MOSE ena Taravatu ese taunimanima dekenai dala ia kehoa, unai amo gwauhamata idia ura karaia neganai, do idia gwau diba, “Dirava vairanai lau gwauhamata,” eiava, “Iehova ena ladana dekenai lau gwauhamata.” To Iesu ena nega ai, Iuda taudia be edia dina ta ta maurina ai gau ta idia karaia eiava hereva ta idia ura gwauraia neganai, gwauhamata idia karaia. Unai bamona idia karaia, badina idia ura taunimanima ese edia hereva do idia abia dae; to Iesu ese nega rua unai kara ia gwauraia dika. Ia gwau: “Namona be emui ‘oibe’ be oibe bona emui ‘lasi’ be lasi.”​—⁠Mat. 5:33-37; 23:16-22.

Buka ta, Theological Dictionary of the New Testament, ia gwau: “Iuda taudia idia ura idia karaia gwauhamata amo idia hamomokania edia hereva be momokani,” bona unai hereva be idaunegai Iuda taudia edia taravatu bukana o Talmud amo. Unai ese do ia hahedinaraia, edena gwauhamata do idia badinaia bona edena do idia badinaia lasi.

Iesu sibona lasi, to ma haida danu ese Iuda taudia edia kara idia gwauraia dika. Hegeregere, Iuda edia histori torea tauna Flavius Josephus ese Iuda oreana ia herevalaia neganai, ia gwau: “Unai orea lalonai idia noho taudia idia abia dae, bema ta be gwauhamata ia karaia, anina be ia be koikoi tauna. Badina ia ura ma haida ese ena hereva idia abia dae.” Danu, Iuda taudia edia buka ta ladana Wisdom of Sirach ia gwau: “Ia gwauhamata kava tauna be taravatu ia utua.” Iesu ese gwauhamata laloa maragi karana ia gwauraia dika danu. Bema nega ibounai hereva momokani ita gwauraia, do ita gwauhamata lasi, ma ta ese iseda hereva ia abia dae totona.