Tetemuka Pengelantang Taja Pan Bisi Perang enggau Penyarut
Ku Gary ke kala gawa nyadi soldadu madah, “Sebedau belajarka Bup Kudus, aku enda nemu nama kebuah mayuh amat penyai, utai ti enda lurus, sereta pemerinsa nyadi ba dunya. Tang diatu aku udah tetemuka pengelantang dalam runding aku. Aku nemu, Petara Jehovah deka ngaga dunya tu nyadi endur ti likun.”
Ukai semina Gary aja ngasaika utai tu. Peratika baka ni Bup Kudus udah nulung orang bukai.
KU BUP KUDUS: “Nuan [Jehovah] endang manah enggau kami, sereta ngampun.”—Masmur 86:5.
BAKA NI AYAT TU UDAH NULUNG: “Ayat tu nulung aku nemu Jehovah nya pengasih. Aku nemu Iya sanggup ngampunka semua penyalah aku ke suba, lebuh maya aku bisi begian ba perang.”—Wilmar, Colombia.
KU BUP KUDUS: “Aku ngaga langit ti baru enggau dunya ti baru. Semua utai ti lama, enda agi dikingatka.”—Isaiah 65:17.
BAKA NI AYAT TU UDAH NULUNG: “Ketegal aku kala gawa ba begian soldadu, aku merinsa laban trauma enggau kemurungan. Tang ayat tu udah ngingatka aku, enda lama agi Jehovah deka muai abis lengis semua pengingat ti jai tu ari aku. Semua tu deka nadai agi dalam runding sereta dalam ati aku belama iya. Tu endang pemeri ti berega!”—Zafirah, Amerika Serikat.
KU BUP KUDUS: “Ba baruh Perintah iya, orang ke manah deka idup penuh pengelantang. Lalu ngasaika pemaik ti belimpah seagi bulan mancharka penampak.”—Masmur 72:7, NWT.
BAKA NI AYAT TU UDAH NULUNG: “Aku selalu berundingka ayat tu. Enda lama agi perang enggau semua penyai ke nyadi deka nadai agi, lalu kitai enda ibuh irau pasal pengelikun orang ke dikesayauka kitai.”—Oleksandra, Ukraine.
KU BUP KUDUS: “Bala kami ke udah mati, deka idup baru! . . . Semua sida ke tinduk dalam kubur deka dani lalu belagu gaga ati.”—Isaiah 26:19.
BAKA NI AYAT TU UDAH NULUNG: “Nyauka semua ari ruang bilik aku dibunuh lebuh suku kaum bukai deka munuh suku kaum aku, iya nya suku kaum Tutsi. Tang ayat tu nulung aku andal, aku deka betemu enggau sida baru. Aku enda sabar deka ninga bunyi nyawa sida ti gaga ati lebuh sida diangkatka idup baru!”—Marie, Rwanda.
KU BUP KUDUS: “Enda lama da agi orang ke jai deka abis. . . Tang orang ke baruh ati deka bempu menua tu lalu diau lantang ngena pengaya sida.”—Masmur 37:10, 11.
BAKA NI AYAT TU UDAH NULUNG: “Taja perang udah abis, tang utai ti enda lurus sereta orang ke jai agi bisi. Ayat tu udah ngeringka aku. Jehovah meda semua utai sereta meretika utai ke ditapi aku. Iya besemaya enda lama da agi pemerinsa deka nadai sereta badu dikingatka.”—Daler, Tajikistan.
Orang ke dalam majalah tu entara sida ke bejuta iku Saksi-Saksi Jehovah ke udah bulih tulung ari Bup Kudus. Sida udah tetemuka pengelantang ti bendar. Sida mega udah belajarka chara mutarka ulah ti bepilih mata pasal bansa, menua, suku kaum, enggau pemenchi. (Epesus 4:31, 32) Saksi-Saksi Jehovah mengkang neutral sereta enggai bisi begian ba sebarang penyarut.—John 18:36.
Saksi-Saksi Jehovah mega nyukung pangan diri baka ruang bilik ti bepengerindu. (John 13:35) Ngambika chunto, Oleksandra ke disebut sebedau tu, patut ngerarika diri enggau menyadi indu iya ngagai menua bukai ketegal perang. Ku iya madah, “Lebuh kami meraka sempadan, tekala nya kami tepedaka Saksi-Saksi Jehovah ba menua nya empu. Sida ngelaluka kami. Sukung sida nulung kami nelebaka diri idup ba menua ti baru sebagai pelari.”
Kami amat ngelaluka kita datai ngagai gempuru kami, ngambika ulih nemu pasal pengelantang ke bisi dipadah dalam Bup Kudus, enggau chara ngulihka nya. Lawa meh jw.org kena ngiga endur ke semak nuan, tauka minta belajarka Bup Kudus enggau pechuma ari siku Saksi-Saksi Jehovah, ngena bup Idup enggau Lantang Belama Iya!
