọ enọ i wo ẹrọwọ jẹ riẹ uzẹme na gbagba a rẹ re avọ uyere-okẹ.
4 Keme emama Ọghẹnẹ kpobi i woma, a rẹ ghọ oware ovo ho thakpinọ a be riẹe avọ uyere-okẹ,
5 keme ẹme Ọghẹnẹ gbe olẹ nọ a lẹ fihọ iẹe u ru rie fo no.
6 Whọ tẹ be kẹ inievo na ohrẹ nana, whọ te jọ emamọ ọgbodibo Kristi Jesu, ọnọ a rọ eme ẹrọwọ na gbe erọ emamọ uwuhrẹ nọ who bi lele kpekpekpe na rọ ko.
7 Siọ iku erue nọ e rẹ wha ọghọ se Ọghẹnẹ hẹ, itienọ ekpọkueyae e rẹ ta. Ukpoye, wuhrẹ omara avọ utee orọ omarọkẹ Ọghẹnẹ.
8 Keme oma na nọ a re ru jaja o rẹ kẹ umutho erere, rekọ omarọkẹ Ọghẹnẹ o rẹ kẹ erere evaọ eware kpobi, keme u wo eyaa kẹ uzuazọ enẹna gbe uzuazọ nọ o be tha.
9 Ẹme yena yọ ẹme nọ a re fievahọ jẹ rọ udu kpobi jẹrehọ.
10 Oyejabọ nọ ma bi ro ru iruo gaga jẹ be daoma kpobi, keme ma fi ẹruore mai họ Ọghẹnẹ nọ ọ rrọ uzuazọ, ọnọ ọ rrọ Osiwi oghẹrẹ ahwo kpobi, maero enọ i wo ẹrọwọ.
11 Hae kẹ ijaje nana jẹ hae rehọ ai wuhrẹ ahwo.
12 Who ru re ohwo ọvo o rri owhẹ vo ho fikinọ whọ rrọ ọmaha. Ukpoye, jọ oriruo kẹ enọ i wo ẹrọwọ evaọ ẹmeọta, evaọ uruemu, evaọ uyoyou, evaọ ẹrọwọ, evaọ uruemu ofuafo.*
13 Bẹsenọ mẹ rẹ nyaze, gbẹ hae roma kẹ isase ẹgbede, hae kẹ uduotahawọ je wuhrẹ ahwo.
14 Who gbabọkẹ okẹ nọ who wo na ha onọ a kẹ owhẹ ẹkwoma eruẹaruẹ okenọ ugboma ekpako na a rọ abọ rai kpahe owhẹ.
15 Hai roro kpahe eware nana; rọ oma kpobi kẹ ae, re ahwo kpobi a sae ruẹ ẹnyaharo ra vevẹ.
16 Hai muẹrohọ omara gbe ewuhrẹ ra ẹsikpobi. Ruabọhọ eware nana, keme enẹ oruo, who ti siwi omara gbe enọ e gaviezọ kẹ owhẹ.
Eme-Obotọ
^ Koyehọ, uzuazọ nọ o kare iruemu ọfariẹ-ogbe.
