Ẹvẹ Isẹri Jihova A re Rri Ahwo nọ A Si No Ukoko?
Mai Isẹri Jihova ma you ahwo kpobi. Ma rẹ daoma kẹ ahwo kpobi adhẹẹ. Nọ oniọvo jọ o gbe bi kpohọ ewuhrẹ hayo usi uwoma ha, ma rẹ nya tei oma re ma tuduhọ iẹe awọ. a Ma you oniọvo mai yọ ma rẹ daoma fiobọhọ kẹe wariẹ kruga evaọ egagọ Jihova.—Luk 15:4-7.
Rekọ evaọ ẹsejọ, ohwo o te ru oghẹrẹ oware uyoma jọ, a sai si ei no ukoko. (1 Ahwo Kọrint 5:13) Rekọ fikinọ ma you inievo mai, taure oware otiọye na o tẹ te via, ma rẹ jowọ kpata kpata re ma fiobọhọ kẹe re o gbe ru oware nọ a ro si ei no ukoko ho. Yọ otẹrọnọ a si rie no ukoko dede, ma re gbe you rie jẹ kẹe adhẹẹ ghele. Ere Ọghẹnẹ ọ gwọlọ nọ ma ru.—Mak 12:31; 1 Pita 2:17.
Fikieme a re ro si ohwo no ukoko?
Ebaibol na ọ ta nọ Oleleikristi ọ tẹ raha uzi ulogbo jọ yọ o bi ro kurẹriẹ hẹ, a re si ei no ukoko. (1 Ahwo Kọrint 5:11-13) A jọ Ebaibol na fodẹ izi ilogbo jọ nọ ohwo ọ sae raha nọ o rẹ whae ze nọ a re ro si ei no ukoko. Ejọ họ, ọfariẹ-ogbe, idieda-thomawa, ohwo okpe, ohwo o te bi gboja kẹ ahwo uviuwou riẹ, gbe uji-utho.—1 Ahwo Kọrint 6:9, 10; Ahwo Galesha 5:19-21; 1 Timoti 1:9, 10.
Rekọ orọnikọ ohwo ọ tẹ nwani raha uzi ulogbo jọ a vẹ si ei no ukoko ho. Ekpako ukoko na a rẹ daoma fiobọhọ kẹe re o nwene. b (Ahwo Rom 2:4) A re ru onana evaọ edhere owowou. (Ahwo Galesha 6:1) Onana o sai ru nọ ohwo na ọ rẹ rọ riẹ nọ oware nọ o ru na o ginẹ thọ, o ve bru oma kpiroro. (2 Timoti 2:24-26) Otẹrọnọ ekpako na a fiobọhọ kẹe te unuẹse buobu no, rekọ o gbe bi ru ikpehre eware, a ve si ei no ukoko. Kẹsena ekpako na a ve whowho kẹ inievo ukoko na nọ ohwo otiọna ọ gbẹ rrọ Osẹri Jihova ha.
Ekpako ukoko a rẹ rehọ edhere owowou lele ohwo nọ ọ raha uzi ta ẹme. A re doku ei hi hayo ta eme edada kẹe he
Eme o re noi ze nọ a te si ohwo nọ ọ rọwo kurẹriẹ hẹ no ukoko? Ọjọ họ, u re ru nọ ukoko na o rẹ rọ jọ fuafo. U re je ru nọ amọfa evaọ ukoko na a gbẹ rọ rehọ aro kele ohwo na ha. (1 Ahwo Kọrint 5:6; 15:33; 1 Pita 1:16) Ere ọvo ho, o sai je ru nọ ohwo na o re ro siobọno uruemu uyoma nọ o je ru, jẹ daoma nwene.—Ahwo Hibru 12:11.
Ẹvẹ Isẹri Jihova a re rri ahwo nọ a si no ukoko?
Ebaibol ọ ta nọ mai Ileleikristi ma ‘nya usu kugbe’ ohwo nọ a si no ukoko ho hayo “tube lele ohwo otiọye na re emu hu.” (1 Ahwo Kọrint 5:11) Kọ oyena o nwani dhesẹ nọ ma rẹ ruẹ e riẹ dhẹ? Ijo. Ma rẹ kẹe adhẹẹ. Ọ sae hae kpohọ ewuhrẹ. Yọ ma sai yere iei kpẹkpẹe re. c Ọ tẹ gwọlọ zihe ze ukoko na, ọ sae vuẹ ekpako ukoko na re a fiobọhọ kẹe.
Ahwo nọ a si no ukoko no a sae gbẹ hae nyaziọ ewuhrẹ
Kọ ẹvẹ kpahe ọzae nọ a si no ukoko nọ aye gbe emọ riẹ e gbẹ rrọ ukoko na? Dede nọ ọ gbẹ be gọ Jihova ha, ahwo uviuwou riẹ a rẹ jẹe egrẹ hẹ. Nọ orọnọ a gbẹ be rria uwou ovona, a re you ohwohwo jẹ riẹ yerikugbe nwane wọhọ epanọ u fo nọ uviuwou o rẹ jọ.
Ohwo nọ a si no ukoko ọ sae vuẹ ekpako na re a nyae ruẹ e riẹ. Nọ ekpako na a tẹ nya, a rẹ rọ edhere owowolẹ rọ Ebaibol na kẹe ohrẹ. A rẹ jẹ vuẹe oware nọ o re ru re ọ sai zihe ze te gọ Jihova. (Zẹkaraya 1:3) Nọ ọ tẹ siọ oware uyoma nọ o je ru na ba, jẹ be daoma ru oware nọ o rẹ were Jihova, a sae wariẹ zihe iei ziọ ukoko na. Wọhọ epanọ inievo obọ Kọrint a dede ọrahauzi nọ o kurẹriẹ rehọ na, inievo ukoko na a rẹ “rọvrẹ riẹ jẹ sasa iẹe oma.”—2 Ahwo Kọrint 2:6-8.
Ẹvẹ inievo jọ nọ a si no ukoko vẹre a rri ohwo nọ a re si no ukoko?
Rri eme jọ nọ inievo jọ nọ a si no ukoko vẹre a ta.
“Nọ mẹ jiroro nọ me re zihe ze ukoko na, ozọ u je mu omẹ inọ ekpako na a te nọ omẹ kpahe izi nọ mẹ raha anwọ ikpe buobu nọ a ro si omẹ no ukoko. Rekọ a nọ omẹ oware utiọye ovo ho. Oware nọ a ta kpobi họ, ‘Daoma hai ru oware nọ o rẹ were Jihova no umuo enẹna vrẹ, oye u muẹme.’ Ẹme yena nọ a vuẹ omẹ na o lẹliẹ udu te omẹ otọ.”—Maria, United States.
“Eva e were inievo ukoko na gaga nọ me zihe ze. Eva e were omẹ gaga re keme inievo ukoko na a fiobọhọ kẹ omẹ riẹ nọ Jihova ọ rọvrẹ omẹ no. Onọ u ru nọ mẹ rọ kpairoro vrẹ eware nọ e via vrẹ no jẹ tẹrovi epanọ me re ro ru oware nọ o rẹ were Jihova. Ekpako na a jẹ tuduhọ omẹ awọ ẹsikpobi. A sasa omẹ oma je ru omẹ riẹ nọ Jihova o you omẹ yọ ọ te siọ omẹ ba ha.”—Malcom, Sierra Leone.
“Eva e be were omẹ gaga keme Jihova o you idibo riẹ yọ ọ gwọlọ nọ ukoko riẹ o rẹ jọ fuafo ẹsikpobi. Dede nọ ahwo jọ a re roro nọ re a si ohwo no ukoko o kiehọ họ, yọ oware nọ u fo nọ a re ru re ukoko na o sae jọ fuafo. Eva e be were omẹ gaga inọ Ọsẹ obọ odhiwu mai na o you omai jẹ vọ avọ erọvrẹ.”—Sandi, United States.
a Dede nọ ọzae ma jọ etenẹ na fodẹ, ẹme nana o kiekpahe aye, te ọmọzae te ọmọtẹ.
b Ekpako ukoko yọ ezae nọ i kruga ziezi evaọ ukoko Isẹri Jihova. A rẹ rehọ Ebaibol na wuhrẹ idibo Jihova jẹ tuduhọ ae awọ. A rẹ wha ezae nana osa ha.—1 Pita 5:1-3.
c Evaọ ẹsejọ, ohwo jọ nọ o no ukoko na no, ọ sai mu ukoko na họ ẹta raha hayo tubẹ viẹ ahwo họ re a kuomagbei. Nọ o tẹ via enẹ, ma re ru lele uzi nọ ọ rrọ Ebaibol na nọ o ta nọ ma “yere” ohwo otiọye na ha.—2 Jọn 9-11.
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Kọ Isẹri Jihova A rẹ Wha Ohẹriẹ Fihọ Iviuwou Manikọ A rẹ Bọ Ae Ga?
Evaọ ẹsejọ a rẹ bọwo Isẹri Jihova ota inọ a rẹ wha ohẹriẹ fihọ iviuwou. Rekọ ginọ uzẹme inọ Isẹri Jihova a rẹ wha ozighi fihọ iviuwou?
ENỌ NỌ AHWO A RẸ NỌ KẸSE KẸSE
Eme Isẹri Jihova A Rọwo?
Se kpahe igogo eware ikpegbisoi jọ nọ ma rọwo.
Ividio nọ A re ro Mu Usiuwoma Họ
Oghẹrẹ Ahwo Vẹ Isẹri Jihova A Rrọ?
Ahwo buobu a gwọlọ riẹ oghẹrẹ ahwo nọ Isẹri Jihova a rrọ. Rri ividio nana re whọ riẹ.
KPAHE OMAI
Kpohọ Ewuhrẹ Jọ
Epanọ ma re ru iwuhrẹ mai. Gwọlọ oria nọ a rẹ jọ ru ewuhrẹ nọ ọ kẹle owhẹ.