ANG ỌJẸ́JẸ 49
Ányị Ugbiyegu Nyang à Tị́ ka Bwu Chị Ọkẹkẹnị?—Ụpa 1
Ahụ bala ọrụ inyeewe yẹhị rịrị nyori ọkẹkẹnị ọla ahyẹẹnụ nya ọhụhụ nya awụlẹ oyeye nyaa ka juwa gboyi myị́ oyi. Ọ tị ka jẹ́-ẹ lịnyị. Angịnyị nya ịKịrayịsị ịlẹ kị ye awụlẹ lụka ọtata lẹ, bala ọ-kaa maga nya ịlẹhị-ịlẹhị nyọka kpa ẹla ọmẹjẹ ịla ịBayịbụụ họ ụkụrwọ, jẹ́ nyori ẹla ọwẹ chịkpẹẹ.
1. Ẹlịyẹ ịBayịbụụ à tị́ ya ká ịrụ-ịhụ ka họ?
IJihova hu ọrụ nya olegbeju nya ugbiyegu. (Wa Ala Efesọsị 5:23.) IJihova tịtọ kọ ka cheje ịlẹ kị ka kpa ọkẹkẹnị wẹ ugbiyegu nyamwụ. ỊBayịbụụ byi ịrụ-ịhụ yẹkẹẹ: “Anụ́-ụ myị ká ịhụ nyanụ anyị a juwa háanụ nya ịlẹhị-ịlẹhị.” (Ala Efesọsị 5:25) Ịyẹ à tị́ ri etu nya ẹla ọwẹ? Ọrụ-ahụ ọ-la ọháha kaa kpa ahụ nyamwụ dụmwọ ụka kị juwa ẹ-ẹpwa, tụ́ ụka kị juwa ẹ-ẹpwụ nya alụma. Ọ kaa chewu koo, họ kọ ka chị ọkẹkẹnị bala ọ-kpahị ju ịbaba nyamwụ. (1 iTimoti 5:8) Ọlẹ kọ tị baba gụgụ wuu, ọ kaa dọọ ụbwọ ri igu bala iJihova la apatabwọ kiwa ka. (ỊMatiyu 4:4) Ọ-chụ pwokwita, ọ ka jẹ́-ẹ raabwọ bala ọ-wa ịBayịbụụ bala ahụ nyamwụ. Ụka ká ọrụ á kpahị ju ahụ nyamwụ ẹ-ẹpwụ nya ọháha, igu oriri nyamwụ bala iJihova kaa kịnyaa.—Wa 1 iPita 3:7.
2. Ẹlịyẹ ịBayịbụụ à tị́ ya ká ịhụ ka họ?
Omyi Ẹla nya Ohe ya nyori ahụ nyị “juwa ju ọrụ nyamwụ ihi hiigu-hiigu.” (Ala Efesọsị 5:33) Ányị ọ tị́ ka bwu họ ịnyị? Ọ ka jẹ́-ẹ kụ irya u-uhye nya abwẹla ịnyịịla nya ọrụmwụ bala abwọlẹ kọ kaa maga nyọka kpahị jwoo bala anyị nyaa. Ịnyịnyị ọ ka mẹ ihi ojuju jẹ bwula ọ-tuubwu ju eje ọchịchị nya ọrụmwụ, ya ẹla dụmwọ tọọ, bala o-ya ẹla ọnyịịla u-uhye nyamwụ, kori kọ dọmwụ kaa gbịgba ha iJihova ka wẹwẹ.
3. Ányị ahụ bala ọrụ à tị́ ka bwu ju awụlẹ oyeye nyaa ọngịrị?
ỊBayịbụụ ya ẹla u-uhye nya ahụ bala ọrụ yẹkẹẹ: “Angị imimiiye ịịwa ka yẹ ri ọngọ ookpokpo.” (ỊMatiyu 19:5) Ọọwa ri, ị ka ma uya ta ịngịngịhyẹ ọlẹ kọ ka chaa ebwo. Ị ka họ ịnyị bwula ọ-bịrị ụka bala awụle ụka myị́ ụka, ya ẹla olirya nyaa bala abwọlẹ ká ẹla kaa laa ọ-ọkịlẹtụ ju awụlẹ. Ị́ kaa myị ịngịngịhyẹ lee ọngọngọhẹ—datị hi iJihova —ka baba haa gụ awụlẹ ka. Ọgụgụụgụ ri, ị ka dụmwọ-dụmwọ chajị kị ka tụ́ ju ọngọlẹ kọ ri ahụ lee ọrwaa ka, chwẹẹ kpoye ka.
JẸ́ GỤ ỌỌWA
Yẹ itiwe nya ehile ịla ịBayịbụụ ịlẹ kị ka jẹ́-ẹ ju awụlẹ oyeye nyanụ ọngịrị.
4. Ọrụ-ahụ—la ọháha ẹ-ẹga nya ahụ nyang bala ọ-kpahị jwoo
ỊBayịbụụ ya nyori ‘ọrụ-ahụ ọnyị myị ọnyị nyị ka la ọháha nya ịlẹhị-ịlẹhị ẹ-ẹga nya ahụ nyamwụ jaabwọ kọ la ọháha u-uhye nya ugbinyịrọ nya ịlọmwụ.’ (Ala Efesọsị 5:28, 29) Ịyẹ à tị́ ri etu nya ẹla ọwẹ? Yẹ IFIM ọwẹ, kanụ ya ẹla u-uhye nya ịtọ ẹla ọlẹ kọ tọọ da.
-
Agbẹyị iyina ọrụ à tị́ ka mẹjẹ nyori ọ la ọháha ẹ-ẹga nya ahụ nyamwụ bala ọ-kpahị jwoo?
Wa Ala iKolosi 3:12, kanụ ya ẹla u-uhye nya ịtọ ẹla ọlẹ:
-
Ányị ọrụ à tị́ ka mẹ abwẹla ịwẹ jẹ ẹ-ẹga nya ahụ nyamwụ?
5. Ahụ—la ọháha ẹ-ẹga nya ọrụng bala o-jwoo ihi
ỊBayịbụụ ju ahụ ọhụ nyọka ju ọrụmwụ ihi kori kọ kaa gbịgba ha iJihova lee ọ-kaa gbịgba họọ ka. Wa 1 iPita 3:1, 2, kanụ ya ẹla u-uhye nya ịtọ ẹla ịlẹ:
-
Kori ká ọrụng á kaa gbịgba ha iJihova ka, ịwẹẹ ọdada á juwa ka, à tịtọ kọ ka yẹ julang gbịgba họọ. Ụgbẹyị oyina à tị́ há gụgụ wuu nyọka dọọ ụbwọ? Ọ-ka tụ́ ẹla nya Ohe oyaya rịrọọ lee ọ-ka mẹ abwẹla ịnyịịla jẹ bala ọ-ka jwoo ihi tị́? Ịyẹ tị́ du ká ya ịnyị?
Ahụ bala ọrụ ka jẹ́-ẹ cheje nya ẹla lawụlẹ. Ma ụka ọhẹ, ahụ á ka myị ọnụ ju eje 1 iPita 3:3-5, kanụ ya ẹla u-uhye nya ịtọ ẹla ọlẹ:
ọchịchị nya ọrụmwụ ka myị́. Ọ ka jẹ́-ẹ ya irya nyamwụ ju ayịbamwụ ụ-ụgbẹyị ọkpẹnẹẹ bala ọ-la ihi-ihi, ma ọ ka jẹ́ nyori iJihova ya ọngịrị ju ọrụmwụ ụ-ụbwọ nyọka cheje nya ẹla ọlẹ kọ ka há ha ugbiyegu nyamwụ. Lẹ, ọ ka maga nya ịlẹhị-ịlẹhị nyọka tuubwu ju eje ọchịchị nyamwụ. Bwula ọ-họ ịnyị, ọ wẹẹ dụbwọ họ ká ugbiyegu nyamwụ ka chị ọkẹkẹnị. Wa-
Ányị ọ tị́ kaa la iJihova ụka ká ahụ á chị ihi ju ọrụmwụ?
6. À ka jẹ́-ẹ kụrụ akama ịlẹpwụ nya awụlẹ oyeye nyanụ
Awụlẹ oyeye ọhẹ-lọhẹ á la kpẹẹkpẹẹ ka. Lẹ, ahụ bala ọrụ ka họ ụkụrwọ lawụlẹ nyọka kụrụ akama ịlẹpwụ nya awụlẹ oyeye nyaa. Yẹ IFIM ọwẹ, kanụ ya ẹla u-uhye nya ịtọ ẹla ịlẹ kị tọọ da.
-
Ẹ-ẹpwụ nya ifim ọwẹ, ẹlịyẹ à tị́ mẹjẹ nyori ahụ bala ọrụ ịwẹ á ju awụlẹ chwẹẹ jaabwọ kọ la ene-ene kaka?
-
Ẹta-ẹdịye iyina ị tị́ hu nyọka ju awụlẹ oyeye nyaa ọngịrị?
Wa 1 Ala ịKọrịntị 10:24 bala Ala iKolosi 3:13. Ụka ká wa ụpwụ ịgọgọ ọnyọnyọọnyị kpá, anụ ya ẹla u-uhye nya ịtọ ẹla ọlẹ:
-
Ányị ọ-kpa ẹla ọmẹjẹ ọla ẹgẹlẹ họ ụkụrwọ à tị́ ka jẹ́-ẹ bwu ju awụlẹ oyeye ọngịrị?
ỊBayịbụụ ya nyori ahị nyị chị ihi ju awụlẹ. Ọọwa ri ọ-ka kpa ọngịnyị ụ-ụgbẹyị ọdụmwọ bala ọ-la ihi-ihi. Wa Ala iRom 12:10, kanụ ya ẹla u-uhye nya ịtọ ẹla ịlẹ:
-
Ọrụ lee ahụ ka dayị gbe ọngọkịla nyamwụ nyọka chị ihi jwoo jene ene ká ọwa ka họ ịnyị? Ịyẹ tị́ du ká ya ịnyị?
ANGỊHỴẸ KAA YẸKẸẸ: “Am bala ahụm lee ọrụm á ju awụlẹ chwẹẹ jaabwọ kọ la ene-ene kaka.”
-
Ányị a tị́ ka wụlẹ ya jaa nyori ịBayịbụụ ka jẹ́-ẹ daa ụbwọ?
ẸLỊYẸ A TỊ́ JẸ́?
Ahụ bala ọrụ ka jẹ́-ẹ chị ọkẹkẹnị kori kị la ọháha ẹ-ẹga nya awụlẹ, ju awụlẹ ihi, bala ọ-kpa ẹla ọmẹjẹ ịla ịBayịbụụ họ ụkụrwọ.
Ẹlịyẹ A Tị́ Yụbwọ Chị?
-
Ịyẹ ọrụ-ahụ a tị́ ka họ ká ugbiyegu nyamwụ ka chị ọkẹkẹnị?
-
Ịyẹ ahụ à tị́ ka họ ká ugbiyegu nyamwụ ka chị ọkẹkẹnị?
-
Kori ká ye ahụ lee ọ-rwọrụ lẹ, ẹla ọmẹjẹ ọlẹpwụ nya ịBayịbụụ oyina à tị́ ka dụbwọ ju awụlẹ oyeye nyanụ ọngịrị?
JẸ́ ANG ỊLẸ DỌỌ U-UHYE
Jẹ́ ang ịlẹ kị ka dang ụbwọ yé ọkẹkẹnị ugbiyegu nyang.
Yẹ ifim nya eje ọlẹ kọ ya ẹla rụ́ ahị ọwawa ọlẹ ko juwa ẹ-ẹpwụ nyọka kpa ẹla ọmẹjẹ nya Ohe Oluhye họ ụkụrwọ ẹ-ẹpwụ nya awụlẹ oyeye nyanụ.
Jẹ́ etu nya ahụ ọ-ka kpa ịlọmwụ keji ha olegbeju oriri nya ọrụ ẹ-ẹpwụ nya ugbiyegu.
“Anyang, Ịyẹ Tị́ Du Kanụ ka Kpịlọnụ Keji Ha Olegbeju Oriri?” (Ẹpwang ọ-Kụ Gbeji nya ahyẹẹnụ 15 nya Ọya Ọharụ, 2010)
Yẹ jaabwọ ká ẹla ọlẹ ká ịBayịbụụ u-uhye nya awụlẹ oyeye ka jẹ́-ẹ da ahụ bala ọrụ ụbwọ.