1 Timoti 2:1-15
2 Fikiere, orọ ọsosuọ kpobi, mẹ be tuduhọ owhai awọ nọ wha hae lẹ roro oghẹrẹ ahwo kpobi, wha hai ru ere avọ elẹ-ayare, elẹ, elẹ nọ a rẹ lẹ roro amọfa gbe uyere-okẹ.
2 Wha hae lẹ roro ivie gbe ahwo kpobi nọ a rrọ ekwa ikpehru, re ma sai gbe yeri uzuazọ udhedhẹ avọ omarọkẹ Ọghẹnẹ gbe osegboja nọ o no udu kpobi ze.
3 Onana u kiehọ yọ o rẹ were Osiwi mai, Ọghẹnẹ,
4 ọnọ o rrọ oreva riẹ inọ oghẹrẹ ahwo kpobi a wo esiwo je wo eriariẹ egbagba uzẹme na.
5 Keme Ọghẹnẹ ọvo ọ rrọ, yọ obruthe ọvo ọ rrọ udevie Ọghẹnẹ avọ ahwo-akpọ, Kristi Jesu, ọzae
6 nọ ọ rọ uzuazọ riẹ hwa osa ẹtanigbo nọ o rrọ ẹrẹrẹe rọkẹ ahwo kpobi*—onana họ oware nọ a re se isẹri kpahe evaọ ẹruoke riẹ.
7 Fiki isẹri-ise nana a rọ rehọ omẹ mu ọtausiuwoma gbe ukọ, ọnọ o re wuhrẹ ahwo erẹwho na kpahe ẹrọwọ gbe uzẹme na, uzẹme mẹ be ta na, mẹ be ta ọrue he.
8 Fikiere mẹ gwọlọ nọ evaọ oria kpobi ezae na a rẹ lẹ, kpare abọ ọrẹri kpehru, ababọ evedha gbe ikẹ-isio.
9 Ere ọvona re, jọ eyae na a gọ ẹgọ nọ o kiehọ,* nọ ọ rrọ owowa je dhesẹ iroro egbagba,* orọnikọ orọ igbeto-ime gbe igoru hayo izuu hayo iwu nọ e ghare gaga ha,
10 rekọ evaọ oghẹrẹ nọ u fo eyae nọ e ta nọ a be gọ Ọghẹnẹ, koyehọ ẹkwoma iruo iwoma.
11 Nọ aye o te bi wuhrẹ ọ rẹ fọ tou avọ omaurokpotọ.
12 Mẹ kẹ aye uvẹ hẹ re o wuhrẹ hayo re o su ọzae, rekọ ọ rẹ fọ tou.
13 Keme Adamu a kake ma, kẹsena a tẹ te ma Ivi.
14 U te no ere no, a viẹ Adamu họ họ, rekọ a viẹ aye na họ totọ o te zihe ruọ ọrahauzi.
15 O make rrọ ere na, aye ọ te thọ omariẹ ẹkwoma emọ-iyẹ, thakpinọ ọ* ruabọhọ ẹrọwọ gbe uyoyou gbe uzuazọ ọrẹri avọ iroro egbagba.*
Eme-Obotọ
^ Hayo “oghẹrẹ ahwo kpobi.”
^ Hayo “nọ o wo ọghọ.”
^ Hayo “areghẹ.”
^ Evaọ Griki, “a.”
^ Hayo “areghẹ.”
